1 Kronika 17:1-27

  • Jeee David ni baama sɔlemɔ shĩa lɛ (1-6)

  • Akɛ David fee kpaŋmɔ kɛhã maŋtsɛyeli (7-15)

  • David shidaa sɔlemɔ (16-27)

17  Be ni David yahi lɛ diɛŋtsɛ emaŋtsɛ shĩa lɛ nɔŋŋ lɛ, ekɛɛ gbalɔ Natan+ akɛ: “Naa! Mi lɛ, miyɛ tseneduru tsei atsũ mli,+ shi Yehowa kpaŋmɔ adeka lɛ ma mama tsũ mli.”+  Natan kɛɛ David akɛ: “Feemɔ nɔ fɛɛ nɔ ni yɔɔ otsui mli, ejaakɛ anɔkwa Nyɔŋmɔ lɛ kɛ bo yɛ.”  Nakai nyɔɔŋ lɛ mli nɔŋŋ lɛ, Nyɔŋmɔ kɛɛ Natan* akɛ:  “Yaa ni oyakɛɛ mitsulɔ David akɛ, ‘Nɔ ni Yehowa kɛɛ nɛ: “Jeee bo ji mɔ ni baama shĩa ohã mi ni mahi mli.+  Ejaakɛ kɛjɛ gbi nɔ ni mijie Israelbii lɛ kɛbashi ŋmɛnɛ lɛ, mihiko shĩa ko mli pɛŋ, shi mama tsũ mli sɔŋŋ miyaa mibaa yɛ.*+  Be ni mikɛ Israelbii lɛ fɛɛ nyiɛ lɛ mli fɛɛ lɛ, ani mikɛɛ Israel kojolɔi ni mihala akɛ amɛkwɛ mimaŋ lɛ ateŋ mɔ ko pɛŋ akɛ, ‘Mɛni hewɔ nyɛmaaa tseneduru tsei atsũ nyɛhãaa mi lɛ?’”’  “No hewɔ lɛ, agbɛnɛ, kɛɛmɔ mitsulɔ David akɛ, ‘Nɔ ni Yehowa, taiatsɛ lɛ kɛɛ nɛ: “Miŋɔ bo kɛjɛ hei ni kooloi yeɔ nii yɛ, kɛjɛ tooku lɛ sɛɛ, ni mifee bo mimaŋ Israel hiɛnyiɛlɔ.+  Ni maye mabua bo yɛ* he fɛɛ he ni oyaa,+ ni magbe ohenyɛlɔi lɛ fɛɛ yɛ ohiɛ;*+ ni mahã oná gbɛ́i tamɔ shikpɔŋ lɛ nɔ gbɔmɛi wuji ni yɔɔ gbɛ́i lɛ.+  Mahala he ko mahã mimaŋ Israel ni mikɛ amɛ baaya jɛmɛ, ni amɛbaahi jɛmɛ ni mɔ ko gbaŋ amɛnaa dɔŋŋ; ni gbɔmɛi fɔji waŋ amɛ yi* dɔŋŋ tamɔ bɔ ni amɛfee amɛ tsutsu lɛ,+ 10  kɛjɛ gbi nɔ ni mihala kojolɔi mito mimaŋ Israel nɔ lɛ.+ Ni mikɛ ohenyɛlɔi lɛ fɛɛ baawo oshishi.+ Agbɛnɛ hu, miikɛɛ bo akɛ, ‘Yehowa baama shĩa ehã bo.’* 11  “‘“Kɛji ogbii lɛ ba naagbee ni ogbo lɛ,* matee oseshinyo* ko shi yɛ osɛɛ, ni ji obihii lɛ eko,+ ni mahã emaŋtsɛyeli lɛ adamɔ shi shiŋŋ.+ 12  Lɛ ji mɔ ni baama shĩa ehã mi,+ ni mahã emaŋtsɛ sɛi lɛ ama shi shiŋŋ kɛya naanɔ.+ 13  Matsɔ etsɛ, ni lɛ hu ebaatsɔ mibinuu.+ Mijieŋ misuɔmɔ ni tsakeee lɛ yɛ enɔ+ tamɔ bɔ ni mijie yɛ mɔ ni tsɔ ohiɛ lɛ nɔ lɛ.+ 14  Mahã edamɔ shi yɛ mishĩa lɛ kɛ mimaŋtsɛyeli lɛ mli kɛya naanɔ;+ ni emaŋtsɛ sɛi lɛ baama shi kɛya naanɔ.”’”+ 15  Natan kɛɛ David wiemɔi nɛɛ fɛɛ kɛ ninaa tso muu lɛ fɛɛ. 16  Kɛkɛ ni Maŋtsɛ David ba ni ebata Yehowa hiɛ ni ekɛɛ: “Ao, Yehowa Nyɔŋmɔ, namɔ po ji mi? Ni mɛni ji mishĩa lɛ po ni okɛ mi ebashɛ he ni okɛ mi eshɛ nɛɛ?