Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Romabii 15:1-33

15  Shi wɔ mɛi ni wɔhe wa lɛ, esa akɛ wɔkpee mɛi ni he waaa lɛ kɛ amɛgbedemɔi lɛ, ni esaaa akɛ wɔsaa wɔ diɛŋtsɛ wɔhiɛ.  Nyɛhãa wɔteŋ mɔ fɛɛ mɔ asaa enaanyo gbɔmɔ hiɛ ni ahi ahã enaanyo lɛ, ni etswa lɛ ema shi hu.  Ejaakɛ Kristo lɛ po esaaa lɛ diɛŋtsɛ ehiɛ, shi tamɔ bɔ ni aŋma lɛ: “Mɛi ni bɔɔ bo ahora lɛ ahorabɔɔ lɛ ebakã minɔ.”  Ejaakɛ nibii fɛɛ ni aŋma ato momo lɛ, aŋma koni etsɔɔ wɔ nii, koni kɛtsɔ wɔshifimɔ kɛ agbɛnɛ hu kɛtsɔ Ŋmalɛi lɛ amli miishɛjemɔ lɛ nɔ lɛ, wɔná hiɛnɔkamɔ.  Agbɛnɛ, Nyɔŋmɔ ni ŋɔɔ shifimɔ kɛ miishɛjemɔ ehãa lɛ ahã nyɛná jwɛŋmɔ ni Kristo Yesu ná lɛ nɔŋŋ eko yɛ nyɛteŋ,  koni nyɛfee ekome ni nyɛkɛ gbee* kome awo wɔ-Nuŋtsɔ Yesu Kristo Nyɔŋmɔ kɛ e-Tsɛ lɛ hiɛ nyam.  No hewɔ lɛ, nyɛhereherea nyɛhe atuu,* tamɔ bɔ ni Kristo hu here wɔ atuu lɛ, ní nyɛkɛwo Nyɔŋmɔ hiɛ nyam.  Ejaakɛ miikɛɛ nyɛ akɛ, Kristo batsɔ mɛi ni afolɔ amɛ ketia lɛ asɔɔlɔ yɛ Nyɔŋmɔ anɔkwale lɛ hewɔ, koni ekɛma shiwoi ní E-kɛhã amɛtsɛmɛi lɛ anɔ mi,  koni jeŋmaji lɛ awo Nyɔŋmɔ hiɛ nyam yɛ emɔbɔnalɛ lɛ hewɔ. Tamɔ bɔ ni aŋma lɛ, akɛ: “No hewɔ majaje bo matsɔɔ yɛ jeŋmaji lɛ ateŋ, ni malá majie ogbɛ́i lɛ yi lɛ.” 10  Ni esaa ekɛɛ: “Nyɛ jeŋmaji, nyɛkɛ emɛi lɛ anáa miishɛɛ.” 11  Kɛfata he lɛ: “Nyɛjiea Yehowa* yi, nyɛ jeŋmaji fɛɛ, ni nyɛhãa mɛi fɛɛ ajiea eyi.” 12  Agbɛnɛ hu Yesaia kɛɛ akɛ: “Yishai shishifã lɛ baaba, mɔ ni baate shi koni ebaye jeŋmaji lɛ anɔ lɛ; ni lɛ enɔ jeŋmaji lɛ baatsɔ aná hiɛnɔkamɔ.” 13  Nyɔŋmɔ ni ŋɔɔ hiɛnɔkamɔ ehãa lɛ ahã nyɛyimɔ obɔbɔ kɛ miishɛɛ kɛ toiŋjɔlɛ akɛni nyɛŋɔɔ nyɛhiɛ nyɛfɔ̃ɔ enɔ lɛ hewɔ, koni nyɛtsɔ mumɔ krɔŋkrɔŋ hewalɛ nɔ nyɛná hiɛnɔkamɔ kɛteke nɔ. 14  Agbɛnɛ, minyɛmimɛi, mi diɛŋtsɛ lɛ miyɛ nɔmimaa yɛ nyɛhewɔ, akɛ nyɛ diɛŋtsɛ hu nyɛyimɔ obɔbɔ kɛ ekpakpafeemɔ, ni nyɛyimɔ obɔbɔ kɛ nilee fɛɛ hu, ni akɛ, nyɛbaanyɛ nyɛwiewiee nyɛtsɔɔ nyɛhe.* 15  Shi yɛ saji komɛi ahe lɛ, miŋma nyɛ ni mishiuuu nɔ ko nɔ, koni mikɛkai nyɛ ekoŋŋ, ejaakɛ Nyɔŋmɔ eŋɔ duromɔ ehã mi 16  koni mafee Kristo Yesu tsulɔ mahã jeŋmaji lɛ. Miitsu nitsumɔ krɔŋkrɔŋ ni ji Nyɔŋmɔ sane kpakpa lɛ shiɛmɔ lɛ, koni jeŋmaji nɛɛ afee afɔle ni sa ehiɛ, ní akɛ mumɔ krɔŋkrɔŋ etsuu he. 17  No hewɔ lɛ, yɛ nibii ni kɔɔ Nyɔŋmɔ he lɛ amli lɛ, miyɛ yiŋtoo hewɔ ni esa akɛ manya yɛ Kristo Yesu mli. 18  Ejaakɛ mikaŋ akɛ mawie nɔ ko akɛ ja nɔ ni Kristo tsɔ minɔ efee bɔ ni afee ni jeŋmaji lɛ abo toi lɛ; etsɔ miwiemɔ kɛ minifeemɔ, 19  okadii kɛ naakpɛɛ nii* ahewalɛ, kɛ Nyɔŋmɔ mumɔ lɛ hewalɛ nɔ efee enɛ, enɛ hewɔ lɛ, mishiɛ Kristo he sane kpakpa lɛ fitsofitso kɛjɛ Yerusalem kɛbɔle shi aahu kɛyashɛ Ilirikum tɔ̃ɔ. 20  Anɔkwa, yɛ nɛkɛ gbɛ nɔ lɛ, oti ni mikɛma mihiɛ ji akɛ mijajeŋ sane kpakpa lɛ yɛ he ni atsĩ Kristo gbɛ́i lɛ tã momo yɛ lɛ, bɔ ni afee ni mikayatswa mɔ kroko faneshi nɔ; 21  shi tamɔ bɔ ni aŋma lɛ, akɛ: “Mɛi ni nine shɛko ehe amaniɛ nɔ lɛ baana, ni mɛi ni nuko lɛ baanu shishi.” 22  Enɛ hewɔ hu ni atsĩ mi gbɛ shii abɔ ni minyɛko maba nyɛŋɔɔ lɛ. 23  Shi amrɔ nɛɛ, shikpɔŋkuku ko bɛ kpokpai nɛɛ anɔ ni mitsuko mli nii, ni afii babaoo nɛ* ní mishwe waa akɛ maba nyɛŋɔɔ. 24  No hewɔ lɛ, mihiɛ kã nɔ akɛ, kɛ́ miifã gbɛ kɛmiiya Spain lɛ, mabana nyɛ, koni kɛ́ mibaná miishɛɛ fioo yɛ nyɛŋɔɔ lɛ, nyɛyajie mi gbɛ. 25  Shi amrɔ nɛɛ miihe mafã gbɛ kɛya Yerusalem koni mayasɔmɔ mɛi krɔŋkrɔŋi lɛ. 26  Ejaakɛ mɛi ni yɔɔ Makedonia kɛ Akaia lɛ kɛ miishɛɛ eŋɔ nibii ni amɛyɔɔ lɛ eko amɛhã akɛ onia kɛhã mɛi krɔŋkrɔŋi ni yɔɔ Yerusalem lɛ ateŋ ohiafoi lɛ. 27  Eji anɔkwale akɛ amɛfee nakai kɛ miishɛɛ, shi anɔkwa, amɛhiɛ amɛ nyɔmɔ; ejaakɛ kɛji jeŋmaji lɛ ená amɛmumɔŋ nibii lɛ eko lɛ, belɛ amɛ hu sɔ̃ kã amɛnɔ akɛ amɛkɛ amɛheloonaa nibii asɔmɔ amɛ. 28  No hewɔ lɛ, kɛ́ migbe enɛ naa ni mikɛ onia* nɛɛ yahã amɛ shweshweeshwe lɛ, mabatsɔ nyɛŋɔɔ kɛya Spain. 29  Kɛfata he lɛ, mile akɛ kɛ́ miba nyɛŋɔɔ lɛ, mikɛ jɔɔmɔ ni eteke nɔ ni jɛ Kristo ŋɔɔ baaba. 30  Agbɛnɛ, nyɛmimɛi, miitsɔ wɔ-Nuŋtsɔ Yesu Kristo nɔ, ni miitsɔ mumɔ lɛ suɔmɔ lɛ nɔ miiwo nyɛ hewalɛ, akɛ nyɛfataa mihe ni wɔkɛ hiɛdɔɔ asɔlea wɔhãa Nyɔŋmɔ yɛ mihewɔ, 31  koni ajie mi kɛjɛ mɛi ni heee yeee ni yɔɔ Yudea lɛ adɛŋ, ní sɔɔmɔ ni mayasɔmɔ yɛ Yerusalem lɛ asa mɛi krɔŋkrɔŋi lɛ ahiɛ jogbaŋŋ, 32  koni yɛ Nyɔŋmɔ suɔmɔ naa lɛ, mikɛ miishɛɛ aba nyɛŋɔɔ ní mi kɛ nyɛ fɛɛ lɛ, wɔwo wɔtsui. 33  Nyɔŋmɔ ni ŋɔɔ toiŋjɔlɛ ehãa lɛ kɛ nyɛ fɛɛ ahi shi. Amen.

Shishigbɛ Niŋmaa

Sht. ŋm., “naabu.”
Aloo “nyɛkpɛlɛkpɛlɛa nyɛhe nɔ.”
Kwɛmɔ Wiemɔi Titrii Amligbalamɔ lɛ.
Aloo “nyɛbaanyɛ nyɛtsɔɔtsɔɔ nyɛhe nii.”
Aloo “gbalɛ okadii.”
Aloo eeenyɛ efee akɛ, “afii saŋŋ nɛ.”
Sht. ŋm., “yibii.”