1 Samuel 1:1-28

  • Elkana kɛ eŋamɛi (1-8)

  • Hana sɔle koni ahã lɛ binuu be ni ebɛ bi (9-18)

  • Afɔ Samuel ni akɛ lɛ hã Yehowa (19-28)

1  Nuu ko hi Ramataim-zofim*+ yɛ Efraim+ gɔji lɛ anɔ ni atsɛɔ lɛ Elkana,+ ni eji Efraimnyo;* etsɛ ji Yeroham, Zuf binuu, Tohu binuu, Elihu binuu lɛ.  Eyɛ ŋamɛi enyɔ; atsɛɔ mɔ kome Hana, ni atsɛɔ mɔ kroko lɛ hu Penina. Penina yɛ bii, shi Hana lɛ, ebɛ bi ko.  Daa afi lɛ, nuu nɛɛ jɛɔ emaŋ ni ekwɔɔ kɛyaa Shilo ni eyajáa* Yehowa, taiatsɛ lɛ, yɛ jɛmɛ ni eshãa afɔle hu ehãa lɛ.+ Jɛmɛ ji he ni no mli lɛ, Eli bihii enyɔ lɛ, Hofni kɛ Finehas+ sɔmɔɔ yɛ akɛ Yehowa osɔfoi.+  Gbi ko be ni Elkana yashã afɔle lɛ, ehã eŋa, Penina kɛ ebihii kɛ ebiyei lɛ fɛɛ amɛgbɛfaŋnɔ,+  shi ehã Hana gbɛfaŋnɔ krɛdɛɛ ko, ejaakɛ Hana ji mɔ ni esumɔɔ; shi Yehowa hãko lɛ bi ko.*  Agbɛnɛ hu, ebienyɛ lɛ yeɔ ehe fɛo daa koni ekɛwo emli la, akɛni Yehowa hãko Hana bi ko lɛ hewɔ.  Nakai ji bɔ ni efeɔ daa afi; be fɛɛ be ni Hana baakwɔ kɛya Yehowa shĩa lɛ,+ ebienyɛ lɛ yeɔ ehe fɛo aahu akɛ efóɔ ni eyeee nii.  Shi ewu, Elkana kɛɛ lɛ akɛ: “Hana, mɛni hewɔ ofóɔ, mɛni hewɔ oyeee nii, ni mɛni hewɔ oyeɔ awerɛho?* Ani mihiii hãaa bo fe bihii nyɔŋma?”  Kɛkɛ ni be ni amɛye nii ni amɛnu nii yɛ Shilo lɛ, Hana te shi. Nakai beiaŋ lɛ, osɔfo Eli ta sɛi nɔ yɛ Yehowa sɔlemɔ shĩa*+ lɛ shinaatso lɛ he. 10  Hana werɛ eho ehe waa diɛŋtsɛ,* ni esɔle etsɛ Yehowa,+ ni efó waa be ni esɔleɔ lɛ. 11  Ni ewo shi akɛ: “Ao, Yehowa taiatsɛ, kɛ́ okwɛ amanehulu ni otsulɔ naa, ni okai mi, ni ohiɛ kpaaa otsulɔ nɔ, ni ohã otsulɔ binuu lɛ,+ mikɛ lɛ baahã Yehowa ewala gbii abɔ fɛɛ, ni yishɛɛ kakla naa esaŋ eyiteŋ.”+ 12  Ni eba mli akɛ, be ni ekɛ be kplaŋŋ sɔleɔ yɛ Yehowa hiɛ lɛ, Eli miikwɛ enaabu. 13  No mli lɛ, Hana miiwie yɛ etsui mli, enaabu kɛkɛ tsɔmɔɔ, shi anuuu egbee. No hewɔ lɛ, Eli susu akɛ Hana etɔ dãa. 14  Eli kɛɛ yoo lɛ akɛ: “Mɛɛ beyinɔ nɔŋŋ oootɔ dãa kɛyashi? Kpa owain lɛ numɔ.” 15  Kɛkɛ ni Hana kɛɛ lɛ akɛ: “Dabi, minuŋtsɔ! Yoo ni werɛ eho ehe waa ji mi;* minuko wain ko loo dãa ni wa ko, shi moŋ, miifɔse mitsuiŋ* miishwie Yehowa hiɛ.+ 16  Kaabu otsulɔ akɛ yoo yaka gbɔmɔ ko, ejaakɛ awerɛho kɛ dɔlɛ ni eyi mitsui mli obɔ lɛ mli mijɛɔ miwieɔ kɛbashi bianɛ nɛɛ.” 17  Kɛkɛ ni Eli kɛɛ akɛ: “Yaa yɛ toiŋjɔlɛ mli, ni Israel Nyɔŋmɔ lɛ ahã bo nɔ ni obi lɛ lɛ.”+ 18  Kɛkɛ ni yoo lɛ kɛɛ akɛ: “Otsulɔ hiɛ aba nyam yɛ ohiɛ.” Ni yoo lɛ yiŋ etee ni eyaye nii, ni ehiɛ efeee mɔbɔmɔbɔ dɔŋŋ. 19  Kɛkɛ ni amɛte shi leebi maŋkpa ni amɛyakoto shi yɛ Yehowa hiɛ. No sɛɛ lɛ, amɛku amɛsɛɛ kɛtee amɛshĩa yɛ Rama.+ Elkana kɛ eŋa Hana ná bɔlɛ, ni Yehowa kai yoo lɛ.*+ 20  Hana ná musu ni efɔ binuu yɛ afi mli,* ni ewo lɛ gbɛ́i+ akɛ Samuel,* ejaakɛ ekɛɛ akɛ, “Yehowa dɛŋ miba lɛ yɛ.” 21  Be ko sɛɛ lɛ, Elkana kɛ eshĩabii lɛ kwɔ kɛtee koni eyashã daa afi afɔle ehã Yehowa,+ koni ekɛ nɔ ni ewo he shi lɛ hu ayahã. 22  Shi Hana ekwɔɔɔ kɛyaaa,+ ejaakɛ ekɛɛ ewu lɛ akɛ: “Kɛ́ mitse gbekɛ nuu lɛ fufɔ nɔŋŋ lɛ, mikɛ lɛ baaya; mikɛ lɛ baayahã Yehowa ni ebaahi jɛmɛ kwraa.”+ 23  Ni ewu Elkana kɛɛ lɛ akɛ: “Feemɔ nɔ ni osusuɔ akɛ esa.* Hii shĩa kɛyashi obaatse lɛ fufɔ. Yehowa ahã nɔ ni owie lɛ aba mli.” No hewɔ lɛ, yoo lɛ hi shĩa ni ekwɛ ebinuu lɛ kɛyashi etse lɛ fufɔ. 24  Be ni etse lɛ fufɔ nɔŋŋ lɛ, ekɛ lɛ kwɔ kɛtee Shilo. Ekɛ tsinanuu ni eye afii etɛ, ashikishaŋ efa kome,* kɛ wain+ gbɛ́ kome hu fata he kɛtee, ni ekɛ gbekɛ nuu lɛ tee Yehowa shĩa lɛ yɛ Shilo.+ 25  Kɛkɛ ni amɛgbe tsinanuu lɛ, ni amɛkɛ gbekɛ nuu lɛ yahã Eli. 26  Ni yoo lɛ kɛɛ akɛ: “Minuŋtsɔ, ofainɛ! Gbii abɔ ni ohiɛ kã nɛɛ,* minuŋtsɔ, miji yoo ni badamɔ omasɛi yɛ biɛ ni basɔle ehã Yehowa lɛ.+ 27  Gbekɛ nuu nɛɛ misɔle mibi lɛ, ni Yehowa ehã mi nɔ ni mibi lɛ lɛ.+ 28  Mi hu mikɛ lɛ miifa Yehowa. Mikɛ lɛ miifa Yehowa ewala gbii abɔ fɛɛ.” Kɛkɛ ni nuu* lɛ koto shi yɛ Yehowa hiɛ yɛ jɛmɛ.

