1 Kronika 11:1-47

  • Israel fɛɛ fɔ David mu akɛ maŋtsɛ (1-3)

  • David ŋɔ Zion (4-9)

  • David tawulɔi kãkãlɔi lɛ (10-47)

11  Be ko sɛɛ lɛ, Israelbii lɛ fɛɛ ba David ŋɔɔ yɛ Hebron+ ni amɛbakɛɛ akɛ: “Naa! Oheloo kɛ lá* ji wɔ.+  Be ko ni eho be ni Saul ji maŋtsɛ lɛ, bo ji mɔ ni nyiɛɔ Israel hiɛ kɛyaa ta.*+ Ni Yehowa, o-Nyɔŋmɔ lɛ kɛɛ bo akɛ: ‘Bo obaakwɛ mimaŋ Israel, ni obaatsɔ mimaŋ Israel hiɛnyiɛlɔ.’”+  No hewɔ lɛ, Israel onukpai lɛ fɛɛ ba maŋtsɛ lɛ ŋɔɔ yɛ Hebron, ni David kɛ amɛ kpaŋ kpaŋmɔ yɛ Hebron yɛ Yehowa hiɛ. Kɛkɛ ni amɛfɔ David mu ni amɛwó lɛ Israel nɔ maŋtsɛ,+ tamɔ bɔ ni Yehowa etsɔ Samuel nɔ ewie lɛ.+  Sɛɛ mli lɛ, David kɛ Israel fɛɛ yi mli akɛ amɛmiiya Yerusalem, ni ji Yebus,+ shikpɔŋ ni Yebusbii+ lɛ yɔɔ nɔ lɛ.  Shi mɛi ni yɔɔ Yebus lɛ tswa David mpoa akɛ: “Onyɛŋ oba biɛ kɔkɔɔkɔ!”+ Shi David ŋɔ Zion+ mɔɔ lɛ ni ŋmɛnɛ lɛ atsɛɔ lɛ, David Maŋ+ lɛ.  No hewɔ lɛ, David kɛɛ akɛ: “Mɔ klɛŋklɛŋ ni baatutua Yebusbii lɛ baatsɔ tatsɛ* kɛ lumɔ.” Ni Yoab,+ Zeruia binuu lɛ klɛŋklɛŋ kwɔ kɛtee, ni ebatsɔ tatsɛ lɛ.  Kɛkɛ ni David yahi mɔɔ lɛ mli. No hewɔ ni atsɛɔ lɛ David Maŋ lɛ.  Ni David tswa gbogboi kɛ nibii krokomɛi kɛbɔle maŋ lɛ he kɛkpe, kɛjɛ Milo* lɛ he kɛyashi hei ni bɔle he lɛ, ni Yoab tswa hei ni eshwɛ yɛ maŋ lɛ mli lɛ ekoŋŋ.  No hewɔ lɛ, David tee nɔ ená hewalɛ,+ ni Yehowa, taiatsɛ lɛ, kɛ lɛ yɛ. 10  Naa David tawulɔi kãkãlɔi lɛ anɔ onukpai lɛ, mɛi ni kɛ Israelbii lɛ fɛɛ fee ekome kɛye amɛbua lɛ waa yɛ emaŋtsɛyeli lɛ mli lɛ. Amɛ amɛye amɛbua ni awó lɛ maŋtsɛ, tamɔ bɔ ni Yehowa ewie yɛ Israel he lɛ.+ 11  David tawulɔi kãkãlɔi lɛ agbɛ́ii nɛ: Yashobeam,+ Hakemonnyo ko binuu, lɛ ji nɔkwɛlɔ yɛ mɛi etɛ lɛ ateŋ.+ Be ko lɛ, ekɛ ekpɔlɔ lɛ gbe mɛi 300.+ 12  Esɛɛ lɛ, Eleazar,+ ni ji Dodo, Ahohinyo+ lɛ binuu lɛ, eji tawulɔi kãkãlɔi etɛ lɛ ateŋ mɔ kome. 13  Be ni Filistibii lɛ bua amɛhe naa kɛhã ta yɛ Pas-damim+ lɛ, no mli lɛ, efata David he yɛ jɛmɛ. No mli lɛ, shikpɔŋ ko kã jɛmɛ ni adu barle* babaoo yɛ nɔ, ni maŋbii lɛ ejo foi yɛ Filistibii lɛ ahewɔ. 