1 Maŋtsɛmɛi 9:1-28

  • Yehowa jie ehe kpo etsɔɔ Solomon ekoŋŋ (1-9)

  • Nɔ ni Solomon kɛke Maŋtsɛ Hiram (10-14)

  • Nibii srɔtoi ni Solomon fee (15-28)

9  Be ni Solomon gbe Yehowa shĩa lɛ, kɛ maŋtsɛ shĩa lɛ maa naa,+ kɛ nɔ fɛɛ nɔ ni Solomon taoɔ ni efee lɛ naa nɔŋŋ lɛ,+  Yehowa jie ehe kpo etsɔɔ Solomon nɔ ni ji shii enyɔ nɔ, tamɔ ejie ehe kpo etsɔɔ lɛ yɛ Gibeon lɛ.+  Yehowa kɛɛ lɛ akɛ: “Minu osɔlemɔ kɛ ofaikpamɔ kɛhã mɔbɔnalɛ lɛ. Mifee shĩa ni oma nɛɛ krɔŋkrɔŋ kɛtsɔ migbɛ́i ni mikɛfɔ̃ nɔ kɛmiiya naanɔ lɛ nɔ,+ ni mihiŋmɛii kɛ mitsui baahi jɛmɛ daa.+  Ni bo lɛ, kɛ́ okɛ tsui krɔŋŋ+ kɛ jalɛ+ nyiɛ yɛ mihiɛ tamɔ otsɛ David nyiɛ yɛ mihiɛ lɛ,+ kɛtsɔ nɔ fɛɛ nɔ ni miwoɔ bo he kitã ni ooofee,+ kɛ mitaomɔ nii, kɛ miyiŋkpɛi* lɛ anɔ ni oooye lɛ nɔ lɛ,+  no lɛ, mahã omaŋtsɛyeli sɛi lɛ ama shi shiŋŋ yɛ Israel nɔ kɛya naanɔ tamɔ bɔ ni miwo otsɛ David shi akɛ, ‘Ebaŋ kɔkɔɔkɔ akɛ be ko baashɛ ni anáŋ oseshinyo ko ni baata Israel maŋtsɛ sɛi lɛ nɔ’ lɛ.+  Shi kɛ́ nyɛ kɛ nyɛshwiei lɛ je misɛɛ ni nyɛyeee mikitãi lɛ, kɛ mimlai ni mikɛshwie nyɛhiɛ lɛ anɔ, ni nyɛyasɔmɔ nyɔŋmɔi krokomɛi ni nyɛkoto amɛ lɛ,+  no lɛ, mafo Israel mashɛ mafɔ̃ kɛje shikpɔŋ ni mikɛhã amɛ lɛ nɔ,+ ni shĩa ni mifee lɛ krɔŋkrɔŋ mihã migbɛ́i lɛ, majie yɛ mihiɛ mashɛ mafɔ̃,+ ni Israel baatsɔ nyaŋemɔ nii* kɛ nɔ ko ni ayeɔ he fɛo yɛ maji fɛɛ ateŋ.+  Ni shĩa nɛɛ baatsɔ koikoi.+ Mɔ fɛɛ mɔ ni baatsɔ he kɛho lɛ naa baakpɛ ehe ni ebaabo tsia* ni ebaabi akɛ, ‘Mɛni hewɔ Yehowa fee shikpɔŋ nɛɛ kɛ shĩa nɛɛ nɛkɛ?’+  Ni amɛbaakɛɛ akɛ, ‘Ejaakɛ amɛje Yehowa, amɛ-Nyɔŋmɔ lɛ sɛɛ, mɔ ni jie amɛtsɛmɛi lɛ kɛje Ejipt shikpɔŋ lɛ nɔ lɛ, ni amɛkɛ amɛhe yakpɛtɛ nyɔŋmɔi krokomɛi ahe ni amɛkoto amɛ ni amɛsɔmɔ amɛ. No hewɔ ni Yehowa kɛ amanehului nɛɛ fɛɛ eba amɛnɔ nɛɛ.’”+ 10  Yɛ afii 20 ni Solomon kɛma shĩai enyɔ lɛ, ni ji Yehowa shĩa lɛ, kɛ maŋtsɛ shĩa lɛ mli fɛɛ lɛ,+ 11  Hiram,+ Tiro maŋtsɛ lɛ bahãa Solomon tseneduru tsei kɛ junipa tsei kɛ shika tsuru abɔ fɛɛ ni etaoɔ;+ no hewɔ lɛ, Maŋtsɛ Solomon hã Hiram maji 20 yɛ Galilea shikpɔŋ lɛ nɔ yɛ no sɛɛ. 12  No hewɔ lɛ, Hiram shi Tiro kɛtee koni eyakwɛ maji ni Solomon kɛhã lɛ lɛ, shi amɛsaaa ehiɛ. 13  Ekɛɛ akɛ: “Minyɛmi, mɛɛ maji ohã mi nɛɛ?” No hewɔ lɛ, atsɛ maji nɛɛ Kabul Shikpɔŋ* lɛ kɛbashi ŋmɛnɛ. 14  Ni Hiram kɛ shika tsuru talɛntai* 120 tsu akɛyahã maŋtsɛ lɛ.