Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Romabii 5:1-21

5  No hewɔ lɛ, amrɔ nɛɛ ni atsɔ hemɔkɛyeli nɔ abu wɔ jalɔi lɛ, nyɛhãa wɔhãa toiŋjɔlɛ akãa he ahia wɔ kɛ Nyɔŋmɔ teŋ* kɛtsɔ wɔ-Nuŋtsɔ Yesu Kristo nɔ,  mɔ nɔ ni wɔtsɔ hemɔkɛyeli nɔ wɔná gbɛ hu kɛba duromɔ ni wɔdamɔ mli amrɔ nɛɛ mli lɛ; ni nyɛhãa wɔnyaa* yɛ Nyɔŋmɔ anunyam lɛ he hiɛnɔkamɔ lɛ hewɔ.  Jeee no kɛkɛ, shi moŋ nyɛhãa wɔnyaa* yɛ amanehului amli hu, ejaakɛ wɔle akɛ amanehulu tsɛɔ shifimɔ kɛbaa;  shifimɔ hu tsɛɔ shihilɛ ni Nyɔŋmɔ kpɛlɛɔ nɔ kɛbaa; shihilɛ ni Nyɔŋmɔ kpɛlɛɔ nɔ hu tsɛɔ hiɛnɔkamɔ kɛbaa,  ni hiɛnɔkamɔ lɛ hãaa mɔ nine anyɛ shi;* ejaakɛ atsɔ mumɔ krɔŋkrɔŋ ni aŋɔhã wɔ lɛ nɔ afɔse Nyɔŋmɔ suɔmɔ lɛ awo wɔtsuii amli.  Anɔkwa, be ni wɔkã he wɔji mɛi ni egbede lɛ, Kristo gbo ehã eshafeelɔi yɛ be ni ato lɛ mli.  Ejaakɛ ekpakpa ko dani mɔ ko baagbo ehã jalɔ; shi ekolɛ, mɔ ko baasumɔ ni egbo ehã gbɔmɔ kpakpa.  Shi Nyɔŋmɔ jieɔ lɛ diɛŋtsɛ esuɔmɔ lɛ yi ehãa wɔ, akɛ be ni wɔkã he wɔji eshafeelɔi lɛ, Kristo gbo ehã wɔ.  No hewɔ lɛ, amrɔ nɛɛ akɛni atsɔ elá lɛ nɔ abu wɔ jalɔi hewɔ lɛ, wɔbaanyɛ wɔná nɔmimaa akɛ abaatsɔ enɔ ahere wɔyiwala kɛjɛ mlifu mli. 10  Ejaakɛ kɛ́ be ni wɔji henyɛlɔi lɛ, atsɔ e-Bi lɛ gbele lɛ nɔ akpãtã wɔ kɛ Nyɔŋmɔ teŋ lɛ, amrɔ nɛɛ ni akpãtã wɔ kɛ lɛ teŋ lɛ, wɔbaanyɛ wɔná nɔmimaa akɛ abaatsɔ Kristo wala nɔ ahere wɔyiwala. 11  Jeee no kɛkɛ, shi wɔmiinya yɛ Nyɔŋmɔ mli hu kɛtsɔ wɔ-Nuŋtsɔ Yesu Kristo nɔ, mɔ nɔ ni wɔtsɔ ní amrɔ nɛɛ wɔná kpatamɔ lɛ. 12  Enɛ hewɔ lɛ, bɔ ni gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ—. 13  Ejaakɛ esha yɛ jeŋ dani akɛ Mla lɛ hã, shi kɛ́ mla bɛ lɛ, abuuu esha ashiii mɔ ko. 14  Kɛ̃lɛ gbele ye maŋtsɛ kɛjɛ Adam—mɔ ni je mɔ ni baaba lɛ—nɔ kɛbashi Mose nɔ, eye mɛi po ni efeko esha ni tamɔ Adam mlatɔmɔ lɛ anɔ. 15  Shi nɔkeenɔ lɛ tamɔɔɔ tɔmɔ lɛ. Ejaakɛ kɛ́ gbɔmɔ kome tɔmɔ hewɔ ni mɛi pii gboi lɛ, belɛ Nyɔŋmɔ duromɔ lɛ kɛ enɔkeenɔ lɛ kɛ agbɛnɛ hu duromɔ lɛ ní atsɔ gbɔmɔ kome ni ji Yesu Kristo nɔ akɛhã lɛ fa kɛteke nɔ* hã mɛi pii! 16  Agbɛnɛ hu, nibii ni jɛ duromɔ keenɔ lɛ mli kɛba lɛ yɛ srɔto yɛ nibii ni jɛ esha ni gbɔmɔ kome lɛ fee lɛ mli kɛba lɛ he. Ejaakɛ nɔ ni jɛ tɔmɔ kome lɛ he kojomɔ lɛ mli kɛba ji fɔbuu, shi nɔkeenɔ ni nyiɛ tɔmɔi pii asɛɛ kɛba ji akɛ abu mɛi jalɔi. 17  Ejaakɛ kɛ́ mɔ kome tɔmɔ lɛ hewɔ jɛ ni gbele tsɔ nakai mɔ kome lɛ nɔ ye maŋtsɛ lɛ, wɔbaanyɛ wɔná nɔmimaa akɛ mɛi ni náa duromɔ ní fa kɛteke nɔ lɛ kɛ jalɛ akɛ duromɔ keenɔ ní fa kɛteke nɔ lɛ baatsɔ mɔ kome ni ji Yesu Kristo lɛ nɔ aye nɔ akɛ maŋtsɛmɛi yɛ wala mli! 18  No hewɔ lɛ, agbɛnɛ, bɔ ni atsɔ tɔmɔ kome nɔ abu gbɔmɛi srɔtoi fɛɛ fɔ lɛ, nakai nɔŋŋ hu kɛtsɔ bembuu nifeemɔ kome nɔ lɛ, aabu gbɔmɛi srɔtoi fɛɛ jalɔi kɛhã wala. 19  Ejaakɛ bɔ ni gbɔmɔ kome lɛ toigbele lɛ hã mɛi pii tsɔmɔ eshafeelɔi lɛ, nakai nɔŋŋ hu gbɔmɔ kome lɛ toiboo lɛ baahã mɛi pii atsɔmɔ jalɔi. 20  Agbɛnɛ, Mla lɛ ba sɛɛ mli koni tɔmɔ aya nɔ afa. Shi he ni esha fa yɛ lɛ, duromɔ fa kɛteke nɔ babaoo yɛ jɛmɛ. 21  Mɛɛ yiŋtoo hewɔ? Koni bɔ nɔŋŋ ni esha kɛ gbele ye maŋtsɛ lɛ, nakai nɔŋŋ duromɔ hu atsɔ jalɛ nɔ aye maŋtsɛ kɛya naanɔ wala mli kɛtsɔ wɔ-Nuŋtsɔ Yesu Kristo nɔ.

Shishigbɛ Niŋmaa

Aloo eeenyɛ efee akɛ, “toiŋjɔlɛ yɛ wɔ kɛ Nyɔŋmɔ teŋ.”
Aloo eeenyɛ efee akɛ, “ni wɔnyaa.”
Aloo eeenyɛ efee akɛ, “shi moŋ wɔnyaa.”
Aloo “wooo mɔ hiɛgbele.”
Aloo “fa kɛteke nɔ babaoo.”