Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Romabii 11:1-36

YITSEI LƐ AMLI SAJI

  • Jeee Israelbii lɛ fɛɛ akpoo (1-16)

  • Oliv tso lɛ he nɔkwɛmɔnɔ lɛ (17-32)

  • Nyɔŋmɔ hiɛshikamɔ lɛ mlikwɔlɛ (33-36)

11  Belɛ, miibi akɛ, ani Nyɔŋmɔ ekpoo emɛi lɛ? Dabida! Ejaakɛ mi hu Israelnyo ji mi, ni mijɛ Abraham seshi* lɛ kɛ Benyamin weku lɛ mli.  Nyɔŋmɔ kpooko emɛi ni ekpɛlɛ amɛnɔ klɛŋklɛŋ lɛ. Ani nyɛleee nɔ ni ŋmalɛ lɛ kɛɔ yɛ Elia he, be ni ekpa Nyɔŋmɔ fai ni ewie eshi Israel lɛ?  “Yehowa,* amɛgbe ogbalɔi lɛ, amɛwule ofɔleshaa latɛi lɛ amɛshwie shi, ni eshwɛ mikome too, ni amrɔ nɛɛ, amɛmiitao amɛŋɔ miwala.”*  Kɛ̃lɛ, mɛni Nyɔŋmɔ kɛɛ lɛ? “Mishi hii akpei kpawo mihã mihe, hii ni kɛ amɛnakutsei kulako shi amɛhãko Baal.”  No hewɔ lɛ, nakai nɔŋŋ nɛkɛ be nɛɛ mli hu lɛ, aná mɛi ni eshwɛ ní atsɔ duromɔ nɔ ahala amɛ.  Agbɛnɛ, kɛ́ duromɔ nɔ atsɔɔ lɛ, belɛ jeee nitsumɔi anɔ atsɔɔ dɔŋŋ; kɛjeee nakai lɛ, duromɔ lɛ jeee duromɔ dɔŋŋ.  Belɛ, te wɔɔkɛɛ tɛŋŋ? Nɔ tuuntu ni Israel kɛ hiɛdɔɔ taoɔ lɛ, enine shɛɛɛ nɔ, shi mɛi ni ahala lɛ anine shɛ nɔ. Mɛi ni shwɛ lɛ ajwɛŋmɔ egbo,  tamɔ bɔ ni aŋma lɛ, akɛ: “Nyɔŋmɔ ehã amɛ wɔ ni tsii mumɔ,* hiŋmɛii ni enaaa nii, kɛ toii ni nuuu nii kɛbashi ŋmɛnɛ gbi nɛɛ nɔ.”  Agbɛnɛ hu David kɛɛ akɛ: “Hã amɛkpɔlɔ lɛ atsɔ tsɔne kɛ akpa kɛ nanetɔ̃tɔmɔnɔ kɛ toigbalamɔ ahã amɛ. 10  Hã amɛhiŋmɛii anɔ awo duŋ koni amɛkana nii, ni ohã amɛdɔ amɛmli daa nɛɛ.” 11  No hewɔ lɛ, miibi akɛ, Ani amɛnane tɔ̃tɔ ni amɛgbee shi kwraa? Dabida! Shi gbɛ fɔŋ ni amɛkɔ lɛ etsɔ yiwalaheremɔ ehã jeŋmajiaŋbii lɛ, koni ehã amɛye awuŋa. 