1 Maŋtsɛmɛi 20:1-43

  • Siriabii lɛ wu ta amɛshi Ahab (1-12)

  • Ahab ye Siriabii lɛ anɔ kunim (13-34)

  • Agba ashi Ahab (35-43)

20  Agbɛnɛ Siria+ maŋtsɛ Ben-hadad+ bua esraafoi lɛ fɛɛ anaa, ni ebua maŋtsɛmɛi 32 kɛ amɛkpɔŋɔi kɛ amɛshwiilii anaa hu efata ehe; ekwɔ kɛtee ni eyawo+ Samaria+ he ka, ni ekɛ lɛ wu.  Kɛkɛ ni etsu mɛi kɛtee Israel maŋtsɛ Ahab+ ŋɔɔ yɛ maŋ lɛ mli ni amɛyakɛɛ lɛ akɛ: “Nɔ ni Ben-hadad kɛɛ nɛ,  ‘Ojwiɛtɛi kɛ oshika tsuru lɛ, minɔ ni, ni oŋamɛi kɛ obihii ni hi fe fɛɛ lɛ hu, minɔ ni.’”  Kɛkɛ ni Israel maŋtsɛ lɛ kɛɛ akɛ: “Minuŋtsɔ maŋtsɛ, mi kɛ nibii fɛɛ ni miyɔɔ lɛ, bo onɔ ni tamɔ bɔ ni owie lɛ.”+  Mɛi ni atsu lɛ ku amɛsɛɛ kɛba ekoŋŋ amɛbakɛɛ: “Nɔ ni Ben-hadad kɛɛ nɛ, ‘Mitsu ni abakɛɛ bo akɛ: “Okɛ ojwiɛtɛi, kɛ oshika tsuru, kɛ oŋamɛi, kɛ obihii lɛ ahã mi.”  Shi wɔ nɛkɛ be mli lɛ, matsu mitsuji lɛ kɛba oŋɔɔ, ni amɛbaakpa oshĩa lɛ kɛ otsuji lɛ ashĩai lɛ amli fitsofitso, ni amɛbaaloo nɔ fɛɛ nɔ ni jara wa kɛhã bo lɛ kɛya.’”  Kɛkɛ ni Israel maŋtsɛ lɛ tsɛ shikpɔŋ lɛ nɔ onukpai lɛ fɛɛ ni ekɛɛ amɛ akɛ: “Nyɛfainɛ, nyɛkwɛa nɔ ko, nuu nɛɛ miitao ekɛ sane fɔŋ aba, ejaakɛ etsɔ hiɛ ebi momo ni mikɛ miŋamɛi, kɛ mibihii, kɛ mijwiɛtɛi, kɛ mishika tsuru lɛ ahã lɛ, ni mikɛhã lɛ.”  Kɛkɛ ni onukpai lɛ fɛɛ kɛ maŋbii lɛ fɛɛ kɛɛ lɛ akɛ: “Kaafo edaaŋ, ni kaakpɛlɛ nɔ.”  No hewɔ lɛ, ekɛɛ mɛi ni Ben-hadad tsu kɛba lɛ akɛ: “Nyɛyakɛa minuŋtsɔ maŋtsɛ akɛ, ‘Klɛŋklɛŋ nibii ni obi ni otsulɔ afee lɛ fɛɛ lɛ, mafee, shi nɔ ni obiɔ sɛɛkpee nɛɛ, minyɛŋ mafee.’” No hewɔ lɛ, mɛi ni atsu lɛ tee ni amɛyakɛɛ Ben-hadad. 10  Agbɛnɛ, Ben-hadad tsu ni ayakɛɛ Ahab akɛ: “Nyɔŋmɔi lɛ kɛ mi aye ni amɛkɛ mi aye ekoŋŋ kɛji be ni makpãtã Samaria hiɛ matã lɛ, abaaná mulu ni fa bɔ ni baayi asraafoi ni nyiɛ misɛɛ lɛ ateŋ mɔ fɛɛ mɔ dɛ̃ kɔkɔ obɔ!” 11  Israel maŋtsɛ lɛ kɛɛ akɛ: “Nyɛyakɛa lɛ akɛ, ‘Mɔ ni kpaako ewoɔ etawuu atade lɛ akashwã tamɔ mɔ ni miijie etawuu atade lɛ yɛ ehe kɛmiishwie shi.’”+ 12  No mli lɛ, Ben-hadad kɛ maŋtsɛmɛi ni fata ehe lɛ ta amɛmama tsũi* lɛ amli amɛmiinu dãa, ni be ni abɔ lɛ nɔ ni Ahab kɛɛ lɛ nɔŋŋ lɛ, ekɛɛ etsuji lɛ akɛ: “Nyɛbuaa nyɛhe naa!” No hewɔ lɛ, amɛbua amɛhe naa koni amɛyatutua maŋ lɛ. 13  Shi gbalɔ ko ba Israel maŋtsɛ Ahab+ ŋɔɔ ebakɛɛ: “Nɔ ni Yehowa kɛɛ nɛ, ‘Bɛ ona mɛi babaoo nɛɛ fɛɛ? Naa, mikɛ amɛ miiwo odɛŋ ŋmɛnɛ, ni obaana akɛ miji Yehowa.’”