Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Yohane 3:1-36

3  Nuu ko yɛ ni ji Farisifoi lɛ ateŋ mɔ kome, ni atsɛɔ lɛ Nikodemo, ni eji Yudafoi lɛ anɔyelɔi lɛ eko.  Mɔ nɛɛ ba eŋɔɔ nyɔɔŋ ni ebakɛɛ lɛ akɛ: “Rabi, wɔle akɛ tsɔɔlɔ ni jɛ Nyɔŋmɔ ŋɔɔ ba ji bo, ejaakɛ mɔ ko mɔ ko nyɛŋ afee okadii ni ofeɔ nɛɛ ja Nyɔŋmɔ kɛ lɛ yɛ.”  Yesu here nɔ ekɛɛ lɛ akɛ: “Lɛɛlɛŋ, lɛɛlɛŋ, miikɛɛ bo akɛ, kɛji afɔɔɔ mɔ ko ekoŋŋ* lɛ, enyɛŋ Nyɔŋmɔ Maŋtsɛyeli lɛ ena.”  Nikodemo kɛɛ lɛ akɛ: “Te aaafee tɛŋŋ afɔ gbɔmɔ be ni eda lɛ? Enyɛŋ ebote enyɛ musu mli nɔ ni ji shii enyɔ nɔ ni afɔ lɛ, aloo jeee nakai?”  Yesu hã hetoo akɛ: “Lɛɛlɛŋ, lɛɛlɛŋ, miikɛɛ bo akɛ, kɛji ajɛɛɛ nu kɛ mumɔ mli afɔɔɔ mɔ ko lɛ, enyɛŋ ebote Nyɔŋmɔ Maŋtsɛyeli lɛ mli.  Nɔ ni ajɛ heloo lɛ mli afɔ lɛ, heloo ni, ni nɔ ni ajɛ mumɔ lɛ mli afɔ lɛ, mumɔ ni.  Kaahã efee bo naakpɛɛ akɛ mikɛɛ bo akɛ: Esa akɛ afɔ nyɛ ekoŋŋ.  Kɔɔyɔɔ lɛ, etswaa kɛyaa he ni esumɔɔ, ni onuɔ egbɛɛmɔ, shi oleee he ni ejɛ kɛ he ni eyaa. Nakai nɔŋŋ mɔ fɛɛ mɔ ni ajɛ mumɔ lɛ mli afɔ lɛ lɛ ji.”  Nikodemo hã lɛ hetoo akɛ: “Te aaafee tɛŋŋ ni nibii nɛɛ aaanyɛ aba mli lɛ?” 10  Yesu here nɔ akɛ: “Israel tsɔɔlɔ ji bo ni kɛ̃lɛ oleee nibii nɛɛ? 11  Lɛɛlɛŋ, lɛɛlɛŋ, miikɛɛ bo akɛ, nɔ ni wɔle lɛ, no wɔwieɔ, ni nɔ ni wɔna lɛ, no he odase wɔyeɔ, shi nyɛ lɛ nyɛŋɔɔɔ odase ni wɔyeɔ lɛ. 12  Kɛ́ mikɛ nyɛ ewie shikpɔŋ nɔ nibii ahe ni kɛ̃lɛ nyɛheee nyɛyeee lɛ, te aaafee tɛŋŋ ni kɛji mikɛ nyɛ wie ŋwɛi nibii ahe lɛ nyɛaahe nyɛye lɛ? 13  Kɛfata he lɛ, mɔ ko mɔ ko ekwɔko kɛyako ŋwɛi, akɛ ja mɔ ni kpeleke shi kɛjɛ ŋwɛi lɛ, gbɔmɔ Bi lɛ. 14  Ni bɔ ni Mose wó onufu lɛ nɔ yɛ ŋa lɛ nɔ* lɛ, nakai nɔŋŋ esa akɛ awó gbɔmɔ Bi lɛ nɔ 15  koni mɔ fɛɛ mɔ ni heɔ enɔ yeɔ lɛ, aná naanɔ wala. 16  “Ejaakɛ Nyɔŋmɔ sumɔ je lɛ jogbaŋŋ aahu akɛ eŋɔ e-Bi koome lɛ ehã, koni mɔ fɛɛ mɔ ni jieɔ hemɔkɛyeli kpo yɛ emli lɛ hiɛ akakpãtã shi moŋ ená naanɔ wala. 17  Ejaakɛ Nyɔŋmɔ tsuuu e-Bi lɛ kɛbaaa je lɛ mli koni ebakojo je lɛ, shi moŋ koni atsɔ enɔ ahere je lɛ yiwala. 18  Mɔ fɛɛ mɔ ni jieɔ hemɔkɛyeli kpo yɛ emli lɛ, akojoŋ lɛ. Mɔ fɛɛ mɔ ni ejieee hemɔkɛyeli kpo yɛ emli lɛ, akojo lɛ momo, ejaakɛ ejieko hemɔkɛyeli kpo yɛ Nyɔŋmɔ Bi koome lɛ gbɛ́i lɛ mli. 19  Agbɛnɛ, enɛ ji nɔdaamɔnɔ kɛhã kojomɔ: akɛ la lɛ eba je lɛ mli, shi gbɔmɛi sumɔɔ duŋ lɛ moŋ fe la lɛ, ejaakɛ amɛnitsumɔi lɛ, efɔji ni. 20  Ejaakɛ mɔ fɛɛ mɔ ni tsuɔ nihiinii lɛ, enyɛɔ la lɛ ni ebaaa la lɛ he, koni akakune enitsumɔi lɛ.