+ 17  Ao Nyɔŋmɔ, oookɛɛ enɛ kɛkɛ faaa lɛ, osaa oowie otsulɔ shĩa lɛ he kɛmiiya wɔsɛɛ tɔ̃ɔ,+ ni obu mi tamɔ mɔ ko ni esa akɛ awó enɔ gojoo,* Ao, Yehowa Nyɔŋmɔ. 18  Mɛni ekoŋŋ otsulɔ David baanyɛ akɛɛ bo yɛ mihiɛ nyam ni owo nɛɛ he, ejaakɛ ole otsulɔ jogbaŋŋ?+ 19  Ao Yehowa, otsulɔ kɛ nɔ ni otsui sumɔɔ* lɛ hewɔ ofee nibii wuji nɛɛ fɛɛ kɛjie ogbojee lɛ kpo lɛ.+ 20  Ao Yehowa, mɔ ko bɛ ni tamɔ bo,+ ni Nyɔŋmɔ ko bɛ akɛ ja bo;+ ni nibii fɛɛ ni wɔnu kɛ wɔtoi lɛ maa enɛ nɔ mi. 21  Mɛɛ jeŋmaŋ kroko yɔɔ shikpɔŋ lɛ nɔ ni tamɔ omaŋ Israel?+ Anɔkwa Nyɔŋmɔ lɛ tee eyakpɔ̃ amɛ ni efee amɛ emaŋ.+ Ni otsɔ nibii kpelei kɛ nibii ni yɔɔ naakpɛɛ ni ofee lɛ nɔ ofee gbɛ́i ohã ohe.+ Ojie* jeŋmaji lɛ yɛ omaŋ ni okpɔ̃ kɛje Ejipt lɛ hiɛ.+ 22  Oto omaŋ Israel akɛ bo diɛŋtsɛ omaŋ kɛmiiya naanɔ;+ ni bo, Ao Yehowa, otsɔ amɛ-Nyɔŋmɔ.+ 23  No hewɔ lɛ, agbɛnɛ, Ao Yehowa, ye shi ni owo yɛ otsulɔ kɛ eshĩa lɛ he lɛ nɔ kɛya naanɔ, ni feemɔ tamɔ bɔ ni owo shi lɛ pɛpɛɛpɛ.+ 24  Ogbɛ́i lɛ ahi shi daa* ni awó nɔ gojoo+ kɛya naanɔ, koni mɛi akɛɛ akɛ, ‘Yehowa, taiatsɛ lɛ, Israel Nyɔŋmɔ lɛ, lɛ ji Nyɔŋmɔ yɛ Israel,’ ni hã otsulɔ David shĩa lɛ ama shi shiŋŋ yɛ ohiɛ.+ 25  Ejaakɛ bo, mi-Nyɔŋmɔ, ojie yiŋ ni oto akɛ obaama shĩa ohã otsulɔ* lɛ kpo otsɔɔ lɛ. Enɛ hewɔ ni otsulɔ ená ekãa ni esɔleɔ sɔlemɔ nɛɛ ehãa bo lɛ. 26  Ni agbɛnɛ, Ao Yehowa, bo ji anɔkwa Nyɔŋmɔ lɛ, ni okɛ nibii kpakpai nɛɛ ewo otsulɔ shi. 27  No hewɔ lɛ, jɛɛ osuɔmɔ mli ojɔɔ otsulɔ shĩa lɛ, ni ohã ehi shi kɛya naanɔ yɛ ohiɛ, ejaakɛ bo, Yehowa, ojɔɔ otsulɔ shĩa lɛ, ni ajɔɔ shĩa lɛ kɛmiiya naanɔ.”

Shishigbɛ Niŋmaa

Loo “Nyɔŋmɔ wiemɔ lɛ ba Natan ŋɔɔ.”
Ekolɛ eetsɔɔ akɛ “mijɛɔ mama tsũ mli kɛyaa mama tsũ mli kɛ shihilɛhe kome mli kɛyaa ekroko mli.”
Loo “Ni mafata ohe kɛya.”
Loo “ni mafolɔ ohenyɛlɔi lɛ fɛɛ mashwie.”
Hebri sht. ŋm., “hãŋ etɔ amɛ.”
Loo “baahã oseshibii aye maŋtsɛ.”
Loo “okɛ otsɛmɛi lɛ yawɔ lɛ.”
Hebri sht. ŋm., “odumɔwu.”
Loo “tamɔ hiɛnaanɔ gbɔmɔ ko.”
Loo “osuɔmɔnaa nii.”
Loo “Oshwie.”
Loo “Hã nɔ ni ogbɛ́i lɛ damɔ shi kɛhã lɛ aba mli.”
Loo “akɛ obaahã otsulɔ seshibii aye maŋtsɛ.”