Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Yohane 8:12-59

8  12  Kɛkɛ ni Yesu kɛ amɛ wie ekoŋŋ ekɛɛ: “Miji je lɛ la lɛ. Mɔ fɛɛ mɔ ni nyiɛɔ misɛɛ lɛ, enyiɛŋ duŋ mli dɔŋŋ, shi moŋ ebaaná wala la lɛ.” 13  No hewɔ lɛ, Farisifoi lɛ kɛɛ lɛ akɛ: “Oyeɔ bo diɛŋtsɛ ohe odase; odase ni oyeɔ lɛ, jeee anɔkwale ni.” 14  Yesu hã amɛ hetoo ekɛɛ: “Kɛ́ miyeɔ mi diɛŋtsɛ mihe odase po lɛ, midase lɛ anɔkwale ni, ejaakɛ mile he ni mijɛ kɛba kɛ he ni miyaa. Shi nyɛ lɛ, nyɛleee he ni mijɛ kɛba kɛ he ni miyaa. 15  Nyɛkojoɔ yɛ heloo naa;* mi lɛ mikojooo mɔ ko mɔ ko kwraa. 16  Ni kɛ̃lɛ, kɛ́ mikojo po lɛ, mikojomɔ lɛ anɔkwale ni, ejaakɛ jeee mi kome ni, shi Tsɛ lɛ ni tsu mi lɛ kɛ mi yɛ. 17  Kɛfata he lɛ, aŋma yɛ nyɛ diɛŋtsɛ nyɛ-Mla lɛ mli akɛ: ‘Mɛi enyɔ odase lɛ, anɔkwale ni.’ 18  Miyeɔ mi diɛŋtsɛ mihe odase, ni Tsɛ lɛ ni tsu mi lɛ hu yeɔ mihe odase.” 19  Kɛkɛ ni amɛkɛɛ lɛ akɛ: “Nɛgbɛ o-Tsɛ lɛ yɔɔ?” Yesu hã hetoo akɛ: “Nyɛleee mi, asaŋ nyɛleee mi-Tsɛ hu. Eji nyɛle mi kulɛ, nyɛbaale mi-Tsɛ hu.” 20  Ewie wiemɔi nɛɛ yɛ oniatsumɔhe lɛ, be ni etsɔɔ nii yɛ sɔlemɔwe lɛ. Shi mɔ ko mɔ ko mɔɔɔ lɛ, ejaakɛ eŋmɛlɛtswaa lɛ shɛko. 21  No hewɔ lɛ, ekɛɛ amɛ ekoŋŋ akɛ: “Mi lɛ, miishi kɛmiiya, ni nyɛbaatao mi, ni kɛ̃lɛ nyɛbaagboi yɛ nyɛhe esha lɛ mli. He ni miyaa lɛ, nyɛnyɛŋ jɛmɛ nyɛba.” 22  Kɛkɛ ni Yudafoi lɛ bɔi kɛɛmɔ akɛ: “Ani ebaagbe ehe? Ejaakɛ ekɛɛ, ‘He ni miyaa lɛ, nyɛnyɛŋ jɛmɛ nyɛba.’” 23  Etee nɔ ekɛɛ amɛ akɛ: “Nyɛ lɛ, nyɛjɛ shishi nɛɛ; mi lɛ, mijɛ ŋwɛi. Nyɛ lɛ, nyɛjɛ je nɛɛ mli; mi lɛ, mijɛɛɛ je nɛɛ mli. 24  No hewɔ ni mikɛɛ nyɛ akɛ: Nyɛbaagboi yɛ nyɛhe eshai lɛ amli lɛ. Ejaakɛ kɛ́ nyɛheee nyɛyeee akɛ mi ni lɛ, nyɛbaagboi yɛ nyɛhe eshai lɛ amli.” 25  No hewɔ lɛ, amɛbɔi lɛ kɛɛmɔ akɛ: “Namɔ ji bo?” Yesu here nɔ ekɛɛ amɛ akɛ: “Mɛni hewɔ kwraa mikɛ nyɛ wieɔ lɛ? 26  Miyɛ nibii pii ni mawie yɛ nyɛhe ni miyɛ nibii pii ni makojo. Anɔkwa sane ji akɛ, mɔ ni tsu mi lɛ anɔkwafo ni, ni nibii tuuntu ni minu yɛ enaa lɛ, nomɛi miwieɔ yɛ je lɛ mli lɛ.” 27  Amɛyanuuu shishi akɛ Tsɛ lɛ he ekɛ amɛ wieɔ lɛ. 28  Kɛkɛ ni Yesu kɛɛ: “Kɛ́ nyɛná nyɛwó gbɔmɔ Bi lɛ nɔ lɛ,* no ni nyɛbaale akɛ mi ni, ni akɛ mitooo mi diɛŋtsɛ miyiŋ mifeee nɔ ko; shi nibii ni Tsɛ lɛ etsɔɔ mi lɛ, nomɛi miwieɔ. 