Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Lɛ Yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ Kwɛmɔ afi 2013 nɔ̃ lɛ

Tito 2:1-15

EMLI SAJI

  • Tsɔɔmɔ ni hãa gbekɛbii kɛ onukpai fɛɛ náa hewalɛ (1-15)

    • Kwa bu ni abuuu Nyɔŋmɔ lɛ (12)

    • Ohiɛ adɔ nitsumɔi kpakpai ahe (14)

2  Shi bo lɛ, yaa nɔ owie wiemɔi ni kɛ tsɔɔmɔ ni hãa mɔ náa hewalɛ* lɛ kpãa gbee.  Hii onukpai lɛ, amɛŋmɛ pɛpɛɛpɛ yɛ amɛnifeemɔi amli, amɛfee mɛi ni bɔɔ mɔdɛŋ,* amɛná jwɛŋmɔ ni sa, amɛhe awa amɛ yɛ hemɔkɛyeli, suɔmɔ, kɛ shifimɔ mli.  Nakai nɔŋŋ yei onukpai lɛ hu, amɛba amɛjeŋ akɛ Nyɔŋmɔ gbeyeishelɔi, amɛkagbe mɛi ahe guɔ, amɛkahã dãanumɔ babaoo ye amɛ nyɔŋ, amɛfee mɛi ni tsɔɔ nii kpakpai,  koni amɛwo oblayei lɛ ŋaa* ní amɛsumɔ amɛwumɛi, amɛsumɔ amɛbii,  amɛná jwɛŋmɔ ni sa, amɛhe atse, amɛtsu nii yɛ shĩa,* amɛfee ekpakpa, amɛŋɔ amɛhe amɛwo amɛ diɛŋtsɛ amɛwumɛi ashishi, koni akawie Nyɔŋmɔ wiemɔ lɛ he efɔŋ.  Oblahii hu nakai nɔŋŋ, yaa nɔ owie otsɔɔ amɛ koni amɛná jwɛŋmɔ ni sa,  ní yɛ gbɛ fɛɛ gbɛ nɔ lɛ, oŋɔ bo diɛŋtsɛ ohe ofee nɔkwɛmɔnɔ ohã amɛ yɛ nitsumɔi kpakpai amli. Tsɔɔmɔ nii ni yɔɔ krɔŋŋ* kɛ mɔdɛŋbɔɔ fɛɛ,*  ní owie wiemɔi ni hãa mɔ náa hewalɛ* ní anáŋ he sane ko atã, koni shiteekɛwolɔi lɛ ahiɛ agboi, akɛni amɛbɛ nɔ ko gbonyo* ko ní amɛbaawie yɛ wɔhe lɛ hewɔ.  Nyɔji lɛ, amɛŋɔ amɛhe amɛwo amɛnuŋtsɔmɛi ashishi yɛ nibii fɛɛ mli, amɛbɔ mɔdɛŋ amɛsa amɛhiɛ, ni amɛkajie sane naa, 10  amɛkaju amɛ, shi moŋ amɛhã ana akɛ abaanyɛ amu afɔ̃ amɛnɔ kwraa, koni amɛkɛwula Nyɔŋmɔ, wɔ-Yiwalaherelɔ lɛ tsɔɔmɔ lɛ yɛ gbɛ fɛɛ gbɛ nɔ. 11  Ejaakɛ ajie Nyɔŋmɔ duromɔ lɛ kpo, ni no ehã aahere gbɔmɛi srɔtoi fɛɛ yiwala. 12  No tsɔseɔ wɔ koni wɔkwa bu ni abuuu Nyɔŋmɔ kɛ je lɛŋ akɔnɔi, ní wɔkɛ jwɛŋmɔ ni sa kɛ jalɛ kɛ Nyɔŋmɔjamɔ su ahi shi yɛ shihilɛ gbɛjianɔtoo ni yɔɔ amrɔ nɛɛ* mli, 13  be mli ni wɔmɛɔ hiɛnɔkamɔ ní hãa anáa miishɛɛ lɛ kɛ Nyɔŋmɔ kpeteŋkpele lɛ kpojiemɔ ni yɔɔ nyam lɛ kɛ Yesu Kristo, wɔ-Yiwalaherelɔ lɛ kpojiemɔ ni yɔɔ nyam lɛ, 14  Kristo ji mɔ ni ŋɔ ehe ehã wɔ koni ekɛhã wɔye wɔhe* kɛjɛ mlatɔmɔi srɔtoi fɛɛ mli, ní etsuu gbɔmɛi ni ji lɛ diɛŋtsɛ enii krɛdɛɛ, ní hiɛ dɔɔ nitsumɔi kpakpai ahe lɛ he ehã ehe. 15  Yaa nɔ owie nibii nɛɛ, ní owie otsɔɔ mɛi,* ní okune* kɛ hegbɛ fɛɛ. Kaafee nɔ ko ni hãŋ abu bo.

Shishigbɛ Niŋmaa

Aloo “ní tsaa mɔ; ní sɛɛnamɔ yɔɔ he.”
Aloo “amɛfee mɛi ni kɛ nibii efeee shwɛmɔ.”
Aloo “amɛhã oblayei lɛ ahiɛ aba amɛhe nɔ; amɛtsɔse oblayei lɛ.”
Aloo “amɛkwɛ amɛshĩai.”
Aloo eeenyɛ efee akɛ, “Okɛ krɔŋŋfeemɔ atsɔɔ nii.”
Aloo “ní okɛ nibii akafee shwɛmɔ kwraa.”
Aloo “ní tsaa mɔ; ní sɛɛnamɔ yɔɔ he.”
Aloo “fɔŋ.”
Aloo “yinɔ ni yɔɔ amrɔ nɛɛ.” Kwɛmɔ Wiemɔi Titrii Amligbalamɔ lɛ.
Sht. ŋm., “ekɛkpɔ̃ wɔ.”
Aloo “owo mɛi hewalɛ.”
Aloo “ojaje mɛi.”