1 Maŋtsɛmɛi 4:1-34

  • Mɛi ni Solomon kɛtsu nii yɛ enɔyeli lɛ mli (1-19)

  • Israel shwere yɛ Solomon nɔyeli lɛ shishi (20-28)

    • Mɔ fɛɛ mɔ yɛ shweshweeshwe yɛ ewain tso kɛ egbami tso shishi (25)

  • Solomon hiɛshikamɔ kɛ abɛi ni ebu (29-34)

4  Maŋtsɛ Solomon ye Israel fɛɛ nɔ.+  Emaŋ onukpai* lɛ agbɛ́ii nɛ: Zadok+ binuu Azaria ji osɔfo lɛ;  Shisha bihii Elihoref kɛ Ahiya ji woloŋmalɔi;+ Ahilud binuu Yehoshafat+ ji saji aŋmalalɔ;  Yehoiada binuu Benaia+ ji mɔ ni kwɛɔ asraafoi lɛ anɔ; Zadok kɛ Abiatar+ ji osɔfoi;  Natan+ binuu Azaria ji mɔ ni kwɛɔ nɔkwɛlɔi lɛ anɔ; Natan binuu Zabud ji osɔfo kɛ maŋtsɛ lɛ naanyo;+  Ahishar ji mɔ ni kwɛɔ maŋtsɛ shĩabii lɛ anɔ; ni Abda binuu Adoniram+ ji mɔ ni kwɛɔ mɛi ni anyɛɔ amɛnɔ kɛhã nitsumɔ lɛ anɔ.+  Solomon yɛ nɔkwɛlɔi 12 yɛ Israel fɛɛ ni bahãa maŋtsɛ lɛ kɛ eshĩabii lɛ niyenii. Amɛteŋ mɔ fɛɛ mɔ yɛ nyɔɔŋ nɔ ni ehãa niyenii yɛ afi fɛɛ afi mli.+  Amɛgbɛ́ii nɛ: Hur binuu lɛ ji mɔ ni kwɛɔ Efraim gɔji lɛ anɔ;  Deker binuu lɛ ji mɔ ni kwɛɔ Makaz, kɛ Shaalbim,+ kɛ Bet-shemesh, kɛ Elon-bet-hanan nɔ; 10  Hesed binuu lɛ ji mɔ ni kwɛɔ Arubot nɔ (Soko kɛ Hefer shikpɔŋ lɛ fɛɛ yɛ eshishi); 11  Abinadab binuu lɛ ji mɔ ni kwɛɔ Dor gɔŋkpɔi lɛ anɔ (eŋa ji Solomon biyoo Tafat); 12  Ahilud binuu Baana ji mɔ ni kwɛɔ Taanak, kɛ Megido,+ kɛ Bet-shean+ fɛɛ, yɛ Zaretan masɛi yɛ Yezreel jɔɔ mli, kɛjɛ Bet-shean kɛtee Abel-mehola aahu kɛyashi Yokmeam+ kpokpaa lɛ nɔ lɛ anɔ; 13  Geber binuu lɛ ji mɔ ni kwɛɔ Ramot-gilead+ nɔ (Manase binuu Yair+ akrowai ni afee mama tsũi yɛ mli yɛ Gilead kpokpaa+ lɛ nɔ lɛ yɛ eshishi; Argob kpokpaa+ lɛ ni yɔɔ Bashan+ lɛ hu yɛ eshishi: maji wuji 60 ni atswa gbogboi awo amɛhe kɛ amɛsɛɛ akɔɔble adabaŋi*); 14  Ido binuu Ahinadab ji mɔ ni kwɛɔ Mahanaim+ nɔ; 15  Ahimaaz ji mɔ ni kwɛɔ Naftali nɔ (ekɛ Solomon biyoo kroko ni atsɛɔ lɛ Basemat lɛ bote gbalashihilɛ mli); 16  Hushai binuu Baana ji mɔ ni kwɛɔ Asher kɛ Bealot nɔ; 17  Parua binuu Yehoshafat ji mɔ ni kwɛɔ Isakar nɔ; 18  Ela binuu Shimei+ ji mɔ ni kwɛɔ Benyamin+ nɔ; 19  Uri binuu Geber ji mɔ ni kwɛɔ Gilead+ shikpɔŋ lɛ, ni ji Sihon,+ Amorbii amaŋtsɛ lɛ, kɛ Og,+ Bashan maŋtsɛ lɛ shikpɔŋ lɛ nɔ. Agbɛnɛ hu, ayɛ nɔkwɛlɔ kome ni kwɛɔ nɔkwɛlɔi nɛɛ fɛɛ anɔ yɛ shikpɔŋ lɛ nɔ. 20  Yuda kɛ Israel yi fa tamɔ ŋshɔnaa shia;+ amɛyeɔ nii ni amɛnuɔ nii ni amɛmii shɛɔ amɛhe.+ 21  Solomon ye maŋtsɛyelii lɛ fɛɛ anɔ, kɛjɛ Faa*+ lɛ naa kɛtee Filistibii lɛ ashikpɔŋ lɛ nɔ, aahu kɛyashi Ejipt husu lɛ naa. Amɛkɛ nikeenii* bahãa Solomon ni amɛsɔmɔ lɛ ewala gbii fɛɛ.+ 22  Solomon gbi kome niyenii ji ashikishaŋ kpakpa kor* susumɔnii 30 kɛ ashikishaŋ kor susumɔnii 60, 23  tsinai ni eshwishwii 10, tsinai ni akɛ amɛ yaa niyeli yɛ ŋa nɔ 20, kɛ gwantɛŋi 100, dani esoro adowai, kɛ baayelɔi, kɛ odabɔi, kɛ loofɔji ni eshwishwii hu. 24  Ejaakɛ lɛ ekwɛɔ Faa+ lɛ biɛgbɛ* fɛɛ anɔ, kɛjɛ Tifsa kɛyashi Gaza,+ kɛ maŋtsɛmɛi fɛɛ ni yɔɔ Faa lɛ biɛgbɛ lɛ nɔ; ni toiŋjɔlɛ yɛ lɛ kɛ kpokpai fɛɛ ni ebɔle ehe lɛ ateŋ.+ 25  Solomon gbii lɛ amli fɛɛ lɛ, Yuda kɛ Israel hi shi shweshweeshwe, mɔ fɛɛ mɔ taa ewain tso kɛ egbami tso shishi, kɛjɛ Dan kɛyashi Beer-sheba. 26  Ni Solomon yɛ okpɔŋɔi atsũi 4,000* kɛhã eshwiilii lɛ kɛ okpɔŋɔi 12,000.*+ 27  Nɔkwɛlɔi nɛɛ ji mɛi ni hãa Maŋtsɛ Solomon kɛ mɔ fɛɛ mɔ ni yeɔ nii yɛ Maŋtsɛ Solomon okpɔlɔ lɛ he lɛ niyenii. Amɛteŋ mɔ fɛɛ mɔ kɛ niyenii baa yɛ nyɔɔŋ ni ato ahã lɛ lɛ mli, ni ehãaa nɔ ko nɔ ko he ahia.+ 28  Ni amɛkɛ barle* kɛ jwɛi hu bahãa okpɔŋɔi lɛ kɛ okpɔŋɔi ni gbalaa shwiilii lɛ yɛ he fɛɛ he ni eko he miihia yɛ, mɔ fɛɛ mɔ kɛbaa yɛ bɔ ni ato akɛ ekɛba lɛ naa. 29  Ni Nyɔŋmɔ hã Solomon hiɛshikamɔ kɛ sanesɛɛkɔmɔ kpele kɛ tsui ni le nii babaoo* tamɔ ŋshɔnaa shia.+ 30  Solomon hiɛ kã shi kwraa fe bɔ ni Bokãgbɛbii lɛ fɛɛ kɛ Ejiptbii lɛ fɛɛ hiɛ kã shi lɛ.+ 31  Ehiɛ kã shi fe gbɔmɛi fɛɛ, ehiɛ kã shi fe Etan,+ Ezrahinyo* lɛ, kɛ Heman,+ kɛ Kalkol,+ kɛ Darda, Mahol bihii lɛ; ni ehe gbɛ́i yɛ jeŋmaji ni yɔɔ ehewɔ lɛ fɛɛ amli.+ 32  Ebu* abɛi 3,000+ ni elalai+ lɛ ayibɔ ji 1,005. 33  Ewieɔ tsei ahe, kɛjɛ tseneduru tso ni yɔɔ Lebanon lɛ nɔ kɛyashi hisopo+ ni kwɛ̃ɔ kɛjɛɔ gbogbo mli lɛ nɔ; ewieɔ kooloi,+ kɛ loofɔji,*+ kɛ kooloi ni wamɔɔ,*+ kɛ nu mli loi ahe. 34  Mɛi ni jɛ jeŋmaji fɛɛ amli lɛ ba amɛbabo Solomon hiɛshikamɔ wiemɔi lɛ toi, maŋtsɛmɛi ni jɛ je lɛŋ he fɛɛ he ni enu bɔ ni ehiɛ kã shi lɛ he lɛ hu ba.+

