Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Romabii 12:1-21

12  No hewɔ lɛ, nyɛmimɛi, mikɛ Nyɔŋmɔ musuŋtsɔlɛi lɛ miikpa nyɛ fai akɛ, nyɛŋɔ nyɛgbɔmɔtsei lɛ nyɛhã akɛ afɔle ni hiɛ kã, ni yɔɔ krɔŋkrɔŋ, ni Nyɔŋmɔ kpɛlɛɔ nɔ, ni no baatsɔɔ akɛ nyɛkɛ sɔɔmɔ krɔŋŋ miihã kɛ nyɛjwɛŋmɔ.  Ni nyɛkahãa shihilɛ gbɛjianɔtoo nɛɛ* shɔ̃a nyɛ dɔŋŋ, moŋ lɛ, nyɛtsakea nyɛhe kɛtsɔ nyɛjwɛŋmɔ ni nyɛbaaya nɔ nyɛtsake lɛ nɔ, koni nyɛ diɛŋtsɛ nyɛnyɛ nyɛka nyɛkwɛ ni nyɛyɔse nɔ ni ji Nyɔŋmɔ suɔmɔnaa nii kpakpa ni ekpɛlɛɔ nɔ ni hi kɛwula shi lɛ.  Ejaakɛ miitsɔ duromɔ ni akɛduro mi lɛ nɔ miikɛɛ nyɛteŋ mɔ fɛɛ mɔ akɛ ekabu ehe tuutu fe bɔ ni sa akɛ ebuɔ ehe, shi moŋ esusu nii ahe bɔ ni baahã ená jwɛŋmɔ ni sa, tamɔ bɔ ni Nyɔŋmɔ eŋɔ* hemɔkɛyeli ehã mɔ fɛɛ mɔ lɛ.  Ejaakɛ tamɔ bɔ ni gbɔmɔtso kome yɔɔ henii pii, shi henii lɛ fɛɛ tsuuu nitsumɔ kome lɛ,  nakai nɔŋŋ wɔ hu, eyɛ mli akɛ wɔyi fa moŋ, shi wɔji gbɔmɔtso kome ni kɛ Kristo efee ekome, ni wɔji henii ni wɔteŋ mɔ fɛɛ mɔ nɔ ji mɔ kroko lɛ.  Belɛ, akɛni esoro wɔteŋ mɔ fɛɛ mɔ nikeenii yɛ duromɔ ni akɛduro wɔ lɛ naa hewɔ lɛ, kɛ́ gbalɛ ni lɛ, nyɛhãa wɔgbaa yɛ hemɔkɛyeli ni asusu ahã wɔ lɛ naa;  aloo kɛ́ sɔɔmɔ ni lɛ, nyɛhãa wɔhiɛa sɔɔmɔ nɛɛ mli; aloo mɔ ni tsɔɔ nii lɛ, ehiɛ enitsɔɔmɔ lɛ mli;  aloo mɔ ni woɔ mɛi hewalɛ lɛ,* ehiɛ hewalɛ ní ewoɔ mɛi* lɛ mli; mɔ ni jaa nii* lɛ, efee kɛ tsui krɔŋŋ; mɔ ni kwɛɔ nii anɔ lɛ,* efee lɛ jogbaŋŋ;* mɔ ni naa mɔbɔ lɛ, ekɛ miishɛɛ afee.  Nyɛsuɔmɔ lɛ, osato akahi mli. Nyɛhia efɔŋ; nyɛkpɛtɛa ekpakpa he. 10  Nyɛdɔdɔa nyɛhe waa yɛ nyɛmimɛi asuɔmɔ mli. Mɔ fɛɛ mɔ atsɔ hiɛ ekɛ woo ahã enaanyo.* 11  Nyɛkafea anihao,* moŋ lɛ, nyɛbɔa nyɛhe mɔdɛŋ.* Nyɛhe adɔa la yɛ mumɔ lɛ naa. Nyɛsɔmɔa Yehowa* akɛ nyɔji. 12  Nyɛnyaa yɛ hiɛnɔkamɔ lɛ mli. Nyɛfia shi yɛ amanehulu mli. Nyɛhiɛa sɔlemɔ mli daa. 13  Nyɛkɛ mɛi krɔŋkrɔŋi lɛ ajaa nii ni nyɛyɔɔ lɛ yɛ amɛhiamɔ nii anaa. Nyɛkɔa gbɔfeemɔ gbɛ lɛ. 14  Nyɛyaa nɔ nyɛjɔa mɛi ni waa nyɛ yi lɛ; nyɛjɔa ni nyɛkalomɔa. 15  Nyɛkɛ mɛi ni nyaa lɛ anyaa; nyɛkɛ mɛi ni foɔ lɛ afoa. 16  Nyɛnaa mɛi krokomɛi tamɔ bɔ ni nyɛnaa nyɛ diɛŋtsɛ nyɛhe lɛ nɔŋŋ;* nyɛkɛ nyɛjwɛŋmɔ akamaa nibii wuji anɔ,* moŋ lɛ, nyɛhãa nibii ni baa shi akpalaa nyɛ. Nyɛkabua nyɛhe hiɛshikalɔi yɛ nyɛ diɛŋtsɛ nyɛhiŋmɛiiaŋ. 17  Nyɛkaŋɔa efɔŋ nyɛtoa mɔ ko mɔ ko efɔŋ najiaŋ. Nyɛsusua nii ni hi yɛ mɛi fɛɛ asusumɔ naa* lɛ he. 18  Kɛ́ aaahi lɛ, nyɛgbɛfaŋ lɛ, nyɛfea bɔ fɛɛ bɔ ni nyɛaanyɛ koni toiŋjɔlɛ ahi nyɛ kɛ mɛi fɛɛ ateŋ. 19  Mɛi ni asumɔɔ, nyɛkatɔa nyɛ diɛŋtsɛ nyɛhe owele, shi moŋ nyɛŋmɛa he nyɛhãa mlifu lɛ;* ejaakɛ aŋma akɛ: “‘Minɔ ji oweletɔɔ lɛ; mi mato najiaŋ,’ Yehowa* kɛɛ.” 20  Shi “kɛ́ hɔmɔ miiye ohenyɛlɔ lɛ, hã lɛ nɔ ko eye; kɛ́ kumai miiye lɛ lɛ, hã lɛ nɔ ko enu; ejaakɛ kɛ́ ofee nakai lɛ, obaabua ŋai kɛ la naa oshwie eyiteŋ.”* 21  Kaahã efɔŋ miiye onɔ kunim, shi moŋ yaa nɔ okɛ ekpakpa aye efɔŋ nɔ kunim.