+ 14  Ahab bi lɛ akɛ: “Namɔ nɔ abaatsɔ?” Ni gbalɔ lɛ kɛɛ akɛ: “Nɔ ni Yehowa kɛɛ nɛ, ‘Abaatsɔ kpokpai lɛ anɔ lumɛi lɛ asɔɔlɔi lɛ anɔ.’” No hewɔ lɛ, Ahab bi lɛ akɛ: “Namɔ baaje ta lɛ shishi?” Ni ekɛɛ lɛ akɛ: “Bo!” 15  Kɛkɛ ni Ahab kane kpokpai lɛ anɔ lumɛi lɛ asɔɔlɔi lɛ, ni ená hii 232; no sɛɛ lɛ, ekane Israel hii lɛ fɛɛ, ni ená hii 7,000. 16  Israelbii lɛ je kpo shwane mli be ni Ben-hadad kɛ maŋtsɛmɛi 32 ni fata ehe ni miiye kɛmiibua lɛ lɛ kɛ lɛ fɛɛ miinu dãa ni amɛtɔrɔ yɛ amɛmama tsũi* lɛ amli lɛ. 17  Be ni kpokpai lɛ anɔ lumɛi lɛ asɔɔlɔi lɛ klɛŋklɛŋ je kpo nɔŋŋ lɛ, Ben-hadad tsu mɛi koni amɛyakwɛ nɔ ni yaa nɔ. Amɛbabɔ lɛ amaniɛ akɛ: “Hii komɛi eje kpo kɛjɛ Samaria.” 18  Kɛkɛ ni ekɛɛ akɛ: “Kɛji toiŋjɔlɛ hewɔ amɛbaa lɛ, no lɛ nyɛmɔmɔa amɛ hiɛkãalɔi; ni kɛji ta hewɔ amɛbaa hu lɛ, no hu nyɛmɔmɔa amɛ hiɛkãalɔi.” 19  Shi be ni mɛnɛɛmɛi—ni ji kpokpai lɛ anɔ lumɛi lɛ asɔɔlɔi lɛ kɛ asraafoi ni nyiɛ amɛsɛɛ lɛ—je kpo lɛ, 20  amɛteŋ mɔ fɛɛ mɔ gbe Sirianyo ni ekɛkpe lɛ. Kɛkɛ ni Siriabii lɛ jo foi,+ ni Israelbii lɛ tiu amɛ, ni Siria maŋtsɛ Ben-hadad kɛ okpɔŋɔnɔtaralɔi komɛi tara okpɔŋɔi anɔ kɛjo foi. 21  Shi Israel maŋtsɛ lɛ je kpo ni etee nɔ etswia mɛi ni tara okpɔŋɔi lɛ anɔ lɛ kɛ shwiilii lɛ amli lɛ nii, ni eye Siriabii lɛ anɔ kunim waa diɛŋtsɛ.* 22  Sɛɛ mli lɛ, gbalɔ+ lɛ ba Israel maŋtsɛ lɛ ŋɔɔ ni ebakɛɛ lɛ akɛ: “Yaa ni oyawaje ohe, ni osusu nɔ ni obaafee lɛ he,+ ejaakɛ Siria maŋtsɛ lɛ baakwɔ kɛba ni ekɛ bo abawu ekoŋŋ yɛ afi ni baa lɛ shishijee mli.”*+ 23  Agbɛnɛ, Siria maŋtsɛ lɛ ŋaawolɔi* lɛ kɛɛ lɛ akɛ: “Amɛ-Nyɔŋmɔ lɛ, Gɔji a-Nyɔŋmɔ ni. No hewɔ ni amɛye wɔnɔ kunim lɛ. Shi kɛ́ wɔkɛ amɛ wu yɛ shikpɔŋ tɛtrɛɛ nɔ lɛ, wɔbaaye amɛnɔ kunim. 24  Agbɛnɛ hu feemɔ enɛ: Hã amralofoi lɛ anyiɛ wɔhiɛ yɛ ta lɛ mli moŋ fe maŋtsɛmɛi+ lɛ. 25  Ni obua asraafoi ni falɛ shɛɔ osraafoi ni gboi lɛ anaa; feemɔ nakai nɔŋŋ yɛ okpɔŋɔi kɛ shwiilii lɛ ni ŋmɛɛ bo lɛ hu gbɛfaŋ. Hã wɔkɛ amɛ awu yɛ shikpɔŋ tɛtrɛɛ nɔ, ni bɔ fɛɛ bɔ ni fee lɛ, wɔbaaye amɛnɔ kunim.” No hewɔ lɛ, ebo amɛŋaawoo lɛ toi, ni efee bɔ ni amɛkɛɛ lɛ pɛpɛɛpɛ. 