29  Ni mɔ ni tsu mi lɛ kɛ mi yɛ; eshiko mi kome, ejaakɛ mifeɔ nɔ ni sa ehiɛ be fɛɛ be.” 30  Be ni ewieɔ nibii nɛɛ, mɛi babaoo ná hemɔkɛyeli yɛ emli. 31  Kɛkɛ ni Yesu tee nɔ ekɛɛ Yudafoi ni ehe lɛ eye lɛ akɛ: “Kɛji nyɛhi miwiemɔ lɛ mli lɛ, belɛ mikaselɔi ji nyɛ lɛɛlɛŋ, 32  ni nyɛbaale anɔkwale lɛ, ni anɔkwale lɛ baahã nyɛye nyɛhe.” 33  Amɛhere lɛ nɔ akɛ: “Abraham seshibii ji wɔ, ni wɔtsɔmɔko mɔ ko nyɔji pɛŋ. Te feɔ tɛŋŋ ni okɛɔ akɛ, ‘Nyɛbaaye nyɛhe’ lɛ?” 34  Yesu hã amɛ hetoo akɛ: “Lɛɛlɛŋ, lɛɛlɛŋ, miikɛɛ nyɛ akɛ, mɔ fɛɛ mɔ ni feɔ esha lɛ, esha nyɔŋ ji lɛ. 35  Kɛfata he lɛ, nyɔŋ ehiii we kɛyaaa naanɔ; bi ji mɔ ni hiɔ shi kɛyaa naanɔ. 36  No hewɔ lɛ, kɛ́ Bi lɛ hã nyɛye nyɛhe lɛ, nyɛbaaye nyɛhe lɛɛlɛŋ. 37  Mile akɛ Abraham seshibii ji nyɛ. Shi nyɛmiitao nyɛgbe mi, ejaakɛ miwiemɔ shwereee yɛ nyɛteŋ. 38  Nibii ni mina be mli ni mikɛ mi-Tsɛ yɔɔ lɛ, nomɛi miwieɔ, shi nyɛ hu, nibii ni nyɛnu yɛ nyɛtsɛ lɛ naa lɛ, nomɛi nyɛfeɔ.” 39  Amɛhã lɛ hetoo akɛ: “Wɔtsɛ ji Abraham.” Yesu kɛɛ amɛ akɛ: “Abraham bii ji nyɛ kulɛ, nyɛbaatsu Abraham nitsumɔi lɛ. 40  Shi amrɔ nɛɛ nyɛmiitao nyɛgbe mi, mi mɔ ni mikɛɔ nyɛ anɔkwale ni minu yɛ Nyɔŋmɔ naa lɛ. Abraham efeee enɛ. 41  Nyɛ lɛ, nyɛtsɛ nitsumɔi nyɛtsuɔ lɛ.” Amɛkɛɛ lɛ akɛ: “Afɔɔɔ wɔ yɛ jeŋba sha* mli; Tsɛ kome wɔyɔɔ, lɛ ji Nyɔŋmɔ.” 42  Yesu kɛɛ amɛ akɛ: “Eji Nyɔŋmɔ ji nyɛ-Tsɛ kulɛ, nyɛbaasumɔ mi, ejaakɛ Nyɔŋmɔ ŋɔɔ mijɛ kɛba ni miyɔɔ biɛ lɛ. Mi diɛŋtsɛ mitooo miyiŋ mibaaa, shi moŋ nakai mɔ lɛ tsu mi. 43  Mɛni hewɔ nyɛnuuu nɔ ni miwieɔ lɛ shishi lɛ? Ejaakɛ nyɛnyɛɛɛ miwiemɔ lɛ toi nyɛbo. 