1 Maŋtsɛmɛi 14:1-31

  • Ahiya gba eshi Yeroboam (1-20)

  • Rehoboam ye Yuda nɔ (21-31)

    • Shishak ba koni ekɛ Yerusalem abawu (25, 26)

14  Nakai be lɛ mli lɛ, hela mɔ Yeroboam binuu Abiya.  No hewɔ lɛ, Yeroboam kɛɛ eŋa akɛ: “Ofainɛ, tee shi ni otsake ohe koni akayoo akɛ bo ji Yeroboam ŋa lɛ, ni oya Shilo. Naa! gbalɔ Ahiya yɛ jɛmɛ. Lɛ ji mɔ ni wie akɛ abaawó mi maŋtsɛ yɛ maŋ nɛɛ nɔ lɛ.+  Kɔlɔmɔ blodoi nyɔŋma, kɛ keekii ni akɛ nii eshwã nɔ, ni owó wo tɔ kome, ni oyana lɛ. Ebaatsɔɔ bo nɔ ni baaba wɔbinuu* lɛ nɔ.”  Yeroboam ŋa lɛ fee tamɔ bɔ ni ekɛɛ lɛ lɛ. Ete shi ni etee Shilo+ ni etee Ahiya shĩa lɛ. Ahiya hiŋmɛii jwere nɔ kɛkɛ, shi enaaa nii ejaakɛ egbɔ.  No mli lɛ, Yehowa etsɔ hiɛ ekɛɛ Ahiya akɛ: “Yeroboam ŋa lɛ miiba oŋɔɔ ebabi bo nii yɛ ebinuu lɛ hewɔ, ejaakɛ ebinuu lɛ bɛ hewalɛ. Makɛɛ bo nɔ ni okɛɛ lɛ.* Kɛ́ eba lɛ, ebaatsake ehe koni akayoo lɛ.”  Be ni yoo lɛ bashɛ shinaa lɛ shi ni Ahiya nu enaneshishi gbɛɛmɔ nɔŋŋ lɛ, ekɛɛ lɛ akɛ: “Yeroboam ŋa, ba mli. Mɛni hewɔ otsake ohe koni akayoo bo lɛ? Afã mi ni mikɛɛ bo sane gbonyo.*  Yaa, yaakɛɛ Yeroboam akɛ, ‘Nɔ ni Yehowa, Israel Nyɔŋmɔ lɛ kɛɛ nɛ: “Mi, miwó onɔ yɛ omaŋbii lɛ ateŋ, ni miwó bo mimaŋ Israel hiɛnyiɛlɔ.+  Kɛkɛ ni mishɔ̃ maŋtsɛyeli lɛ yɛ David shĩa lɛ dɛŋ* ni mikɛhã bo.+ Shi ofeko onii tamɔ mitsulɔ David, mɔ ni ye mikitãi lɛ anɔ ni ekɛ etsui fɛɛ nyiɛ misɛɛ lɛ, hɛɛ, mɔ ni fee nɔ ni ja pɛ yɛ mihiɛ lɛ.+  Shi ofee efɔŋ fe mɛi fɛɛ ni tsɔ ohiɛ lɛ, ni ofee nyɔŋmɔ kroko kɛ dade amagai ohã ohe koni okɛwo mimli la,+ ni miji mɔ ni otsɔ osɛɛ ohã lɛ.+ 10  Enɛ hewɔ lɛ, mikɛ sane fɔŋ miiba Yeroboam shĩa lɛ nɔ, ni mafo nuu fɛɛ nuu* ni yɔɔ Yeroboam shĩa lɛ,+ mɛi ni abuuu lɛ po, mashɛ mafɔ yɛ Israel, ni mabɛɛ Yeroboam shĩa lɛ hiahia tamɔ bɔ ni abɛɔ fei kɛyashiɔ eshishi fɛɛ tãa lɛ! 11  Kɛ́ Yeroboam mɔ ko gbo yɛ maŋ lɛ mli lɛ, gbei baaye lɛ; ni kɛ́ emɔ ko gbo yɛ ŋa nɔ lɛ, ŋwɛi loofɔji baaye lɛ, ejaakɛ Yehowa ewie.”’ 12  “Agbɛnɛ tee shi ni oya oshĩa. Kɛ́ oshɛ maŋ lɛ mli nɔŋŋ lɛ, gbekɛ lɛ baagbo. 13  Ni Israel fɛɛ baafó lɛ ni amɛbaafu lɛ, ejaakɛ lɛ pɛ ji Yeroboam weku lɛ mli nyo ni akɛ lɛ baafɔ̃ gbonyobu mli, ejaakɛ lɛ pɛ ji mɔ ni jɛ Yeroboam shĩa lɛ mli ni Yehowa, Israel Nyɔŋmɔ lɛ ena nɔ ko kpakpa yɛ etsui mli. 14  Yehowa baawó maŋtsɛ ko ehã ehe koni eye Israel nɔ, lɛ ebaakpãtã Yeroboam shĩa lɛ hiɛ*+ kɛ́ nakai gbi lɛ shɛ, loo amrɔ nɛɛ po. 15  Yehowa baatswa Israel nɔ, ni Israel baafee tamɔ gãlã* ni miihoso yɛ nu mli, ni ebaafã Israel kɛje nɛkɛ shikpɔŋ kpakpa nɛɛ ni ekɛhã amɛtsɛmɛi lɛ nɔ,+ ni ebaagbɛ amɛ eshwã Yufrate Faa lɛ sɛɛ,+ ejaakɛ amɛfee amɛwɔŋ tsei* lɛ,+ ni amɛkɛwo Yehowa mli la. 16  Ni ebaakwa Israel yɛ eshai ni Yeroboam fee kɛ eshai ni Yeroboam hã Israel fee lɛ hewɔ.”