1 Samuel 16:1-23

  • Samuel fɔ David mu akɛ mɔ ni baaye maŋtsɛ yɛ Saul sɛɛ (1-13)

    • “Yehowa lɛ, enaa tsui lɛ mli” (7)

  • Nyɔŋmɔ mumɔ lɛ je Saul nɔ (14-17)

  • David tsɔ mɔ ni tswaa saŋku ehãa Saul (18-23)

16  Sɛɛ mli lɛ, Yehowa kɛɛ Samuel akɛ: “Obaaye Saul he awerɛho kɛyashi mɛɛ be,+ be mli ni mikwa lɛ maŋtsɛ lɛ yeli yɛ Israel?+ Okɛ mu awo okolonto lɛ mli+ ni oya. Matsu bo Yishai,+ Betlehemnyo lɛ ŋɔɔ, ejaakɛ mihala maŋtsɛ yɛ ebihii lɛ ateŋ mihã mihe.”+  Shi Samuel kɛɛ akɛ: “Te mafee tɛŋŋ maya lɛ? Kɛ́ Saul nu he lɛ, ebaagbe mi.”+ Yehowa kɛɛ lɛ akɛ: “Mɔ tsina oblayoo ni okɛya ni okɛɛ akɛ, ‘Miba koni mibashã afɔle mahã Yehowa.’  Fɔ̃ɔ Yishai nine kɛba afɔleshaa lɛ he; kɛkɛ lɛ mahã ole nɔ ni esa akɛ ofee. Fɔɔ mɔ ni matsɔɔ bo lɛ mu ohã mi.”+  Samuel fee nɔ ni Yehowa kɛɛ lɛ lɛ. Be ni eshɛ Betlehem lɛ,+ maŋ lɛ mli onukpai lɛ kɛ lɛ bakpe kɛ hekpokpomɔ amɛkɛɛ: “Ooba yɛ toiŋjɔlɛ mli lo?”  Kɛkɛ ni ekɛɛ akɛ: “Miba yɛ toiŋjɔlɛ mli. Miba koni mibashã afɔle mahã Yehowa. Nyɛtsua nyɛhe ni nyɛfataa mihe kɛyashãa afɔle lɛ.” Kɛkɛ ni etsuu Yishai kɛ ebihii lɛ ahe, ni etsɛ amɛ kɛtee he ni ebaashã afɔle lɛ yɛ lɛ.  Be ni amɛba ni ena Eliab+ lɛ, ekɛɛ akɛ: “Lɛɛlɛŋ, mɔ ni Yehowa ehala lɛ* lɛ damɔ ehiɛ nɛɛ.”  Shi Yehowa kɛɛ Samuel akɛ: “Kaakwɛ egbɔmɔtso kɛ bɔ ni ekwɔ hã lɛ,+ ejaakɛ mihalako lɛ. Jeee bɔ ni gbɔmɔ kwɛɔ nii ji bɔ ni Nyɔŋmɔ kwɛɔ nii, ejaakɛ gbɔmɔ kwɛɔ nɔ ni anaa, shi Yehowa lɛ, enaa tsui lɛ mli.”+  Kɛkɛ ni Yishai tsɛ Abinadab+ ni ehã ebatsɔ Samuel hiɛ kɛho, shi ekɛɛ akɛ: “Yehowa halako mɔ nɛ hu.”  No sɛɛ lɛ, Yishai kɛ Shama+ hu ba, shi ekɛɛ akɛ: “Yehowa halako mɔ nɛ hu.” 10  No hewɔ lɛ, Yishai hã ebihii kpawo batsɔ Samuel hiɛ kɛho, shi Samuel kɛɛ Yishai akɛ: “Yehowa halako mɛnɛɛmɛi ateŋ mɔ ko.” 11  Agbɛnɛ Samuel bi Yishai akɛ: “Ani obihii lɛ fɛɛ nɛ?” Ni ekɛɛ akɛ: “Eshwɛ amɛteŋ gbekɛ kwraa+ lɛ; eekwɛ gwantɛŋi lɛ.”