Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Yohane 6:1-71

YITSEI LƐ AMLI SAJI

  • Yesu lɛ mɛi 5,000 (1-15)

  • Yesu nyiɛ nu hiɛ (16-21)

  • Yesu, “wala aboloo lɛ” (22-59)

  • Mɛi pii anane tɔ̃tɔ yɛ Yesu wiemɔi lɛ ahewɔ (60-71)

6  Enɛ sɛɛ lɛ, Yesu yiŋ etee Galilea ŋshɔ loo Tiberia Ŋshɔ* lɛ sɛɛ.  Shi asafoku babaoo ko tee nɔ nyiɛ esɛɛ, ejaakɛ amɛmiina naakpɛɛ okadii ni efeɔ, ni ji helatsɛmɛi ni etsaa lɛ.  No hewɔ lɛ, Yesu kwɔ kɛtee gɔŋ ko nɔ, ni eyata shi yɛ jɛmɛ, ekɛ ekaselɔi lɛ.  No mli lɛ, Hehoo lɛ, ni ji Yudafoi lɛ agbi jurɔ lɛ miibɛŋkɛ.  Be ni Yesu hole ehiŋmɛii anɔ ni ena akɛ asafoku babaoo ko miiba eŋɔɔ lɛ, ekɛɛ Filipo akɛ: “Nɛgbɛ wɔbaayahé aboloi* yɛ wɔhã mɛnɛɛmɛi ni amɛye?”  Shi ewie enɛ kɛka lɛ, ejaakɛ ele nɔ ni eeba ebafee.  Filipo hã lɛ hetoo akɛ: “Aboloo denarioi ohai enyɔ faaa bɔ ni amɛteŋ mɔ fɛɛ mɔ baaná fioo ko po.”  Ekaselɔi lɛ ateŋ mɔ kome, Andrea, ni ji Simon Petro nyɛmi nuu lɛ, kɛɛ lɛ akɛ:  “Naa gbekɛ nuu fioo ko ni hiɛ akoko aboloi enumɔ kɛ nu mli loi enyɔ. Shi mɛi pii nɛɛ, amɛnɛgbɛ enɛ baashɛ?” 10  Yesu kɛɛ: “Nyɛhãa mɛi lɛ ataraa shi.” No mli lɛ, jwɛii pii yɛ jɛmɛ, no hewɔ lɛ, hii ni amɛyibɔ aaafee akpei enumɔ lɛ ho amɛtara shi. 11  Ni Yesu kɔlɔ aboloi lɛ, ni be ni eda shi lɛ, ejara ehã mɛi ni tara shi lɛ; nakai nɔŋŋ efee yɛ loi bibii lɛ hu he, ni amɛná bɔ fɛɛ bɔ ni amɛtaoɔ. 12  Shi be ni amɛye amɛtɔrɔ lɛ, ekɛɛ ekaselɔi lɛ akɛ: “Nyɛbuaa fufuji ni eshwɛ lɛ anaa, koni nɔ ko nɔ ko akafite.” 13  No hewɔ lɛ, amɛbua akoko aboloi enumɔ lɛ afufuji ni mɛi lɛ ye ni shwɛ lɛ anaa, amɛwo kɛntɛŋi nyɔŋma kɛ enyɔ obɔbɔ. 14  Be ni mɛi lɛ na okadi ni Yesu fee lɛ, amɛbɔi kɛɛmɔ akɛ: “Mɔ nɛ ji Gbalɔ ni baa je lɛ mli lɛ lɛɛlɛŋ.” 15  Agbɛnɛ, Yesu lɛ, akɛni ele akɛ amɛmiiba amɛbamɔ lɛ ni amɛwó lɛ maŋtsɛ hewɔ lɛ, egbala ehe shi ni ekome too etee gɔŋ lɛ nɔ ekoŋŋ. 16  Be ni shɛ gbɛkɛnaashi lɛ, ekaselɔi lɛ kpeleke shi kɛtee ŋshɔ lɛ naa, 17  ni amɛbote lɛlɛ ko mli, ni amɛbɔi ŋshɔ lɛ foo kɛmiiya Kapernaum. Be nɛɛ mli lɛ, duŋ ewo, ni Yesu bako amɛŋɔɔ lolo. 18  Agbɛnɛ hu, akɛni kɔɔyɔɔ ni naa wa ko miitswa hewɔ lɛ, ŋshɔ lɛ fee hamahama. 