44  Nyɛ lɛ, nyɛjɛ nyɛtsɛ ni ji Abonsam lɛ mli, ni nyɛsumɔɔ akɛ nyɛfee nyɛtsɛ lɛ suɔmɔnaa nii. Nakai mɔ lɛ gbɔmɔgbelɔ ji lɛ be ni eje shishi lɛ,* ni edamɔɔɔ shi shiŋŋ yɛ anɔkwale lɛ mli, ejaakɛ anɔkwale bɛ emli. Kɛ́ eemale lɛ, lɛ diɛŋtsɛ esubaŋ kpo ejieɔ lɛ, ejaakɛ amalelɔ kɛ malemɔ tsɛ ji lɛ. 45  Nɔ ni tamɔɔɔ nakai lɛ, akɛni mi lɛ, miwieɔ anɔkwale hewɔ lɛ, nyɛheee mi nyɛyeee. 46  Nyɛteŋ namɔ buɔ mi fɔ akɛ mifee esha? Kɛji miwie anɔkwale lɛ, mɛni hewɔ nyɛheee mi nyɛyeee lɛ? 47  Mɔ ni jɛ Nyɔŋmɔ ŋɔɔ lɛ, eboɔ Nyɔŋmɔ wiemɔi atoi. No hewɔ ni nyɛbooo toi lɛ, ejaakɛ nyɛjɛɛɛ Nyɔŋmɔ ŋɔɔ.” 48  Yudafoi lɛ hã lɛ hetoo akɛ: “Ani ejeee anɔkwale akɛ, wɔkɛɛ akɛ, ‘Samarianyo ji bo ni oyɛ daimonio’?” 49  Yesu hã hetoo akɛ: “Mibɛ daimonio, shi mikɛ woo hãa mi-Tsɛ, ni nyɛ lɛ nyɛgbeɔ mihe guɔ. 50  Shi mitaooo anunyam mihãaa mi diɛŋtsɛ mihe; Mɔ ko yɛ ni taoɔ ni ekojoɔ. 51  Lɛɛlɛŋ, lɛɛlɛŋ, miikɛɛ nyɛ akɛ, kɛji mɔ ko ye miwiemɔ nɔ lɛ, enaŋ gbele kɔkɔɔkɔ.” 52  Yudafoi lɛ kɛɛ lɛ akɛ: “Agbɛnɛ wɔná wɔle akɛ oyɛ daimonio. Abraham gbo, ni gbalɔi lɛ hu gboi, shi bo lɛ okɛɛ, ‘Kɛji mɔ ko ye miwiemɔ nɔ lɛ, esaŋ enaa gbele kɔkɔɔkɔ.’ 53  Ani ofe wɔtsɛ Abraham ni gbo lɛ? Gbalɔi lɛ hu gboi. Namɔ okɛɔ akɛ oji?” 54  Yesu hã hetoo akɛ: “Kɛji miwo mi diɛŋtsɛ mihiɛ nyam lɛ, minunyam lɛ jeee nɔ ko. Mi-Tsɛ ji mɔ ni woɔ mihiɛ nyam, mɔ ni nyɛkɛɔ akɛ lɛ ji nyɛ-Nyɔŋmɔ lɛ. 55  Kɛ̃lɛ nyɛleko lɛ, shi mi lɛ mile lɛ. Ni kɛ́ mikɛɛ mileee lɛ lɛ, matsɔ amalelɔ tamɔ nyɛ. Shi mile lɛ ni miyeɔ ewiemɔ nɔ. 56  Nyɛtsɛ Abraham mii shɛ ehe naakpa yɛ hiɛnɔkamɔ ni ená akɛ ebaana migbi lɛ hewɔ, ni ena ni emii shɛ ehe.” 57  Kɛkɛ ni Yudafoi lɛ kɛɛ lɛ akɛ: “Oyeko afii nyɔŋmai enumɔ po, ni kɛ̃lɛ ona Abraham lo?” 58  Yesu kɛɛ amɛ akɛ: “Lɛɛlɛŋ, lɛɛlɛŋ, miikɛɛ nyɛ akɛ, dani Abraham baaba shihilɛ mli lɛ, miyɛ.” 59  Enɛ hewɔ lɛ, amɛkɔlɔ tɛi akɛ amɛkɛbaatswia lɛ, shi Yesu tee ehe ni eje sɔlemɔwe lɛ etee.

Shishigbɛ Niŋmaa

Aloo “yɛ gbɔmɛi ataomɔ nii anaa.”
Ni tsɔɔ akɛ, kɛ́ agbe lɛ yɛ tso jaŋŋ lɛ nɔ lɛ.
Aloo “bɔlɛnamɔ jeŋba sha.” Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Aloo “kɛjɛ shishijee lɛ.”