1 Kronika 22:1-19

  • David saa nibii eto kɛhã sɔlemɔ shĩa lɛ maa (1-5)

  • David kɛ gbɛtsɔɔmɔ hã Solomon (6-16)

  • Afã lumɛi lɛ koni amɛye amɛbua Solomon (17-19)

22  Kɛkɛ ni David kɛɛ akɛ: “Yehowa, anɔkwa Nyɔŋmɔ lɛ shĩa nɛ, ni afɔleshaa latɛ ni Israelbii lɛ kɛbaashã shãa afɔle nɛ.”+  Kɛkɛ ni David fã koni akɛ gbɔi+ ni yɔɔ Israel shikpɔŋ lɛ nɔ lɛ fɛɛ aba, ni ehã amɛtsu nii akɛ tɛgbalɔi koni amɛgbala tɛi ni amɛsaa he koni akɛma anɔkwa Nyɔŋmɔ lɛ shĩa lɛ.+  Agbɛnɛ hu, David bua dadei babaoo naa koni akɛfee plɛkoobii kɛhã agbói lɛ anaa shinai lɛ kɛ agbɛnɛ hu klampii,* ni ebua akɔɔble babaoo ni anyɛɛɛ aŋmɛ etsiimɔ hu naa,+  ni ebua tseneduru tsei+ babaoo bɔ ni anyɛɛɛ akane hu naa, ejaakɛ Sidonbii+ lɛ kɛ Tirobii+ lɛ bahã David tseneduru tsei babaoo diɛŋtsɛ.  Ni David kɛɛ akɛ: “Mibi Solomon edako ni ehiɛ esako* hu,+ shi shĩa ni abaama ahã Yehowa lɛ hu da+ ni ebaafee fɛo waa aahu akɛ abaawie he+ yɛ shikpɔŋ lɛ nɔ fɛɛ.+ No hewɔ lɛ, mabua nibii anaa mashwie shi mahã lɛ.” No hewɔ lɛ, David bua nibii babaoo naa dani egbo.  Agbɛnɛ, etsɛ ebinuu Solomon ni efã lɛ koni ema shĩa ehã Yehowa, Israel Nyɔŋmɔ lɛ.  David kɛɛ ebinuu Solomon akɛ: “Kulɛ ekã mitsui nɔ akɛ mama shĩa mahã Yehowa, mi-Nyɔŋmɔ lɛ gbɛ́i lɛ.+  Shi Yehowa kɛɛ mi* akɛ, ‘Oshwie lá shi tsɔ, ni owu tai wuji. Jeee bo ji mɔ ni baama shĩa ohã migbɛ́i lɛ,+ ejaakɛ oshwie lá shi tsɔ yɛ mihiɛ yɛ shikpɔŋ lɛ nɔ.  Naa! Obaafɔ binuu ko,+ ni ebaafee mɔ ko ni sumɔɔ toiŋjɔlɛ,* ni mahã ehe ajɔ lɛ yɛ ehenyɛlɔi fɛɛ ni bɔle ehe lɛ adɛŋ,+ ejaakɛ abaatsɛ lɛ Solomon,*+ ni yɛ egbii lɛ amli lɛ, mahã Israel toiŋ ajɔ lɛ, ni amɛbaahi shi kpoo.+ 10  Lɛ ji mɔ ni baama shĩa ehã migbɛ́i lɛ.+ Ni ebaatsɔ mibinuu ni matsɔ etsɛ.+ Mahã emaŋtsɛyeli lɛ maŋtsɛ sɛi lɛ ama shi shiŋŋ yɛ Israel kɛya naanɔ.’+ 11  “No hewɔ lɛ, agbɛnɛ mibinuu, Yehowa aye abua bo,* ni ehã oye omanye ni oma Yehowa, o-Nyɔŋmɔ lɛ shĩa lɛ, tamɔ bɔ ni ewie yɛ ohe lɛ pɛpɛɛpɛ.