1 Samuel 10:1-27

  • Afɔ Saul mu akɛ maŋtsɛ (1-16)

  • Akɛ Saul tsɔɔ maŋbii lɛ (17-27)

10  Kɛkɛ ni Samuel wó mu kɛ tɔ lɛ ni efɔse eshwie Saul yiteŋ.+ Eshɔ enaa ni ekɛɛ: “Ani jeee mu Yehowa efɔ bo akɛ hiɛnyiɛlɔ+ yɛ egboshinii lɛ nɔ?+  Ŋmɛnɛ lɛ, kɛ́ oshi mi ni ooya lɛ, obaayanina hii enyɔ komɛi yɛ Rahel gbonyobu+ lɛ he yɛ Benyamin shikpɔŋ lɛ nɔ yɛ Zelza, ni amɛbaakɛɛ bo akɛ, ‘Ana tejiyei ni otee amɛ taomɔ lɛ, shi amrɔ nɛɛ otsɛ ejie ejwɛŋmɔ yɛ tejiyei lɛ anɔ,+ ni eeye etsui yɛ nyɛhewɔ moŋ. Eekɛɛ: “Mɛni esa akɛ mafee yɛ mibinuu lɛ hewɔ?”’  Tsa nɔ kɛjɛ jɛmɛ kɛyashi obaashɛ Tabor tso agbo lɛ he, ni obaana hii etɛ ni nyiɛ gbɛ kɛmiikwɔ kɛmiiya anɔkwa Nyɔŋmɔ lɛ ŋɔɔ yɛ Betel,+ amɛteŋ mɔ kome tere abotiabii etɛ, ni mɔ kroko tere blodoi etɛ, ni mɔ kome hu tere gbɛ́ ni akɛ wain ewo mli.  Amɛbaaŋa bo, ni amɛbaahã bo blodoi enyɔ, esa akɛ ohe yɛ amɛdɛŋ.  No sɛɛ lɛ, obaaya oyashɛ anɔkwa Nyɔŋmɔ lɛ gɔŋkpɔ lɛ he, he ni Filistibii lɛ asraafoi komɛi yɔɔ lɛ. Kɛ́ oshɛ maŋ lɛ mli lɛ, okɛ gbalɔi asafoku ko baakpe ni amɛmiikpeleke shi kɛmiijɛ he grɔŋŋ lɛ, ni aatswa kpãi saŋku, aasha akashaa, aakpã obɛnta, ni aatswa saŋku kɛmiinyiɛ amɛhiɛ be ni amɛgbaa lɛ.  Yehowa mumɔ lɛ baayi onɔ,+ ni obaafata amɛhe kɛgba ni obaatsɔ gbɔmɔ kroko kwraa.+  Kɛ́ okadii nɛɛ ba mli lɛ, feemɔ nɔ fɛɛ nɔ ni obaanyɛ ofee, ejaakɛ anɔkwa Nyɔŋmɔ lɛ fata ohe.  No sɛɛ lɛ, tsɔ mihiɛ ni okpeleke shi kɛya Gilgal,+ ni mi hu makpeleke shi kɛba oŋɔɔ yɛ jɛmɛ koni mashã shãa afɔlei kɛ naanyobɔɔ afɔlei. Mɛɛ gbii kpawo kɛyashi maba oŋɔɔ. Kɛkɛ lɛ mahã ole nɔ ni esa akɛ ofee.”  Be ni Saul tsɔ ehe koni eshi Samuel lɛ nɔŋŋ ni Nyɔŋmɔ bɔi Saul tsui tsakemɔ koni etsɔ tamɔ gbɔmɔ kroko kwraa, ni okadii nɛɛ fɛɛ ba mli yɛ nakai gbi lɛ nɔ. 10  No hewɔ lɛ, amɛshi jɛmɛ kɛtee gɔŋkpɔ lɛ he, ni gbalɔi asafoku ko kɛ lɛ bakpe. Amrɔ nɔŋŋ lɛ, Nyɔŋmɔ mumɔ lɛ bayi enɔ+ ni ebɔi gbaa+ yɛ amɛteŋ. 11  Be ni mɛi fɛɛ ni le lɛ lɛ na akɛ efata gbalɔi lɛ ahe kɛmiigba lɛ, amɛbibii amɛhe akɛ: “Mɛni feɔ Kish binuu lɛ? Ani Saul hu yɛ gbalɔi lɛ ateŋ?” 12  Ni nuu ko ni jɛ jɛmɛ lɛ bi akɛ: “Shi namɔ ji amɛtsɛ?” No hewɔ lɛ, ebatsɔ wiemɔ ni awieɔ* akɛ: “Ani Saul hu yɛ gbalɔi lɛ ateŋ?”