19  Shi be ni amɛwiri aaafee shitoi etɛ loo ejwɛ* lɛ, amɛna Yesu nyiɛ ŋshɔ lɛ hiɛ ni eebɛŋkɛ lɛlɛ lɛ, ni gbeyei mɔmɔ amɛ. 20  Shi ekɛɛ amɛ akɛ: “Mi ni; nyɛkashea gbeyei!” 21  No hewɔ lɛ, amɛsumɔ akɛ amɛŋɔ lɛ kɛba lɛlɛ lɛ mli, ni amrɔ lɛ, lɛlɛ lɛ yakpeleke yɛ shikpɔŋ nɔ he ni amɛyaa lɛ. 22  Enɔ jetsɛremɔ lɛ, asafoku lɛ ni damɔ ŋshɔ lɛ sɛɛ lɛ na akɛ no mli lɛ, lɛlɛ ko bɛ jɛmɛ akɛ ja lɛlɛ bibioo ko, ni akɛ, Yesu fataaa ekaselɔi lɛ ahe kɛboteee lɛlɛ lɛ mli, shi moŋ ekaselɔi lɛ kɛkɛ yiŋ amɛtee. 23  Shi lɛji jɛ Tiberia ba he ni Nuŋtsɔ lɛ da shi ni amɛye aboloi lɛ yɛ lɛ masɛi. 24  No hewɔ lɛ, be ni asafoku lɛ na akɛ Yesu loo ekaselɔi lɛ bɛ jɛmɛ lɛ, amɛbotebotee amɛlɛji lɛ amli ni amɛba Kapernaum koni amɛbatao Yesu. 25  Be ni amɛna lɛ yɛ ŋshɔ lɛ sɛɛ lɛ, amɛkɛɛ lɛ akɛ: “Rabi, mɛɛ be oba biɛ?” 26  Yesu hã amɛ hetoo ekɛɛ: “Lɛɛlɛŋ, lɛɛlɛŋ, miikɛɛ nyɛ akɛ, jeee okadii ni nyɛna lɛ ahewɔ nyɛtaoɔ mi lɛ, shi moŋ, akɛni nyɛye aboloi lɛ eko ni nyɛtɔrɔ lɛ hewɔ ni. 27  Nyɛkatsua niyenii ni fiteɔ lɛ he nii, shi moŋ nyɛtsua niyenii ni fiteee ni hãa naanɔ wala ni gbɔmɔ Bi lɛ baahã nyɛ lɛ he nii; ejaakɛ mɔ nɛ ji mɔ ni Tsɛ lɛ, Nyɔŋmɔ diɛŋtsɛ, esɔo enaa kɛtsɔɔ akɛ ekpɛlɛɔ enɔ lɛ.” 28  No hewɔ lɛ, amɛkɛɛ lɛ akɛ: “Mɛni esa akɛ wɔfee koni wɔnyɛ wɔtsu Nyɔŋmɔ nitsumɔi lɛ?” 29  Yesu hã amɛ hetoo akɛ: “Nyɔŋmɔ nitsumɔ lɛ nɛ, akɛ nyɛjie hemɔkɛyeli kpo yɛ mɔ ni etsu lɛ lɛ mli.” 30  Ni amɛkɛɛ lɛ akɛ: “Mɛɛ okadi obaafee, koni wɔna ni wɔhe bo wɔye? Mɛɛ nitsumɔ obaatsu? 31  Wɔtsɛmɛi lɛ ye mana lɛ yɛ ŋa lɛ nɔ,* taakɛ aŋma lɛ, akɛ: ‘Ehã amɛ aboloo kɛjɛ ŋwɛi ni amɛye.’” 32  Kɛkɛ ni Yesu kɛɛ amɛ akɛ: “Lɛɛlɛŋ, lɛɛlɛŋ, miikɛɛ nyɛ akɛ, Mose hãaa nyɛ aboloo lɛ kɛjɛɛɛ ŋwɛi, shi moŋ mi-Tsɛ hãa nyɛ anɔkwa aboloo lɛ kɛjɛɔ ŋwɛi. 33  Ejaakɛ Nyɔŋmɔ aboloo lɛ ji mɔ ni kpelekeɔ shi kɛjɛɔ ŋwɛi ni eŋɔɔ wala ehãa je lɛ lɛ.” 34  No hewɔ lɛ, amɛkɛɛ lɛ akɛ: “Nuŋtsɔ, hã wɔ aboloo nɛɛ daa.” 35  Yesu kɛɛ amɛ akɛ: “Miji wala aboloo lɛ. Mɔ fɛɛ mɔ ni baa miŋɔɔ lɛ, hɔmɔ yeŋ lɛ kɔkɔɔkɔ, ni mɔ fɛɛ mɔ ni jieɔ hemɔkɛyeli kpo yɛ mimli lɛ, kumai yeŋ lɛ kɔkɔɔkɔ. 36  Shi taakɛ mikɛɛ nyɛ lɛ, nyɛna mi moŋ, shi kɛ̃lɛ nyɛheee nyɛyeee. 37  Mɛi fɛɛ ni Tsɛ lɛ ŋɔɔ hãa mi lɛ baaba miŋɔɔ, ni mɔ ni baa miŋɔɔ lɛ mishwieŋ lɛ kɔkɔɔkɔ; 38  ejaakɛ mikpeleke shi kɛjɛ ŋwɛi kɛba koni mibafee mɔ ni tsu mi lɛ suɔmɔnaa nii, shi jeee mi diɛŋtsɛ misuɔmɔnaa nii. 39  Enɛ ji mɔ ni tsu mi lɛ suɔmɔnaa nii, akɛ mikahã mɛi ni eŋɔhã mi lɛ ateŋ mɔ ko kwraa ŋmɛɛ mi, shi moŋ mitee amɛ shi yɛ naagbee gbi lɛ nɔ. 40  Ejaakɛ enɛ ji mi-Tsɛ suɔmɔnaa nii, akɛ mɔ fɛɛ mɔ ni yɔseɔ Bi lɛ, ni ejieɔ hemɔkɛyeli kpo yɛ emli lɛ aná naanɔ wala, ni matee lɛ shi yɛ naagbee gbi lɛ nɔ.” 41  Kɛkɛ ni Yudafoi lɛ bɔi huhuuhuwiemɔ yɛ ehe, ejaakɛ ekɛɛ akɛ: “Miji aboloo ni kpeleke shi kɛjɛ ŋwɛi lɛ.” 42  Ni amɛbɔi kɛɛmɔ akɛ: “Ani jeee Yesu, Yosef bi lɛ, ni wɔle etsɛ kɛ enyɛ lɛ nɛ? Te feɔ tɛŋŋ ni amrɔ nɛɛ ekɛɔ akɛ, ‘Mikpeleke shi kɛjɛ ŋwɛi’ lɛ?” 43  Yesu here nɔ ekɛɛ amɛ akɛ: “Nyɛkpaa huhuuhu lɛ wiemɔ yɛ nyɛteŋ. 44  Mɔ ko mɔ ko nyɛŋ aba miŋɔɔ, akɛ ja Tsɛ lɛ ni tsu mi lɛ gbala lɛ dã, ni matee lɛ shi yɛ naagbee gbi lɛ nɔ. 45  Aŋma yɛ Gbalɔi lɛ amli akɛ: ‘Yehowa* baatsɔɔ amɛ fɛɛ nii.’ Mɔ fɛɛ mɔ ni boɔ Tsɛ lɛ toi ni ekaseɔ nii lɛ baa miŋɔɔ. 46  Jeee akɛ gbɔmɔ ko ena Tsɛ lɛ pɛŋ, ja mɔ ni jɛ Nyɔŋmɔ ŋɔɔ lɛ; mɔ nɛ ji mɔ ni ena Tsɛ lɛ. 47  Lɛɛlɛŋ, lɛɛlɛŋ, miikɛɛ nyɛ akɛ, mɔ fɛɛ mɔ ni heɔ yeɔ lɛ yɛ naanɔ wala. 48  “Miji wala aboloo lɛ. 49  Nyɛtsɛmɛi lɛ ye mana lɛ yɛ ŋa lɛ nɔ,* ni kɛ̃lɛ amɛgboi. 50  Enɛ ji aboloo ni kpeleke shi kɛjɛ ŋwɛi lɛ, koni mɔ fɛɛ mɔ aye eko ni ekagbo. 51  Miji aboloo ni hiɛ kã ni kpeleke shi kɛjɛ ŋwɛi lɛ. Kɛ́ mɔ ko ye aboloo nɛɛ eko lɛ, ebaahi shi kɛya naanɔ; ni anɔkwa, aboloo ni mikɛbaahã koni je lɛ aná wala lɛ ji miheloo lɛ.” 52  Kɛkɛ ni Yudafoi lɛ kɛ amɛhe bɔi ŋwanejee amɛkɛɛ: “Te nuu nɛɛ baafee tɛŋŋ eŋɔ eheloo ehã wɔ ni wɔye lɛ?” 53  No hewɔ lɛ, Yesu kɛɛ amɛ akɛ: “Lɛɛlɛŋ, lɛɛlɛŋ, miikɛɛ nyɛ akɛ, kɛji nyɛyeee gbɔmɔ Bi lɛ heloo lɛ, ni nyɛnuuu elá lɛ, nyɛbɛ wala yɛ nyɛmli. 54  Mɔ fɛɛ mɔ ni yeɔ miheloo ni enuɔ milá lɛ yɛ naanɔ wala, ni matee lɛ shi yɛ naagbee gbi lɛ nɔ; 55  ejaakɛ miheloo lɛ, anɔkwa niyenii ni, ni milá lɛ, anɔkwa numɔnɔ ni. 56  Mɔ fɛɛ mɔ ni yeɔ miheloo ni enuɔ milá lɛ, eyaa nɔ ekɛ mi feɔ ekome, ni mi hu mikɛ lɛ feɔ ekome. 