26  Afi lɛ shishijee mli* lɛ, Ben-hadad bua Siriabii lɛ anaa ni amɛkwɔ kɛtee Afek+ koni amɛkɛ Israel ayawu. 27  Abua Israelbii lɛ hu anaa, ni ahã amɛ niyenii koni amɛkɛya ta lɛ, ni amɛje kpo koni amɛkɛ Siriabii lɛ ayakpe. Be ni Israelbii lɛ bɔ nsara yɛ Siriabii lɛ ahiɛgbɛ lɛ, Israelbii lɛ fee tamɔ abotiakui bibii enyɔ, shi Siriabii lɛ eyi shikpɔŋ lɛ nɔ fɛɛ.+ 28  Kɛkɛ ni anɔkwa Nyɔŋmɔ lɛ gbɔmɔ lɛ tee Israel maŋtsɛ lɛ ŋɔɔ eyakɛɛ lɛ akɛ: “Nɔ ni Yehowa kɛɛ nɛ, ‘Akɛni Siriabii lɛ kɛɛ akɛ: “Yehowa lɛ, Gɔji a-Nyɔŋmɔ ni, ni ejeee shikpɔŋ tɛtrɛɛ Nyɔŋmɔ” hewɔ lɛ, mikɛ mɛi babaoo nɛɛ fɛɛ baawo odɛŋ,+ ni obaana lɛɛlɛŋ akɛ miji Yehowa.’”+ 29  Israelbii lɛ kɛ Siriabii lɛ bɔ nsara gbii kpawo bɔ ni nsara kome miikwɛ nsara kroko lɛ hiɛ; ni yɛ gbi kpawo lɛ nɔ lɛ, amɛje ta lɛ shishi. Israelbii lɛ gbe Siria asraafoi 100,000 ni nyiɛɔ amɛnane nɔ, yɛ gbi kome mli. 30  Ni Siriabii ni shwɛ lɛ jo foi kɛtee Afek+ maŋ lɛ mli. Shi maŋ lɛ gbogbo lɛ kumɔ eshwie hii ni shwɛ lɛ ateŋ mɛi 27,000 nɔ. Ben-hadad hu jo foi ni eyabote maŋ lɛ mli, ni eyatee ehe yɛ sɛɛtsu ko mli. 31  Etsuji lɛ kɛɛ lɛ akɛ: “Naa! Wɔnu akɛ Israel shĩa lɛ maŋtsɛmɛi lɛ ji maŋtsɛmɛi ni naa mɔbɔ.* No hewɔ lɛ, ofainɛ, hã wɔkɛ kpekpe aŋmɔlɔ wɔhɛ ni wɔkɛ kpãi afimɔa wɔyitsei ni wɔje kpo kɛya Israel maŋtsɛ lɛ ŋɔɔ. Ekolɛ ekɛ ohe* baake bo ni egbeŋ bo.”+ 32  No hewɔ lɛ, amɛkɛ kpekpei ŋmɔlɔ amɛhɛ, ni amɛkɛ kpãi fimɔ amɛyitsei ni amɛba Israel maŋtsɛ lɛ ŋɔɔ amɛbakɛɛ lɛ akɛ: “Nɔ ni otsulɔ Ben-hadad kɛɛ nɛ, ‘Ofainɛ, okɛ mihe* ake mi.’” Ahab kɛɛ akɛ: “Ehiɛ kã lolo? Minyɛmi ji lɛ.” 33  Hii lɛ ni atsu lɛ bu nɔ ni ewie lɛ akɛ okadi ni tsɔɔ akɛ nɔ ko kpakpa baaba, ni amɛhe nɔ ni ewie lɛ amɛye oya nɔŋŋ, ni amɛkɛɛ: “Onyɛmi ji Ben-hadad lɛɛlɛŋ.” Kɛkɛ ni Ahab kɛɛ akɛ: “Nyɛyaa nyɛyatsɛa lɛ kɛbaa.” Kɛkɛ ni Ben-hadad je kpo kɛtee Ahab ŋɔɔ, ni Ahab hã ekwɔ kɛba eŋɔɔ yɛ shwiili lɛ mli. 34  Ni Ben-hadad kɛɛ lɛ akɛ: “Maji lɛ ni mipapa shɔ̃ yɛ otsɛ dɛŋ lɛ, mikɛbaahã bo ekoŋŋ, ni obaanyɛ okɛmamɔ jarayelihei* yɛ Damasko ohã ohe, tamɔ bɔ ni mipapa fee yɛ Samaria lɛ.” Ahab kɛɛ lɛ akɛ: “Yɛ kpaŋmɔ nɛɛ hewɔ lɛ, mahã oye ohe.” Kɛkɛ ni ekɛ lɛ kpaŋ ni eŋmɛɛ ehe ni etee. 35  Ni gbalɔi abii*+ lɛ eko kɛɛ nuu ko ni ji lɛ gbalɔ lɛ he gbɔmɔ ko yɛ Yehowa wiemɔ naa akɛ: “Ofainɛ, tswaa mi nɔ.”