Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Romabii 8:1-39

8  No hewɔ lɛ, mɛi ni kɛ Kristo Yesu efee ekome lɛ bɛ fɔbuu ko.  Ejaakɛ mumɔ lɛ mla lɛ ni hãa wala yɛ Kristo Yesu mli lɛ ehã nyɛye nyɛhe kɛjɛ esha mla lɛ kɛ gbele mla lɛ dɛŋ.  Nɔ ni Mla lɛ nyɛɛɛ afee yɛ gbedemɔ ni heloo lɛ ehã egbede lɛ hewɔ lɛ, Nyɔŋmɔ tsɔ lɛ diɛŋtsɛ e-Bi lɛ ni etsu kɛba yɛ su ni tamɔ esha heloo su mli kɛ agbɛnɛ hu yɛ esha hewɔ lɛ nɔ efee, ni ekɛbu esha fɔ yɛ heloo lɛ mli,  koni Mla lɛ mli jalɛ taomɔ nii lɛ aba mli yɛ wɔ mɛi ni wɔnyiɛɛɛ yɛ heloo lɛ naa, shi moŋ wɔnyiɛɔ yɛ mumɔ lɛ naa lɛ anɔ.  Ejaakɛ mɛi ni hiɔ shi yɛ heloo lɛ naa lɛ kɛ amɛjwɛŋmɔ maa heloo lɛ nibii anɔ, shi mɛi ni hiɔ shi yɛ mumɔ lɛ naa lɛ kɛ amɛjwɛŋmɔ maa mumɔ lɛ nibii anɔ.  Ejaakɛ jwɛŋmɔ ni akɛmaa heloo lɛ nɔ lɛ, gbele ni, shi jwɛŋmɔ ni akɛmaa mumɔ lɛ nɔ lɛ, wala kɛ toiŋjɔlɛ ni;  ejaakɛ jwɛŋmɔ ni akɛmaa heloo lɛ nɔ lɛ ji nyɛɛ ni anyɛɔ Nyɔŋmɔ, ejaakɛ heloo lɛ eŋɔɔɔ ehe ewooo Nyɔŋmɔ mla lɛ shishi, ni asaŋ enyɛŋ efee nakai tete.  No hewɔ lɛ, mɛi ni nyiɛɔ yɛ heloo lɛ naa lɛ nyɛɛɛ Nyɔŋmɔ hiɛ amɛsa.  Shi kɛ́ Nyɔŋmɔ mumɔ lɛ hiɔ nyɛmli lɛɛlɛŋ lɛ, no lɛ nyɛnyiɛɛɛ yɛ heloo lɛ naa, shi moŋ nyɛnyiɛɔ yɛ mumɔ lɛ naa. Shi kɛ́ mɔ ko bɛ Kristo mumɔ lɛ, belɛ mɔ lɛ jeee Kristo nɔ. 10  Shi kɛ́ Kristo kɛ nyɛ efee ekome lɛ, no lɛ gbɔmɔtso lɛ egbo yɛ esha hewɔ, shi mumɔ lɛ ji wala yɛ jalɛ hewɔ. 11  Agbɛnɛ, kɛji mɔ ni tee Yesu shi kɛjɛ gbohii ateŋ lɛ hiɔ nyɛmli lɛ, mɔ ni tee Kristo Yesu shi kɛjɛ gbohii ateŋ lɛ baatsɔ emumɔ ni hiɔ nyɛmli lɛ nɔ ehã nyɛgbɔmɔtsei ni baagboi lɛ hu wala. 12  No hewɔ lɛ, agbɛnɛ, nyɛmimɛi, sɔ̃ kã wɔnɔ, shi ejeee heloo lɛ he sɔ̃ ni biɔ ni wɔhi shi yɛ heloo lɛ naa; 13  ejaakɛ kɛ́ nyɛhi shi yɛ heloo lɛ naa lɛ, bɔ fɛɛ bɔ ni fee lɛ nyɛbaagboi; shi kɛ́ nyɛtsɔ mumɔ lɛ nɔ nyɛgbe gbɔmɔtso lɛ nitsumɔi lɛ, nyɛhiɛ baakamɔ. 