Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Romabii 4:1-25

4  Kɛ́ nakai ni lɛ, mɛni wɔɔkɛɛ akɛ Abraham, ni ji wɔtsɛ yɛ heloo gbɛfaŋ lɛ ná?  Akɛ nɔkwɛmɔnɔ lɛ, kɛ́ nitsumɔi anɔ atsɔ abu Abraham jalɔ lɛ, kulɛ eyɛ yiŋtoo hewɔ ní eeeshwã, shi jeee yɛ Nyɔŋmɔ hiɛ.  Shi te ŋmalɛ lɛ kɛɔ tɛŋŋ? “Abraham ná hemɔkɛyeli yɛ Yehowa* mli, ni abu no jalɛ ahã lɛ.”  Agbɛnɛ, mɔ ni tsuɔ nii lɛ, abuɔ enyɔmɔwoo lɛ akɛ egbɛnaa nii,* shi jeee akɛ duromɔ nɔ ko.  Nɔ ni tamɔɔɔ nakai lɛ, mɔ ni tsuuu nii, shi enáa hemɔkɛyeli yɛ mɔ ni buɔ eshafeelɔ jalɔ lɛ mli lɛ, abuɔ ehemɔkɛyeli lɛ akɛ jalɛ ahãa lɛ.  Nakai nɔŋŋ David hu wie miishɛɛ ni gbɔmɔ náa kɛ́ Nyɔŋmɔ shi nitsumɔi asɛɛ ebu jalɛ ehã lɛ lɛ he akɛ:  “Mɛi ni aŋɔ amɛmlatɔmɔ nifeemɔi afa amɛ, ní atsimɔ amɛhe eshai anɔ* lɛ yɛ miishɛɛ;  gbɔmɔ ni Yehowa* ebuuu ehe esha lɛ he akɔntaa lɛ yɛ miishɛɛ.”  Belɛ, ani mɛi ni afo amɛ ketia lɛ pɛ náa miishɛɛ nɛɛ, aloo foolɔi hu náa? Ejaakɛ wɔkɛɔ akɛ: “Abu Abraham hemɔkɛyeli lɛ akɛ jalɛ ahã lɛ.” 10  Belɛ, mɛɛ shihilɛi amli abu no jalɛ ahã lɛ? Be ni afo lɛ ketia lɛ, aloo be ni afoko lɛ ketia? Jeee be ni afo lɛ ketia, shi moŋ be ni eji foolɔ lɛ. 11  Ni enine shɛ okadi ko nɔ—no ji ketiafoo—akɛ naasɔomɔ nɔ* kɛhã jalɛ ni damɔ hemɔkɛyeli ni ená be ni eji foolɔ lɛ nɔ, koni etsɔ mɛi fɛɛ ni yɔɔ hemɔkɛyeli be ni amɛji foolɔi lɛ atsɛ, bɔ ni afee ni abu jalɛ ahã amɛ hu; 12  ni asaŋ etsɔ shwiei ni afolɔ amɛ ketia lɛ atsɛ, mɛi ni jeee ketiafoo lɛ he kɛkɛ amɛkpɛtɛɔ, shi moŋ, amɛnyiɛɔ wɔtsɛ Abraham nanemaahei lɛ asɛɛ kpaakpa yɛ hemɔkɛyeli ni ená be ni eji foolɔ lɛ naa lɛ. 13  Ejaakɛ jeee mla nɔ atsɔ awo Abraham loo eseshi* lɛ shi akɛ ebaaná jeŋ ko akɛ gboshinii, shi moŋ jalɛ ni damɔ hemɔkɛyeli nɔ lɛ nɔ atsɔ. 14  Ejaakɛ kɛ́ mɛi ni kpɛtɛɔ mla he lɛ ji niyelɔi lɛ, belɛ sɛɛnamɔ ko bɛ hemɔkɛyeli he, ni agu shiwoo lɛ. 15  Yɛ anɔkwale mli lɛ, Mla lɛ tsɛɔ mlifu kɛbaa, shi he ni mla bɛ lɛ, mlatɔmɔ ko hu bɛ jɛmɛ. 16  No hewɔ ni atsɔɔ hemɔkɛyeli nɔ lɛ, koni efee duromɔ naa, bɔ ni afee ni shiwoo lɛ ama shi shiŋŋ ahã eseshi* lɛ fɛɛ, jeee mɛi ni kpɛtɛɔ Mla lɛ he lɛ kɛkɛ, shi moŋ mɛi ni kpɛtɛɔ Abraham ni ji wɔ fɛɛ wɔtsɛ lɛ hemɔkɛyeli lɛ he lɛ hu. 17  (Nɛkɛ pɛpɛɛpɛ ji bɔ ni aŋma lɛ, akɛ: “Miŋɔ bo mifee jeŋmaji pii atsɛ.”) Enɛ ba yɛ Nyɔŋmɔ hiɛ, mɔ ni ená hemɔkɛyeli yɛ emli, ní hãa gbohii baa wala mli, ní tsɛɔ nibii ni bɛ lɛ, tamɔ nɔ ni amɛyɛ lɛ.* 18  Eyɛ mli akɛ hiɛnɔkamɔ bɛ moŋ, kɛ̃lɛ etsɔ hiɛnɔkamɔ nɔ ená hemɔkɛyeli, koni etsɔ jeŋmaji pii atsɛ yɛ nɔ ni awie momo lɛ naa, akɛ: “Nakai oseshi* lɛ baatamɔ.” 19  Ni eyɛ mli akɛ egbedeee yɛ hemɔkɛyeli mli moŋ, shi ejwɛŋ gbo ní lɛ diɛŋtsɛ egbɔmɔtso lɛ egbo momo (akɛni eye aaafee afii oha), kɛ agbɛnɛ, bɔ ni Sara musu egbo* lɛ hu he. 20  Shi Nyɔŋmɔ shiwoo lɛ hewɔ lɛ, eyiŋ efeee lɛ kɔshikɔshi oookɛɛ ebɛ hemɔkɛyeli; moŋ lɛ, ehemɔkɛyeli lɛ hã ená hewalɛ, ni ewo Nyɔŋmɔ hiɛ nyam 21  ni ená nɔmimaa kwraa akɛ nɔ ni Nyɔŋmɔ ewo he shi lɛ, ebaanyɛ efee hu. 22  No hewɔ lɛ, “abu no jalɛ ahã lɛ.” 23  Shi jeee lɛ kɛkɛ ehewɔ aŋma wiemɔi ni ji, ‘abu no ahã lɛ’ lɛ, 24  shi moŋ wɔ mɛi ni abaabu no ahã wɔ lɛ hu hewɔ, ejaakɛ wɔheɔ mɔ ni tee wɔ-Nuŋtsɔ Yesu shi kɛjɛ gbohii ateŋ lɛ wɔyeɔ. 25  Aŋɔ lɛ ahã yɛ wɔtɔmɔi lɛ ahewɔ, ni atee lɛ shi yɛ jalɔi ni abaabu wɔ lɛ hewɔ.

Shishigbɛ Niŋmaa

Kwɛmɔ Wiemɔi Titrii Amligbalamɔ lɛ.
Aloo “nyɔmɔ ni ahiɛ lɛ.”
Aloo “ní akɛ amɛhe eshai efa amɛ.”
Kwɛmɔ Wiemɔi Titrii Amligbalamɔ lɛ.
Aloo “aduatsɔmaanɔ; nɔmimaa.”
Sht. ŋm., “edumɔwu.”
Sht. ŋm., “edumɔwu.”
Aloo eeenyɛ efee akɛ, “ní tsɛɔ nɔ ni bɛ shihilɛ mli lɛ kɛbaa shihilɛ mli lɛ.”
Sht. ŋm., “odumɔwu.”
Aloo “fɔ ni Sara fɔɔɔ.”