Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 9:1-38

9  No hewɔ lɛ, ebote lɛlɛ lɛ mli ni efo ŋshɔ lɛ kɛtee esɛɛgbɛ, ni etee lɛ diɛŋtsɛ emaŋ lɛ mli.  Ni naa! akɛ nuu ko ni miiye kuumɔ hela eŋmɛ saa nɔ kɛmiiba Yesu ŋɔɔ. Be ni Yesu na amɛhemɔkɛyeli lɛ, ekɛɛ mɔ ni ekumɔ lɛ akɛ: “Bi, hã otsui anyɔ omli!* Aŋɔ ohe eshai lɛ afa bo.”  Agbɛnɛ, woloŋmalɔi komɛi kɛɛkɛɛ amɛhe akɛ: “Mɔ nɛɛ miibɔ musu.”  Akɛni Yesu le amɛsusumɔi hewɔ lɛ, ekɛɛ: “Mɛni hewɔ nyɛsusuɔ nibii fɔji yɛ nyɛtsuii amli lɛ?  Akɛ nɔkwɛmɔnɔ lɛ, te enɛɛmɛi amli nɔ ni waaa, ni aaakɛɛ akɛ, ‘Aŋɔ ohe eshai lɛ afa bo,’ aloo ni aaakɛɛ akɛ, ‘Tee shi ni onyiɛ’?  Shi bɔ ni afee ni nyɛle akɛ gbɔmɔ Bi lɛ yɛ hegbɛ yɛ shikpɔŋ lɛ nɔ akɛ eŋɔɔ eshai efaa lɛ—” kɛkɛ ni ekɛɛ mɔ ni ekumɔ lɛ akɛ: “Tee shi, wó osaa lɛ, ni oya oshĩa.”  Ni ete shi ni eyiŋ etee eshĩa.  Be ni asafoku lɛ na enɛ lɛ, gbeyei mɔmɔ amɛ, ni amɛwo Nyɔŋmɔ, mɔ ni ŋɔ hegbɛ ni tamɔ nɛkɛ ehã gbɔmɛi lɛ, hiɛ nyam.  Agbɛnɛ, be ni Yesu je jɛmɛ eyaa lɛ, ehiŋmɛi gba nuu ko ni atsɛɔ lɛ Mateo nɔ akɛ eta toohemɔhe lɛ, ni ekɛɛ lɛ akɛ: “Baatsɔ misɛɛnyiɛlɔ.” Kɛkɛ ni ete shi ni enyiɛ esɛɛ. 10  Sɛɛ mli be ni Yesu ta niyeniiashi* yɛ shĩa lɛ, naa! toohelɔi kɛ eshafeelɔi babaoo ba ni amɛkɛ Yesu kɛ ekaselɔi lɛ baye nii.* 11  Shi be ni Farisifoi lɛ na enɛ lɛ, amɛkɛɛ ekaselɔi lɛ akɛ: “Mɛni hewɔ nyɛtsɔɔlɔ lɛ kɛ toohelɔi kɛ eshafeelɔi yeɔ nii lɛ?” 12  Be ni enu amɛwiemɔ lɛ, ekɛɛ akɛ: “Mɛi ni yɔɔ hewalɛ lɛ, helatsalɔ he ehiaaa amɛ, shi mɛi ni he yeɔ lɛ moŋ ehe hiaa. 13  Belɛ, nyɛyaa ni nyɛyakasea nɔ ni ji enɛ shishi: ‘Mɔbɔnalɛ mitaoɔ, shi jeee afɔle.’ Ejaakɛ mibaaa jalɔi atsɛmɔ, shi moŋ eshafeelɔi.” 14  Kɛkɛ ni Yohane kaselɔi lɛ ba eŋɔɔ ni amɛbabi lɛ akɛ: “Mɛni hewɔ wɔ kɛ Farisifoi lɛ fɔɔ ŋmaahilɛ shi okaselɔi lɛ ehiii ŋmaa lɛ?” 15  Ni Yesu kɛɛ amɛ akɛ: “Ayemforo wu lɛ nanemɛi lɛ bɛ yiŋtoo hewɔ ni amɛaaye awerɛho, gbii abɔ ni ayemforo wu lɛ kɛ amɛ yɔɔ lɛ, aloo jeee nakai? Shi gbii baaba ni abaaŋɔ ayemforo wu lɛ kɛaaje amɛteŋ kɛya, ni no lɛ amɛbaahi ŋmaa. 16  Mɔ ko mɔ ko kɛ mama hee* taaa mama momo, ejaakɛ mama hee lɛ baatse kɛje mama momo lɛ he, ni no baahã egba fe tsutsu lɛ. 17  Asaŋ aŋɔɔɔ wein hee awooo wein kotokui* memeji amli. Kɛ́ afee nakai lɛ, wein kotokui lɛ baafɛlɛ ni wein lɛ baashwie shi, ni wein kotokui lɛ baafite. Shi akɛ wein hee woɔ wein kotokui hei amli, ni no baa nibii enyɔ lɛ fɛɛ yi.” 18  Be ni ekɛɔ amɛ nibii nɛɛ, naa! nɔyelɔ ko tsi ebɛŋkɛ ni ekoto lɛ ekɛɛ: “Benɛ nɛɛ, mibiyoo lɛ egbo, shi ba ni obaŋɔ onine oŋmɛ enɔ, ni ebaaba wala mli ekoŋŋ.” 