57  Bɔ ni Tsɛ hiɛkãalɔ lɛ tsu mi, ni Tsɛ lɛ hewɔ mihiɛ kã lɛ, nakai nɔŋŋ mɔ ni yeɔ mi lɛ hu hiɛ baakã yɛ mihewɔ. 58  Enɛ ji aboloo ni kpeleke shi kɛjɛ ŋwɛi lɛ. Etamɔɔɔ be ni nyɛtsɛmɛi lɛ ye ni kɛ̃lɛ amɛgboi lɛ. Mɔ fɛɛ mɔ ni yeɔ aboloo nɛɛ baahi shi kɛya naanɔ.” 59  Ewie nibii nɛɛ be ni etsɔɔ nii yɛ kpeehe ko* yɛ Kapernaum lɛ. 60  Be ni ekaselɔi lɛ ateŋ mɛi babaoo nu enɛ lɛ, amɛkɛɛ akɛ: “Wiemɔ ni wa nɛ; namɔ baanyɛ toi abo?” 61  Shi akɛni Yesu le yɛ emli akɛ ekaselɔi lɛ miiwie huhuuhu yɛ enɛ he hewɔ lɛ, ekɛɛ amɛ akɛ: “Ani enɛ miitɔ̃tɔ nyɛnane? 62  Ni kɛ́ nyɛna gbɔmɔ Bi lɛ miikwɔ kɛmiiya he ni eyɔɔ sá lɛ hu? 63  Mumɔ lɛ ji nɔ ni hãa wala; heloo lɛ he bɛ sɛɛnamɔ ko kwraa. Wiemɔi ni mikɛ nyɛ wie lɛ, mumɔ ni, ni wala ni. 64  Shi nyɛteŋ mɛi komɛi yɛ ni heee yeee.” Ejaakɛ kɛjɛ shishijee lɛ, Yesu le mɛi ni heee yeee lɛ kɛ mɔ ni baajie lɛ ehã lɛ. 65  Etsa nɔ ekɛɛ akɛ: “Enɛ hewɔ mikɛɛ nyɛ akɛ, mɔ ko nyɛŋ aba miŋɔɔ ja Tsɛ lɛ ehã lɛ hegbɛ lɛ.” 66  Enɛ hewɔ lɛ, kaselɔi lɛ ateŋ mɛi babaoo ku amɛsɛɛ kɛtee nibii ni yɔɔ sɛɛ lɛ ahe, ni amɛkɛ lɛ enyiɛɛɛ dɔŋŋ. 67  No hewɔ lɛ, Yesu kɛɛ Mɛi Nyɔŋma kɛ Enyɔ lɛ akɛ: “Ani nyɛ hu nyɛmiitao ni nyɛya?” 68  Simon Petro hã lɛ hetoo akɛ: “Nuŋtsɔ, namɔ ŋɔɔ wɔbaaya? Bo oyɔɔ naanɔ wala wiemɔi lɛ. 69  Wɔ lɛ, wɔhe wɔye ni asaŋ wɔná wɔle akɛ bo ji Mɔ Krɔŋkrɔŋ ni jɛ Nyɔŋmɔ ŋɔɔ lɛ.” 70  Yesu hã amɛ hetoo akɛ: “Ani jeee nyɛyi nyɔŋma kɛ enyɔ mihala? Ni kɛ̃lɛ nyɛteŋ mɔ kome ji mɔheguɔgbelɔ.”* 71  Anɔkwa, no mli lɛ, eewie Yuda, Simon Iskariot bi lɛ he, ejaakɛ mɔ nɛɛ miiba ebajie lɛ ehã, eyɛ mli akɛ eji Mɛi Nyɔŋma kɛ Enyɔ lɛ ateŋ mɔ kome.

Shishigbɛ Niŋmaa

Kwɛmɔ Mat 4:18 sh. niŋ.
Yɛ Ŋmalɛi lɛ amli lɛ, aboloo ji mamu ni akɛ nu ekpɔtɔ ní ashã, ni bei pii lɛ, akɛdamɔɔ shi kɛhãa niyenii.
Aaafee km enumɔ loo ekpaa. Sht. ŋm., “aaafee stadioi 25 loo 30.”
Kwɛmɔ Mat 3:1 sh. niŋ.
Kwɛmɔ Wiemɔi Titrii Amligbalamɔ lɛ.
Kwɛmɔ Mat 3:1 sh. niŋ.
Aloo “maŋ gwabɔɔ ko shishi.”
Aloo “abonsam.”