+ 12  Nɔ ni mibiɔ kɛkɛ ji, kɛ́ Yehowa hã obaye Israel nɔ lɛ, ehã bo hiɛshikamɔ kɛ saneshishinumɔ+ koni oye Yehowa, o-Nyɔŋmɔ lɛ, mla lɛ nɔ.+ 13  Ni kɛ́ oye taomɔ nii+ kɛ yiŋkpɛi* ni Yehowa fã Mose ni ekɛhã Israel lɛ nɔ jogbaŋŋ lɛ, obaaye omanye.+ No hewɔ lɛ, feemɔ ekãa ni owaje ohe. Kaashe gbeyei, ni otsui akafã hu.+ 14  Naa, migbo deŋme diɛŋtsɛ kɛbua shika tsuru talɛntai* 100,000 kɛ jwiɛtɛi talɛntai 1,000,000 anaa koni akɛma Yehowa shĩa lɛ, ni mibua akɔɔble kɛ dadei babaoo+ ni anyɛɛɛ aŋmɛ amɛtsiimɔ kɛ tsei kɛ tɛi hu anaa,+ shi okɛ nibii nɛɛ eko baafata he. 15  Agbɛnɛ hu, oyɛ nitsulɔi babaoo—tɛgbalɔi, kɛ tɛ gbogbotswalɔi,+ kapintafoi, kɛ mɛi ni le ŋaa nitsumɔi srɔtoi fɛɛ.+ 16  Anyɛɛɛ aŋmɛ shika tsuru, kɛ jwiɛtɛi, kɛ akɔɔble, kɛ dade ni mibua naa lɛ tsiimɔ.+ No hewɔ lɛ, tee shi ni oje nitsumɔ lɛ shishi, ni Yehowa aye abua bo.”*+ 17  Kɛkɛ ni David fã Israel lumɛi lɛ fɛɛ koni amɛye amɛbua ebinuu Solomon. Ekɛɛ amɛ akɛ: 18  “Bɛ Yehowa, nyɛ-Nyɔŋmɔ lɛ kɛ nyɛ yɛ? Bɛ ehã nyɛhe ejɔ nyɛ yɛ nyɛhenyɛlɔi fɛɛ ni bɔle nyɛ lɛ adɛŋ? Ejaakɛ ekɛ shikpɔŋ lɛ nɔ bii lɛ fɛɛ wo midɛŋ, ni akɛ shikpɔŋ lɛ ewo wɔshishi yɛ Yehowa kɛ maŋ lɛ hiɛ. 19  No hewɔ lɛ, agbɛnɛ, nyɛkɛ nyɛtsui muu fɛɛ kɛ nyɛsusuma* muu fɛɛ ataoa Yehowa, nyɛ-Nyɔŋmɔ lɛ sɛɛ gbɛ,+ ni nyɛjea shishi nyɛmaa Yehowa, anɔkwa Nyɔŋmɔ lɛ jamɔhe lɛ,+ koni nyɛkɛ Yehowa kpaŋmɔ adeka lɛ kɛ anɔkwa Nyɔŋmɔ lɛ nibii krɔŋkrɔŋi+ lɛ aba shĩa ni ama ahã Yehowa gbɛ́i lɛ mli.”+

Shishigbɛ Niŋmaa

Eji dade ni akɛmɔɔ nibii enyɔ kɛkpɛtɛɔ loo kɛtsaa.
Loo “ebɛ niiashikpamɔ.”
Loo “Yehowa wiemɔ lɛ ba miŋɔɔ.”
Hebri sht. ŋm., “hejɔɔmɔ.”
Ejɛ Hebri wiemɔ ko ni shishi ji “Toiŋjɔlɛ” lɛ mli.
Loo “Yehowa kɛ bo ahi shi.”
Loo “kojomɔi.”
Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
Loo “Yehowa kɛ bo ahi shi.”