Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Romabii 10:1-21

10  Nyɛmimɛi, yɛ anɔkwale mli lɛ, nɔ ni mitsui shweɔ kɛ fai ni mikɛ hiɛdɔɔ kpaa Nyɔŋmɔ mihãa amɛ ji akɛ, ahere amɛyiwala.  Ejaakɛ miyeɔ amɛhe odase akɛ amɛhiɛ dɔɔ yɛ Nyɔŋmɔ he moŋ, shi jeee yɛ nilee krɔŋŋ naa.  Akɛni amɛleee Nyɔŋmɔ jalɛ lɛ shi amɛmiitao ni amɛto amɛ diɛŋtsɛ amɛnɔ shishi hewɔ lɛ, amɛŋɔɔɔ amɛhe amɛwooo Nyɔŋmɔ jalɛ lɛ shishi.  Ejaakɛ Kristo ji Mla lɛ naagbee, koni mɔ fɛɛ mɔ ni jieɔ hemɔkɛyeli kpo lɛ aná jalɛ.  Ejaakɛ Mose ŋma yɛ jalɛ ni jɛ Mla lɛ mli lɛ he akɛ: “Gbɔmɔ ni yeɔ nibii nɛɛ anɔ lɛ baahi shi yɛ nibii nɛɛ ahewɔ.”  Shi jalɛ ni jɛ hemɔkɛyeli mli lɛ kɛɔ akɛ: “Kaakɛɛ yɛ otsui mli akɛ, ‘Namɔ baakwɔ kɛya ŋwɛi?’ ni tsɔɔ akɛ, koni eyaŋɔ Kristo kɛkpeleke shi,  aloo, ‘Namɔ baakpeleke shi kɛya bu kwɔŋkwɔŋ lɛ mli?’ ni tsɔɔ akɛ, koni eyaŋɔ Kristo kɛjɛ gbohii ateŋ kɛba.”  Shi moŋ te ekɛɔ tɛŋŋ? “Wiemɔ lɛ bɛŋkɛ bo, eyɛ bo diɛŋtsɛ odaa mli kɛ bo diɛŋtsɛ otsui mli”; no ji hemɔkɛyeli he “wiemɔ lɛ” ní wɔshiɛɔ lɛ.  Ejaakɛ kɛ́ okɛ onaabu jaje otsɔɔ akɛ, Yesu ji Nuŋtsɔ, ni ojie hemɔkɛyeli kpo yɛ otsui mli akɛ Nyɔŋmɔ tee lɛ shi kɛjɛ gbohii ateŋ lɛ, abaahere oyiwala. 10  Ejaakɛ tsui akɛjieɔ hemɔkɛyeli kpo kɛshɛɔ jalɛ he, shi naabu akɛjajeɔ atsɔɔ kɛshɛɔ yiwalaheremɔ he. 11  Ejaakɛ ŋmalɛ lɛ kɛɔ akɛ: “Mɔ ko mɔ ko bɛ ni náa hemɔkɛyeli yɛ emli ní nine baanyɛ shi.” 12  Ejaakɛ srɔto ko bɛ Yudafonyo kɛ Helanyo teŋ. Nuŋtsɔ kome ta nii fɛɛ nɔ, ni niiatsɛ hu ji lɛ hã* mɛi fɛɛ ni boɔ tsɛɔ lɛ lɛ. 13  Ejaakɛ “mɔ fɛɛ mɔ ni boɔ tsɛɔ Yehowa* gbɛ́i lɛ, abaahere eyiwala.” 14  Shi te amɛbaafee tɛŋŋ amɛbo amɛtsɛ mɔ ni amɛnáko hemɔkɛyeli yɛ emli lɛ? Ni asaŋ te amɛbaafee tɛŋŋ amɛná hemɔkɛyeli hu yɛ mɔ ni amɛnuko ehe sane lɛ mli lɛ? Ni asaŋ te amɛbaafee tɛŋŋ amɛnu hu kɛ́ mɔ ko bɛ ni baashiɛ? 15  Ni asaŋ te amɛbaafee tɛŋŋ amɛshiɛ hu kɛ́ atsuko amɛ? Tamɔ bɔ ni aŋma lɛ, akɛ: “Kwɛ bɔ ni mɛi ni jajeɔ nibii kpakpai ahe sane kpakpa lɛ anaji yɔɔ fɛo hã!” 16  Kɛ̃lɛ, jeee amɛ fɛɛ amɛbo sane kpakpa lɛ toi. Ejaakɛ Yesaia kɛɛ akɛ: “Yehowa,* namɔ ená hemɔkɛyeli yɛ nɔ ni anu yɛ wɔnaa lɛ mli?”* 17  No hewɔ lɛ, hemɔkɛyeli nyiɛɔ nɔ ni anuɔ lɛ sɛɛ kɛbaa. Ni nɔ ni anuɔ lɛ hu tsɔɔ Kristo he wiemɔ lɛ nɔ kɛbaa. 18  Shi miibi akɛ, Ani nu amɛnuuu? Dabida, anɔkwa, “amɛgbee jije kɛtee shikpɔŋ lɛ nɔ fɛɛ, ni amɛsane lɛ shɛ shikpɔŋ lɛ naagbeehei lɛ.” 19  Shi miibi akɛ, Ani le Israel leee? Klɛŋklɛŋ lɛ, Mose kɛɛ akɛ: “Matsɔ mɛi ni jeee jeŋmaŋ ko nɔ mahã nyɛye awuŋa; matsɔ jeŋmaŋ ko ni leee nii nɔ mahã nyɛmli afu waa.” 20  Ni Yesaia fee ekãa babaoo ni ekɛɛ: “Mɛi ni taooo mi lɛ na mi; mɛi ni biii mishi lɛ bale mi.” 21  Shi ewie Israel he akɛ: “Gbi muu fɛɛ lɛ, migbɛɔ minijiaŋ mihãa maŋ toigbolɔi kɛ kuɛŋtilɔi lɛ.”

Shishigbɛ Niŋmaa

Aloo “edɛŋ kpɔɔ hãa.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “yɛ wɔmaniɛbɔɔ lɛ mli?”