Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Lɛ Yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ Kwɛmɔ afi 2013 nɔ̃ lɛ

Romabii 13:1-14

EMLI SAJI

  • Nyɛbaa nyɛhe shi nyɛhãa hegbɛi lɛ (1-7)

    • Toowoo (6, 7)

  • Suɔmɔ woɔ Mla lɛ obɔ (8-10)

  • Nyɛnyiɛa bɔ ni sa shwane (11-14)

13  Mɔ fɛɛ mɔ* aŋɔ ehe awo hegbɛi ni nɔ kwɔlɔ fe lɛ lɛ ashishi, ejaakɛ hegbɛ ko bɛ ni jɛɛɛ Nyɔŋmɔ ŋɔɔ; hegbɛi ni yɔɔ lɛ, Nyɔŋmɔ ji mɔ ni ŋɔ amɛ eto amɛgbɛhei lɛ.  No hewɔ lɛ, mɔ fɛɛ mɔ ni teɔ shi woɔ hegbɛ lɛ, eete shi eewo Nyɔŋmɔ gbɛjianɔtoo; mɛi ni teɔ shi woɔ no lɛ baaná amɛkojomɔ.  Ejaakɛ nakai nɔyelɔi lɛ ahe yɛ gbeyei, jeee kɛhã mɛi ni feɔ nɔ kpakpa, shi moŋ kɛhã mɛi ni feɔ nibii gbohii lɛ. Osumɔŋ ni hegbɛ lɛ he ahi gbeyei ahã bo, aloo jeee nakai? Belɛ, yaa nɔ ofee ekpakpa, ni obaaná yijiemɔ kɛjɛ edɛŋ;  ejaakɛ eji Nyɔŋmɔ sɔɔlɔ kɛhã bo yɛ ohilɛkɛhamɔ hewɔ. Shi kɛ́ oofee nɔ ko gbonyo lɛ, no lɛ she gbeyei, ejaakɛ jeee yaka ehiɛɔ klante lɛ. Eji Nyɔŋmɔ sɔɔlɔ, oweletɔlɔ ni jieɔ mlifu kpo eshiɔ mɔ ni feɔ nɔ ko gbonyo lɛ.*  No hewɔ lɛ, esa akɛ nyɛŋɔ nyɛhe nyɛwo hegbɛi ni yeɔ nɔ lɛ ashishi, jeee yɛ nakai mlifu lɛ kɛkɛ hewɔ, shi moŋ yɛ nyɛhenilee hu hewɔ.  Enɛ hewɔ ni nyɛwoɔ too hu lɛ; ejaakɛ amɛji Nyɔŋmɔ tsuji ni sɔmɔɔ mɛi daa nɛɛ.  Nyɛŋɔa mɛi fɛɛ agbɛnaa nii nyɛhãa amɛ: mɔ ni biɔ too lɛ, nyɛwoa too lɛ; mɔ ni biɔ maŋ too lɛ, nyɛwoa maŋ too lɛ; mɔ ni biɔ gbeyeishemɔ lɛ, nyɛŋɔa gbeyeishemɔ lɛ nyɛhãa lɛ; mɔ ni biɔ woo lɛ, nyɛŋɔa woo lɛ nyɛhãa lɛ.  Nyɛkahiɛa mɔ ko mɔ ko nɔ ko kwraa he nyɔmɔ, ja suɔmɔ ni nyɛkɛaasumɔsumɔɔ nyɛhe lɛ kɛkɛ; ejaakɛ mɔ fɛɛ mɔ ni sumɔɔ enaanyo gbɔmɔ lɛ, ewo mla lɛ obɔ.  Ejaakɛ mlai ni ji, “Esaaa akɛ ofiteɔ gbãla,* esaaa akɛ ogbeɔ gbɔmɔ, esaaa akɛ ojuɔ, esaaa akɛ ohiɛ kɔ̃ɔ nii anɔ,” kɛ kitãi krokomɛi ni yɔɔ lɛ, amua fɛɛ naa yɛ wiemɔ nɛɛ mli akɛ: “Esa akɛ osumɔ onaanyo gbɔmɔ tamɔ bo diɛŋtsɛ ohe.” 10  Suɔmɔ efeee enaanyo gbɔmɔ efɔŋ ko; no hewɔ lɛ, suɔmɔ woɔ mla lɛ obɔ. 11  Ni nyɛfea enɛ, titri lɛ akɛni nyɛle be lɛ, akɛ ŋmɛlɛtswaa ni esa akɛ nyɛte shi kɛjɛ wɔ mli lɛ eshɛ lɛ hewɔ, ejaakɛ amrɔ nɛɛ, wɔyiwalaheremɔ lɛ ebɛŋkɛ fe be mli ni wɔbatsɔmɔ héyelilɔi lɛ. 12  Nyɔɔŋ lɛ eho etã; jetsɛremɔ ebɛŋkɛ. No hewɔ lɛ, nyɛhãa wɔjiea duŋ mli nitsumɔi lɛ wɔshwiea, ni nyɛhãa wɔwoa la tawuu nii lɛ. 13  Nyɛhãa wɔnyiɛa fɛfɛo bɔ ni sa shwane, jeee yɛ hiɛtserɛjiemɔi ni yɔɔ hoo kɛ dãatɔɔ mli, jeee yɛ bɔlɛnamɔ jeŋba sha kɛ efɔŋ ni akɛ kuɛŋtimɔ feɔ* mli, jeee yɛ béi kɛ awuŋayeli mli. 14  Moŋ lɛ, nyɛwoa Nuŋtsɔ Yesu Kristo tamɔ atade, ni nyɛkatsɔa hiɛ nyɛtoa gbɛjianɔ kɛhã nibii ni heloo lɛ shweɔ.

Shishigbɛ Niŋmaa

Aloo “Susuma fɛɛ susuma.”
Aloo “ni gbalaa mɔ ni feɔ nɔ ko gbonyo lɛ toi.”
Kwɛmɔ Mat 5:27 sh. niŋ.
Aloo “jeŋbai gbohii ni efeee mɔ hiɛgbele.” Hela wiemɔkuli ni ji a·selʹgei·a lɛ piifeemɔ. Kwɛmɔ Wiemɔi Titrii Amligbalamɔ lɛ.