Shishigbɛ Niŋmaa

Loo “hi Rama, ni eji Zufnyo.”
Atsɛɔ Elkana akɛ Efraimnyo, ejaakɛ afɔ lɛ yɛ Efraim shikpɔŋ lɛ nɔ, shi Levinyo ji lɛ. Kwɛmɔ 1Kr 6:19, 22-28.
Loo “eyakotoɔ.”
Hebri sht. ŋm., “Yehowa eŋa emusu naa.”
Loo “Mɛni hewɔ otsui werɛ eho ehe?”
Ni ji, sɔlemɔ buu lɛ.
Loo “Hana susuma werɛ eho ehe waa diɛŋtsɛ.”
Loo “Yoo ni ehao waa yɛ emumɔ mli ji mi.”
Hebri sht. ŋm., “miifɔse misusuma mli.” Kwɛmɔ Wiemɔi Titrii Amligbalamɔ lɛ.
Loo “Yehowa gbala ejwɛŋmɔ kɛba yoo lɛ nɔ.”
Shishitsɔɔmɔi komɛi kɛɔ akɛ, “yɛ be ni sa mli.”
Eshishi ji, “Nyɔŋmɔ gbɛ́i.”
Hebri sht. ŋm., “Feemɔ nɔ ni hi yɛ ohiɛ.”
Aaafee litai 22 (kwat 20). Kwɛmɔ Saji Krokomɛi B14 lɛ.
Loo “Gbii abɔ ni osusuma hiɛ kã nɛɛ.”
Ekã shi faŋŋ akɛ Elkana ni.