Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Tito 1:1-16

1  Paulo, Nyɔŋmɔ nyɔŋ kɛ Yesu Kristo bɔfo yɛ mɛi ni Nyɔŋmɔ ehala lɛ ahemɔkɛyeli lɛ naa, kɛ agbɛnɛ hu, yɛ anɔkwale lɛ ní kɛ Nyɔŋmɔjamɔ su kpãa gbee lɛ he nilee krɔŋŋ lɛ naa,  ni enɛ damɔ naanɔ wala lɛ he hiɛnɔkamɔ ní Nyɔŋmɔ, mɔ ni nyɛŋ emale lɛ wo he shi yɛ blema tɔ̃ɔ lɛ nɔ;  shi yɛ lɛ diɛŋtsɛ ebe ni sa mli lɛ, etsɔ shiɛmɔ ní atu awo midɛŋ yɛ Nyɔŋmɔ, wɔ-Yiwalaherelɔ lɛ famɔ naa lɛ nɔ ehã ale ewiemɔ lɛ;  kɛyahã Tito, bi krɔŋŋ yɛ hemɔkɛyeli lɛ ní wɔ fɛɛ wɔnáa mli gbɛfaŋnɔ lɛ naa lɛ akɛ: Duromɔ kɛ toiŋjɔlɛ ni jɛ Nyɔŋmɔ, ni ji Tsɛ lɛ kɛ Kristo Yesu, wɔ-Yiwalaherelɔ lɛ dɛŋ lɛ ahã bo.  Mishi bo yɛ Kreta koni ojaje nibii ni ejaaa* lɛ, ní ohole asafoŋ onukpai yɛ maŋ fɛɛ maŋ mli, tamɔ bɔ ni mikɛ gbɛtsɔɔmɔ hã bo lɛ:  kɛ́ nuu ko yɛ ni sane ko bɛ ehe, eji wu ni yɔɔ ŋa kome, eyɛ bii ní heɔ yeɔ ní awieee amɛhe akɛ amɛji sakasakafeelɔi* loo atuatselɔi.  Nɔkwɛlɔ lɛ, akɛni eji shĩa nɔkwɛlɔ ní Nyɔŋmɔ ehala lɛ hewɔ lɛ, esa akɛ efee mɔ ni sane ko bɛ ehe, jeee mɔ ni yeɔ etsui naa sane, jeee mɔ ni mli fuɔ mramra, jeee dãatɔlɔ, jeee yiwalɔ,* jeee mɔ ni kɛ amimyeli tiuɔ kutumpɔo sɛɛnamɔ sɛɛ,  shi moŋ gbɔfeelɔ, mɔ ni sumɔɔ ekpakpa, mɔ ni yɔɔ jwɛŋmɔ ni sa,* jalɔ, anɔkwafo, mɔ ni yeɔ ehe nɔ,  yɛ enitsɔɔmɔ he ŋaa gbɛfaŋ lɛ, ehiɛɔ anɔkwa wiemɔ lɛ* mli kpɛŋŋ, koni enyɛ ekɛ tsɔɔmɔ ni hãa mɔ náa hewalɛ* lɛ awo mɛi hewalɛ,* ní ekɛkune* mɛi ni wieɔ shiɔ tsɔɔmɔ nɛɛ hu. 10  Ejaakɛ mɛi pii yɛ ni ji atuatselɔi, mɛi ni wieɔ wiemɔi ni sɛɛnamɔ bɛ he, kɛ mɛi ni lakaa mɛi, titri lɛ, mɛi ni kpɛtɛɔ ketiafoo lɛ he lɛ. 11  Ehe miihia ni ahã amɛbu amɛnaa, akɛni nɛkɛ mɛi nɛɛ yaa nɔ amɛbutuɔ shĩai muji fɛɛ lɛ hewɔ, ejaakɛ amɛtsɔɔ nibii ni esaaa akɛ amɛtsɔɔ yɛ kutumpɔo sɛɛnamɔ hewɔ. 12  Amɛteŋ mɔ ko ni ji amɛ diɛŋtsɛ amɛgbalɔ lɛ kɛɛ akɛ: “Kretabii ji amalelɔi be fɛɛ be, kooloi awuiyelɔi, fufeelɔi hejɔ̃lɔi.” 13  Nɛkɛ odase nɛɛ anɔkwale ni. Enɛ hewɔ lɛ, yaa nɔ okune* amɛ veveeve, koni amɛhe awa amɛ yɛ hemɔkɛyeli lɛ mli, 14  ní amɛkɛ amɛjwɛŋmɔ akaya Yudafoi adesãi kɛ gbɔmɛi ni kpaleɔ kɛjɛɔ anɔkwale lɛ he lɛ akitãi lɛ anɔ. 15  Mɛi ni he tse lɛ, nibii fɛɛ he tse hã amɛ; shi mɛi ni abule amɛ ní amɛbɛ hemɔkɛyeli lɛ, nɔ ko nɔ ko bɛ ni he tse hã amɛ, ejaakɛ abule amɛjwɛŋmɔi kɛ amɛhenilei fɛɛ. 16  Amɛjajeɔ yɛ faŋŋ akɛ amɛle Nyɔŋmɔ, shi amɛkɛ amɛnitsumɔi kwaa lɛ, ejaakɛ amɛhe yɛ nyaŋemɔ ni amɛgboɔ toi, ni amɛsaaa hãaa nitsumɔ kpakpa ko kwraa.

Shishigbɛ Niŋmaa

Aloo “nibii ni yeko emuu.”
Aloo “amɛhiɛ yɛ kramakrama; amɛhiɛ ejɔɔɔ.”
Aloo “jeee ninekpokpookpotsɛ.”
Aloo “mɔ ni yɔɔ jwɛŋmɔ kpakpa; mɔ ni hiɛ kã shi.”
Aloo “sane ní abaanyɛ amu afɔ̃ nɔ lɛ.”
Aloo “ní tsaa mɔ; ní sɛɛnamɔ yɔɔ he.”
Aloo “awie atsɔɔ mɛi.”
Aloo “ekɛjaje.”
Aloo “ojaje.”