12  Agbɛnɛ, kɛ́ gbɛ fɔŋ ni amɛkɔ lɛ hã je lɛ ná nii, ni amɛnɔgbɔmɔ lɛ hã jeŋmajiaŋbii lɛ ná nii lɛ, kɛ́ amɛyibɔ lɛ shɛ lɛ, kwɛ bɔ ni no baahã aná nii kɛteke nɔ! 13  Agbɛnɛ mikɛ nyɛ ni nyɛji jeŋmajiaŋbii lɛ miiwie. Akɛni miji jeŋmaji lɛ abɔfo hewɔ lɛ, miwoɔ misɔɔmɔ lɛ hiɛ nyam* 14  akɛ aleenɔ manyɛ mahã mi diɛŋtsɛ mimɛi* lɛ aye awuŋa, ni mahere amɛteŋ mɛi komɛi ayiwala lo. 15  Ejaakɛ kɛ́ shɛrɛmɔ ni ashɛrɛ amɛ ashwie lɛ tsɔɔ kpatamɔ kɛhã je lɛ, belɛ kɛ́ akpɛlɛ amɛnɔ lɛ, ani no etsɔŋ wala kɛmiijɛ gbohii ateŋ? 16  Kɛfata he lɛ, kɛ́ ma* lɛ fã ní aŋɔ ahã akɛ klɛŋklɛŋ yibii lɛ yɛ krɔŋkrɔŋ lɛ, no lɛ ma muu lɛ fɛɛ hu yɛ krɔŋkrɔŋ; ni kɛ́ shishifã lɛ yɛ krɔŋkrɔŋ lɛ, no lɛ tso lɛ niji lɛ hu yɛ krɔŋkrɔŋ. 17  Shi kɛ́ akumɔ tso lɛ niji lɛ ekomɛi, ni bo ni oji ŋa mli oliv tso lɛ, atɛo bo awo tso lɛ niji ni shwɛ lɛ mli ni oná oliv tso lɛ shishifã lɛ mli nii kpakpai lɛ amli gbɛfaŋnɔ lɛ, 18  kaapupu ohe yɛ tso lɛ niji lɛ anɔ.* Shi kɛ́ opupu ohe yɛ amɛnɔ* lɛ, kaimɔ akɛ jeee bo ohiɛ shishifã lɛ, shi shishifã lɛ moŋ hiɛ bo. 19  Agbɛnɛ, obaakɛɛ akɛ: “Akumɔ tso lɛ niji lɛ koni atɛo mi awo tso lɛ mli.” 20  Eji anɔkwale! Ejaakɛ hemɔkɛyeli ni amɛbɛ lɛ hewɔ akumɔ amɛ lɛ, shi bo lɛ hemɔkɛyeli hewɔ odamɔ shi lɛ. Kaawó ohe nɔ, shi moŋ she nii gbeyei. 21  Ejaakɛ kɛ́ Nyɔŋmɔ ebaaa tso lɛ diɛŋtsɛ niji lɛ ayi lɛ, bo hu ebaŋ oyi. 22  No hewɔ lɛ, susumɔ Nyɔŋmɔ mlihilɛ kɛ etoigbalamɔ lɛ fɛɛ he. Egbala mɛi ni gbee shi lɛ atoi, shi bo lɛ, Nyɔŋmɔ mlihilɛ lɛ baaya nɔ ahi onɔ kɛji otee nɔ ohi emlihilɛ lɛ mli; kɛjeee nakai lɛ, bo hu abaafo bo ashɛ afɔ̃. 23  Ni amɛ hu, kɛ́ amɛyaaa nɔ amɛhiii shi akɛ mɛi ni bɛ hemɔkɛyeli lɛ, abaatɛo amɛ awo tso lɛ mli, ejaakɛ Nyɔŋmɔ baanyɛ atɛo amɛ awo mli ekoŋŋ. 24  Ejaakɛ kɛ́ afo bo kɛjɛ tso ni ji ŋa mli oliv tso yɛ bɔɔsu naa lɛ he, ni atɛo bo awo abɔɔ mli oliv tso lɛ mli, nɔ ko ni afɔɔɔ feemɔ lɛ, kwɛ bɔ ni ebaafee mlɛo akɛ abaatɛo mɛnɛɛmɛi ni ji tso lɛ niji diɛŋtsɛ lɛ awo oliv tso ni ji amɛ diɛŋtsɛ amɛnɔ lɛ mli ekoŋŋ! 