+ 13  Be ni egba etã lɛ, eba he grɔŋŋ lɛ. 14  Sɛɛ mli lɛ, Saul tsɛkwɛ̃* lɛ bi lɛ kɛ esɔɔlɔ lɛ akɛ: “Nɛgbɛ nyɛtee?” Ni ekɛɛ akɛ: “Wɔtee wɔyatao tejiyei lɛ,+ shi wɔnaaa amɛ, no hewɔ lɛ, wɔtee Samuel ŋɔɔ.” 15  Saul tsɛkwɛ̃ lɛ bi akɛ: “Ofainɛ kɛɛmɔ mi, mɛni Samuel kɛɛ nyɛ?” 16  Saul kɛɛ etsɛkwɛ̃ lɛ akɛ: “Ekɛɛ wɔ akɛ ana tejiyei lɛ momo.” Shi Saul ekɛɛɛ lɛ nɔ ni Samuel wie yɛ maŋtsɛ lɛ yeli lɛ he lɛ. 17  Kɛkɛ ni Samuel tsɛ maŋ lɛ fɛɛ kɛkpe yɛ Yehowa hiɛ yɛ Mizpa+ 18  ni ekɛɛ Israelbii lɛ akɛ: “Nɔ ni Yehowa, Israel Nyɔŋmɔ lɛ kɛɛ nɛ: ‘Mi, miwó Israel kɛje Ejipt ni mihere lɛ kɛje Ejipt dɛŋ,+ kɛje maŋtsɛyelii fɛɛ ni haoɔ nyɛ lɛ adɛŋ. 19  Shi ŋmɛnɛ lɛ, nyɛkwa nyɛ-Nyɔŋmɔ lɛ,+ mɔ ni here nyɛ kɛje nyɛmanehului kɛ nyɛhaomɔi fɛɛ amli lɛ, ni nyɛmiikɛɛ akɛ: “Dabi, wó maŋtsɛ ohã wɔ koni eye wɔnɔ.” No hewɔ lɛ, nyɛbadamɔa Yehowa hiɛ yɛ nyɛwekui lɛ anaa kɛ nyɛshĩai* lɛ anaa.’” 20  No hewɔ lɛ, Samuel hã Israel wekui lɛ fɛɛ tsi amɛbɛŋkɛ+ ni ahala Benyamin weku lɛ.+ 21  Kɛkɛ ni ehã Benyamin weku lɛ tsi amɛbɛŋkɛ yɛ amɛshĩai lɛ anaa, ni ahala Matribii lɛ ashĩa lɛ. Naagbee lɛ, ahala Kish binuu Saul.+ Shi be ni amɛtee lɛ taomɔ lɛ, amɛnaaa lɛ. 22  No hewɔ lɛ, amɛyabi Yehowa nii akɛ:+ “Ani nuu lɛ eba biɛ?” Yehowa hã hetoo akɛ: “Eyatee yɛ jatsui lɛ ateŋ.” 23  No hewɔ lɛ, amɛjo foi ni amɛyamɔ lɛ kɛba. Be ni ebadamɔ mɛi lɛ ateŋ lɛ, ekwɔ* fe mɛi lɛ fɛɛ.+ 24  Samuel kɛɛ mɛi lɛ fɛɛ akɛ: “Nyɛmiina mɔ ni Yehowa ehala lɛ lɛ,+ akɛ mɔ ko mɔ ko bɛ mɛi lɛ ateŋ ni tamɔ lɛ?” Ni mɛi lɛ fɛɛ wó amɛgbee nɔ amɛkɛɛ: “Maŋtsɛ lɛ yi aná wala!” 25  Samuel kɛɛ mɛi lɛ nibii ni maŋtsɛ lɛ yɔɔ hegbɛ akɛ ebiɔ kɛjɛɔ amɛdɛŋ,+ ni eŋmala yɛ wolo mli ni ekɛyafɔ̃ Yehowa hiɛ. No sɛɛ lɛ, Samuel wo mɛi lɛ fɛɛ gbɛ, ni mɔ fɛɛ mɔ tee eshĩa. 26  Saul hu tee eshĩa yɛ Gibea, ni tawulɔi ni Yehowa eta amɛtsuii ahe lɛ fata ehe kɛtee. 27  Shi hii yaka gbɔmɛi komɛi wie akɛ: “Te mɔ nɛ aaafee tɛŋŋ ehere wɔ lɛ?”+ No hewɔ lɛ, amɛgbe ehe guɔ, ni amɛbakeee lɛ nɔ ko.+ Shi ewieee nɔ ko yɛ he.*

Shishigbɛ Niŋmaa

Loo “abɛ ni abuɔ.”
Ni ji, etsɛ nyɛmi nuu.
Loo “nyɛ-akpei.”
Hebri sht. ŋm., “kɛjɛ ekɔɔŋ nɔ kɛyaa lɛ, ekwɔ.”
Hebri sht. ŋm., “Ni efee enii tamɔ mɔ ko ni etɔ mu.”