14  Ejaakɛ mɛi fɛɛ ni Nyɔŋmɔ mumɔ lɛ kpalaa amɛ lɛ, amɛji Nyɔŋmɔ bii lɛɛlɛŋ. 15  Ejaakɛ jeee nyɔŋyeli mumɔ ní hãa asheɔ gbeyei ekoŋŋ lɛ nyɛná, shi moŋ nyɛná biiatsɔmɔ mumɔ, ni ji mumɔ ní hãa wɔbolɔɔ akɛ: “Aba,* Ataa!” lɛ. 16  Mumɔ lɛ diɛŋtsɛ kɛ wɔmumɔ lɛ yeɔ odase akɛ Nyɔŋmɔ bii ji wɔ. 17  Belɛ, kɛ́ bii ji wɔ lɛ, niyelɔi hu ji wɔ—anɔkwa, Nyɔŋmɔ niyelɔi, kɛ Kristo nanemɛi niyelɔi—shi ja wɔ kɛ lɛ efee ekome kɛna nɔ dã, koni awo wɔ kɛ lɛ fɛɛ hiɛ nyam hu. 18  Ejaakɛ misusuɔ akɛ kɛ́ akɛ amanehului ni wɔnaa amrɔ nɛɛ to anunyam ni abaajie kpo yɛ wɔmli lɛ he lɛ, nomɛi jeee nɔ ko kwraa. 19  Ejaakɛ bɔɔ nii lɛ kɛ miishɛɛ kpele miimɛ Nyɔŋmɔ bii lɛ akpojiemɔ lɛ. 20  Ejaakɛ aŋɔ bɔɔ nii lɛ awo yaka nii ashishi, jeee amɛ diɛŋtsɛ amɛsuɔmɔ naa, shi moŋ yɛ mɔ ni ŋɔ amɛ ewo shishi lɛ suɔmɔ naa, yɛ hiɛnɔkamɔ mli 21  akɛ abaahã bɔɔ nii lɛ diɛŋtsɛ hu aye amɛhe kɛjɛ fitemɔ nyɔŋyeli mli ní amɛná Nyɔŋmɔ bii lɛ anunyam heyeli lɛ. 22  Ejaakɛ wɔle akɛ bɔɔ nii lɛ fɛɛ feɔ ekome kɛyaa nɔ amɛkɛ̃mɔɔ ni amɛhe jaraa amɛ kɛbashi amrɔ nɛɛ. 23  Jeee no kɛkɛ, shi moŋ wɔ diɛŋtsɛ hu ni wɔyɔɔ klɛŋklɛŋ yibii, ni ji mumɔ lɛ, hɛɛ, wɔ diɛŋtsɛ hu wɔkɛ̃mɔɔ yɛ wɔmli, ni yɛ nakai be lɛ mli nɔŋŋ lɛ wɔmiimɛ waa kɛhã bii ni wɔbaatsɔmɔ lɛ, ni ji kpɔmɔ ni abaatsɔ kpɔmɔnɔ lɛ nɔ akpɔ̃ wɔ kɛjɛ wɔgbɔmɔtsei lɛ amli lɛ. 24  Ejaakɛ ahere wɔyiwala yɛ hiɛnɔkamɔ nɛɛ mli; shi hiɛnɔkamɔ ni anaa lɛ, ejeee hiɛnɔkamɔ, ejaakɛ kɛ́ gbɔmɔ na nɔ ko lɛ, ani ehiɛ kãa nakai nɔ lɛ nɔ? 25  Shi kɛ́ wɔhiɛ kã nɔ ni wɔnaaa lɛ nɔ lɛ, wɔkɛ shifimɔ yaa nɔ wɔmɛɔ nakai nɔ lɛ kɛ miishɛɛ kpele. 