25  Ejaakɛ, nyɛmimɛi, misumɔɔɔ akɛ mashiu nyɛ nɛkɛ teemɔŋ sane krɔŋkrɔŋ nɛɛ nɔ, koni nyɛkabu nyɛhe hiɛshikalɔi yɛ nyɛ diɛŋtsɛ nyɛhiŋmɛiiaŋ: Israel fã ko jwɛŋmɔ egbo kɛyashi jeŋmajiaŋbii lɛ ayibɔ lɛ fɛɛ baaba mli, 26  ni nɛkɛ gbɛ nɔ abaatsɔ ahere Israel fɛɛ yiwala. Tamɔ bɔ ni aŋma lɛ, akɛ: “Kpɔ̃lɔ lɛ* baajɛ Zion aba ni ebaahã nifeemɔi ni wooo Nyɔŋmɔ hiɛ nyam lɛ aje Yakob he kɛya. 27  Ni enɛ ji kpaŋmɔ ni mi kɛ amɛ baakpaŋ, be mli ni majie amɛhe eshai kɛya lɛ.” 28  Anɔkwa, yɛ sane kpakpa lɛ gbɛfaŋ lɛ, henyɛlɔi ji amɛ yɛ nyɛ hewɔ; shi yɛ Nyɔŋmɔ halamɔ lɛ gbɛfaŋ lɛ, asumɔɔ amɛ yɛ amɛtsɛmɛi lɛ ahewɔ. 29  Ejaakɛ Nyɔŋmɔ nikeenii lɛ kɛ etsɛmɔ lɛ jeee nibii ni ebaashwa ehe yɛ he. 30  Ejaakɛ tamɔ bɔ ni tsutsu ko lɛ, nyɛji Nyɔŋmɔ nɔ toigbolɔi, shi amrɔ nɛɛ, ana nyɛ mɔbɔ yɛ amɛtoigbele lɛ hewɔ lɛ, 31  nakai nɔŋŋ agbɛnɛ, mɛnɛɛmɛi gbo toi, ni atsɔ no nɔ ana nyɛ mɔbɔ, koni amrɔ nɛɛ amɛ diɛŋtsɛ hu ana amɛ mɔbɔ. 32  Ejaakɛ Nyɔŋmɔ eŋamɔ amɛ fɛɛ amɛyi ewo toigbele mli, koni ena amɛ fɛɛ mɔbɔ. 33  Oo kwɛ bɔ ni nii ni Nyɔŋmɔ yɔɔ lɛ fa kɛteke nɔ, kɛ bɔ ni ehiɛshikamɔ kɛ nilee lɛ mli kwɔ hã! Ekojomɔi lɛ, anyɛɛɛ shishi ana, ni egbɛi lɛ hu, anyɛɛɛ sɛɛ mo aja! 34  Ejaakɛ “namɔ ebale Yehowa* jwɛŋmɔ, aloo namɔ ebatsɔ eŋaawolɔ?” 35  Aloo, “namɔ etsɔ hiɛ ehã lɛ nɔ ko, ni kulɛ esa akɛ ato lɛ najiaŋ?” 36  Ejaakɛ nibii fɛɛ jɛ eŋɔɔ, ni lɛ enɔ amɛtsɔɔ amɛhiɔ shi, ni lɛ nɔŋŋ amɛyɔɔ amɛhã. Lɛ aŋɔ anunyam ahã kɛya naanɔ. Amen.

Shishigbɛ Niŋmaa

Sht. ŋm., “dumɔwu.”
Kwɛmɔ Wiemɔi Titrii Amligbalamɔ lɛ.
Aloo “misusuma.”
Enɛ tsɔɔ akɛ, amɛnyɛɛɛ amɛyɔse Nyɔŋmɔ yiŋtoo.
Aloo “miwóɔ misɔɔmɔ lɛ nɔ gojoo.”
Sht. ŋm., “miheloo.”
Ma ji nibii tamɔ abele, omɔ, ŋmaa, kɛ amɛhenɔi ni agbɛlɛ ni akɛ nu efutu.
Aloo “kaashwã yɛ niji lɛ anɔ.”
Aloo “oshwã yɛ amɛnɔ.”
Aloo “Yiwalaherelɔ lɛ.”
Kwɛmɔ Wiemɔi Titrii Amligbalamɔ lɛ.