1 Maŋtsɛmɛi 7:1-51

  • Solomon maŋtsɛ shĩa lɛ (1-12)

  • Ŋaalɔ Hiram baye ebua Solomon (13-47)

    • Akɔɔble akulashiŋi enyɔ lɛ (15-22)

    • Dade nu taŋki agbo ni atsɛɔ lɛ Ŋshɔ lɛ (23-26)

    • Nu shwiilii nyɔŋma kɛ akɔɔble okpolui nyɔŋma lɛ (27-39)

  • Akɛ shika tsuru fee nibii (48-51)

7  Ni Solomon ma lɛ diɛŋtsɛ emaŋtsɛ shĩa lɛ,+ ehe lɛ afii 13 dani egbe nɔ fɛɛ nɔ naa.+  Ni ema shĩa ko ni atsɛɔ lɛ Lebanon Koo Shĩa+ lɛ yɛ tseneduru tso akulashiŋi anɔ; ato akulashiŋi lɛ anaa sɛrɛnɛɛ, nakai sɔŋŋ ejwɛ, kɛjɛ hiɛ kɛtee sɛɛ; akɛ tseneduru tso mplaŋi+ eshwie akulashiŋi lɛ anɔ; ni shĩa lɛ kɛlɛ ji ninetalɔi* 100, elɛɛmɔ ji ninetalɔi 50, ni ekwɔlɛ ji ninetalɔi 30.  Akala tseneduru tsei kɛha tsũ lɛ mli kɛma mplaŋi ni ble mplaŋi ni jwere akulashiŋi lɛ anɔ lɛ amli lɛ anɔ; amɛyibɔ ji 45, ni 15 yɔɔ kuu fɛɛ kuu mli.  Samfɛji ni awo he tsei yɛ shĩa lɛ he; ato samfɛji lɛ anaa sɛrɛnɛɛ, nakai sɔŋŋ etɛ, kɛjɛ ŋwɛi kɛyi shi, ni samfɛji lɛ eko fɛɛ eko miikwɛ samfɛlɛ kroko hiɛ, ni etsara nɔ nakai kɛjɛ ŋwɛi kɛyi shi.  Shinai lɛ fɛɛ hiɛ shinaatsei ejwɛjwɛɛjwɛ* tamɔ bɔ ni samfɛji ni eko fɛɛ eko miikwɛ samfɛlɛ kroko hiɛ kɛjɛ ŋwɛi kɛyi shi lɛ ji lɛ nɔŋŋ.  Ni efee ablanaa ko ni atsɛɔ lɛ Akulashiŋi Ablanaa;* ekɛlɛ ji ninetalɔi 50, ni elɛɛmɔ ji ninetalɔi 30, ni ablanaa kroko kɛ enɔ akulashiŋi ni aha yiteŋ yɛ hiɛ.  Ema tsũ ko hu ni atsɛɔ lɛ Maŋtsɛ Sɛi+ Asa,* ni ji he ni ebaakojo yɛ lɛ—atsɛɔ tsũ nɛɛ hu akɛ, Kojomɔ Asa+—ni amɛkala tseneduru tsei amɛha mli kɛjɛ shishi kɛyashi mplaŋi lɛ anaa.  Maŋtsɛ shĩa ni ebaahi mli lɛ yɛ kpo kroko+ nɔ, yɛ Asa* lɛ sɛɛgbɛ, ni ama lɛ tamɔ no nɔŋŋ. Solomon ma shĩa ko tamɔ Asa nɛɛ nɔŋŋ ehã Farao biyoo ni eyaŋɔ lɛ akɛ eŋa lɛ.+  Enɛɛmɛi fɛɛ lɛ, akɛ tɛi ni jara wa+ ni asusu ni ako ni akɛ saalai ni akɛfolɔɔ tɛi esaa amɛhe fɛɛ ni fee, kɛjɛ faneshi lɛ nɔ aahu kɛyashi eyiteŋ, kɛ agbɛnɛ hu kɛjɛ agbó lɛ naa aahu kɛyashi kpo wulu+ lɛ nɔ. 10  Ni akɛ tɛi wuji ni jara wa to faneshi lɛ shishi; tɛi lɛ ekomɛi adaramɔ ji ninetalɔi nyɔŋma, ekrokomɛi hu adaramɔ ji ninetalɔi kpaanyɔ. 