Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Yuda 1:1-25

YITSEI LƐ AMLI SAJI

  • Ŋamɔ (1, 2)

  • Bɔ fɛɛ bɔ ni fee lɛ, abaakojo amale tsɔɔlɔi (3-16)

    • Mikael kɛ Abonsam taa naa (9)

    • Henok gbalɛ lɛ (14, 15)

  • Nyɛyaa nɔ nyɛhia Nyɔŋmɔ suɔmɔ lɛ mli (17-23)

  • Aŋɔ anunyam ahã Nyɔŋmɔ (24, 25)

 Yuda, Yesu Kristo nyɔŋ ni ji Yakobo nyɛmi lɛ, kɛyahã mɛi ni atsɛ amɛ ni Nyɔŋmɔ ni ji wɔ-Tsɛ lɛ sumɔɔ amɛ ni abaa amɛ yi kɛhã Yesu Kristo lɛ:  Mɔbɔnalɛ kɛ toiŋjɔlɛ kɛ suɔmɔ aya nɔ afa ahã nyɛ.  Mɛi ni asumɔɔ, kulɛ miibɔ mɔdɛŋ waa akɛ maŋma nyɛ wɔ fɛɛ wɔyiwalaheremɔ lɛ he sane, shi mina akɛ ehe miihia waa ni maŋma nyɛ kɛwo nyɛ hewalɛ ni nyɛmia nyɛhiɛ waa kɛwu hemɔkɛyeli lɛ ni aŋɔhã mɛi krɔŋkrɔŋi lɛ shi kome nyɔŋlo lɛ he ta.  Nɔ hewɔ ji akɛ mɛi komɛi eju shi kɛbabote nyɛteŋ, mɛi ni Ŋmalɛi lɛ ejɛ jeeŋmɔ ewie amɛhe akɛ amɛbaaná fɔbuu kojomɔ nɛɛ; amɛbuuu Nyɔŋmɔ, ni amɛkɛ Nyɔŋmɔ duromɔ lɛ jieɔ amɛnaa kɛfeɔ efɔŋ kɛ kuɛŋtimɔ,* ni amɛkwaa Yesu Kristo, wɔnɔtsɛ* kɛ wɔ-Nuŋtsɔ kome pɛ lɛ.  Eyɛ mli akɛ nyɛle enɛ fɛɛ moŋ, shi miisumɔ ni makai nyɛ akɛ Yehowa* here mɛi kɛje Ejipt shikpɔŋ lɛ nɔ, shi sɛɛ mli lɛ, ekpãtã amɛteŋ mɛi ni ejieee hemɔkɛyeli kpo lɛ ahiɛ.  Ni ŋwɛibɔfoi ni eyaaa nɔ amɛhiii amɛgbɛhe ni aŋɔhã amɛ lɛ, shi moŋ amɛshi amɛ diɛŋtsɛ amɛshihilɛhe lɛ, ekɛ naanɔ kpãi efimɔ amɛ yɛ duŋ kpii mli kɛhã gbi wulu lɛ nɔ kojomɔ lɛ.  Nakai nɔŋŋ Sodom kɛ Gomora kɛ maji ni jwere amɛhe lɛ hu kɛ amɛhe wo bɔlɛnamɔ jeŋba sha* mli vii, ni amɛdi nibii ni heloo lɛ shweɔ ni kɛ adebɔɔ gbɛjianɔtoo eyaaa lɛ asɛɛ; akɛ naanɔ la* gbala amɛtoi, ni eji nɔkwɛmɔnɔ ni bɔɔ wɔ kɔkɔ.  Enɛ fɛɛ sɛɛ lɛ, mɛi nɛɛ hu laa lamɔi, amɛbuleɔ heloo lɛ, amɛbuuu nɔyeli, ni amɛwieɔ anunyam gbɔmɛi ahe wiemɔi fɔji.  Shi be ni ŋwɛibɔfonukpa Mikael kɛ Abonsam taa naa yɛ Mose gbonyo lɛ he ní amɛkpãaa gbee lɛ, ekaaa akɛ eeekojo lɛ, ni ewieee wiemɔ fɔŋ ko, shi moŋ ekɛɛ akɛ: “Yehowa* akã ohiɛ.” 10  Shi mɛi nɛɛ wieɔ nibii fɛɛ ni amɛnuuu shishi diɛŋtsɛ lɛ ahe wiemɔi fɔji. Ni yɛ nibii fɛɛ ni amɛnuɔ shishi yɛ amɛfɔmɔ su naa lɛ agbɛfaŋ lɛ, amɛtamɔ kooloi ni bɛ jwɛŋmɔ, ni amɛyaa nɔ amɛbuleɔ amɛhe yɛ nibii nɛɛ amli. 11  Kpoo hã amɛ, ejaakɛ amɛkɔ Kain gbɛ lɛ, ni amɛhe efee oya kɛkɔ Bileam gbɛ gbonyo lɛ yɛ sɛɛnamɔ hewɔ, ni amɛhiɛ ekpãtã akɛni amɛwieɔ atuatsemɔ wiemɔi taakɛ Kora fee lɛ hewɔ! 12  Mɛnɛɛmɛi kɛ nyɛ yeɔ nii yɛ okpɔlɔi ni nyɛŋmɛɔ kɛtsɔɔ nyɛsuɔmɔ lɛ ashishi, shi amɛji tɛsai ni etee yɛ nu shishi, tookwɛlɔi ni lɛɔ amɛ diɛŋtsɛ amɛhe ni amɛsheee gbeyei; atatui ni nu bɛ amɛmli ni kɔɔyɔɔ kpalaa amɛ kɛyaa kɛbaa; tsei ni wooo yibii yɛ amɛyibiiwoo beiaŋ, ni amɛgboi shii enyɔ,* ni afãmɔ amɛ kɛ amɛshishifãi; 13  ŋshɔkei ni yɔɔ hamahama ni tswaa afui, ní jieɔ amɛ diɛŋtsɛ amɛhiɛgbejianii amɛshwieɔ; ŋulamii ni kpaa shi kɛkɛ, ní duŋ kpii lɛ mli amɛbaahi kɛya naanɔ. 