Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Yohane 10:1-42

10  “Lɛɛlɛŋ, lɛɛlɛŋ, miikɛɛ nyɛ akɛ, mɔ ni tsɔɔɔ shinaa lɛ mli kɛboteee gwantɛŋi atsũ lɛ mli, shi moŋ etsɔɔ he kroko ekwɔɔ kɛboteɔ mli lɛ, nakai mɔ lɛ, julɔ kɛ ofɔ̃yelɔ* ji lɛ.  Shi mɔ ni tsɔɔ shinaa lɛ mli kɛboteɔ mli lɛ, lɛ ji gwantɛŋi lɛ akwɛlɔ.  Shinaanaakwɛlɔ lɛ gbeleɔ ehãa mɔ nɛ, ni gwantɛŋi lɛ boɔ egbee toi. Ekɛ lɛ diɛŋtsɛ egwantɛŋi lɛ agbɛ́ii tsɛɔ amɛ, ni enyiɛɔ amɛhiɛ kɛjeɔ kpo.  Kɛ́ ejie lɛ diɛŋtsɛ egwantɛŋi lɛ fɛɛ kɛje kpo lɛ, enyiɛɔ amɛhiɛ, ni gwantɛŋi lɛ nyiɛɔ esɛɛ, ejaakɛ amɛle egbee.  Amɛnyiɛŋ mɔkpɔŋ ko sɛɛ kɔkɔɔkɔ, shi amɛbaajo foi kɛje ehe, ejaakɛ amɛleee mɛikpɔji agbee.”  Yesu bu amɛ abɛ nɛɛ, shi amɛ lɛ, amɛnuuu nɔ ni ekɛɔ amɛ lɛ shishi.  No hewɔ lɛ, Yesu saa ekɛɛ: “Lɛɛlɛŋ, lɛɛlɛŋ, miikɛɛ nyɛ akɛ, miji shinaa kɛhã gwantɛŋi lɛ.  Mɛi fɛɛ ni baa ni amɛbakɛɔ akɛ amɛji mi lɛ, julɔi kɛ ofɔ̃yelɔi* ji amɛ; shi gwantɛŋi lɛ booo amɛ toi.  Miji shinaa lɛ; mɔ fɛɛ mɔ ni tsɔɔ minɔ kɛboteɔ mli lɛ, abaahere eyiwala, ni nakai mɔ lɛ baabote mli, ni ebaaje kpo, ni ebaaná lɛɛnii. 10  Julɔ baaa yaka, shi juu kɛ gbee, kɛ hiɛkpatamɔ hewɔ ebaa. Miba koni amɛná wala ni amɛná ni eteke nɔ. 11  Miji tookwɛlɔ kpakpa lɛ; tookwɛlɔ kpakpa lɛ ŋɔɔ ewala* eŋmɛɔ shi ehãa gwantɛŋi lɛ. 12  Apaafonyo, ni ejeee tookwɛlɔ ni gwantɛŋi lɛ hu jeee enɔ lɛ, naa akɛ klaŋ miiba ni ejoɔ foi eshiɔ gwantɛŋi lɛ—ni klaŋ lɛ bamɔmɔɔ amɛ ni egbɛɔ amɛ eshwãa— 13  ejaakɛ apaafonyo ji lɛ, ni edɔɔɔ gwantɛŋi lɛ ahe. 14  Miji tookwɛlɔ kpakpa lɛ. Mile migwantɛŋi lɛ, ni migwantɛŋi lɛ hu le mi, 15  taakɛ Tsɛ lɛ le mi ni mi hu mile Tsɛ lɛ; ni miŋɔɔ miwala* miŋmɛɔ shi mihãa gwantɛŋi lɛ. 16  “Ni miyɛ gwantɛŋi krokomɛi ni jɛɛɛ tsũ nɛɛ mli; esa akɛ mikɛ nomɛi hu aba mli, ni amɛbaabo migbee toi, ni amɛbaatsɔ tooku kome yɛ tookwɛlɔ kome shishi. 17  Enɛ hewɔ ni Tsɛ lɛ sumɔɔ mi lɛ, ejaakɛ miŋɔ miwala* miŋmɛ shi, koni minine ashɛ nɔ ekoŋŋ. 18  Mɔ ko mɔ ko shɔ̃ɔɔ yɛ midɛŋ, shi mi diɛŋtsɛ mikɛŋmɛɔ shi. Miyɛ hegbɛ akɛ mikɛŋmɛɔ shi, ni miyɛ hegbɛ akɛ minine shɛɔ nɔ ekoŋŋ. Miná kitã nɛɛ kɛjɛ mi-Tsɛ ŋɔɔ.” 19  Mligbalamɔ ba Yudafoi lɛ ateŋ ekoŋŋ yɛ wiemɔi nɛɛ ahewɔ. 20  Amɛteŋ mɛi babaoo kɛɛ akɛ: “Eyɛ daimonio, ni eye sɛkɛ. Mɛni hewɔ nyɛboɔ lɛ toi?” 21  Mɛi krokomɛi kɛɛ: “Jeee mɔ ni yɔɔ daimonio wiemɔi nɛ. Ani daimonio ko baanyɛ agbele shwilafoi ahiŋmɛii?” 