Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Tito 3:1-15

3  Yaa nɔ okai amɛ ni amɛŋɔ amɛhe amɛwo nɔyelii kɛ hegbɛi ashishi, ní amɛbo amɛ toi hu, amɛsaa amɛhe amɛhã nitsumɔ kpakpa fɛɛ nitsumɔ kpakpa,  amɛkawie mɔ ko mɔ ko he efɔŋ, amɛkafee amɛhe béilɔi, shi moŋ amɛfee mɛi ni nuɔ nii ashishi, amɛjie mlijɔlɛ kpo kɛwula shi amɛtsɔɔ gbɔmɛi fɛɛ.  Ejaakɛ wɔ hu tsutsu ko lɛ, wɔji mɛi ni bɛ jwɛŋmɔ, toigbolɔi, ahã wɔdu gbɛ, akɔnɔi kɛ shwɛmɔ-kɛ-ŋɔɔmɔi srɔtoi ye wɔ nyɔŋ, wɔtee nɔ wɔfee nibii gbohii ni wɔklɔ mɛi anɔ, wɔhe yɛ nyaŋemɔ, ni wɔnyɛnyɛɔ wɔhe.  Shi be ni ajie Nyɔŋmɔ, wɔ-Yiwalaherelɔ lɛ mlihilɛ lɛ, kɛ suɔmɔ ni eyɔɔ kɛhã gbɔmɛi lɛ kpo lɛ,  etsɔ hejuu ni kɛ wɔ ba wala mli lɛ kɛ mumɔ krɔŋkrɔŋ ní ekɛfee wɔ ehee lɛ nɔ ehere wɔyiwala ( jeee jalɛ nitsumɔi ní wɔtsu hewɔ, shi moŋ lɛ diɛŋtsɛ emɔbɔnalɛ hewɔ).  Etsɔ Yesu Kristo, wɔ-Yiwalaherelɔ lɛ nɔ efɔse mumɔ nɛɛ eshwie wɔnɔ ni eteke nɔ,*  koni be ni atsɔ nakai mɔ lɛ duromɔ lɛ nɔ abu wɔ jalɔi sɛɛ lɛ, wɔtsɔmɔ niyelɔi yɛ naanɔ wala he hiɛnɔkamɔ naa.  Anɔkwa wiemɔi nɛ, ni miitao ni oya nɔ oma saji nɛɛ anɔ mi, koni mɛi ni ehe Nyɔŋmɔ nɔ amɛye lɛ ahã amɛjwɛŋmɔ ahi nitsumɔi kpakpai ni amɛbaaya nɔ amɛtsu lɛ nɔ. Nibii nɛɛ hi ni amɛhe yɛ sɛɛnamɔ hã gbɔmɛi.  Shi tsi ohe kɛje kwashiai aŋwanejei kɛ wekutɔkpai ahe saji kɛ naataamɔi kɛ Mla lɛ he nɔmɔi ahe, ejaakɛ amɛhe bɛ sɛɛnamɔ ni amɛji yaka nii hu. 10  Gbɔmɔ ni gbɛɔ tsɔɔmɔ kroko eshwãa lɛ, kɛ́ owie otsɔɔ lɛ* shi kome kɛ nɔ ni ji shii enyɔ nɔ lɛ, kwa lɛ, 11  ejaakɛ ole akɛ gbɔmɔ nɛɛ eje gbɛ lɛ nɔ ni eefee esha, ni lɛ diɛŋtsɛ ebu ehe fɔ. 12  Kɛ́ mitsu Artema aloo Tihiko kɛba oŋɔɔ lɛ, bɔɔ mɔdɛŋ fɛɛ ni ooonyɛ ni oba miŋɔɔ yɛ Nikopoli, ejaakɛ jɛmɛ mikpɛ miyiŋ akɛ maye fɛ̃i be lɛ yɛ. 13  Bɔɔ mɔdɛŋ ni owo Zena, mɔ ni le Mla lɛ jogbaŋŋ lɛ kɛ Apolo gbɛ jogbaŋŋ, koni nɔ ko he akahia amɛ yɛ amɛgbɛfãa lɛ mli. 14  Shi hã wɔ diɛŋtsɛ wɔmɛi lɛ hu akase nitsumɔi kpakpai ní ayaa nɔ atsuɔ koni kɛ́ hiamɔi ní ebaabi ni atsu he nii oya nɔŋŋ ba lɛ, amɛye amɛbua, koni amɛkafee mɛi ni wooo yibii. 15  Mɛi ni kɛ mi yɔɔ lɛ fɛɛ miiŋa bo. Ŋa mɛi ni dɔɔ wɔhe yɛ hemɔkɛyeli lɛ mli lɛ. Duromɔ lɛ kɛ nyɛ fɛɛ ahi shi.

Shishigbɛ Niŋmaa

Aloo “babaoo.”
Aloo “obɔ lɛ kɔkɔ.”