Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Yohane 11:1-57

11  Agbɛnɛ, nuu ko ni atsɛɔ lɛ Lazaro lɛ he miiye; ejɛ Betania, Maria kɛ enyɛmi yoo Marta mɛi akrowa lɛ.  Nɛkɛ Maria nɛɛ ji mɔ ni fɔse mu ni jeɔ ŋma eshwie Nuŋtsɔ lɛ he ní ekɛ eyitsɔi tsumɔ enaji ahe lɛ; enyɛmi nuu Lazaro he yeɔ lɛ.  No hewɔ lɛ, enyɛmimɛi yei lɛ kɛ shɛɛ maje lɛ amɛkɛɛ: “Nuŋtsɔ, naa! mɔ ni odɔɔ ehe lɛ he miiye.”  Shi be ni Yesu nu lɛ, ekɛɛ: “Nɛkɛ hela nɛɛ jeee nɔ ni baayagbe naa yɛ gbele mli, shi moŋ koni akɛwo Nyɔŋmɔ hiɛ nyam, koni atsɔ no nɔ awo Nyɔŋmɔ Bi lɛ hu hiɛ nyam.”  Agbɛnɛ, Yesu sumɔɔ Marta kɛ enyɛmi yoo lɛ kɛ Lazaro fɛɛ.  Shi be ni enu akɛ Lazaro he miiye lɛ, anɔkwa, ehi shi yɛ he ni eyɔɔ lɛ gbii enyɔ kɛfata he.  Kɛkɛ ni no sɛɛ lɛ, ekɛɛ kaselɔi lɛ akɛ: “Nyɛhãa wɔyaa Yudea ekoŋŋ.”  Kaselɔi lɛ kɛɛ lɛ akɛ: “Rabi, etsɛko tsɔ ni Yudeabii lɛ tao akɛ amɛtswia bo tɛi, ni ooya jɛmɛ ekoŋŋ lo?”  Yesu hã hetoo akɛ: “Ani jeee ŋmɛlɛtswai nyɔŋma kɛ enyɔ yɔɔ jetsɛremɔ mli? Kɛji mɔ ko nyiɛ shwane lɛ, etɛɛɛ, ejaakɛ enaa je nɛɛ la lɛ. 10  Shi kɛji mɔ ko nyiɛ nyɔɔŋ lɛ, etɛɔ, ejaakɛ la lɛ bɛ emli.” 11  Be ni ewie nibii nɛɛ, ekɛshi sɛɛ akɛ: “Wɔnaanyo Lazaro ewɔ, shi miiya jɛmɛ ni mayatsĩɛ lɛ.” 12  Ni kaselɔi lɛ kɛɛ lɛ akɛ: “Nuŋtsɔ, kɛ́ wɔ ewɔɔ lɛ, ehe baawa lɛ.” 13  Shi no mli lɛ, Yesu miiwie egbele he. Shi amɛsusu akɛ eewie wɔ ni awɔɔ kɛjɔɔ he lɛ he. 14  Kɛkɛ ni Yesu kɛɛ amɛ faŋŋ akɛ: “Lazaro egbo, 15  ni nyɛ hewɔ lɛ, miná miishɛɛ pam akɛ mibɛ jɛmɛ, koni nyɛhe nyɛye. Shi nyɛhãa wɔyaa eŋɔɔ.” 16  No hewɔ lɛ, Toma, mɔ ni atsɛɔ lɛ Hãaji lɛ kɛɛ enanemɛi kaselɔi lɛ akɛ: “Nyɛhãa wɔ hu wɔyaa koni wɔkɛ lɛ ayagbo.” 17  Be ni Yesu shɛ jɛmɛ lɛ, ena akɛ Lazaro eye gbii ejwɛ momo yɛ gbonyo bu* lɛ mli. 18  Shi Betania bɛŋkɛ Yerusalem, ni ekɛ lɛ teŋ jekɛmɔ aaafee shitoi enyɔ.* 19  Ni Yudafoi lɛ ateŋ mɛi pii eba Marta kɛ Maria ŋɔɔ koni amɛbashɛje amɛmii yɛ amɛnyɛmi nuu lɛ hewɔ. 20  Be ni Marta nu akɛ Yesu miiba lɛ, etee ekɛ lɛ yakpe; shi Maria lɛ, etee nɔ eta shĩa. 21  Kɛkɛ ni Marta kɛɛ Yesu akɛ: “Nuŋtsɔ, eji oyɛ biɛ kulɛ, minyɛmi nuu lɛ náaa agbo. 22  Ni kɛ̃lɛ, amrɔ nɛɛ po lɛ, mile akɛ nɔ fɛɛ nɔ ni obaabi Nyɔŋmɔ lɛ, Nyɔŋmɔ kɛbaahã bo.” 23  Yesu kɛɛ lɛ akɛ: “Onyɛmi nuu lɛ baate shi.” 24  Marta kɛɛ lɛ akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.” 