Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Yohane 4:1-54

YITSEI LƐ AMLI SAJI

  • Yesu kɛ Samaria yoo lɛ (1-38)

    • ‘Okɛ mumɔ kɛ anɔkwale’ ajá Nyɔŋmɔ (23, 24)

  • Samariabii pii he Yesu nɔ amɛye (39-42)

  • Yesu tsa sɔɔlɔ ko binuu (43-54)

4  Be ni Nuŋtsɔ lɛ ná ele akɛ Farisifoi lɛ enu akɛ Yesu miifee kaselɔi babaoo ni eebaptisi mɛi babaoo hu fe Yohane—  tsɛbelɛ, Yesu diɛŋtsɛ ebaptisiii shi moŋ ekaselɔi lɛ ni baptisi lɛ—  eshi Yudea ni eyi mli akɛ eeya Galilea ekoŋŋ.  Shi esa akɛ eyatsɔ Samaria kɛya.  No hewɔ lɛ, ebashɛ Samaria maŋ ko ni atsɛɔ lɛ Sikar ni bɛŋkɛ shikpɔŋ ni Yakob kɛhã ebi Yosef lɛ mli.  Anɔkwa, Yakob nubu lɛ yɛ jɛmɛ. Agbɛnɛ, akɛni gbɛnyiɛmɔ lɛ ehã etɔ Yesu hewɔ lɛ, eho eshwata shi yɛ nubu* lɛ he. No mli lɛ, eshɛ aaafee ŋmɛlɛtswaa ekpaa* lɛ nɔ.  Samaria yoo ko ba nuyɛɛ. Yesu kɛɛ lɛ akɛ: “Hã mi nu lɛ eko manu.”  (Ejaakɛ ekaselɔi lɛ etee maŋ lɛ mli amɛyaahé niyenii.)  No hewɔ lɛ, Samaria yoo lɛ kɛɛ lɛ akɛ: “Te fee tɛŋŋ ni bo Yudafonyo lɛ, obaa mi Samaria yoo lɛ nu ni onu lɛ?” (Ejaakɛ Yudafoi lɛ kɛ Samariabii bɛ nɔ ko feemɔ.) 10  Yesu hã lɛ hetoo akɛ: “Eji ole Nyɔŋmɔ duromɔ keenɔ lɛ kɛ mɔ ni biɔ bo akɛ, ‘Hã mi nu lɛ eko manu’ lɛ kulɛ, bo moŋ obaabi lɛ, ni ebaahã bo wala nu.” 11  Ekɛɛ lɛ akɛ: “Onukpa, obɛ nɔ ko po ni akɛyɛɔ nu, ni nubu lɛ mli kwɔ. Belɛ, nɛgbɛ oná wala nu nɛɛ yɛ mɔ? 12  Ani ofe wɔtsɛ Yakob, mɔ ni hã wɔ nubu lɛ, ni lɛ kɛ ebii kɛ ekooloi hu nu mli nu lɛ?” 13  Yesu hã lɛ hetoo akɛ: “Mɔ fɛɛ mɔ ni nuɔ nu nɛɛ eko lɛ, kumai baaye lɛ ekoŋŋ. 14  Mɔ fɛɛ mɔ ni nuɔ nu ni mahã lɛ lɛ eko lɛ, kumai yeŋ lɛ dɔŋŋ kɛaatee naanɔ, shi nu ni mahã lɛ lɛ baatsɔ nuhiŋmɛi yɛ emli, ni ebaatue koni ehã naanɔ wala.” 15  Yoo lɛ kɛɛ lɛ akɛ: “Onukpa, hã mi nu nɛɛ eko, koni kumai akaye mi dɔŋŋ, ni mikakã he miba biɛ mibayɛ nu.” 16  Yesu kɛɛ lɛ akɛ: “Yaa ni oyatsɛ owu ni oba biɛ.” 17  Yoo lɛ here nɔ akɛ: “Mibɛ wu.” Yesu kɛɛ lɛ akɛ: “Owie anɔkwale akɛ, ‘Mibɛ wu.’ 18  Ejaakɛ ogbã wumɛi enumɔ, ni nuu ni okɛyɔɔ amrɔ nɛɛ, jeee owu ji lɛ. No lɛ, owie anɔkwale.” 