11  Ni atswa tɛi ni jara wa ni asusu ni ako kɛ tseneduru tsei yɛ nɔ. 12  Akɛ tɛi ni ako ni eko kã eko nɔ, nɔkwɔlɛi etɛ kɛ tseneduru mplaŋi nɔkwɔlɛ kome tswa gbogbo kɛbɔle kpo wulu lɛ, tamɔ bɔ ni afee awo mligbɛ kpo+ lɛ ni yɔɔ Yehowa shĩa lɛ kɛ shĩa lɛ ablanaa+ lɛ he lɛ nɔŋŋ. 13  Kɛkɛ ni Maŋtsɛ Solomon tsu ni ayatsɛ Hiram+ kɛjɛ Tiro kɛba. 14  Eji yoo okulafo ko ni jɛ Naftali weku lɛ mli lɛ binuu, ni epapa lɛ, Tironyo akɔɔble sɔ̃lɔ ji lɛ;+ ele nibii fɛɛ ni akɛ akɔɔble* feɔ lɛ ahe ŋaa, eyɛ amɛhe nilee,+ ni ele nibii nɛɛ afeemɔ jogbaŋŋ hu. No hewɔ lɛ, eba Maŋtsɛ Solomon ŋɔɔ ni ebatsu enii lɛ fɛɛ ehã lɛ. 15  Efee akɔɔble akulashiŋi enyɔ lɛ;+ akulashiŋi lɛ eko fɛɛ eko kwɔlɛ ji ninetalɔi 18, ni kɛ́ okɛ susumɔ kpãa bɔle akulashiŋi lɛ eko fɛɛ eko he lɛ, efeɔ ninetalɔi 12.+ 16  Ni ekɛ akɔɔble fee akulashiŋ akekerei enyɔ emamɔ akulashiŋi lɛ anɔ. Akekere lɛ ekome kwɔlɛ ji ninetalɔi enumɔ, ni akekere kroko lɛ hu kwɔlɛ ji ninetalɔi enumɔ. 17  Aye kpãa ni alo ni eko tsa eko tamɔ yaa he samai yɛ akekerei ni mamɔ akulashiŋi lɛ anɔ lɛ eko fɛɛ eko he;+ kpawo yɛ akekere kome he ni kpawo yɛ akekere kroko lɛ he. 18  Ni eye pomegranet aduawai ni eko kã eko nɔ he samai yɛ yaa lɛ he kɛbɔle akekerei ni yɔɔ akulashiŋi lɛ anɔ lɛ ahe kɛkpe; efee nakai yɛ akekerei enyɔ lɛ fɛɛ ahe. 19  Afee akekerei ni mamɔ akulashiŋi ni yɔɔ ablanaa lɛ hiɛ lɛ anɔ lɛ tamɔ lili fɔfɔii, ni fɔfɔii lɛ akwɔlɛ ji ninetalɔi ejwɛ. 20  Akekerei lɛ mamɔ akulashiŋi enyɔ lɛ anɔ yɛ ga ni afee kɛbɔle akulashiŋi lɛ anaabu ni yɔɔ yaa lɛ shishi lɛ nɔ; ni pomegranet aduawai ni yɔɔ akekerei lɛ eko fɛɛ eko he lɛ yibɔ ji 200, ni eko kã eko nɔ kɛbɔle akekerei lɛ eko fɛɛ eko he kɛkpe.+ 21  Ekɛ akulashiŋi lɛ mamɔ sɔlemɔ shĩa* ablanaa lɛ hiɛ.+ Ekɛ akulashiŋ kome ma ninejurɔgbɛ,* ni ewo lɛ gbɛ́i akɛ Yakin,* ni ekɛ akulashiŋ kome hu ma abɛkugbɛ,* ni ewo lɛ gbɛ́i akɛ Boaz.*+ 22  Ni afee akulashiŋ akekerei lɛ tamɔ lili fɔfɔii. No hewɔ lɛ, agbe akulashiŋi lɛ ahe nitsumɔ lɛ naa. 23  Kɛkɛ ni ekɛ dade fee nu taŋki agbo ko ni atsɛɔ lɛ Ŋshɔ lɛ.+ Efee lɛ kokloo, ni kɛjɛ enaabu biɛ kɛyashi enaabu biɛ lɛ, efeɔ ninetalɔi 10,* ni ekwɔlɛ ji ninetalɔi 5, ni kɛ́ okɛ susumɔ kpãa bɔle he lɛ, efeɔ ninetalɔi 30.+ 24  Ni aye tsene tɔi ahe samai+ yɛ enaabu lɛ shishi kɛbɔle he kɛkpe, tsene tɔi nyɔŋma yɛ ninetalɔ kome fɛɛ ninetalɔ kome mli yɛ Ŋshɔ lɛ he kɛkpe, ni ato naa sɛrɛnɛɛ, nakai sɔŋŋ enyɔ kɛbɔle he, ni afee tsene tɔi lɛ kɛ Ŋshɔ lɛ fɛɛ shi kome. 25  Ema tsinahii 12 nɔ,+ 3 miikwɛ kooyi, 3 miikwɛ anai, 3 miikwɛ wuoyi, ni 3 hu miikwɛ bokã; ni Ŋshɔ lɛ ma amɛnɔ, ni amɛ fɛɛ amɛsɛɛ miikwɛ teŋgbɛ. 