* Shi nuu lɛ ekpɛlɛɛɛ akɛ ebaatswa gbalɔ lɛ nɔ. 36  No hewɔ lɛ, ekɛɛ nuu lɛ akɛ: “Akɛni obooo Yehowa gbee toi hewɔ lɛ, kɛ́ oshi mi nɔŋŋ lɛ, jata ko baagbe bo.” Be ni eshi lɛ sɛɛ lɛ, jata ko kɛ lɛ bakpe ni egbe lɛ. 37  Eyana nuu kroko ni ekɛɛ lɛ akɛ: “Ofainɛ, tswaa mi nɔ.”* Ni nuu lɛ tswa lɛ nɔ ni epila lɛ. 38  Kɛkɛ ni gbalɔ lɛ tee ni eyadamɔ gbɛ lɛ he emɛ maŋtsɛ lɛ, ni ekɛ mama fi ehiŋmɛi nɔ koni akayoo lɛ. 39  Be ni maŋtsɛ lɛ hoɔ lɛ, ebo etsɛ maŋtsɛ lɛ ekɛɛ: “Otsulɔ tee ta lɛ naa he ni wa lɛ, ni nuu ko je kpo kɛba ni ekɛ nuu kroko bahã mi ni ekɛɛ akɛ, ‘Kwɛmɔ nuu nɛɛ nɔ ohã mi. Kɛ́ ejo foi lɛ, okɛ owala baatsake ewala,*+ kɛjeee nakai lɛ okɛ jwiɛtɛi talɛnta* kome baawo ehe nyɔmɔ.’ 40  Ni be ni otsulɔ hiɛ edɔ ni efeɔ nibii krokomɛi lɛ, trukaa lɛ, nuu lɛ jo foi.” No hewɔ lɛ, Israel maŋtsɛ lɛ kɛɛ lɛ akɛ: “No lɛ, nɛkɛ toigbalamɔ nɔŋŋ sa bo;* bo diɛŋtsɛ otsɔ hiɛ okojo ohe momo.” 41  Kɛkɛ ni ejie mama lɛ ni ekɛfi ehiŋmɛi nɔ lɛ oya, ni Israel maŋtsɛ lɛ yoo lɛ akɛ eji gbalɔi lɛ ateŋ mɔ kome.+ 42  Ni gbalɔ lɛ kɛɛ lɛ akɛ: “Nɔ ni Yehowa kɛɛ nɛ, ‘Akɛni oŋmɛɛ nuu ni miwie akɛ agbe lɛ lɛ he hewɔ lɛ,+ okɛ owala baatsake ewala,*+ ni omaŋbii lɛ hu kɛ amɛwala baatsake emaŋbii lɛ anɔ.’”+ 43  Kɛkɛ ni Israel maŋtsɛ lɛ nii fee mɔbɔ, ni emiishɛɛ tã, ni eyi gbɛ kɛtee eshĩa yɛ Samaria.+

Shishigbɛ Niŋmaa

Loo “agbai ni amɛfee.”
Loo “agbai ni amɛfee.”
Loo “egbe Siriabii babaoo.”
Blema Israelbii lɛ afi lɛ jeɔ shishi kɛjɛ March teŋgbɛ.
Loo “tsuji.”
Ni ji, kɛjɛ March kɛmiimɔ April mli.
Loo “ji maŋtsɛmɛi ni jieɔ suɔmɔ ni tsakeee kpo.”
Loo “osusuma.”
Loo “misusuma.”
Loo “gbɛjegbɛi.”
Eeenyɛ efee akɛ, akɛ wiemɔ ni ji “gbalɔi abii” lɛ tsuɔ nii kɛhãa mɛi ni yaa skul ni akɛtsɔɔ gbalɔi anii, loo akɛtsuɔ nii kɛhãa gbalɔi akuu ko.
Loo “gba mi ma.”
Loo “gba mi ma.”
Loo “okɛ osusuma baatsake esusuma.”
Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
Loo “No lɛ, nakai abaakojo bo.”
Loo “okɛ osusuma baatsake esusuma.”