+ Ni Samuel kɛɛ Yishai akɛ: “Tsu ni ayatsɛ lɛ kɛba, ejaakɛ wɔtaŋ shi wɔyeŋ nii ja eba dã.” 12  No hewɔ lɛ, etsu ni ayatsɛ lɛ, ni ekɛ lɛ ba. Etsuɔ, ni ehiŋmɛii yɛ fɛo ni ehe hu yɛ fɛo.+ Kɛkɛ ni Yehowa kɛɛ akɛ: “Tee shi, fɔɔ lɛ mu, ejaakɛ lɛ nɛ!”+ 13  No hewɔ lɛ, Samuel wó akolonto ni mu yɔɔ mli+ lɛ ni efɔ lɛ mu yɛ enyɛmimɛi hii lɛ ahiɛ. Ni Yehowa mumɔ lɛ yi David nɔ kɛjɛ nakai gbi lɛ nɔ kɛyaa.+ Sɛɛ mli lɛ, Samuel te shi ni etee Rama.+ 14  No mli lɛ, Yehowa mumɔ lɛ eje Saul nɔ,+ ni mumɔ gbonyo ni jɛ Yehowa ŋɔɔ haoɔ lɛ.+ 15  Saul tsuji lɛ kɛɛ lɛ akɛ: “Ona akɛ mumɔ gbonyo ni jɛ Nyɔŋmɔ ŋɔɔ miihao bo. 16  Ofainɛ, hã wɔnuŋtsɔ akɛɛ etsuji ni damɔ ehiɛ lɛ ni amɛyatao nuu ko ni le saŋku tswaa jogbaŋŋ.+ Be fɛɛ be ni mumɔ gbonyo ni jɛ Nyɔŋmɔ ŋɔɔ lɛ baaba onɔ lɛ, ebaatswa, ni ohe baajɔ bo.” 17  No hewɔ lɛ, Saul kɛɛ etsuji lɛ akɛ: “Nyɛfainɛ, nyɛyataoa nuu ko ni le tswaa jogbaŋŋ, ni nyɛkɛ lɛ abaa miŋɔɔ.” 18  Sɔɔlɔi lɛ ateŋ mɔ kome kɛɛ akɛ: “Naa! Mile Yishai, Betlehemnyo lɛ binuu ko ni le saŋku tswaa jogbaŋŋ, eji nuu ni yɔɔ ekãa, tawulɔ kãkãlɔ.+ Ele wiemɔ jogbaŋŋ, ni ehe yɛ fɛo hu,+ ni Yehowa kɛ lɛ yɛ.”+ 19  Kɛkɛ ni Saul tsu mɛi kɛtee Yishai ŋɔɔ akɛ: “Hã obinuu David ni kwɛɔ toi lɛ aba miŋɔɔ.”+ 20  No hewɔ lɛ, Yishai kɛ blodo, kɛ kooloo hewolo tɔ ni wain yɔɔ mli, kɛ abotiabi shwie teji nɔ, ni ekɛtsu ebinuu David kɛyahã Saul. 21  Ni David ba Saul ŋɔɔ ni ebabɔi lɛ sɔɔmɔ.+ Saul basumɔ esane waa, ni ebatsɔ mɔ ni hiɛɔ etawuu nii. 22  Saul tsu ni ayakɛɛ Yishai akɛ: “Ofainɛ, hã David aya nɔ asɔmɔ mi, ejaakɛ ehiɛ eba nyam yɛ mihiɛ.” 23  Be fɛɛ be ni mumɔ gbonyo ni jɛ Nyɔŋmɔ ŋɔɔ lɛ baaba Saul nɔ lɛ, David kɔɔ saŋku lɛ ni etswaa, ni Saul náa hewalɛ ni ehe jɔɔ lɛ, ni mumɔ gbonyo lɛ jeɔ enɔ eyaa.+

Shishigbɛ Niŋmaa

Loo “mɔ ni Yehowa efɔ lɛ mu.”