Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Yohane 7:1-52

7  Enɛ sɛɛ lɛ, Yesu tee nɔ enyiɛ kɛkpa Galilea, shi esumɔɔɔ akɛ efeɔ nakai yɛ Yudea, ejaakɛ Yudafoi lɛ miitao lɛ agbe.  Shi Yudafoi lɛ Agbai* Agbi Jurɔ lɛ miibɛŋkɛ.  No hewɔ lɛ, enyɛmimɛi lɛ kɛɛ lɛ akɛ: “Jee biɛ ni oya Yudea, koni okaselɔi lɛ hu ana nitsumɔi ni otsuɔ lɛ.  Ejaakɛ mɔ ko mɔ ko bɛ ni miitao ni ale lɛ yɛ maŋ, ní efeɔ nɔ ko yɛ teemɔŋ. Akɛni oofee nibii nɛɛ hewɔ lɛ, jiemɔ ohe shi otsɔɔ je lɛ.”  Anɔkwa, no mli lɛ enyɛmimɛi lɛ ejieee hemɔkɛyeli kpo yɛ emli.  No hewɔ lɛ, Yesu kɛɛ amɛ akɛ: “Mibe lɛ shɛko, shi nyɛ lɛ, daa nɛɛ, nyɛbe eshɛ.  Je lɛ bɛ yiŋtoo ko ni ebaadamɔ nɔ enyɛ nyɛ, shi mi lɛ, enyɛɔ mi, ejaakɛ miyeɔ ehe odase akɛ enitsumɔi lɛ nitsumɔi fɔji ni.  Nyɛ lɛ, nyɛkwɔa kɛyaa gbi jurɔ lɛ; mi lɛ, mikwɔŋ kɛyaŋ gbi jurɔ nɛɛ bianɛ, ejaakɛ mibe lɛ shɛko.”  No hewɔ lɛ, be ni ekɛɛ amɛ nibii nɛɛ etã lɛ, etee nɔ ehi Galilea. 10  Shi be ni enyɛmimɛi lɛ ekwɔ kɛtee gbi jurɔ lɛ sɛɛ lɛ, lɛ hu ekwɔ kɛtee, shi jeee yɛ faŋŋ, moŋ lɛ yɛ teemɔŋ. 11  No hewɔ lɛ, Yudafoi lɛ bɔi lɛ taomɔ yɛ gbijurɔyeli lɛ shishi ni amɛkɛɛ: “Nɛgbɛ nakai nuu lɛ yɔɔ?” 12  Ni awiewiee ablɛbi pii yɛ asafoku lɛ teŋ yɛ ehewɔ. Mɛi komɛi kɛɛ: “Gbɔmɔ kpakpa ji lɛ.” Mɛi krokomɛi hu kɛɛ: “Ejeee gbɔmɔ kpakpa. Elakaa asafoku lɛ.” 13  Anɔkwa, mɔ ko mɔ ko ewieee ehe yɛ mɛi ahiɛ ejaakɛ amɛmiishe Yudafoi lɛ agbeyei. 14  Be ni shɛ gbijurɔyeli lɛ teŋgbɛ lɛ, Yesu kwɔ kɛtee sɔlemɔwe lɛ ni eyabɔi nitsɔɔmɔ. 15  Ni Yudafoi lɛ anaa kpɛ amɛhe amɛkɛɛ: “Te nuu nɛɛ fee tɛŋŋ ele Ŋmalɛi lɛ* amli nɛkɛ, be mli ni ekaseko nii yɛ skul* ko kwraa mli lɛ?” 16  Yesu hu hã amɛ hetoo ekɛɛ: “Nɔ ni mitsɔɔ lɛ, jeee minɔ ni, shi moŋ mɔ ni tsu mi lɛ nɔ ni. 17  Kɛji mɔ ko miisumɔ akɛ efee E-suɔmɔnaa nii lɛ, ebaale kɛji nitsɔɔmɔ lɛ jɛ Nyɔŋmɔ ŋɔɔ aloo mi diɛŋtsɛ mitoɔ miyiŋ miwieɔ. 