14  Hɛɛ, Henok, ni eji mɔ kpawo nɔ kɛjɛ Adam nɔ lɛ hu gba yɛ amɛhe be ni ekɛɛ akɛ: “Naa! Yehowa* kɛ ekrɔŋkrɔŋbii akpei nyɔŋmai abɔ lɛ ba 15  koni ebakojo mɛi fɛɛ, ni ebu mɛi fɛɛ ni ebuuu Nyɔŋmɔ lɛ fɔ yɛ amɛnishaianii fɛɛ ni amɛfee kɛtsɔɔ akɛ amɛsheee Nyɔŋmɔ gbeyei lɛ, kɛ wiemɔi ni wawai fɛɛ ni nɔshafeelɔi ni ebuuu Nyɔŋmɔ lɛ wie amɛshi lɛ lɛ hewɔ.” 16  Mɛi nɛɛ wieɔ huhuuhu, amɛtɔkeɔ yɛ amɛshihilɛ he, amɛnyiɛɔ nibii ni amɛ diɛŋtsɛ amɛshweɔ lɛ asɛɛ, amɛnaabu wieɔ naafuu wiemɔi, ni yɛ nakai be lɛ mli nɔŋŋ lɛ, amɛwoɔ mɛi ayiteŋ mulu* yɛ amɛ diɛŋtsɛ amɛsɛɛnamɔ hewɔ. 17  Shi mɛi ni asumɔɔ, nyɛ lɛ, nyɛkaia wiemɔi ni wɔ-Nuŋtsɔ Yesu Kristo bɔfoi lɛ wie be ko ni eho* lɛ, 18  bɔ ni amɛfɔɔ nyɛ kɛɛmɔ akɛ: “Yɛ naagbee be lɛ mli lɛ, hefɛoyelɔi baaba, mɛi ni baanyiɛ nibii fɔji ni amɛ diɛŋtsɛ amɛshweɔ lɛ asɛɛ” lɛ. 19  Mɛnɛɛmɛi ji mɛi ni kɛ mligbalamɔi baa, mɛi ni feɔ amɛnii tamɔ kooloi,* ní mumɔ lɛ kudɔɔɔ amɛ.* 20  Shi mɛi ni asumɔɔ, nyɛ lɛ, nyɛtswaa nyɛhe nyɛmaa nyɛhemɔkɛyeli ni yɔɔ krɔŋkrɔŋ fe fɛɛ lɛ nɔ, ni nyɛsɔlea yɛ mumɔ krɔŋkrɔŋ lɛ kɛ gbeekpamɔ naa, 21  bɔ ni afee ni nyɛya nɔ nyɛhi Nyɔŋmɔ suɔmɔ lɛ mli, be mli ni nyɛmɛɔ wɔ-Nuŋtsɔ Yesu Kristo mɔbɔnalɛ ní baahã nyɛná naanɔ wala lɛ. 22  Agbɛnɛ hu, nyɛyaa nɔ nyɛnaa mɛi ni yiŋ feɔ amɛ enyɔnyɔɔnyɔ lɛ mɔbɔ; 23  nyɛsháa amɛ kɛjɛa la lɛ mli kɛherea amɛ. Shi nyɛyaa nɔ nyɛnaa mɛi krokomɛi hu mɔbɔ, ni nyɛkɛ gbeyeishemɔ afea nakai, ni yɛ nakai be lɛ mli nɔŋŋ lɛ nyɛnyɛa atade ní akɛ heloo lɛ ewo lɛ muji lɛ tete. 24  Agbɛnɛ, lɛ mɔ ni eyɔɔ hewalɛ ni ekɛbaabu nyɛhe koni nyɛkatɛrɛ, ni ehã nyɛkɛ miishɛɛ babaoo adamɔ shi akɛ mɛi ni kpa ko bɛ amɛhe yɛ enunyam lɛ hiɛ, 25  Nyɔŋmɔ kome pɛ, ni ji wɔ-Yiwalaherelɔ kɛtsɔ Yesu Kristo, wɔ-Nuŋtsɔ lɛ nɔ lɛ, lɛ aŋɔ anunyam, agbojee, hewalɛ, kɛ nɔyeli ahã kɛjɛ naanɔi anaanɔ, amrɔ nɛɛ, kɛ agbɛnɛ kɛmiiya naanɔi anaanɔ. Amen.

Shishigbɛ Niŋmaa

Aloo “kɛbaa jeŋba gbonyo ni efeee amɛ hiɛgbele.” Hela, a·selʹgei·a. Kwɛmɔ Wiemɔi Titrii Amligbalamɔ lɛ.
Aloo “mɔ ni nɔ ji wɔ.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Enɛ tsɔɔ naanɔ hiɛkpatamɔ. Kwɛmɔ Wiemɔi Titrii Amligbalamɔ lɛ, “Gehena.”
Kwɛmɔ Wiemɔi Titrii Amligbalamɔ lɛ.
Aloo “amɛgboi kwraa.”
Kwɛmɔ Wiemɔi Titrii Amligbalamɔ lɛ.
Aloo “amɛnyaa mɛi ahe.”
Aloo “nyɛkaia nibii ni . . . bɔfoi lɛ gba.”
Aloo “heloŋ gbɔmɛi.”
Sht. ŋm., “ní bɛ mumɔ lɛ.”