26  Nakai nɔŋŋ mumɔ lɛ hu yeɔ ebuaa wɔ yɛ wɔgbedemɔi lɛ amli; ejaakɛ nɔ ni esa akɛ wɔsɔle wɔbi taakɛ ehe hiaa akɛ wɔfee lɛ, wɔleee, shi moŋ mumɔ lɛ diɛŋtsɛ kɛ wɔkɛ̃mɔmɔi ni ejeko kpo* lɛ kpaa fai ehãa wɔ. 27  Shi mɔ ni taoɔ tsuii amli lɛ le nɔ ni mumɔ lɛ tsɔɔ lɛ,* ejaakɛ ekpaa fai ehãa mɛi krɔŋkrɔŋi lɛ yɛ Nyɔŋmɔ suɔmɔ naa. 28  Wɔle akɛ, Nyɔŋmɔ hãa enitsumɔi lɛ fɛɛ kɛ amɛhe kpãa gbee kɛhã mɛi ni sumɔɔ Nyɔŋmɔ lɛ, mɛi ni atsɛ amɛ yɛ eyiŋtoo naa lɛ ahilɛkɛhamɔ; 29  ejaakɛ mɛi ni ekpɛlɛ amɛnɔ klɛŋklɛŋ lɛ, etsɔ hiɛ ekpɛ mli eto hu akɛ amɛsu baatamɔ e-Bi lɛ nɔ lɛ, koni e-Bi lɛ afee kromɔbi yɛ nyɛmimɛi pii ateŋ. 30  Kɛfata he lɛ, mɛi ni etsɔ hiɛ ekpɛ mli eto yɛ amɛhe lɛ ji mɛi nɔŋŋ ni etsɛ amɛ lɛ; ni mɛi ni etsɛ amɛ lɛ nɔŋŋ ji mɛi ni ebu amɛ jalɔi lɛ. Naagbee lɛ, mɛi ni ebu amɛ jalɔi lɛ nɔŋŋ ji mɛi ni ewo amɛhiɛ nyam lɛ. 31  Belɛ, mɛni wɔɔkɛɛ yɛ nibii nɛɛ ahe? Kɛ́ Nyɔŋmɔ yɛ wɔgbɛfaŋ lɛ, namɔ baate shi awo wɔ? 32  Kɛ́ ekamaaa wɔ lɛ diɛŋtsɛ e-Bi lɛ, shi moŋ eŋɔ lɛ ehã yɛ wɔ fɛɛ wɔhewɔ lɛ, ani lɛ kɛ e-Bi lɛ fɛɛ eŋɔŋ nibii krokomɛi fɛɛ amɛhãŋ wɔ tswaa? 33  Namɔ kɛ sane baafɔ̃ mɛi ni Nyɔŋmɔ ehala lɛ anɔ? Nyɔŋmɔ ji mɔ ni buɔ amɛ jalɔi. 34  Namɔ baabu amɛ fɔ? Kristo Yesu ji mɔ ni gbo lɛ, hɛɛ, shi nɔ ni fe no lɛ, mɔ ni atee lɛ shi ní yɔɔ Nyɔŋmɔ ninejurɔ nɔ, ní kpaa fai hu ehãa wɔ lɛ. 35  Namɔ baatse wɔ kɛje Kristo lɛ suɔmɔ lɛ he? Amanehulu loo hejaramɔ loo yiwaa loo hɔmɔ loo yayai nyiɛmɔ loo oshara loo klante? 36  Tamɔ bɔ ni aŋma lɛ, akɛ: “Bo ohewɔ lɛ agbeɔ wɔ gbi muu fɛɛ; abu wɔ akɛ gwantɛŋi ni ayaagbe amɛ.” 37  Shi yɛ nibii nɛɛ fɛɛ mli lɛ, wɔtsɔɔ mɔ ni sumɔ wɔ lɛ nɔ wɔyeɔ kunim kwraa. 38  Ejaakɛ miyɛ nɔmimaa akɛ gbele jio, wala jio, ŋwɛibɔfoi jio, nɔyelii jio, nibii ni yɔɔ amrɔ nɛɛ jio, nibii ni baaba lɛ jio, hewalɛi jio, 39  ŋwɛi jio, shishi jio, loo bɔɔ nii lɛ amli nɔ kroko jio, nyɛŋ atse wɔ kɛje Nyɔŋmɔ suɔmɔ ni yɔɔ Kristo Yesu, wɔ-Nuŋtsɔ lɛ mli lɛ he.

Shishigbɛ Niŋmaa

Aramaik wiemɔ ni shishi ji “Mitsɛ!”
Aloo “ni wɔwieko.”
Aloo “le mumɔ lɛ yiŋtoo; jwɛŋmɔ.”