* 21  Shi mɔ fɛɛ mɔ ni feɔ nii ni ji anɔkwale lɛ baa la lɛ he, koni enitsumɔi lɛ aje kpo faŋŋ akɛ nitsumɔi ni kɛ Nyɔŋmɔ suɔmɔnaa nii kpãa gbee.” 22  Enɛ sɛɛ lɛ, Yesu kɛ ekaselɔi lɛ tee Yudea akrowai lɛ amli, ni ekɛ amɛ yaye be ko yɛ jɛmɛ ni ebaptisi mɛi.* 23  Shi no mli lɛ, Yohane hu miibaptisi yɛ Ainon ni bɛŋkɛ Salim lɛ, ejaakɛ nu pii bua shi yɛ jɛmɛ, ni mɛi baa ni abaptisiɔ amɛ; 24  ejaakɛ no mli lɛ anáko awo Yohane tsuŋ. 25  Agbɛnɛ, Yohane kaselɔi lɛ kɛ Yudafonyo ko je ŋwane yɛ hetsuumɔ he. 26  No hewɔ lɛ, amɛba Yohane ŋɔɔ ni amɛbakɛɛ lɛ akɛ: “Rabi, nuu ni no mli lɛ ekɛ bo yɔɔ Yordan sɛɛ ni oye ehe odase lɛ, naa, mɔ nɛɛ miibaptisi, ni mɛi fɛɛ miiya eŋɔɔ.” 27  Yohane hã hetoo ekɛɛ: “Gbɔmɔ ko nine nyɛŋ ashɛ nɔ ko nɔ ja ajɛ ŋwɛi akɛhã lɛ. 28  Nyɛ diɛŋtsɛ nyɛyeɔ mi odase akɛ mikɛɛ akɛ, ‘Jeee miji Kristo lɛ, shi moŋ, atsu mi kɛtsɔ nakai mɔ lɛ hiɛ.’ 29  Mɔ fɛɛ mɔ ni hiɛ ayemforo lɛ ji ayemforo wu lɛ. Shi ayemforo wu lɛ naanyo lɛ, kɛ́ edamɔ shi ni enu ehe lɛ, emii shɛɔ ehe naakpa yɛ ayemforo wu lɛ gbee lɛ hewɔ. No hewɔ lɛ, mimiishɛɛ lɛ eyi obɔ. 30  Esa akɛ nakai mɔ lɛ aya nɔ ashwere, shi mi lɛ, esa akɛ minɔ aya nɔ agbɔ.” 31  Mɔ ni jɛ ŋwɛi ba lɛ, efe mɛi krokomɛi fɛɛ. Mɔ ni jɛ shikpɔŋ lɛ nɔ lɛ, shikpɔŋ lɛ nɔ ejɛ ni ewieɔ shikpɔŋ lɛ nɔ nibii ahe. Mɔ ni jɛ ŋwɛi eba lɛ, efe mɛi krokomɛi fɛɛ. 32  Nɔ ni ena ni enu lɛ, no he odase eyeɔ, shi mɔ ko mɔ ko ekpɛlɛɛɛ edase lɛ nɔ. 33  Mɔ fɛɛ mɔ ni ekpɛlɛ edase lɛ nɔ lɛ, esɔo naa* akɛ anɔkwafo ji Nyɔŋmɔ. 34  Ejaakɛ mɔ ni Nyɔŋmɔ tsu lɛ, Nyɔŋmɔ wiemɔi ewieɔ, ejaakɛ Nyɔŋmɔ lɛteee mumɔ lɛ he* ehãaa. 35  Tsɛ lɛ sumɔɔ Bi lɛ ni eŋɔ nibii fɛɛ ewo edɛŋ. 36  Mɔ ni jieɔ hemɔkɛyeli kpo yɛ Bi lɛ mli lɛ yɛ naanɔ wala; mɔ ni gboɔ Bi lɛ nɔ toi lɛ, enáŋ wala, shi moŋ Nyɔŋmɔ mlifu hiɔ enɔ.

Shishigbɛ Niŋmaa

Aloo eeenyɛ efee akɛ, “kɛji ajɛɛɛ ŋwɛi afɔɔɔ mɔ ko.”
Kwɛmɔ Mat 3:1 sh. niŋ.
Aloo “akakpa enitsumɔi lɛ ahe mama.”
Ekã shi faŋŋ akɛ, baptisimɔ lɛ tee nɔ yɛ Yesu gbɛtsɔɔmɔ naa. Okɛto Yoh 4:2 lɛ he.
Aloo “ema nɔ mi.”
Aloo “esusuuu mumɔ lɛ.”