26  Ni etilɛ tamɔ dɛ̃ lɛɛmɔ;* ni afee enaabu tamɔ kɔɔpoo naabu, tamɔ lili fɔfɔi. Akɛ nu bat* susumɔnii 2,000 ni woɔ mli. 27  Kɛkɛ ni ekɛ akɔɔble fee nu shwiilii nyɔŋma+ lɛ. Nu shwiilii lɛ eko fɛɛ eko kɛlɛ ji ninetalɔi ejwɛ, elɛɛmɔ ji ninetalɔi ejwɛ, ni ekwɔlɛ ji ninetalɔi etɛ. 28  Nɛkɛ ji bɔ ni afee nu shwiilii lɛ: Amɛyɛ mlihɔlɔmɔnii tɛtrɛbii yɛ amɛhe, ni akɛ mlihɔlɔmɔnii tɛtrɛbii lɛ ehɔlɔ mlibelemɔnii lɛ amli. 29  Aye jatai,+ kɛ tsinahii, kɛ kerubim+ ahe samai yɛ mlihɔlɔmɔnii tɛtrɛbii ni hɔlɔ mlibelemɔnii lɛ amli lɛ anɔ, ni nakai samai lɛ nɔŋŋ eko yɛ mlibelemɔnii lɛ anɔ. Ni aye samai koklobii yɛ jatai lɛ kɛ tsinahii lɛ aŋwɛigbɛ kɛ amɛshishigbɛ. 30  Shwiilii lɛ eko fɛɛ eko yɛ akɔɔble tai* ejwɛ kɛ akɔɔble tsei ni hɔlɔ tai lɛ amli, ni dadei ejwɛ ni yɔɔ ekoji lɛ ji nɔ ni hiɛ amɛmli. Ni dadei lɛ ni hiɛ okpolu lɛ yɛ okpolu lɛ shishigbɛ, ni aye samai koklobii yɛ eko fɛɛ eko he. 31  Afee akekere awo okpolu lɛ naa, ni okpolu lɛ mlikwɔlɛ ji ninetalɔ kome; enaa yɛ kokloo, ni kɛjɛ shwiili lɛ naa kɛyashi okpolu lɛ shishi lɛ, fɛɛ feɔ ninetalɔ kome kɛ fã, ni aye samai yɛ shwiili lɛ naa. Ni mlihɔlɔmɔnii tɛtrɛbii ni yɔɔ ehewɔ lɛ, hiɛ koji ejwɛ, ebɛ kokloo. 32  Tai ejwɛ lɛ yɛ mlihɔlɔmɔnii tɛtrɛbii lɛ ashishi, ni dadei ni hiɛ tai lɛ yɛ shwiili lɛ he, ni tai lɛ eko fɛɛ eko kwɔlɛ ji ninetalɔ kome kɛ fã. 33  Ni afee tai lɛ tamɔ ta shwiili tai. Dadei akɛfee tsei ni hiɛ tai lɛ amli lɛ, kɛ nii kokloo ni tai lɛ hɔ he lɛ,* kɛ tai lɛ mli tsei lɛ,* kɛ nɔ ni akɔɔble tsei ni hɔlɔ tai lɛ mli lɛ hɔ mli lɛ.* 34  Dadei ejwɛ ni hiɛ tai lɛ amli lɛ yɛ shwiili lɛ eko fɛɛ eko koji ejwɛ lɛ ahe; asɔ̃ dadei nɛɛ akpɛtɛ shwiili lɛ he. 35  Akɛ nɔ ko kokloo ni kwɔlɛ ji ninetalɔ fã ewo shwiili lɛ naa, ni asɔ̃ ehe dadei lɛ kɛ ehe mlihɔlɔmɔnii tɛtrɛbii lɛ awo shwiili lɛ naa. 36  Eye kerubim, kɛ jatai, kɛ tɛŋ tsei ahe samai ewo ehe dadei kɛ ehe mlihɔlɔmɔnii tɛtrɛbii lɛ anɔ, bɔ ni baaya eko fɛɛ eko nɔ, ni eye samai koklobii kɛbɔle he fɛɛ.