Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Yohane 13:1-38

YITSEI LƐ AMLI SAJI

  • Yesu fɔ ekaselɔi lɛ anaji ahe (1-20)

  • Yesu hã ana akɛ Yuda baajie lɛ ehã (21-30)

  • Kitã hee (31-35)

    • “Kɛji nyɛsumɔɔ nyɛhe” (35)

  • Yesu gba efɔ̃ shi akɛ Petro baakwa lɛ (36-38)

13  Agbɛnɛ, dani Hehoo gbi jurɔ lɛ baashɛ lɛ, akɛni Yesu le akɛ eŋmɛlɛtswaa ni ekɛbaaje je nɛɛ mli kɛya Tsɛ lɛ ŋɔɔ lɛ eshɛ hewɔ lɛ, bɔ ni esumɔɔ lɛ diɛŋtsɛ enii ni yɔɔ je lɛ mli lɛ, esumɔ amɛ aahu kɛyashi naagbee.  No mli lɛ, gbɛkɛ niyeli lɛ miiya nɔ, ni Abonsam eŋɔwo Yuda Iskariot, Simon binuu lɛ tsui mli momo koni ejie lɛ ehã.  No hewɔ lɛ, Yesu lɛ, akɛni ele akɛ Tsɛ lɛ eŋɔ nibii fɛɛ ewo edɛŋ, ni akɛ, Nyɔŋmɔ ŋɔɔ ejɛ kɛba, ni eeya Nyɔŋmɔ ŋɔɔ hewɔ lɛ,  ete shi kɛjɛ gbɛkɛ niyeli lɛ shishi ni ejie etadei anɔhaanɔi lɛ eshwie shi. Ni ekɔ papam, ni ekɛŋmɔ ehɛ.  No sɛɛ lɛ, ekɛ nu wo okpolu mli ni ebɔi kaselɔi lɛ anaji ahe fɔmɔ, ni ekɛ papam ni ŋmɔ ehɛ lɛ tsumɔɔ.  Kɛkɛ ni eshɛ Simon Petro nɔ. Petro kɛɛ lɛ akɛ: “Nuŋtsɔ, ani oofɔ minaji ahe?”  Yesu hã lɛ hetoo ekɛɛ: “Nɔ ni mifeɔ nɛɛ, onuuu shishi amrɔ nɛɛ, shi nibii nɛɛ asɛɛ lɛ, obaanu shishi.”  Petro kɛɛ lɛ akɛ: “Ofɔŋ minaji ahe kɔkɔɔkɔ.” Yesu hã lɛ hetoo akɛ: “Kɛ́ mifɔɔɔ onaji ahe lɛ, obɛ gbɛfaŋnɔ ko yɛ miŋɔɔ.”  Simon Petro kɛɛ lɛ akɛ: “Nuŋtsɔ, kaafɔ minaji ahe pɛ, shi moŋ fɔ miniji kɛ miyitso hu he.” 10  Yesu kɛɛ lɛ akɛ: “Mɔ fɛɛ mɔ ni eju ehe lɛ, hefɔflɔmɔ he ehiaaa lɛ akɛ ja enaji ahe fɔmɔ kɛkɛ, ejaakɛ ehe tse kɛmɔ shi. Ni nyɛ lɛ, nyɛhe tse, shi jeee nyɛ fɛɛ.” 11  Ejaakɛ ele mɔ ni jieɔ lɛ ehãa lɛ. No hewɔ ni ekɛɛ akɛ: “Jeee nyɛ fɛɛ nyɛhe tse” lɛ. 12  Agbɛnɛ, be ni efɔ amɛnaji ahe ni ewo etadei anɔhaanɔi lɛ, eho eta okpɔlɔ lɛ he ekoŋŋ, ni ekɛɛ amɛ akɛ: “Ani nyɛnuɔ nɔ ni mifee mihã nyɛ nɛɛ shishi? 13  Nyɛtsɛɔ mi ‘Tsɔɔlɔ,’ kɛ ‘Nuŋtsɔ,’ ni nyɛsane ja, ejaakɛ nakai ji mi. 14  No hewɔ lɛ, kɛji mi, ni miji Nuŋtsɔ kɛ Tsɔɔlɔ lɛ, mifɔ nyɛnaji ahe lɛ, esa akɛ nyɛ hu* nyɛfɔfɔɔ nyɛteŋ mɔ fɛɛ mɔ naji ahe. 15  Ejaakɛ mifee nɔkwɛmɔnɔ mihã nyɛ, koni bɔ ni mifee mihã nyɛ lɛ, nyɛ hu nyɛfee nakai nɔŋŋ. 16  Lɛɛlɛŋ, lɛɛlɛŋ, miikɛɛ nyɛ akɛ, nyɔŋ efeee enuŋtsɔ, asaŋ mɔ ni atsu lɛ lɛ, efeee mɔ ni tsu lɛ lɛ. 17  Kɛji nyɛle nibii nɛɛ ni nyɛkɛtsu nii lɛ, nyɛyɛ miishɛɛ. 18  Jeee nyɛ fɛɛ nyɛhe miwieɔ lɛ; mile mɛi ni mihala lɛ. Shi enɛ ba lɛ nakai koni ŋmalɛ lɛ aba mli akɛ: ‘Mɔ ni yeɔ miboloo lɛ, ewó enanetsitsi nɔ eshi mi.’