Shishigbɛ Niŋmaa

Loo “Elumɛi.”
Adabaŋ ji dade loo tso ni akɛbeleɔ shinaa loo agbó sɛɛ kɛlaa sɛɛ.
Ni ji, Yufrate Faa lɛ.
Eeenyɛ efee akɛ, “nikeenii” nɛɛ ji maŋ too ko ni Solomon biɔ yɛ amɛdɛŋ.
Kor kome feɔ litai 220 (kwat 200). Kwɛmɔ Saji Krokomɛi B14 lɛ.
Ni ji, Yufrate Faa lɛ anaigbɛ.
Yibɔ nɛɛ yɛ wolokpoi komɛi amli kɛ agbɛnɛ hu yɛ Biblia lɛ mli fã kroko ni amaniɛbɔɔ nɛɛ je kpo yɛ lɛ mli. Wolokpoi komɛi hu fee lɛ 40,000.
Loo “okpɔŋɔnɔtaralɔi.”
Eji wiiti henɔ ko.
Hebri mli lɛ, “tsui ni mli lɛɛ.”
Loo “Zerahinyo.”
Hebri mli lɛ, “Ewie.”
Loo “bɔɔ nii ni filikiɔ.”
Eeenyɛ efee akɛ, onufui kɛ odaakɛlɛoi kɛ amɛhenɔi kɛ kooloi bibii tamɔ tsatsubii, kakalikai kɛ amɛhenɔi lɛ fata kooloi ni wamɔɔ nɛɛ ahe.