Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Yakobo 3:1-18

3  Minyɛmimɛi, esaaa akɛ nyɛteŋ mɛi babaoo tsɔmɔɔ tsɔɔlɔi ejaakɛ nyɛle akɛ wɔbaaná kojomɔ ni tsii fe* mɛi krokomɛi anɔ.  Ejaakɛ wɔ fɛɛ wɔtɔ̃ɔ* babaoo. Kɛ́ mɔ ko tɔ̃ɔɔ yɛ wiemɔ mli lɛ, no lɛ gbɔmɔ ni eye emuu ji lɛ, ni enyɛɔ ewoɔ egbɔmɔtso muu lɛ fɛɛ manyoflɛ.  Kɛ́ wɔkɛ okpɔŋɔi amanyoflɛi wo amɛdaaŋ koni amɛbo wɔ toi lɛ, wɔkɛkudɔɔ amɛgbɔmɔtso muu lɛ fɛɛ hu.  Kwɛmɔ meelei hu: Eyɛ mli akɛ amɛdara waa ni kɔɔyɔi ni naa wa kpalaa amɛ moŋ, shi kudɔɔ bibioo ko kɛkɛ akɛkudɔɔ amɛ kɛyaa he fɛɛ he ni kudɔɔtsɛ lɛ sumɔɔ ni eya lɛ.  Nakai nɔŋŋ lilɛi lɛ hu, gbɔmɔtso lɛ henɔ bibioo ko kɛkɛ ni, ni kɛ̃lɛ eshwãa nii wuji. Kwɛ bɔ ni la bibioo nyɛɔ eshãa koo kpele!  Lilɛi lɛ hu, la ni. Wɔgbɔmɔtso lɛ henii lɛ ateŋ lɛ, lilɛi lɛ ji jeŋ ko ni mli eyi obɔ kɛ nibii ni ejaaa, ejaakɛ ebuleɔ gbɔmɔtso muu lɛ fɛɛ, ni emaa shihilɛ gbɛ muu lɛ fɛɛ* naa la, ni Gehena* enáa ela lɛ kɛjɛɔ.  Ejaakɛ ŋa mli kooloi kɛ loofɔji kɛ kooloi ni wamɔɔ kɛ ŋshɔŋ loi henɔi lɛ fɛɛ lɛ, gbɔmɔ baanyɛ ajɔɔ amɛhe, ni ejɔɔ amɛhe hu.  Shi gbɔmɔ ko gbɔmɔ ko nyɛŋ ajɔɔ lilɛi lɛ he. Eflegeje ni eyeɔ awui, ebɔɔ ni gbeɔ mɔ eyi lɛ obɔ.  No nɔŋŋ wɔkɛjieɔ Yehowa,* ni ji Tsɛ lɛ yi, ni kɛ̃lɛ no nɔŋŋ hu wɔkɛlomɔɔ gbɔmɛi ni abɔ “yɛ Nyɔŋmɔ su nɔ” lɛ. 10  Daa kome lɛ nɔŋŋ mli jɔɔmɔ kɛ loomɔ jɛɔ. Minyɛmimɛi, esaaa akɛ nibii yaa nɔ yɛ nɛkɛ gbɛ nɔ. 11  Nuhiŋmɛi yɔɔ nɛɛ, ebaaa nuŋma* kɛ nu ni joɔ fɛɛ kɛjɛɛɛ hiŋmɛi kome lɛ nɔŋŋ mli, aloo jeee nakai? 12  Minyɛmimɛi, agbami tso nyɛŋ awo oliv, ni wein tso nyɛŋ awo agbami, aloo jeee nakai? Asaŋ ŋoo nuhiŋmɛi nyɛŋ aba nuŋma. 13  Namɔ ji hiɛshikalɔ kɛ saneshishinulɔ yɛ nyɛteŋ? Etsɔ ejeŋba kpakpa lɛ nɔ ehã ana akɛ ekɛ mlijɔlɛ ni jɛɔ hiɛshikamɔ mli kɛbaa lɛ tsuɔ enitsumɔi. 14  Shi kɛ́ awuŋayeli ni naa wa kɛ mansɔtsɔɔ* yɛ nyɛtsuii amli lɛ, nyɛkashwãa ní nyɛmalea nyɛshia anɔkwale lɛ. 15  Hiɛshikamɔ nɛɛ, jeee ŋwɛi ejɛ; shi moŋ shikpɔŋ nɔ nɔ ni, kooloi anɔ ni, daimonioi anɔ ni. 16  Ejaakɛ he fɛɛ he ni awuŋayeli kɛ mansɔtsɔɔ* yɔɔ lɛ, jɛmɛ basabasafeemɔ kɛ nihiinii fɛɛ hu yɔɔ. 17  Shi hiɛshikamɔ ni jɛ ŋwɛi lɛ, klɛŋklɛŋ kwraa lɛ eyɛ krɔŋŋ, no sɛɛ lɛ esumɔɔ toiŋjɔlɛ, enuɔ nii ashishi, eboɔ toi oya, eyi obɔ kɛ mɔbɔnalɛ kɛ yibii kpakpai, ekwɛɛɛ hiɛiaŋ, efeee osato. 18  Kɛfata he lɛ, jalɛ yibii lɛ, toiŋjɔlɛ mli aduɔ yɛ ahãa mɛi ni kpãtãa lɛ.*

Shishigbɛ Niŋmaa

Aloo “ni naa wa fe.”
Sht. ŋm., “wɔtɛrɛɔ.”
Sht. ŋm., “fɔmɔŋ (jɛɛhe) kokrolonto lɛ.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Sht. ŋm., “nu ni ŋɔɔ.”
Aloo eeenyɛ efee akɛ, “otii ni hãa nyɛfoɔ nyɛ pɛ nyɛnɔ mli mamɔ nyɛhiɛ.”
Aloo eeenyɛ efee akɛ, “otii ni hãa mɔ foɔ lɛ pɛ enɔ mli.”
Aloo eeenyɛ efee akɛ, “mɛi ni kpãtãa lɛ duɔ jalɛ yibii lɛ yɛ toiŋjɔlɛ mli.”