19  Yoo lɛ kɛɛ lɛ akɛ: “Onukpa, mina akɛ gbalɔ ji bo. 20  Gɔŋ nɛɛ nɔ wɔtsɛmɛi lɛ já yɛ, shi nyɛ lɛ nyɛkɛɔ akɛ he ni esa akɛ mɛi ajá yɛ lɛ yɛ Yerusalem.” 21  Yesu kɛɛ lɛ akɛ: “Yoo, he mi oye, ŋmɛlɛtswaa lɛ miiba, be mli ni jeee gɔŋ nɛɛ nɔ, ni asaŋ jeee Yerusalem nyɛbaajá Tsɛ lɛ yɛ. 22  Nyɛjáa nɔ ni nyɛleee; wɔ lɛ, wɔjáa nɔ ni wɔle, ejaakɛ yiwalaheremɔ jeɔ shishi kɛjɛɔ Yudafoi lɛ anɔ. 23  Shi ŋmɛlɛtswaa lɛ miiba, ni eshɛ agbɛnɛ, be mli ni anɔkwa jálɔi lɛ baajá Tsɛ lɛ kɛ mumɔ kɛ anɔkwale, ejaakɛ, anɔkwa, Tsɛ lɛ miitao mɛi ni tamɔ nɛkɛ ni amɛjá lɛ. 24  Nyɔŋmɔ lɛ Mumɔ ni, ni mɛi ni jáa lɛ lɛ, esa akɛ amɛjá lɛ kɛ mumɔ kɛ anɔkwale.” 25  Yoo lɛ kɛɛ lɛ akɛ: “Mile akɛ Mesia ni atsɛɔ lɛ Kristo lɛ miiba. Kɛ́ nakai mɔ lɛ ba lɛ, ebaajaje nibii fɛɛ etsɔɔ wɔ faŋŋ.” 26  Yesu kɛɛ lɛ akɛ: “Mi mɔ ni mikɛ bo wieɔ lɛ, mi ni.” 27  Kɛkɛ ni ekaselɔi lɛ ba, ni efee amɛ naakpɛɛ akɛ ekɛ yoo miiwie. Shi kɛ̃lɛ, mɔ ko ekɛɛɛ akɛ: “Mɛni otaoɔ?” aloo “Mɛni hewɔ okɛ yoo lɛ wieɔ?” 28  No hewɔ lɛ, yoo lɛ shi enugbɛ́ lɛ ni eyiŋ etee maŋ lɛ mli ni eyakɛɛ mɛi lɛ akɛ: 29  “Nyɛbaa nyɛbakwɛa nuu ko ni gba mi nibii fɛɛ ni mifee lɛ. Ani jeee Kristo lɛ nɛ?” 30  Amɛje kpo kɛjɛ maŋ lɛ mli ni amɛbɔi eŋɔɔbaa. 31  Nakai be lɛ mli lɛ, kaselɔi lɛ miikpa lɛ fai akɛ: “Rabi, ye nɔ ko.” 32  Shi ekɛɛ amɛ akɛ: “Miyɛ niyenii ni miyeɔ ni nyɛleee.” 33  No hewɔ lɛ, kaselɔi lɛ kɛɛkɛɛ amɛhe akɛ: “Ani mɔ ko ebahã lɛ nɔ ko eye?” 34  Yesu kɛɛ amɛ akɛ: “Miniyenii ji akɛ mafee mɔ ni tsu mi lɛ suɔmɔnaa nii ni magbe enitsumɔ lɛ naa. 35  Ani nyɛkɛɛɛ akɛ eshwɛ nyɔji ejwɛ dani nikpamɔ be lɛ baashɛ? Naa! Miikɛɛ nyɛ akɛ: Nyɛholea nyɛhiŋmɛii anɔ ni nyɛkwɛa ŋmɔji lɛ, akɛ amɛgba futaa ni sa kpamɔ. Amrɔ nɛɛ 36  nikpalɔ lɛ miiná nyɔmɔwoo ni eebua yibii anaa kɛhã naanɔ wala, bɔ ni afee ni nidulɔ lɛ kɛ nikpalɔ lɛ fɛɛ anya shi kome. 37  Ejaakɛ enɛ gbɛfaŋ lɛ, wiemɔ ni awie lɛ ji anɔkwale akɛ: Mɔ kome ji nidulɔ lɛ, ni mɔ kroko ji nikpalɔ lɛ. 38  Mitsu nyɛ koni nyɛyakpa nɔ ni jeee nyɛ nyɛtsu he nɔ ko. Mɛi krokomɛi etsu nii