22  Nakai be lɛ mli lɛ, aaye Nɔjɔɔmɔ Gbi Jurɔ lɛ yɛ Yerusalem. Fɛ̃i be mli ni, 23  ni Yesu nyiɛ sɔlemɔwe lɛ yɛ Solomon Koishi lɛ. 24  Kɛkɛ ni Yudafoi lɛ gba bɔle lɛ, ni amɛbɔi lɛ kɛɛmɔ akɛ: “Be enyiɛ kwraa obaahã wɔmɛ* kɛyashi? Kɛ́ bo ji Kristo lɛ, kɛɛmɔ wɔ faŋŋ.” 25  Yesu hã amɛ hetoo akɛ: “Mikɛɛ nyɛ, ni kɛ̃lɛ nyɛheee nyɛyeee. Nitsumɔi ni mitsuɔ yɛ mi-Tsɛ gbɛ́i mli lɛ, nomɛi yeɔ mihe odase. 26  Shi nyɛheee nyɛyeee, ejaakɛ nyɛjeee migwantɛŋi. 27  Migwantɛŋi lɛ boɔ migbee toi, ni mile amɛ, ni amɛnyiɛɔ misɛɛ. 28  Mihãa amɛ naanɔ wala, ni akpãtãŋ amɛhiɛ kɔkɔɔkɔ, ni mɔ ko mɔ ko shɔ̃ŋ amɛ yɛ midɛŋ. 29  Nɔ ni mi-Tsɛ eŋɔhã mi lɛ fe nibii krokomɛi fɛɛ, ni mɔ ko mɔ ko nyɛŋ ashɔ̃ amɛ yɛ Tsɛ lɛ dɛŋ. 30  Mi kɛ Tsɛ lɛ fɛɛ lɛ, ekome ni.”* 31  Yudafoi lɛ kɔlɔ tɛi ekoŋŋ akɛ amɛkɛbaatswia lɛ. 32  Yesu here amɛnɔ akɛ: “Mijie nitsumɔi kpakpai pii ni jɛ Tsɛ lɛ ŋɔɔ lɛ akpo mitsɔɔ nyɛ. Te nakai nitsumɔi lɛ ateŋ nɔ hewɔ ni nyɛbaatswia mi tɛi nɛɛ?” 33  Yudafoi lɛ hã hetoo akɛ: “Jeee nitsumɔ kpakpa lɛ hewɔ wɔbaatswia bo tɛi lɛ, shi moŋ musubɔɔ hewɔ; ejaakɛ bo ni gbɔmɔ ji bo lɛ, ofeɔ ohe nyɔŋmɔ ko.” 34  Yesu hã amɛ hetoo akɛ: “Ani aŋmako yɛ nyɛ-Mla lɛ mli akɛ, ‘Mikɛɛ, “nyɔŋmɔi ji nyɛ”’?* 35  Kɛ́ etsɛ mɛi ni Nyɔŋmɔ wiemɔ lɛ wie eshi amɛ lɛ ‘nyɔŋmɔi,’—ni kɛ̃lɛ anyɛŋ agu ŋmalɛ lɛ— 36  ani nyɛmiikɛɛ mi mɔ ni Tsɛ lɛ efee mi krɔŋkrɔŋ, ni etsu mi kɛba je lɛ mli lɛ akɛ, ‘Obɔ musu,’ akɛni mikɛɛ akɛ, ‘Nyɔŋmɔ Bi ji mi’ lɛ hewɔ? 37  Kɛ́ mitsuuu mi-Tsɛ nitsumɔi lɛ, nyɛkahea mi nyɛyea. 38  Shi kɛ́ miitsu, ni kɛ̃lɛ nyɛheee mi nyɛyeee po lɛ, nyɛhea nitsumɔi lɛ nyɛyea, koni nyɛbale ni nyɛya nɔ nyɛle akɛ Tsɛ lɛ kɛ mi efee ekome, ni mi hu mi kɛ Tsɛ lɛ efee ekome.” 39  No hewɔ lɛ, amɛka ekoŋŋ akɛ amɛbaamɔ lɛ, shi eje amɛdɛŋ. 40  Ni eyafo Yordan ekoŋŋ kɛtee he ni Yohane baptisiɔ yɛ tsutsu lɛ, ni eyahi jɛmɛ. 41  Ni mɛi babaoo ba eŋɔɔ, ni amɛbɔi kɛɛmɔ akɛ: “Yohane efeee okadi ko moŋ, shi nibii fɛɛ ni Yohane wie yɛ nuu nɛɛ he lɛ, anɔkwale ni.” 42  Ni mɛi babaoo ná hemɔkɛyeli yɛ emli yɛ jɛmɛ.

Shishigbɛ Niŋmaa

Eshishi ji, mɔ ni haa mɛi anii; ojotswalɔ.
Kwɛmɔ kk. 1 sh. niŋ.
Aloo “esusuma.”
Aloo “misusuma.”
Aloo “misusuma.”
Aloo “wɔsusumai amɛ.”
Aloo “Mi kɛ Tsɛ lɛ efee ekome.”
Aloo “nyɛtamɔ nyɔŋmɔi.”