14  Shi edamɔ ŋmɔ lɛ teŋ tuuntu ni efã ŋmɔ lɛ he, ni egbe Filistibii lɛ, no hewɔ lɛ, Yehowa ye kunim kpele.*+ 15  Nɔkwɛlɔi 30 lɛ ateŋ mɛi etɛ kpeleke shi kɛtee tɛsaa lɛ he yɛ David ŋɔɔ yɛ Adulam tɛkplo+ lɛ mli, no mli lɛ, Filistibii lɛ asraafoi komɛi ebɔ nsara yɛ Refaim Jɔɔ+ lɛ mli. 16  No mli lɛ, David yɛ teemɔhe lɛ, ni Filistibii lɛ asraafoi akuu ko yɛ Betlehem. 17  Kɛkɛ ni David hã ana akɛ nɔ ko miiba etsine, ni ekɛɛ: “Eji maná bu ni akɛtoɔ nu ni yɔɔ Betlehem+ agbó lɛ masɛi lɛ mli nu kulɛ, manu waa!” 18  Kɛkɛ ni mɛi etɛ lɛ bote Filistibii lɛ ansara lɛ mli ekãa naa ni amɛyayɛ nu yɛ bu ni akɛtoɔ nu ni yɔɔ Betlehem agbó lɛ masɛi lɛ mli ni amɛkɛbahã David; shi David sumɔɔɔ ni enu, ni efɔse eshwie shi ehã Yehowa. 19  Ekɛɛ akɛ: “Ekaba lɛ nakai kɔkɔɔkɔ yɛ migbɛfaŋ akɛ mafee enɛ yɛ mi-Nyɔŋmɔ lɛ hiɛ! Ani esa akɛ minu hii ni kɛ amɛwala* wo oshãra mli nɛɛ alá lo?”+ Ejaakɛ amɛkɛ amɛwala* wo oshãra mli ni amɛyayɛ kɛba. No hewɔ lɛ, esumɔɔɔ ni enu. Nibii ni etawulɔi kãkãlɔi etɛ lɛ fee lɛ nɛ. 20  Abishai,+ ni ji Yoab+ nyɛmi nuu lɛ hu batsɔ mɛi etɛ kroko anɔkwɛlɔ; ekɛ ekpɔlɔ lɛ gbe mɛi 300, ni ehe gbɛ́i tamɔ mɛi etɛ lɛ nɔŋŋ.+ 21  Yɛ mɛi etɛ kroko lɛ ateŋ lɛ, ebɔɔ mɔdɛŋ waa fe mɛi enyɔ ni fata ehe lɛ, ni lɛ ji amɛnɔkwɛlɔ, shi enáaa gbɛnaa ni klɛŋklɛŋ mɛi etɛ lɛ ná lɛ. 22  Benaia,+ Yehoiada binuu lɛ, ji nuu ko ni yɔɔ ekãa* ni tsu nitsumɔi kpelei babaoo yɛ Kabzeel.+ Egbe Ariel, Moabnyo lɛ bihii enyɔ lɛ, ni ebote nubu ko mli ni eyagbe jata yɛ snoo gbi nɔ.+ 23  Egbe Ejipt nuu ko ni kwɔ ni eti waa hu—ekwɔlɛ ji ninetalɔi enumɔ.*+ Eyɛ mli akɛ Ejiptnyo lɛ hiɛ akpɔlɔ ni da tamɔ tsɔne ni mamalolɔ kɛloɔ mama lɛ mli tso+ yɛ edɛŋ moŋ, shi ekɛ tso tee enɔ ni eshɔ̃ akpɔlɔ lɛ yɛ Ejiptnyo lɛ dɛŋ, ni ekɛ nuu lɛ diɛŋtsɛ akpɔlɔ lɛ gbe lɛ.+ 24  Enɛɛmɛi ji nibii ni Benaia, Yehoiada binuu lɛ fee, ni ehe gbɛ́i tamɔ hii kãkãlɔi etɛ lɛ nɔŋŋ. 25  Eyɛ mli akɛ ebɔ mɔdɛŋ waa fe mɛi 30 lɛ moŋ, shi enáaa gbɛnaa ni mɛi etɛ lɛ ná lɛ.