19  Kɛkɛ ni Yesu te shi ni ekɛ ekaselɔi lɛ nyiɛ esɛɛ. 20  Ni naa! yoo ko ni lá eho lɛ afii nyɔŋma kɛ enyɔ baje esɛɛgbɛ ni eta etade nɔhaanɔ lɛ naamuu lɛ he, 21  ejaakɛ etee nɔ ekɛɛ ehe akɛ: “Kɛji mita etade nɔhaanɔ lɛ he kɛkɛ lɛ, mihe baawa mi.” 22  Yesu tsɔ ehe, ni be ni ena yoo lɛ, ekɛɛ akɛ: “Biyoo, hã otsui anyɔ omli!* Ohemɔkɛyeli ehã ohe ewa bo.” Ni yoo lɛ he wa lɛ yɛ nakai ŋmɛlɛtswaa lɛ nɔ nɔŋŋ. 23  Agbɛnɛ, be ni Yesu bote nɔyelɔ lɛ shĩa lɛ mli ni ehiŋmɛi gba bɛlɛkpãlɔi lɛ kɛ asafoku lɛ nɔ akɛ amɛmiifee hoo lɛ, 24  ekɛɛ akɛ: “Nyɛshia biɛ, ejaakɛ gbekɛ yoo lɛ gboko, shi wɔ ewɔ.” Kɛkɛ ni amɛbɔi lɛ ŋmɔɔ kɛ hefɛoyeli. 25  Be ni ahã asafoku lɛ tee agbó lɛ naa nɔŋŋ lɛ, etee tsũ lɛ mli ni emɔ gbekɛ yoo lɛ nineshi, ni gbekɛ yoo lɛ te shi. 26  Anɔkwa, nɛkɛ sane nɛɛ gbɛ shwã nakai kpokpaa lɛ nɔ fɛɛ. 27  Be ni Yesu je jɛmɛ eyaa lɛ, shwilafoi enyɔ nyiɛ esɛɛ, ni amɛmiibolɔ akɛ: “Naa wɔ mɔbɔ, David Bi.” 28  Be ni etee shĩa lɛ mli lɛ, shwilafoi lɛ ba eŋɔɔ, ni Yesu bi amɛ akɛ: “Ani nyɛyɛ hemɔkɛyeli akɛ manyɛ mafee enɛ?” Amɛhã lɛ hetoo akɛ: “Hɛɛ, Nuŋtsɔ.” 29  Kɛkɛ ni etara amɛhiŋmɛii lɛ ahe ekɛɛ: “Yɛ nyɛhemɔkɛyeli lɛ naa lɛ, aba mli nakai ahã nyɛ.” 30  Ni amɛhiŋmɛii lɛ na nii. Kɛfata he lɛ, Yesu bɔ amɛ kɔkɔ kɛ hiɛdɔɔ akɛ: “Nyɛkwɛa ni mɔ ko akalea enɛ.” 31  Shi amɛ lɛ, be ni amɛje kpo lɛ, amɛyagbɛ ehe sane amɛshwã nakai kpokpaa lɛ nɔ fɛɛ. 32  Be ni amɛmiishi lɛ, naa! akɛ nuu mumui ko ni yɔɔ daimonio ba eŋɔɔ; 33  ni be ni afã daimonio lɛ, nuu mumui lɛ wie. Ojogbaŋŋ, asafoku lɛ naa kpɛ amɛhe ni amɛkɛɛ: “Anako nɛkɛ nɔ ko pɛŋ yɛ Israel.” 34  Shi Farisifoi lɛ kɛɛ: “Daimonioi lɛ anɔyelɔ lɛ hewalɛ ekɛfãmɔɔ daimonioi lɛ.” 35  Ni Yesu yakpa maji kɛ akrowai lɛ fɛɛ nɔ, ni etsɔɔ nii yɛ amɛkpeehei lɛ, ni eshiɛ Maŋtsɛyeli lɛ he sane kpakpa lɛ, ni etsa helai srɔtoi fɛɛ kɛ gbɔmɔtsoŋ gbɔjɔmɔi srɔtoi fɛɛ. 36  Be ni ena asafoku lɛ, emusuŋ tsɔ lɛ yɛ amɛhewɔ ejaakɛ afee amɛ niseniianii, ni akpoo amɛ tamɔ gwantɛŋi ni bɛ kwɛlɔ. 37  Kɛkɛ ni ekɛɛ ekaselɔi lɛ akɛ: “Hɛɛ, nikpamɔ lɛ fa, shi nitsulɔi lɛ faaa. 38  No hewɔ lɛ, nyɛkpaa nikpamɔ Nuŋtsɔ lɛ fai koni etsu nitsulɔi kɛba enikpamɔ lɛ mli.”

Shishigbɛ Niŋmaa

Aloo “ná ekãa!”
Aloo “ta okpɔlɔ lɛ he.”
Aloo “batara okpɔlɔ lɛ he.”
Ni ji, mama ni afɔko he, ni esuko.
Kotokui ni akɛ kooloo hewolo fee.
Aloo “ná ekãa!”