+ 37  Nɛkɛ ji bɔ ni efee nu shwiilii nyɔŋma+ lɛ; afee fɛɛ yɛ gbɛ kome nɔ,+ ni fɛɛ hiɛ susumɔ kome kɛ henɔ kome. 38  Efee akɔɔble okpolui nyɔŋma;+ eko fɛɛ eko yeɔ bat susumɔnii 40. Okpolui lɛ eko fɛɛ eko naabu biɛ kɛyashi enaabu biɛ* lɛ feɔ ninetalɔi ejwɛ. Okpolu kome hɔ nu shwiilii lɛ ateŋ eko fɛɛ eko mli. 39  Kɛkɛ ni ekɛ nu shwiilii lɛ enumɔ mamɔ shĩa lɛ ninejurɔgbɛ, ni ekɛ enumɔ hu mamɔ shĩa lɛ abɛkugbɛ, ni ekɛ Ŋshɔ lɛ ma shĩa lɛ ninejurɔgbɛ, kɛmiiya wuoyi-bokã.+ 40  Hiram+ fee okpolui lɛ, kɛ sofii lɛ,+ kɛ tsɛnsii lɛ hu.+ No hewɔ lɛ, Hiram gbe nitsumɔi fɛɛ ni etsu ehã Maŋtsɛ Solomon kɛhã Yehowa shĩa lɛ naa:+ 41  akulashiŋi enyɔ+ lɛ kɛ akekerei ni tamɔ tsɛnsii ni mamɔ akulashiŋi enyɔ lɛ anɔ lɛ; yaa he samai enyɔ+ ni yɔɔ akekerei enyɔ ni tamɔ tsɛnsii ni mamɔ akulashiŋi lɛ anɔ lɛ ahe lɛ; 42  pomegranet aduawai 400+ ni yɔɔ yaa he samai enyɔ lɛ ahe, ni ji pomegranet aduawai ni eko kã eko nɔ yɛ yai lɛ eko fɛɛ eko he, yɛ akekerei enyɔ ni tamɔ tsɛnsii ni mamɔ akulashiŋi enyɔ lɛ anɔ lɛ ahe lɛ; 43  nu shwiilii nyɔŋma+ lɛ, kɛ okpolui nyɔŋma+ ni hɔlɔ nu shwiilii lɛ amli lɛ; 44  Ŋshɔ+ lɛ kɛ tsinahii 12 ni yɔɔ Ŋshɔ lɛ shishi lɛ; 45  kɛ lamululoomɔnii lɛ, sofii lɛ, tsɛnsii lɛ, kɛ nibii krokomɛi lɛ fɛɛ, Hiram kɛ akɔɔble ni atsuu he fee nɛkɛ nibii nɛɛ fɛɛ ehã Maŋtsɛ Solomon kɛhã Yehowa shĩa lɛ. 46  Maŋtsɛ lɛ kɛ nishɔ̃ɔ sũ fee nibii nɛɛ yɛ Sukot kɛ Zaretan teŋ, yɛ Yordan kpokpaa lɛ nɔ. 47  Nibii lɛ afalɛ sɔŋŋ hewɔ lɛ, Solomon eŋmɛɛɛ amɛtsiimɔ. Aleee akɔɔble lɛ tsiimɔ.+ 48  Solomon fee nibii lɛ fɛɛ kɛhã Yehowa shĩa lɛ: shika tsuru afɔleshaa latɛ+ lɛ; shika tsuru okpɔlɔ+ lɛ ni hiɛmaa blodo lɛ maa nɔ lɛ; 49  kanetsei+ ni akɛ shika tsuru krɔŋŋ fee lɛ, enumɔ yɛ ninejurɔgbɛ ni enumɔ hu yɛ abɛkugbɛ yɛ sɛɛtsu lɛ hiɛ; kɛ fɔfɔii+ lɛ, kɛ kanei lɛ, kɛ nibɛɛnii* lɛ, akɛ shika tsuru fee fɛɛ;+ 50  okpolui lɛ, kɛ lagbeenii lɛ,+ kɛ tsɛnsii lɛ, kɛ kɔɔpoi lɛ,+ kɛ lajeenii lɛ,+ akɛ shika tsuru krɔŋŋ fee fɛɛ; kɛ nibii ni sɛɛtsu+ lɛ ni ji He Krɔŋkrɔŋ Fe Fɛɛ lɛ shinai lɛ kɛ sɔlemɔ shĩa+ lɛ shinai lɛ tsɔmɔɔ amɛhe yɛ amɛnɔ lɛ, akɛ shika tsuru fee fɛɛ. 51  No hewɔ lɛ, Maŋtsɛ Solomon gbe nitsumɔi fɛɛ ni esa akɛ etsu yɛ Yehowa shĩa lɛ he lɛ naa. Kɛkɛ ni Solomon kɛ nibii ni etsɛ David ejɔɔ nɔ*+ lɛ ba shĩa lɛ, ni ekɛ jwiɛtɛi lɛ, kɛ shika tsuru lɛ, kɛ nibii lɛ ba ni ekɛbawo Yehowa shĩa lɛ jwetritoohei lɛ.+

