Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Romabii 9:1-33

9  Miiwie anɔkwale yɛ Kristo mli; mimaleee, ejaakɛ mihenilee yeɔ mi odase yɛ mumɔ krɔŋkrɔŋ mli,  akɛ miyeɔ awerɛho babaoo ni minuɔ dɔlɛ ni sɛɛ efooo he yɛ mitsui mli.  Ejaakɛ miná ni kulɛ atse mi diɛŋtsɛ kɛje Kristo lɛ he akɛ mɔ ni alomɔ lɛ yɛ minyɛmimɛi ni ji miwekumɛi yɛ heloo gbɛfaŋ lɛ anajiaŋ,  mɛi ni ji Israelbii lɛ. Amɛnɔ ji biiatsɔmɔ lɛ kɛ anunyam lɛ kɛ kpaŋmɔi lɛ kɛ Mla lɛ kɛhãmɔ lɛ kɛ sɔɔmɔ krɔŋŋ lɛ kɛ shiwoi lɛ.  Amɛnɔ ji tsɛmɛi lɛ, mɛi amli hu ni Kristo lɛ jɛ kɛba yɛ heloo gbɛfaŋ lɛ. Ajie Nyɔŋmɔ, mɔ ni ta nii fɛɛ nɔ lɛ, yi kɛya naanɔ. Amen.  Shi no etsɔɔɔ akɛ Nyɔŋmɔ wiemɔ lɛ efee yaka. Ejaakɛ jeee mɛi fɛɛ ni jɛ Israel mli lɛ ji “Israel” lɛɛlɛŋ.  Asaŋ jeee akɛni Abraham seshi* ji amɛ hewɔ lɛ, bii ji amɛ fɛɛ; shi moŋ, “Mɔ ni abaatsɛ lɛ akɛ oseshi* lɛ baajɛ Isak mli.”  No ji akɛ, jeee heloonaa bii lɛ ji Nyɔŋmɔ bii lɛɛlɛŋ, shi shiwoo naa bii lɛ moŋ abuɔ akɛ seshi* lɛ.  Ejaakɛ shiwoo wiemɔ lɛ nɛ: “Yɛ nɛkɛ be nɛɛ mli lɛ maba ni Sara baaná binuu.” 10  Jeee no be lɛ mli kɛkɛ, shi moŋ be ni Rebeka kɛ wɔtsɛ Isak kome lɛ ná hãaji musu lɛ hu; 11  ejaakɛ be ni anáko afɔ amɛ ni amɛtsuko nɔ kpakpa ko loo nɔ fɔŋ ko lɛ, bɔ ni afee ni Nyɔŋmɔ yiŋtoo yɛ halamɔ lɛ he lɛ akadamɔ nitsumɔi anɔ, shi moŋ eya nɔ edamɔ mɔ ni tsɛɔ mɔ lɛ nɔ lɛ, 12  akɛɛ yoo lɛ akɛ: “Onukpa lɛ baatsɔ nyɔŋ ehã gbekɛ lɛ.” 13  Tamɔ bɔ ni aŋma lɛ, akɛ: “Yakob lɛ, misumɔ lɛ, shi Esau lɛ, minyɛ lɛ.” 14  Belɛ, te wɔɔkɛɛ tɛŋŋ? Ani Nyɔŋmɔ yeɔ sane ko ni ejaaa? Dabida! 15  Ejaakɛ ekɛɛ Mose akɛ: “Mana mɔ fɛɛ mɔ ní misumɔɔ akɛ mana lɛ mɔbɔ lɛ mɔbɔ, ni majie musuŋtsɔlɛ kpo matsɔɔ mɔ fɛɛ mɔ ní misumɔɔ akɛ majie musuŋtsɔlɛ kpo matsɔɔ lɛ lɛ.” 16  No hewɔ lɛ, agbɛnɛ, edamɔɔɔ nɔ ni mɔ shweɔ aloo mɔ lɛ mɔdɛŋbɔɔ nɔ,* shi moŋ edamɔ Nyɔŋmɔ, mɔ ni naa mɔbɔ lɛ nɔ. 17  Ejaakɛ ŋmalɛ lɛ kɛɛ Farao akɛ: “Enɛ nɔŋŋ hewɔ mihã otee nɔ ohi shi lɛ: koni matsɔ onɔ majie mihewalɛ kpo matsɔɔ, koni mahã ajaje migbɛ́i lɛ yɛ shikpɔŋ lɛ nɔ fɛɛ.” 18  No hewɔ lɛ, agbɛnɛ, mɔ fɛɛ mɔ ni esumɔɔ akɛ ena lɛ mɔbɔ lɛ, lɛ mɔbɔ enaa, shi mɔ fɛɛ mɔ ni esumɔɔ akɛ eŋmɛ lɛ gbɛ ní ekpiliŋ etsui lɛ, lɛ eŋmɛɔ lɛ gbɛ ní ekpiliŋ etsui. 