25  Yesu kɛɛ lɛ akɛ: “Miji gbohiiashitee lɛ kɛ wala lɛ. Mɔ ni jieɔ hemɔkɛyeli kpo yɛ mimli lɛ, kɛ́ egbo po lɛ, ebaaba wala mli; 26  ni mɔ fɛɛ mɔ ni hiɛ kã ni jieɔ hemɔkɛyeli kpo yɛ mimli lɛ gboŋ kɔkɔɔkɔ. Ani oheɔ enɛ oyeɔ?” 27  Ekɛɛ lɛ akɛ: “Hɛɛ, Nuŋtsɔ, miheɔ miyeɔ akɛ bo ji Kristo lɛ, Nyɔŋmɔ Bi lɛ, mɔ ni baa je lɛ mli lɛ.” 28  Be ni ewie enɛ lɛ, eyiŋ etee eyatsɛ enyɛmi yoo Maria, ni ekɛɛ lɛ pɛ akɛ: “Tsɔɔlɔ lɛ eba ni eetsɛ bo.” 29  Be ni Maria nu enɛ lɛ, ete shi oya ni etee eŋɔɔ. 30  Yesu nako abote akrowa lɛ mli, shi moŋ eyɛ he ni Marta kɛ lɛ kpe yɛ lɛ lolo. 31  Be ni Yudafoi ni kɛ Maria yɔɔ shĩa ni amɛshɛjeɔ emii lɛ na akɛ Maria ete shi oya ni eje kpo lɛ, amɛnyiɛ esɛɛ, ejaakɛ amɛsusu akɛ eeya gbonyo bu* lɛ he eyafo yɛ jɛmɛ. 32  Be ni Maria shɛ he ni Yesu yɔɔ lɛ ni ehiŋmɛi gba enɔ lɛ, eho egbee enaji anaa ni ekɛɛ lɛ akɛ: “Nuŋtsɔ, eji oyɛ biɛ kulɛ, minyɛmi nuu lɛ náaa agbo.” 33  Be ni Yesu na akɛ eefo ni Yudafoi ni kɛ lɛ ba lɛ hu miifo lɛ, ewerɛ ho ehe yɛ emli* ni ehao. 34  Ekɛɛ: “Nɛgbɛ nyɛkɛ lɛ eŋmɛ?” Amɛkɛɛ lɛ akɛ: “Nuŋtsɔ, ba ni obakwɛ.” 35  Yesu hiŋmɛiiaŋ kpala nu. 36  Kɛkɛ ni Yudafoi lɛ bɔi kɛɛmɔ akɛ: “Nyɛkwɛa, edɔɔ ehe waa!” 37  Shi amɛteŋ mɛi komɛi kɛɛ: “Nuu nɛɛ ni gbele shwilafo lɛ hiŋmɛii lɛ, ani enyɛŋ efee ni kulɛ mɔ nɛ akagbo?” 38  Kɛkɛ ni Yesu werɛ ho ehe yɛ emli ekoŋŋ ni eba gbonyo bu* lɛ he. Anɔkwa, tɛkplo ni, ni tɛ bu naa. 39  Yesu kɛɛ: “Nyɛjiea tɛ lɛ.” Marta, mɔ ni egbo lɛ nyɛmi yoo lɛ kɛɛ lɛ akɛ: “Nuŋtsɔ, benɛ nɛɛ eeje fu, ejaakɛ eye gbii ejwɛ.” 40  Yesu kɛɛ lɛ akɛ: “Ani mikɛɛɛ bo akɛ kɛ́ ohe oye lɛ obaana Nyɔŋmɔ anunyam lɛ?” 41  No hewɔ lɛ, amɛjie tɛ lɛ. Kɛkɛ ni Yesu hole ehiŋmɛii anɔ kɛtee ŋwɛi ni ekɛɛ: “Ataa, miida bo shi akɛ obo mi toi. 42  Anɔkwa, mile akɛ oboɔ mi toi daa; shi asafoku ni damɔ biɛ lɛ hewɔ miwieɔ lɛ, koni amɛhe amɛye akɛ bo otsu mi.” 43  Be ni ewie