18  Mɔ fɛɛ mɔ ni toɔ lɛ diɛŋtsɛ eyiŋ ewieɔ lɛ, eetao lɛ diɛŋtsɛ enunyam; shi mɔ fɛɛ mɔ ni taoɔ mɔ ni tsu lɛ lɛ anunyam lɛ, anɔkwafo ji lɛ, ni nɔ ko ni ejaaa bɛ emli. 19  Mose hã nyɛ Mla lɛ, aloo jeee nakai? Shi nyɛteŋ mɔ ko mɔ ko yeee Mla lɛ nɔ. Mɛni hewɔ nyɛtaoɔ mi nyɛgbe lɛ?” 20  Asafoku lɛ hã hetoo akɛ: “Oyɛ daimonio. Namɔ taoɔ bo agbe?” 21  Yesu hã amɛ hetoo akɛ: “Nɔ kome pɛ mifee, ni nyɛ fɛɛ nyɛnaa ekpɛ nyɛhe nɛɛ. 22  Enɛ hewɔ Mose ŋɔ ketiafoo lɛ ehã nyɛ lɛ—jeee akɛ ejɛ Mose ŋɔɔ, shi moŋ ejɛ tsɛmɛi lɛ aŋɔɔ—ni nyɛfoɔ mɔ ketia yɛ Hejɔɔmɔ Gbi nɔ. 23  Kɛ́ afoɔ gbɔmɔ ketia yɛ Hejɔɔmɔ Gbi nɔ koni akaku Mose Mla lɛ mli lɛ, ani nyɛ lɛ, nyɛmli efu mi waa akɛni mihã mɔ ko he wa lɛ jogbaŋŋ yɛ Hejɔɔmɔ Gbi nɔ lɛ hewɔ? 24  Nyɛkpaa kponɔgbɛ ni nyɛkwɛɔ kɛkojoɔ lɛ, moŋ lɛ nyɛkojoa jalɛ kojomɔ.” 25  Kɛkɛ ni Yerusalembii lɛ ateŋ mɛi komɛi bɔi kɛɛmɔ akɛ: “Mɔ nɛ ji mɔ ni amɛtaoɔ lɛ amɛgbe lɛ, aloo jeee lɛ ni? 26  Ni kɛ̃lɛ, naa! eewie yɛ mɛi ahiɛ, ni amɛkɛɛɛ lɛ nɔ ko. Ani nɔyelɔi lɛ ená ele kɛ nɔmimaa akɛ mɔ nɛ ji Kristo lɛ? 27  Nɔ ni tamɔɔɔ nakai lɛ, wɔle he ni nuu nɛɛ jɛ; kɛ̃lɛ kɛ́ Kristo lɛ ba lɛ, mɔ ko mɔ ko leŋ he ni ejɛ.” 28  Kɛkɛ ni be ni Yesu tsɔɔ nii yɛ sɔlemɔwe lɛ, ebo ekɛɛ: “Nyɛle mi ni nyɛle he ni mijɛ. Ni mitooo mi diɛŋtsɛ miyiŋ mibaaa, shi mɔ ni tsu mi lɛ yɛ lɛɛlɛŋ, ni nyɛleee lɛ. 29  Mile lɛ, ejaakɛ najiaŋdamɔlɔ ni jɛ eŋɔɔ ji mi, ni nakai mɔ lɛ tsu mi.” 30  No hewɔ lɛ, amɛje shishi amɛtao bɔ ni amɛbaafee amɛmɔ lɛ, shi mɔ ko mɔ ko kɛ enine etaaa ehe ejaakɛ eŋmɛlɛtswaa lɛ shɛko. 31  Fɛɛ sɛɛ lɛ, asafoku lɛ ateŋ mɛi pii ná hemɔkɛyeli yɛ emli, ni amɛkɛɛ akɛ: “Kɛ́ Kristo lɛ ba lɛ, ani ebaafee okadii babaoo fe nɔ ni nuu nɛɛ feɔ nɛɛ?” 32  Farisifoi lɛ nu akɛ asafoku lɛ miiwie ablɛbiwiemɔi nɛɛ yɛ ehe, ni osɔfoi tsiifoi lɛ kɛ Farisifoi lɛ tsu bulɔi koni amɛyamɔ lɛ. 33  Kɛkɛ ni Yesu kɛɛ: “Mikɛ nyɛ baahi shi be fioo dani maya mɔ ni tsu mi lɛ ŋɔɔ. 34  Nyɛbaatao mi, shi nyɛnaŋ mi, ni he ni miyɔɔ lɛ, nyɛnyɛŋ jɛmɛ nyɛba.” 