19  No hewɔ lɛ, obaakɛɛ mi akɛ: “Mɛni hewɔ eshwaa mɔ* lolo? Ejaakɛ namɔ baanyɛ ate shi awo esuɔmɔnaa nii lɛ?” 20  Shi bo gbɔmɔ, namɔ ji bo ni okɛ Nyɔŋmɔ kaneɔ? Ani nɔ ni ashɔ̃ lɛ baakɛɛ mɔ ni shɔ̃ lɛ lɛ akɛ: “Mɛni hewɔ oshɔ̃ mi nɛkɛ?” 21  Mɛni? Ani gbɛshɔ̃lɔ lɛ bɛ hegbɛ yɛ sũ lɛ nɔ akɛ ekɛ sũ ni akpɔtɔ kome lɛ nɔŋŋ eko baashɔ̃ kukwɛi* ko ni hiɛ yɔɔ nyam, ni ekɛ eko hu ashɔ̃ kukwɛi* ko ni hiɛ bɛ nyam? 22  Belɛ, kɛ́ Nyɔŋmɔ sumɔ akɛ ejie emlifu kpo ni ehã ale ehewalɛ lɛ, ni eto etsui shi waa ehã mlifu kukwɛi* ní sa hiɛkpatamɔ lɛ hu? 23  Ni kɛji efee enɛ bɔ ni afee ni ehã ale enunyam falɛ yɛ mɔbɔnalɛ kukwɛii* ní etsɔ hiɛ esaa eto kɛhã anunyam lɛ anɔ lɛ, 24  ni tsɔɔ akɛ, wɔ mɛi ni etsɛ lɛ, jeee kɛjɛ Yudafoi lɛ ateŋ kɛkɛ, shi moŋ kɛjɛ jeŋmaji lɛ hu ateŋ lɛ, no hu? 25  Tamɔ bɔ pɛ ni ekɛɛ hu yɛ Hoshea wolo lɛ mli lɛ, akɛ: “Matsɛ mɛi ni jeee mimɛi lɛ akɛ ‘mimɛi,’ kɛ yoo ni asumɔɔɔ lɛ lɛ akɛ, ‘misuɔlɔ’; 26  ni he ni akɛɛ amɛ yɛ akɛ, ‘Nyɛjeee mimɛi lɛ,’ jɛmɛ nɔŋŋ abaatsɛ amɛ akɛ ‘Nyɔŋmɔ hiɛkãalɔ lɛ bii’ yɛ.” 27  Kɛfata he lɛ, Yesaia bolɔɔ yɛ Israel hewɔ akɛ: “Eyɛ mli akɛ Israelbii lɛ ayi fa tamɔ ŋshɔnaa shia moŋ, shi mɛi ni eshwɛ lɛ kɛkɛ yiwala abaahere. 28  Ejaakɛ Yehowa* baahã mɛi abu amɛhe akɔntaa yɛ shikpɔŋ lɛ nɔ, ebaagbe naa ni ebaafo lɛ kuku.”* 29  Agbɛnɛ hu, taakɛ Yesaia gba lɛ: “Eji Yehowa,* taiatsɛ lɛ, shiii seshi* ko ehãaa wɔ kulɛ, wɔtsɔmɔ tamɔ Sodom pɛpɛɛpɛ, ni wɔfee tamɔ Gomora.” 30  Belɛ, te wɔɔkɛɛ tɛŋŋ? Akɛ, eyɛ mli akɛ jeŋmajiaŋbii lɛ ediii jalɛ sɛɛ moŋ, shi amɛnine shɛ jalɛ, ni ji jalɛ ni jɛ hemɔkɛyeli mli lɛ nɔ; 31  shi Israel lɛ, eyɛ mli akɛ ediɔ jalɛ mla sɛɛ moŋ, shi eshɛɛɛ nakai mla lɛ he. 32  Mɛni hewɔ? Ejaakɛ amɛtsɔɔɔ hemɔkɛyeli nɔ amɛdiii sɛɛ, shi moŋ amɛdi sɛɛ oookɛɛ edamɔ nitsumɔi anɔ. Amɛtɛrɛ “tɛmɔ tɛ” lɛ; 33  tamɔ bɔ ni aŋma lɛ, akɛ: “Naa! mikɛ tɛmɔ tɛ ko kɛ nanetɔ̃tɔmɔ tɛsaa ko miiŋmɛ shi yɛ Zion, shi mɔ fɛɛ mɔ ni náa no mli hemɔkɛyeli lɛ, enine enyɛŋ shi.”

Shishigbɛ Niŋmaa

Sht. ŋm., “dumɔwu.”
Sht. ŋm., “odumɔwu.”
Sht. ŋm., “dumɔwu.”
Sht. ŋm., “edamɔɔɔ mɔ ni shweɔ lɛ nɔ, ni asaŋ edamɔɔɔ mɔ ni joɔ foi lɛ nɔ.”
Aloo “etaoɔ mɔ he tɔmɔ.”
Aloo “gbɛ́.”
Aloo “gbɛ́.”
Aloo “gbɛ́.”
Aloo “gbɛ́i.”
Kwɛmɔ Wiemɔi Titrii Amligbalamɔ lɛ.
Aloo “ebaatsu he nii oya.”
Kwɛmɔ Wiemɔi Titrii Amligbalamɔ lɛ.
Sht. ŋm., “dumɔwu.”