nibii nɛɛ, ebo kɛ gbee ni wa ekɛɛ: “Lazaro, jee kpo!” 44  Nuu ni no mli lɛ egbo lɛ je kpo ni akɛ mamai ebala enaji kɛ eniji, ni akɛ mama efi ehiɛ. Yesu kɛɛ amɛ akɛ: “Nyɛfɛnea lɛ ni nyɛhãa eyaa.” 45  No hewɔ lɛ, Yudafoi ni ba Maria ŋɔɔ ni na nɔ ni Yesu fee lɛ ateŋ mɛi pii ná hemɔkɛyeli yɛ emli, 46  shi amɛteŋ mɛi komɛi yiŋ amɛtee Farisifoi lɛ aŋɔɔ ni amɛyagba amɛ nɔ ni Yesu fee lɛ. 47  No hewɔ lɛ, osɔfoi tsiifoi lɛ kɛ Farisifoi lɛ bua Sanhedrin* lɛ naa kɛkpe, ni amɛkɛɛ: “Mɛni wɔfeɔ, ejaakɛ nuu nɛɛ feɔ okadii pii? 48  Kɛ́ wɔŋmɛ lɛ gbɛ ní eya nɔ nɛkɛ nɔŋŋ lɛ, amɛ fɛɛ amɛbaaná hemɔkɛyeli yɛ emli, ni Romabii lɛ baaba amɛbaŋɔ wɔjamɔhe* kɛ wɔmaŋ lɛ.” 49  Shi amɛteŋ mɔ kome, Kaiafa, ni ji osɔfonukpa yɛ nakai afi lɛ mli lɛ kɛɛ amɛ akɛ: “Nyɛleee nɔ ko kwraa, 50  ni nyɛsusuko he hu akɛ sɛɛnamɔ yɛ he kɛhã nyɛ akɛ gbɔmɔ kome baagbo ehã mɛi lɛ, moŋ fe nɔ ni jeŋmaŋ muu lɛ fɛɛ hiɛ baakpãtã.” 51  Shi jeee lɛ diɛŋtsɛ eto eyiŋ ewie enɛ, shi moŋ akɛni osɔfonukpa ji lɛ yɛ nakai afi lɛ mli hewɔ lɛ, egba akɛ Yesu baagbo ehã maŋ lɛ, 52  ni jeee kɛhã maŋ lɛ pɛ, shi moŋ koni ebua Nyɔŋmɔ bii ni egbɛ eshwã lɛ hu anaa efee amɛ ekome. 53  No hewɔ lɛ, kɛjɛ nakai gbi lɛ nɔ kɛyaa lɛ, amɛtee eyi nɔ apam koni amɛgbe lɛ. 54  No hewɔ lɛ, Yesu enyiɛɛɛ kpetekplee dɔŋŋ yɛ Yudafoi lɛ ateŋ, shi moŋ eshi jɛmɛ etee kpokpaa ni bɛŋkɛ ŋa lɛ nɔ* lɛ nɔ, ni etee maŋ ko ni atsɛɔ lɛ Efraim lɛ mli, ni ekɛ kaselɔi lɛ yahi jɛmɛ. 55  Agbɛnɛ, Yudafoi lɛ a-Hehoo lɛ miibɛŋkɛ, ni mɛi babaoo jɛ koiasɛɛ amɛkwɔ kɛtee Yerusalem dani Hehoo lɛ ashɛ, koni amɛyatsuu amɛhe yɛ kusum naa. 56  Amɛmiitao Yesu, ni be ni amɛdamɔdamɔɔ shi yɛ sɔlemɔwe lɛ, amɛkɛɛkɛɛ amɛhe akɛ: “Te nyɛsusuɔ tɛŋŋ? Ani ebaŋ gbi jurɔ lɛ kwraa?” 57  Shi osɔfoi tsiifoi lɛ kɛ Farisifoi lɛ ewo kitã akɛ kɛ́ mɔ ko ná ele he ni Yesu yɔɔ lɛ, ebabɔ amaniɛ, koni amɛyamɔ lɛ.

Shishigbɛ Niŋmaa

Aloo “gbonyo kaimɔ bu.”
Aaafee km etɛ. Sht. ŋm., “aaafee stadioi 15.”
Aloo “gbonyo kaimɔ bu.”
Sht. ŋm., “yɛ mumɔ lɛ mli.”
Aloo “gbonyo kaimɔ bu.”
Kwɛmɔ Mat 26:59 sh. niŋ.
Ni tsɔɔ akɛ, sɔlemɔwe lɛ.
Kwɛmɔ Mat 3:1 sh. niŋ.