35  No hewɔ lɛ, Yudafoi lɛ kɛɛkɛɛ yɛ amɛteŋ akɛ: “Nɛgbɛ nuu nɛɛ eto eyiŋ akɛ ebaaya, ni no hewɔ lɛ wɔnaŋ lɛ lɛ? Ani eeenyɛ efee akɛ eto eyiŋ akɛ ebaaya Yudafoi ni egbɛ eshwã Helabii lɛ ateŋ lɛ aŋɔɔ koni eyatsɔɔ Helabii lɛ anii? 36  Mɛni etaoɔ etsɔɔ lɛ be ni ekɛɛ akɛ, ‘Nyɛbaatao mi, shi nyɛnaŋ mi, ni he ni miyɔɔ lɛ, nyɛnyɛŋ jɛmɛ nyɛba’ lɛ?” 37  Naagbee gbi lɛ nɔ, ni ji gbijurɔyeli lɛ gbi wulu lɛ nɔ lɛ, Yesu damɔ shi ni ebo ekɛɛ: “Kɛ́ kumai miiye mɔ ko lɛ, eba miŋɔɔ ni ebanu nu. 38  Mɔ fɛɛ mɔ ni náa hemɔkɛyeli yɛ mimli lɛ, taakɛ ŋmalɛ lɛ ekɛɛ lɛ: ‘Fai ni wala nu yɔɔ mli baajɛ emli tɔ̃ɔ aho.’” 39  Shi ewie enɛ kɛkɔ mumɔ ni mɛi ni náa hemɔkɛyeli yɛ emli lɛ miiba abaná lɛ he; no mli lɛ mumɔ lɛ bɛ, ejaakɛ anáko awo Yesu hiɛ nyam. 40  Asafoku lɛ ateŋ mɛi komɛi ni nu wiemɔi nɛɛ bɔi kɛɛmɔ akɛ: “Gbalɔ lɛ nɛ lɛɛlɛŋ.” 41  Mɛi krokomɛi hu miikɛɛ akɛ: “Kristo lɛ nɛ.” Shi mɛi komɛi hu kɛɛ akɛ: “Kristo lɛ, ani Galilea ebaajɛ? 42  Ani ŋmalɛ lɛ ekɛɛɛ akɛ Kristo lɛ baajɛ David seshi lɛ mli, ni ebaajɛ Betlehem, akrowa ni David hi mli lɛ mli?” 43  No hewɔ lɛ, mligbalamɔ ba asafoku lɛ teŋ yɛ ehewɔ. 44  Kulɛ amɛteŋ mɛi komɛi miitao akɛ amɛmɔ lɛ, shi mɔ ko mɔ ko kɛ enine etaaa ehe. 45  Kɛkɛ ni bulɔi lɛ ku amɛsɛɛ kɛtee osɔfoi tsiifoi lɛ kɛ Farisifoi lɛ aŋɔɔ, ni amɛbi bulɔi lɛ akɛ: “Mɛni hewɔ nyɛkɛ lɛ baaa lɛ?” 46  Bulɔi lɛ here nɔ akɛ: “Gbɔmɔ ko gbɔmɔ ko ewieko nɛkɛ dã.” 47  Farisifoi lɛ hu hã hetoo akɛ: “Ani nyɛ hu alaka nyɛ? 48  Ani nɔyelɔi lɛ loo Farisifoi lɛ ateŋ mɔ ko ená emli hemɔkɛyeli? 49  Shi asafoku nɛɛ ni leee Mla lɛ, alomɔ amɛ.” 50  Nikodemo, ni ba eŋɔɔ be ko ni eho, ni eji amɛteŋ mɔ kome lɛ kɛɛ amɛ akɛ: 51  “Wɔ-Mla lɛ ekojooo mɔ ko, ja anu enaa sane ni aná ale nɔ ni efeɔ dã, aloo jeee nakai?” 52  Amɛhã lɛ hetoo akɛ: “Ani bo hu Galilea ojɛ? Taomɔ mli ni obaana akɛ gbalɔ ko eteŋ shi kɛjɛŋ Galilea.”*

Shishigbɛ Niŋmaa

Aloo “Asesei.”
Sht. ŋm., “niŋmai lɛ.”
Ni tsɔɔ akɛ, rabifoi askul srɔtoi lɛ.
Kkj. 53 kɛyashi yitso 8, kk. 11 lɛ bɛ blema wolokpoi ni akɛ niji ŋmala ni amuɔ afɔ̃ɔ amɛnɔ lɛ ateŋ babaoo mli.