Shishigbɛ Niŋmaa

Aloo “yinɔ nɛɛ.” Kwɛmɔ Wiemɔi Titrii Amligbalamɔ lɛ.
Aloo “esusu.”
Aloo “mɔ ni wieɔ tsɔɔ mɛi lɛ.”
Aloo “wiemɔ ní ewieɔ etsɔɔ mɛi.”
Aloo “mɔ ni hãa nɔ ko kɛyeɔ ebuaa.”
Aloo “mɔ ni nyiɛɔ hiɛ lɛ.”
Aloo “efee kɛ mɔdɛŋbɔɔ.”
Aloo “Mɔ fɛɛ mɔ kɛ woo ahã enaanyo klɛŋklɛŋ.”
Aloo “Nyɛkalilaa shi yɛ nyɛnitsumɔ mli.”
Aloo “nyɛhiɛ adɔa.”
Kwɛmɔ Wiemɔi Titrii Amligbalamɔ lɛ.
Aloo “Jwɛŋmɔ ni nyɛhiɛ yɛ diɛŋtsɛ nyɛhe lɛ, nyɛnáa nakai jwɛŋmɔ nɔŋŋ yɛ mɛi krokomɛi ahe.”
Aloo “nyɛkanáa susumɔi wuji.”
Aloo “yɛ mɛi fɛɛ hiɛ.”
Ni tsɔɔ akɛ, Nyɔŋmɔ mlifu lɛ.
Kwɛmɔ Wiemɔi Titrii Amligbalamɔ lɛ.
Ni tsɔɔ akɛ, ebaahã mɔ lɛ he ajɔ ni ebaasere etsuiŋwalɛ lɛ.