Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Romabii 14:1-23

14  Nyɛherea mɔ ni egbede yɛ ehemɔkɛyeli mli lɛ atuu, shi nyɛkakojoa aŋkroaŋkroi asusumɔi.*  Mɔ ko yɛ hemɔkɛyeli ni ekɛyeɔ nɔ fɛɛ nɔ, shi mɔ ni egbede lɛ yeɔ yelibai pɛ.  Mɔ ni yeɔ lɛ akanyaŋe mɔ ni yeee lɛ, ni mɔ ni yeee lɛ akakojo mɔ ni yeɔ lɛ, ejaakɛ Nyɔŋmɔ ehere lɛ atuu.  Namɔ ji bo ni okojoɔ mɔ kroko tsulɔ? Edamɔ shi jio, egbee shi jio, lɛ diɛŋtsɛ enuŋtsɔ lɛ ni baatsɔɔ. Anɔkwa, abaahã edamɔ shi, ejaakɛ Yehowa* baanyɛ ahã edamɔ shi.  Mɔ ko buɔ gbi ko fe gbi kroko; mɔ kroko hu buɔ gbi fɛɛ gbi pɛpɛɛpɛ; mɔ fɛɛ mɔ aná nɔmimaa kwraa yɛ lɛ diɛŋtsɛ ejwɛŋmɔ mli.  Mɔ ni buɔ gbi ko akɛ gbi krɛdɛɛ lɛ, Yehowa* ebuɔ ehãa. Agbɛnɛ hu, mɔ ni yeɔ nii lɛ, Yehowa* eyeɔ ehãa, ejaakɛ edaa Nyɔŋmɔ shi yɛ he; ni mɔ ni yeee nii lɛ, Yehowa* eyeee ehãaa, ni kɛ̃lɛ edaa Nyɔŋmɔ shi.  Anɔkwa, wɔteŋ mɔ ko hiɛ kãaa hãaa lɛ diɛŋtsɛ ehe kɛkɛ, ni mɔ ko gbooo hu hãaa lɛ diɛŋtsɛ ehe kɛkɛ.  Ejaakɛ kɛ́ wɔhiɛ kã lɛ, Yehowa* wɔhiɛ kã wɔhã, ni kɛ́ wɔgboi hu lɛ, Yehowa* wɔgboi wɔhã. No hewɔ lɛ, kɛ́ wɔhiɛ kã jio, wɔgboi jio, Yehowa* nii ji wɔ.  Ejaakɛ enɛ hewɔ Kristo gbo ni eba wala mli ekoŋŋ, koni etsɔ gbohii kɛ hiɛkãalɔi fɛɛ a-Nuŋtsɔ. 10  Shi bo, mɛni hewɔ okojoɔ onyɛmi? Aloo bo hu, mɛni hewɔ onyaŋeɔ onyɛmi? Ejaakɛ wɔ fɛɛ wɔbaadamɔ Nyɔŋmɔ kojomɔ sɛi lɛ hiɛ. 11  Ejaakɛ aŋma akɛ: “‘Gbii abɔ ni mihiɛ kã nɛɛ,’ Yehowa* kɛɛ, ‘nakutso fɛɛ nakutso baakoto mi, ni lilɛi fɛɛ lilɛi baajaje Nyɔŋmɔ atsɔɔ.’” 12  No hewɔ lɛ, agbɛnɛ, wɔteŋ mɔ fɛɛ mɔ baabu lɛ diɛŋtsɛ ehe akɔntaa ehã Nyɔŋmɔ. 13  No hewɔ lɛ, nyɛkahãa wɔkojokojoa wɔhe dɔŋŋ, shi moŋ, nyɛtswaa nyɛfai shi akɛ nyɛkɛ nanetɔ̃tɔmɔnɔ loo gbɛtsiinɔ ko emaŋ nyɛmi ko hiɛ. 14  Mile ni miyɛ nɔmimaa hu yɛ Nuŋtsɔ Yesu mli akɛ nɔ ko nɔ ko bɛ ni lɛ diɛŋtsɛ lɛ, ehe tseee; kɛ́ mɔ ko buɔ nɔ ko akɛ ehe tseee lɛ, no lɛ ehe tseee kɛhã lɛ. 15  Ejaakɛ kɛ́ nɔ ko ni oyeɔ lɛ gbaa onyɛmi naa lɛ, no lɛ jeee suɔmɔ naa onyiɛɔ yɛ lɛ dɔŋŋ. Okɛ oniyenii akakpãtã mɔ ni Kristo gbo hã lɛ lɛ hiɛ. 16  No hewɔ lɛ, nyɛkahãa awiea ekpakpa ni nyɛfeɔ lɛ he efɔŋ. 17  Ejaakɛ Nyɔŋmɔ Maŋtsɛyeli lɛ, jeee niyeli kɛ ninumɔ ni, moŋ lɛ, eji jalɛ kɛ toiŋjɔlɛ kɛ miishɛɛ ni tsɔɔ mumɔ krɔŋkrɔŋ nɔ kɛbaa. 18  Ejaakɛ mɔ fɛɛ mɔ ni sɔmɔɔ Kristo akɛ nyɔŋ yɛ nɛkɛ gbɛ nɔ lɛ, esaa Nyɔŋmɔ hiɛ, ni gbɔmɛi hu kpɛlɛɔ enɔ. 19  No hewɔ lɛ, agbɛnɛ, nyɛhãa wɔtiua nibii ni kɛ toiŋjɔlɛ baa kɛ nibii ni wɔkɛaatswatswaa wɔhe wɔma shi lɛ asɛɛ. 20  Nyɛkpaa Nyɔŋmɔ nitsumɔ lɛ kuumɔ kɛ shishwiemɔ yɛ niyenii hewɔ. Eji anɔkwale akɛ, nibii fɛɛ he tse, shi ehiii akɛ* gbɔmɔ aye nɔ ko kɛ́ no baatɔ̃tɔ mɔ kroko nane lɛ. 21  Ehi akɛ okaye loo ko, loo okanu wein, aloo okafee nɔ ko ni baatɔ̃tɔ onyɛmi nane. 22  Hemɔkɛyeli ni oyɔɔ lɛ, okɛto ohã bo diɛŋtsɛ ohe yɛ Nyɔŋmɔ hiɛ. Mɔ ni ekojooo lɛ diɛŋtsɛ ehe yɛ nɔ ni ekpɛlɛɔ nɔ lɛ he lɛ yɛ miishɛɛ. 23  Shi kɛ́ eyiŋ etɛ̃ɛɛ lɛ lɛ, kɛji eye lɛ, abu lɛ fɔ momo, ejaakɛ ejɛɛɛ hemɔkɛyeli mli eyeee. Anɔkwa, nɔ fɛɛ nɔ ni jɛɛɛ hemɔkɛyeli mli lɛ, esha ni.

Shishigbɛ Niŋmaa

Aloo eeenyɛ efee akɛ, “yiŋkɔshikɔshifeemɔi.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “esaaa akɛ.”