+ Shi David hala lɛ koni ekwɛ ehebulɔi lɛ anɔ. 26  Asraafoi lɛ akui lɛ ateŋ tawulɔi kãkãlɔi lɛ ji Asahel,+ Yoab nyɛmi nuu lɛ, kɛ Elhanan, ni ji Dodo, ni jɛ Betlehem lɛ binuu lɛ,+ 27  kɛ Shamot, Harornyo lɛ, kɛ Helez, Pelonnyo lɛ, 28  kɛ Ira,+ Tekonyo Ikesh binuu lɛ, kɛ Abiezer,+ Anatotnyo lɛ, 29  kɛ Sibekai,+ Hushanyo lɛ, kɛ Ilai, Ahohinyo lɛ, 30  kɛ Maharai,+ Netofatnyo lɛ, kɛ Heled,+ Netofatnyo Baanah binuu lɛ, 31  kɛ Itai, ni ji Ribai ni jɛ Gibea ni yɔɔ Benyamin+ lɛ binuu lɛ, kɛ Benaia, Piratonnyo lɛ, 32  kɛ Hurai ni jɛ Gaash+ nujɔi* lɛ anaa lɛ, kɛ Abiel, Bet-arabanyo* lɛ, 33  kɛ Azmawet, Baharumnyo lɛ, kɛ Eliaba, Shaalbonnyo lɛ, 34  kɛ Gizonnyo Hashem bihii lɛ, kɛ Yonatan, Hararnyo Shage binuu lɛ, 35  kɛ Ahiam, Hararnyo Sakar binuu lɛ, kɛ Elifal, Ur binuu lɛ, 36  kɛ Hefer, Mekeratnyo lɛ, kɛ Ahiya, Pelonnyo lɛ, 37  kɛ Hezro, Karmelnyo lɛ, kɛ Naarai, Ezbai binuu lɛ, 38  kɛ Yoel, Natan nyɛmi nuu lɛ, kɛ Mibhar, Hagri binuu lɛ, 39  kɛ Zelek, Amonnyo lɛ, kɛ Naharai, Berotnyo lɛ, ni ji mɔ ni hiɛɔ Zeruia binuu Yoab tawuu nii lɛ; 40  Ira, Itrinyo lɛ, kɛ Gareb, Itrinyo lɛ, 41  kɛ Uria,+ Hitnyo lɛ, kɛ Zabad, Ahlai binuu lɛ, 42  kɛ Adina, Rubennyo Shiza binuu lɛ, ni ji shĩa onukpa yɛ Rubenbii lɛ ateŋ lɛ, kɛ mɛi 30 ni fata ehe lɛ; 43  Hanan, Maaka binuu lɛ, kɛ Yoshafat, Mitninyo lɛ, 44  kɛ Uzia, Ashteratnyo lɛ, kɛ Shama kɛ Yeiel Aroernyo Hotam bihii lɛ; 45  Yediael, Shimri binuu lɛ, kɛ enyɛmi nuu Yoha, Tizinyo lɛ; 46  Eliel, Mahavinyo lɛ, kɛ Yeribai kɛ Yoshavia, Elnaam bihii lɛ, kɛ Itma, Moabnyo lɛ; 47  Eliel, kɛ Obed, kɛ Yaasiel, Mezobanyo lɛ.

Shishigbɛ Niŋmaa

Loo “Oheloo kɛ wu.”
Hebri sht. ŋm., “bo okɛ Israel yaa ni okɛ amɛ baa.”
Hebri sht. ŋm., “yitso.”
Eji Hebri wiemɔ ko ni tsɔɔ nɔ ko ni abua naa tamɔ gɔŋ.
Eji wiiti henɔ ko.
Loo “Yehowa tsu yiwalaheremɔ nitsumɔ kpele.”
Loo “amɛsusumai.”
Loo “amɛsusumai.”
Hebri sht. ŋm., “eji nuu ni yɔɔ ekãa binuu.”
Nuu lɛ kwɔlɛ aaafee mitai 2.23 (nanetalɔi 7.3). Kwɛmɔ Saji Krokomɛi B14 lɛ.
Loo “Arbatnyo.”