+ 15  Mɛi ni Maŋtsɛ Solomon nyɛ amɛnɔ kɛhã nitsumɔ+ kɛtswa Yehowa shĩa lɛ,+ kɛ maŋtsɛ shĩa lɛ, kɛ Milo*+ lɛ, kɛ Yerusalem gbogbo lɛ, kɛ Hazor,+ kɛ Megido,+ kɛ Gezer+ lɛ ahe saji nɛ. 16  (No mli lɛ, Farao, Ejipt maŋtsɛ lɛ ekwɔ kɛba ni ebaŋɔ Gezer ni ekɛ la eshã maŋ lɛ, ni egbe Kanaanbii+ ni yɔɔ maŋ lɛ mli lɛ hu. No hewɔ lɛ, ekɛ maŋ lɛ hã ebiyoo+ lɛ, ni ji Solomon ŋa lɛ akɛ gbɛwoo nii.*) 17  Solomon saa etswa Gezer, kɛ Jɔɔŋgbɛ Bet-horon,+ 18  kɛ Baalat,+ kɛ Tamar ni yɔɔ ŋa lɛ nɔ, yɛ shikpɔŋ lɛ nɔ, 19  kɛ agbɛnɛ hu maji ni Solomon kɛ nibii toɔ mli lɛ fɛɛ, shwiilii amaji+ lɛ, okpɔŋɔnɔtaralɔi amaji lɛ, kɛ nɔ fɛɛ nɔ ni Solomon sumɔɔ akɛ ema yɛ Yerusalem, yɛ Lebanon, kɛ agbɛnɛ hu yɛ shikpɔji fɛɛ ni yɔɔ eshishi lɛ amli lɛ. 20  Shi Amorbii lɛ kɛ Hitbii lɛ kɛ Perizbii lɛ kɛ Hivbii lɛ kɛ Yebusbii+ lɛ ateŋ mɛi fɛɛ ni shwɛ ni fataaa Israelbii lɛ ahe lɛ,+ 21  amɛseshibii ni shwɛ yɛ shikpɔŋ lɛ nɔ lɛ—ni ji mɛi ni Israelbii lɛ kpãtãaa amɛhiɛ lɛ—Solomon nyɛ amɛnɔ kɛhã nitsumɔ akɛ nyɔji kɛbashi ŋmɛnɛ.+ 22  Shi Solomon efeee Israelbii lɛ ateŋ mɔ ko mɔ ko nyɔŋ,+ shi moŋ amɛji etawulɔi kɛ etsuji kɛ elumɛi kɛ esafoiatsɛmɛi kɛ eshwiilii kɛ ekpɔŋɔnɔtaralɔi lɛ anɔkwɛlɔi. 23  Ayɛ nɔkwɛlɔi anɔ onukpai 550 ni kwɛɔ Solomon nitsumɔ lɛ nɔ, ni ji mɛi ni kwɛɔ mɛi ni tsuɔ nii lɛ anɔ.+ 24  Shi Farao biyoo+ lɛ kwɔ kɛjɛ David Maŋ+ lɛ mli kɛba lɛ diɛŋtsɛ eshĩa ni Solomon ema ehã lɛ lɛ mli; kɛkɛ ni Solomon tswa Milo*+ lɛ. 25  Solomon shãa shãa afɔlei kɛ naanyobɔɔ afɔlei yɛ afɔleshaa latɛ ni ema ehã Yehowa lɛ nɔ+ shii etɛ daa afi,+ ni eshãa lasu afɔlei hu yɛ afɔleshaa latɛ ni ma Yehowa hiɛ lɛ nɔ, no hewɔ lɛ, egbe shĩa lɛ naa kwraa.+ 26  Maŋtsɛ Solomon fee meelei pii hu yɛ Ezion-geber+ ni yɔɔ Elot masɛi yɛ Ŋshɔ Tsuru lɛ naa yɛ Edom shikpɔŋ lɛ nɔ lɛ.+ 27  Hiram kɛ meelei tsuɔ lɛ diɛŋtsɛ etsuji,+ ni ji hii ni le ŋshɔ hiɛ nitsumɔ waa lɛ, ni amɛyafataa Solomon tsuji lɛ ahe kɛsɔmɔɔ. 28  Amɛyaa Ofir+ ni amɛyaloɔ shika tsuru talɛntai 420 kɛbahãa Maŋtsɛ Solomon.

Shishigbɛ Niŋmaa

Loo “mikojomɔi.”
Hebri sht. ŋm., “abɛbuu nɔ.”
Hebri sht. ŋm., “ebaakpã bɛlɛ.”
Shishitsɔɔmɔi komɛi kɛɔ akɛ, “Shikpɔŋ Ni He Bɛ Sɛɛnamɔ Ko.”
Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
Eji Hebri wiemɔ ko ni tsɔɔ nɔ ko ni abua naa tamɔ gɔŋ.
Loo “yookpeemɔ nikeenii; gbãla nii.”
Eji Hebri wiemɔ ko ni tsɔɔ nɔ ko ni abua naa tamɔ gɔŋ.