lɛ, ni nyɛ lɛ, nyɛba nyɛmiiná amɛnitsumɔ lɛ he sɛɛ.” 39  Ni Samariabii ni jɛ nakai maŋ lɛ mli lɛ ateŋ mɛi babaoo ná hemɔkɛyeli yɛ emli yɛ yoo lɛ wiemɔ ni ekɛye amɛ odase akɛ: “Egba mi nibii fɛɛ ni mifee lɛ” hewɔ. 40  No hewɔ lɛ, be ni Samariabii lɛ ba eŋɔɔ lɛ, amɛkpa lɛ fai akɛ ekɛ amɛ ahi shi, ni ehi jɛmɛ gbii enyɔ. 41  Ni mɛi krokomɛi babaoo he ye yɛ nɔ ni Yesu wie lɛ hewɔ, 42  ni amɛkɛɛ yoo lɛ akɛ: “Jeee nɔ ni owie lɛ kɛkɛ hewɔ wɔheɔ wɔyeɔ dɔŋŋ; ejaakɛ wɔ diɛŋtsɛ wɔnu ni wɔná wɔle akɛ nuu nɛɛ ji je lɛ yiwalaherelɔ lɛ lɛɛlɛŋ.” 43  Gbii enyɔ lɛ sɛɛ lɛ, eshi jɛmɛ ni etee Galilea. 44  Shi Yesu diɛŋtsɛ ye odase akɛ gbalɔ ko hiɛ bɛ nyam yɛ lɛ diɛŋtsɛ emaŋ. 45  No hewɔ lɛ, be ni eshɛ Galilea lɛ, Galileabii lɛ here lɛ, ejaakɛ amɛna nibii fɛɛ ni efee yɛ Yerusalem yɛ gbijurɔyeli lɛ mli lɛ, ejaakɛ amɛ hu amɛtee gbijurɔyeli lɛ eko. 46  Kɛkɛ ni esaa eba Kana ni yɔɔ Galilea lɛ, he ni ehã nu tsɔ wein yɛ lɛ. Ni maŋtsɛ sɔɔlɔ ko yɛ ni ebinuu he miiye yɛ Kapernaum. 47  Be ni nuu nɛɛ nu akɛ Yesu ejɛ Yudea eba Galilea lɛ, etee eŋɔɔ ni eyakpa lɛ fai akɛ ekpeleke shi kɛba ni ebatsa ebinuu lɛ, ejaakɛ eehe egbo. 48  Shi Yesu kɛɛ lɛ akɛ: “Kɛ́ nyɛnaaa okadii kɛ naakpɛɛ nii lɛ, nyɛheee nyɛyeee kɔkɔɔkɔ.” 49  Maŋtsɛ sɔɔlɔ lɛ kɛɛ lɛ akɛ: “Nuŋtsɔ, kpelekemɔ shi oba dani mibi bibioo lɛ agbo.” 50  Yesu kɛɛ lɛ akɛ: “Yaa; obinuu lɛ yɛ wala mli.” Nuu lɛ he wiemɔ ni Yesu kɛ lɛ wie lɛ eye ni eyiŋ etee. 51  Shi be ni ekpelekeɔ shi kɛyaa lɛ, enyɔji lɛ kɛ lɛ bakpe ni amɛkɛɛ lɛ akɛ ebinuu lɛ yɛ wala mli.* 52  No hewɔ lɛ, ebi amɛ nɔ ŋmɛlɛtswaa nɔ ni ehe wa lɛ lɛ. Ni amɛkɛɛ lɛ akɛ: “Atridii lɛ tse yɛ enɔ nyɛ, yɛ ŋmɛlɛtswaa ni ji kpawo* lɛ nɔ.” 53  Ni tsɛ lɛ ná ele akɛ nakai ŋmɛlɛtswaa lɛ nɔ nɔŋŋ ni Yesu kɛɛ lɛ akɛ: “Obinuu lɛ yɛ wala mli” lɛ. No hewɔ lɛ, lɛ kɛ eshĩabii lɛ fɛɛ he ye. 54  Enɛ ji okadi ni ji enyɔ ni Yesu fee be ni ejɛ Yudea eba Galilea lɛ.

Shishigbɛ Niŋmaa

Aloo “nuhiŋmɛi.”
Ni tsɔɔ akɛ, aaafee shwane ŋmɛlɛ 12.
Aloo “ebinuu lɛ he ebɔi lɛ waa.”
Ni tsɔɔ akɛ, aaafee shwane ŋmɛlɛ 1.