Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Romabii 1:1-32

1  Paulo, Kristo Yesu nyɔŋ ní atsɛ lɛ koni ebatsɔ bɔfo, ní ajie lɛ ato ahã Nyɔŋmɔ sane kpakpa,  ní etsɔ hiɛ ewo he shi kɛtsɔ egbalɔi lɛ anɔ yɛ Ŋmalɛi krɔŋkrɔŋi lɛ amli,  ní kɔɔ e-Bi lɛ he, mɔ ni yɛ heloo gbɛfaŋ lɛ, ajɛ David seshi* lɛ mli afɔ lɛ,  shi atsɔ mumɔ ni yɔɔ krɔŋkrɔŋ lɛ nɔ ajie lɛ kpo yɛ hewalɛ mli akɛ Nyɔŋmɔ Bi kɛtsɔ shi ni atee lɛ kɛjɛ gbohii ateŋ lɛ nɔ—hɛɛ, Yesu Kristo, wɔ-Nuŋtsɔ lɛ.  Enɔ wɔtsɔ wɔná duromɔ kɛ bɔfo nitsumɔ lɛ, koni ajɛ hemɔkɛyeli mli abo toi yɛ jeŋmaji lɛ fɛɛ mli yɛ egbɛ́i lɛ hewɔ,  jeŋmaji ní nyɛ hu nyɛyɔɔ amɛteŋ, nyɛ mɛi ni atsɛ nyɛ koni nyɛbatsɔmɔ Yesu Kristo nii lɛ—  kɛyahã mɛi fɛɛ ni yɔɔ Roma ni ji mɛi ni Nyɔŋmɔ sumɔɔ, ní atsɛ amɛ koni amɛbatsɔmɔ mɛi krɔŋkrɔŋi lɛ: Duromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.  Klɛŋklɛŋ kwraa lɛ, miitsɔ Yesu Kristo nɔ miida mi-Nyɔŋmɔ lɛ shi yɛ nyɛ fɛɛ nyɛhewɔ, ejaakɛ awieɔ nyɛhemɔkɛyeli lɛ he yɛ je lɛŋ fɛɛ.  Ejaakɛ Nyɔŋmɔ, mɔ ni miŋɔɔ sɔɔmɔ krɔŋŋ mihãa kɛ mimumɔ fɛɛ yɛ e-Bi lɛ he sane kpakpa lɛ shiɛmɔ mli lɛ, ji midasefonyo akɛ mitsĩɔ nyɛtã yɛ misɔlemɔi amli daa ni mifɔ̃ko, 10  ni mikpaa fai akɛ kɛ́ aaahi lɛ, manyɛ maba nyɛŋɔɔ agbɛnɛ, kɛ́ Nyɔŋmɔ miisumɔ. 11  Ejaakɛ miishwe akɛ mana nyɛ, koni mikɛ mumɔŋ nikeenii lɛ eko abahã nyɛ ní nyɛhe awa; 12  aloo, moŋ lɛ, koni wɔwowoo wɔhe hewalɛ, ni tsɔɔ akɛ atsɔ nyɛhemɔkɛyeli lɛ nɔ awo mi hewalɛ ni atsɔ mi hu minɔ lɛ nɔ awo nyɛ hewalɛ. 13  Shi nyɛmimɛi, miisumɔ akɛ nyɛle akɛ, mito miyiŋ shii abɔ akɛ maba nyɛŋɔɔ, bɔ ni afee ni maná yibii komɛi yɛ nyɛ hu nyɛteŋ taakɛ miná yɛ jeŋmaji krokomɛi lɛ ateŋ lɛ—shi atsĩ mi gbɛ kɛbashi amrɔ nɛɛ. 14  Mihiɛ Helabii kɛ maŋsɛɛbii,* hiɛshikalɔi kɛ mɛi ni leee nii fɛɛ nyɔmɔ; 15  no hewɔ lɛ, miishwe waa akɛ mabajaje sane kpakpa lɛ matsɔɔ nyɛ mɛi hu ni nyɛyɔɔ Roma lɛ. 16  Ejaakɛ mihiɛ gbooo sane kpakpa lɛ he; yɛ anɔkwale mli lɛ, eji Nyɔŋmɔ hewalɛ ni ekɛhereɔ mɔ fɛɛ mɔ ni yɔɔ hemɔkɛyeli lɛ yiwala, Yudafonyo lɛ klɛŋklɛŋ kɛ agbɛnɛ hu, Helanyo lɛ. 17  Ejaakɛ no mli ajieɔ Nyɔŋmɔ jalɛ lɛ kpo yɛ, kɛtsɔ hemɔkɛyeli nɔ, kɛ agbɛnɛ hu kɛhã hemɔkɛyeli, tamɔ bɔ ni aŋma lɛ, akɛ: “Shi jalɔ lɛ, ebaaya nɔ ehi shi yɛ hemɔkɛyeli hewɔ.” 18  Ni aajie Nyɔŋmɔ mlifu kpo kɛmiijɛ ŋwɛi kɛmiishi nibii fɔji kɛ nibii ni ejaaa fɛɛ ní mɛi ni tsĩɔ anɔkwale lɛ nɔ yɛ gbɛ ni ejaaa nɔ lɛ feɔ lɛ, 19  ejaakɛ nɔ ni abaanyɛ ale yɛ Nyɔŋmɔ he lɛ yɛ faŋŋ yɛ amɛteŋ, ejaakɛ Nyɔŋmɔ jie tsɔɔ amɛ faŋŋ. 20  Ejaakɛ esui ni anaaa lɛ, ni ji enaanɔ hewalɛ kɛ Nyɔŋmɔ ni eji lɛ, kɛjɛ jeŋbɔɔ mli beebe lɛ anaa faŋŋ, ejaakɛ atsɔɔ nibii ni efee lɛ anɔ ayɔseɔ enɛɛmɛi, ni no hewɔ lɛ, amɛbɛ naajiemɔ ko. 21  Ejaakɛ, amɛle Nyɔŋmɔ moŋ, shi amɛwooo ehiɛ nyam akɛ Nyɔŋmɔ, asaŋ amɛdaaa lɛ shi, moŋ lɛ, amɛbatsɔmɔ mɛi ni jwɛŋɔ yaka jwɛŋmɔi, ni amɛtsuii ni kɔɔɔ sane sɛɛ lɛ wo duŋ. 22  Amɛtsɛɔ amɛhe hiɛshikalɔi moŋ, shi amɛbatsɔmɔ kwashiai 23  ni amɛtsake Nyɔŋmɔ ni fiteee lɛ anunyam lɛ ni amɛkɛfee nɔ ko tamɔ gbɔmɔ ni fiteɔ kɛ loofɔji kɛ kooloi naji-ejwɛɛjwɛtsɛmɛi kɛ kooloi ni wamɔɔ ahe amagai. 24  No hewɔ lɛ, akɛni amɛmiitao amɛhi shi yɛ amɛ diɛŋtsɛ amɛtsuiiaŋ akɔnɔi lɛ anaa hewɔ lɛ, Nyɔŋmɔ ŋmɛɛ amɛhe ehã muji nii, koni no agbe amɛ diɛŋtsɛ amɛgbɔmɔtsei lɛ ahe guɔ. 25  Amɛŋɔ Nyɔŋmɔ he anɔkwale lɛ amɛtsake amale, ni amɛjá ni amɛkɛ sɔɔmɔ krɔŋŋ hã bɔɔ nii lɛ moŋ fe Bɔlɔ lɛ, mɔ ni ajieɔ eyi kɛyaa naanɔ lɛ. Amen. 26  Enɛ hewɔ ni Nyɔŋmɔ ŋmɛɛ amɛhe ní amɛtiu bɔlɛnamɔ he akɔnɔ sɛɛ ní amɛyeee amɛhe nɔ lɛ, ejaakɛ bɔ ni ato yɛ adebɔɔ naa akɛ aná bɔlɛ lɛ, amɛyei lɛ etsake hiɛ amɛhã nɔ ni kɛ adebɔɔ gbɛjianɔtoo kpãaa gbee; 27  nakai nɔŋŋ hii lɛ hu eshi bɔ ni ato yɛ adebɔɔ naa akɛ hii kɛ yei aná bɔlɛ lɛ, ni amɛkɛ bɔlɛnamɔ he akɔnɔ ni naa wa nyiɛɔ amɛ diɛŋtsɛ amɛhe sɛɛ, ni hii kɛ hii tsuɔ yakayakanii, ni amɛ diɛŋtsɛ amɛnáa amɛtɔmɔ lɛ he toigbalamɔ* ni sa. 28  Akɛni amɛsusu akɛ ehe ehiaaa ni amɛle Nyɔŋmɔ hewɔ lɛ,* Nyɔŋmɔ ŋmɛɛ amɛhe ehã jwɛŋmɔ ni ejaaa, koni amɛfee nibii ni esaaa. 29  Ni amɛyimɔ obɔbɔ kɛ nii ni ejaaa, efɔŋfeemɔ, amimyeli,* kɛ nibii gbohii fɛɛ, asaŋ amɛyimɔ obɔbɔ kɛ mɔnɔklɔmɔ, gbɔmɔgbee, béi, mɔlakamɔ, kɛ jwɛŋmɔ fɔŋ, amɛji ablɛbiwielɔi,* 30  mɛi afitelɔi, mɛi ni nyɛɔ Nyɔŋmɔ, mɛi ni ebuuu saa, henɔwolɔi, shwãlɔi, nibii ni yeɔ mɔ awui ahe ŋaatsɔlɔi,* fɔlɔi anɔ toigbolɔi, 31  mɛi ni nuuu nii ashishi, kpaŋmɔ mlikulɔi, mɛi ni bɛ adebɔɔ naa hedɔɔ, kɛ mɛi ni enaaa mɔbɔ. 32  Eyɛ mli akɛ mɛi nɛɛ le Nyɔŋmɔ jalɛ akpɔ lɛ jogbaŋŋ moŋ—akɛ mɛi ni feɔ nɛkɛ nibii nɛɛ sa gbele—shi jeee feemɔ kɛkɛ amɛyaa nɔ amɛfeɔ, moŋ lɛ, amɛkpɛlɛɔ mɛi ni feɔ nibii nɛɛ anɔ hu.

Shishigbɛ Niŋmaa

Sht. ŋm., “dumɔwu.”
Aloo “mɛi ni jeee Helabii.” Hela mli lɛ, “barbarobii.”
Aloo “nyɔmɔwoo.”
Aloo “amɛsumɔɔɔ akɛ amɛhiɛɔ Nyɔŋmɔ he nilee krɔŋŋ mli hewɔ lɛ.”
Aloo “hiɛkɔ̃ɔ.”
Aloo “mɛi-ahe-wielɔi.”
Aloo “nibii fɔji ahe ŋaatsɔlɔi.”