Shishigbɛ Niŋmaa

Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
Loo “Shinai lɛ kɛ amɛhe tsei lɛ fɛɛ hiɛ koji ejwɛjwɛɛjwɛ.”
Loo “Akulashiŋi Asa.”
Loo “Maŋtsɛ Sɛi Ablanaa.”
Hebri sht. ŋm., “shĩa lɛ Asa.”
Loo “brɔnz,” yɛ kuku nɛɛ kɛ hei krokomɛi ni abaatsi akɔɔble tã yɛ, yɛ yitso nɛɛ mli.
Ni ji, He Krɔŋkrɔŋ lɛ.
Loo “wuoyigbɛ.”
Eshishi ji, “Ehã [ni ji, Yehowa ahã] Ema Shi Shiŋŋ.”
Loo “kooyigbɛ.”
Eeenyɛ efee akɛ eshishi ji, “Yɛ Hewalɛ Mli.”
Loo “enaa lɛɛmɔ feɔ ninetalɔi 10.”
Aaafee sɛntimitai 7.4 (iŋtsii 2.9). Kwɛmɔ Saji Krokomɛi B14 lɛ.
Bat kome feɔ litai 22 (galɔn 5.81). Kwɛmɔ Saji Krokomɛi B14 lɛ.
Loo “koklolonto.”
Blɔfo mli lɛ, “rim.”
Blɔfo mli lɛ, “spoks.”
Blɔfo mli lɛ, “hɔb.”
Loo “enaa lɛɛmɔ.”
Loo “abɛɛlei.”
Loo “efee lɛ krɔŋkrɔŋ.”