+ 17  Kɛkɛ ni Yeroboam ŋa lɛ te shi ni eyi gbɛ ni etee Tirza. Be ni eshɛ eshĩa lɛ shinaa lɛ shi lɛ, ebinuu lɛ gbo.* 18  No hewɔ lɛ, amɛfu lɛ ni Israel fɛɛ fó lɛ tamɔ bɔ ni Yehowa tsɔ etsulɔ, gbalɔ Ahiya nɔ ewie lɛ. 19  Shi Yeroboam shihilɛ mli saji krokomɛi fɛɛ, bɔ ni ewu tai ehã,+ kɛ bɔ ni eye maŋtsɛ ehã lɛ, aŋmala yɛ Israel maŋtsɛmɛi ayinɔsaji awolo lɛ mli. 20  Bei* abɔ ni Yeroboam kɛye maŋtsɛ ji afii 22, ni egbo;*+ ni ebinuu Nadab baye maŋtsɛ yɛ esɛɛ.+ 21  No mli lɛ, Solomon binuu Rehoboam hu miiye maŋtsɛ yɛ Yuda. Be ni Rehoboam batsɔ maŋtsɛ lɛ, no mli lɛ, eye afii 41, ni eye maŋtsɛ afii 17 yɛ Yerusalem, ni ji maŋ ni Yehowa hala+ yɛ Israel wekui lɛ fɛɛ amli koni egbɛ́i akã nɔ lɛ.+ Atsɛɔ Rehoboam mami akɛ Naama, eji Amon yoo.+ 22  Nakai beiaŋ lɛ, Yuda fee efɔŋ yɛ Yehowa hiɛ,+ ni amɛkɛ eshai ni amɛfee lɛ wo Nyɔŋmɔ mli la fe bɔ ni amɛtsɛmɛi lɛ fee lɛ.+ 23  Amɛ hu amɛmamɔ hei grɔŋŋi, kɛ wɔŋ tɛi, kɛ wɔŋ tsei*+ yɛ gɔŋkpɔ fɛɛ gɔŋkpɔ+ ni kwɔ nɔ kɛ tso fɛɛ tso ni ebu kusuu shishi.+ 24  Agbɛnɛ hu, hii ni hãa hii krokomɛi kɛ amɛ náa bɔlɛ* yɛ jamɔhei lɛ yɛ shikpɔŋ lɛ nɔ.+ Yudabii lɛ fee nibii fɛɛ ni yɔɔ nyaŋemɔ ni jeŋmaji ni Yehowa shwie yɛ Israelbii lɛ ahiɛ lɛ fee lɛ eko. 25  Maŋtsɛ Rehoboam nɔyeli afi ni ji enumɔ lɛ nɔ lɛ, Ejipt maŋtsɛ Shishak+ kwɔ kɛba koni ekɛ Yerusalem abawu.+ 26  Eloo Yehowa shĩa lɛ jwetrii lɛ kɛ maŋtsɛ shĩa lɛ jwetrii lɛ kɛtee.+ Eloo nɔ fɛɛ nɔ kɛtee, eloo shika tsuru tsɛŋi ni Solomon fee lɛ fɛɛ hu kɛtee.+ 27  No hewɔ lɛ, Maŋtsɛ Rehoboam fee akɔɔble tsɛŋi eto najiaŋ, ni ekɛ fɛɛ wo mɛi ni kwɛɔ bulɔi* ni buɔ maŋtsɛ shĩa lɛ agbó lɛ naa lɛ anɔ lɛ adɛŋ. 28  Be fɛɛ be ni maŋtsɛ lɛ baaba Yehowa shĩa lɛ, bulɔi lɛ hiɛɔ tsɛŋi lɛ, ni no sɛɛ lɛ, amɛkɛkuɔ sɛɛ kɛyaa bulɔi atsũ lɛ mli ekoŋŋ. 29  Shi Rehoboam shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli.+ 30  Nakai beiaŋ fɛɛ lɛ, Rehoboam kɛ Yeroboam kɛ amɛhe wu ta.+ 31  Ni Rehoboam gbo* ni afu lɛ yɛ etsɛmɛi lɛ amasɛi yɛ David Maŋ lɛ mli.+ Atsɛɔ emami, Naama, eji Amon yoo.+ Ni ebinuu Abiyam*+ baye maŋtsɛ yɛ esɛɛ.

Shishigbɛ Niŋmaa

Hebri sht. ŋm., “gbekɛ nuu.”
Loo “Kɛɛmɔ lɛ nɛkɛ kɛ nɛkɛ.”
Loo “mikɛɛ bo sane ni wa.”
Hebri sht. ŋm., “Kɛkɛ ni mitse maŋtsɛyeli lɛ kɛje David shĩa lɛ he.”
Hebri sht. ŋm., “mɔ fɛɛ mɔ ni shamɔɔ eshwieɔ gbogbo he.” Wiemɔ ni Hebribii wieɔ kɛgbeɔ hii ahe guɔ.
Hebri sht. ŋm., “mɔ ni baafo Yeroboam shĩa lɛ eshɛ efɔ̃.”
Eji jwɛi ko ni kwɛ̃ɔ yɛ hei ni nui yɔɔ.
Loo “gbekɛ nuu lɛ gbo.”
Loo “Gbii.”
Loo “ekɛ etsɛmɛi lɛ yawɔ.”
Loo “hii ni kɛ hii krokomɛi náa bɔlɛ.”
Hebri sht. ŋm., “foijelɔi.”
Loo “kɛ etsɛmɛi lɛ yawɔ.”
Atsɛɔ lɛ Abiya hu.