* 19  Kɛjɛ be nɛɛ nɔ kɛyaa lɛ, miikɛɛ nyɛ dani eba mli, koni kɛ́ eba mli lɛ, nyɛhe nyɛye akɛ mi ni. 20  Lɛɛlɛŋ, lɛɛlɛŋ, miikɛɛ nyɛ akɛ, mɔ ni hereɔ mɔ fɛɛ mɔ ni mitsuɔ lɛ lɛ hereɔ mi hu, ni mɔ fɛɛ mɔ ni hereɔ mi lɛ, ehereɔ mɔ ni tsu mi lɛ hu.” 21  Be ni Yesu wie nibii nɛɛ egbe naa lɛ, ehao yɛ mumɔ mli, ni eye odase ekɛɛ, “Lɛɛlɛŋ, lɛɛlɛŋ, miikɛɛ nyɛ akɛ, nyɛteŋ mɔ kome baajie mi ehã.” 22  Kɛkɛ ni kaselɔi lɛ kwɛkwɛɛ amɛhiɛiaŋ, ejaakɛ amɛleee mɔ ni ewieɔ ehe sane lɛ. 23  No mli lɛ, Yesu kaselɔi lɛ ateŋ mɔ kome ni esumɔɔ lɛ lɛ ta Yesu masɛi kpaakpa.* 24  No hewɔ lɛ, Simon Petro kɛ eyitso fee okadi etsɔɔ lɛ ni ekɛɛ lɛ akɛ: “Tsɔɔmɔ wɔ mɔ ni ewieɔ ehe sane lɛ.” 25  No hewɔ lɛ, mɔ ni ta Yesu masɛi kpaakpa lɛ ho ekpasa Yesu tsitsi ni ekɛɛ lɛ akɛ: “Nuŋtsɔ, namɔ ni?” 26  Yesu hã hetoo akɛ: “Lɛ ji mɔ ni maŋɔ aboloo kuku matsɔ mli mahã lɛ lɛ.” No hewɔ lɛ, be ni ekɛ aboloo lɛ tsɔ mli lɛ, ekɔ ni ekɛhã Yuda, Simon Iskariot bi lɛ. 27  Be ni Yuda he aboloo lɛ sɛɛ lɛ, Satan bote emli. No hewɔ lɛ, Yesu kɛɛ lɛ akɛ: “Nɔ ni ofeɔ lɛ, feemɔ lɛ mramra.” 28  Shi mɛi ni tara okpɔlɔ lɛ he lɛ ateŋ mɔ ko mɔ ko leee nɔ hewɔ ni ekɛɛ lɛ nakai lɛ. 29  Anɔkwa, amɛteŋ mɛi komɛi susu akɛ, akɛni Yuda hiɛɔ shika adeka lɛ hewɔ lɛ, Yesu miikɛɛ lɛ akɛ, “Yaahé nibii ni he hiaa wɔ lɛ oto gbi jurɔ lɛ,” aloo akɛ, eŋɔ nɔ ko ehã ohiafoi. 30  No hewɔ lɛ, be ni ehe aboloo kuku lɛ, eje kpo amrɔ nɔŋŋ. No mli lɛ, je ena. 31  No hewɔ lɛ, be ni eje kpo lɛ, Yesu kɛɛ: “Agbɛnɛ, awo gbɔmɔ Bi lɛ hiɛ nyam, ni awo Nyɔŋmɔ hu hiɛ nyam yɛ ehewɔ. 32  Nyɔŋmɔ diɛŋtsɛ baawo ehiɛ nyam, ni ebaawo ehiɛ nyam amrɔ nɔŋŋ. 33  Bii bibii, mi kɛ nyɛ yɛ be kukuoo ko. Nyɛbaatao mi; ni tamɔ bɔ ni mikɛɛ Yudafoi lɛ akɛ, ‘He ni miyaa lɛ, nyɛnyɛŋ jɛmɛ nyɛba’ lɛ, amrɔ nɛɛ miikɛɛ nyɛ hu nakai nɔŋŋ. 34  Miihã nyɛ kitã hee akɛ nyɛsumɔsumɔa nyɛhe; bɔ ni misumɔ nyɛ lɛ, nyɛ hu nyɛsumɔsumɔa nyɛhe nakai nɔŋŋ. 35  Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.” 36  Simon Petro kɛɛ lɛ akɛ: “Nuŋtsɔ, nɛgbɛ oyaa?” Yesu hã hetoo akɛ: “He ni miyaa lɛ, onyɛŋ misɛɛ onyiɛ amrɔ nɛɛ, shi sɛɛ mli lɛ, obaanyiɛ misɛɛ.” 37  Petro kɛɛ lɛ akɛ: “Nuŋtsɔ, mɛni hewɔ minyɛŋ osɛɛ manyiɛ amrɔ nɛɛ? Maŋɔ miwala* maŋmɛ shi mahã bo.” 38  Yesu hã hetoo akɛ: “Ani obaaŋɔ owala* oŋmɛ shi ohã mi? Lɛɛlɛŋ, lɛɛlɛŋ, miikɛɛ bo akɛ, wuɔ naŋ agbɛɛ ni obaakwa mi shii etɛ.”

Shishigbɛ Niŋmaa

Aloo “sɔ̃ kã nyɛ hu nyɛnɔ akɛ.”
Aloo “ete shi ewo mi.”
Sht. ŋm., “kã Yesu miinaa.”
Aloo “misusuma.”
Aloo “osusuma.”