Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 8:1-34

8  Be ni ejɛ gɔŋ lɛ nɔ ekpeleke shi lɛ, asafoku babaoo ko nyiɛ esɛɛ.  Ni naa! nuu kpitiyelɔ ko ba ni ebakoto lɛ ekɛɛ: “Nuŋtsɔ, kɛ́ oosumɔ lɛ, obaanyɛ ohã mihe atse.”  No hewɔ lɛ, ekpã enine mli eta ehe ni ekɛɛ: “Miisumɔ! Ohe atse.” Amrɔ lɛ, ekpiti lɛ tee ni ehe tse.  Kɛkɛ ni Yesu kɛɛ lɛ akɛ: “Kwɛmɔ ni okakɛɛ mɔ ko, shi moŋ yaa, okɛ ohe ayatsɔɔ osɔfo lɛ, ní oŋɔ nɔkeenɔ ni Mose fo efɔ̃ shi lɛ ohã, koni no afee odase kɛhã amɛ.”  Be ni ebote Kapernaum lɛ, asraafoiatsɛ* ko ba eŋɔɔ ebakpa lɛ fai  ni ekɛɛ: “Onukpa, mitsulɔ lɛ kã shi yɛ shĩa kɛ kuumɔ hela, ni eepiŋ waa.”  Ekɛɛ lɛ akɛ: “Kɛ́ mishɛ jɛmɛ lɛ, matsa lɛ.”  Asraafoiatsɛ lɛ hã hetoo akɛ: “Onukpa, misaaa mɔ ni obaa mishĩa, shi moŋ hã wiemɔ lɛ ajɛ onaa kɛkɛ, ni mitsulɔ lɛ he baawa lɛ.  Ejaakɛ mi hu gbɔmɔ ni yɔɔ mɔ ko shishi ji mi moŋ, shi miyɛ asraafoi yɛ mishishi, ni mikɛɔ mɔ nɛ akɛ, ‘Yaa!’ ni eyaa, ni mikɛɔ mɔ kroko akɛ, ‘Ba!’ ni ebaa, ni mikɛɔ minyɔŋ akɛ, ‘Feemɔ enɛ!’ ni efeɔ.” 10  Be ni Yesu nu enɛ lɛ, enaa kpɛ ehe ni ekɛɛ mɛi ni nyiɛ esɛɛ lɛ akɛ: “Lɛɛlɛŋ, miikɛɛ nyɛ akɛ, minako mɔ ko yɛ Israel ni hemɔkɛyeli da tamɔ nɛkɛ dã. 11  Shi miikɛɛ nyɛ akɛ, mɛi babaoo baajɛ boka kɛ anai aba koni amɛkɛ Abraham kɛ Isak kɛ Yakob abatara okpɔlɔ he yɛ ŋwɛi Maŋtsɛyeli lɛ mli; 12  shi abaashɛrɛ Maŋtsɛyeli lɛ bii lɛ ashwie agbonaa duŋ lɛ mli. Jɛmɛ ji he ni amɛbaafo ni amɛbaakpe amɛnyanyɔjiashi yɛ.” 13  Kɛkɛ ni Yesu kɛɛ asraafoiatsɛ lɛ akɛ: “Yaa. Bɔ ni ojie hemɔkɛyeli kpo lɛ, aba mli nakai ahã bo.” Ni tsulɔ lɛ he wa lɛ yɛ nakai ŋmɛlɛtswaa lɛ nɔ nɔŋŋ. 14  Ni be ni Yesu ba Petro shĩa lɛ, ena Petro shaayoo kã shi kɛ atridii. 15  No hewɔ lɛ, eta yoo lɛ nine he, ni atridii lɛ tse yɛ enɔ, ni yoo lɛ te shi ni ebɔi lɛ sɔɔmɔ. 16  Shi be ni shɛ gbɛkɛnaashi lɛ, akɛ mɛi babaoo ni yɔɔ daimonioi ba eŋɔɔ; ni ekɛ wiemɔ fã mumɔi lɛ, ni etsa mɛi ni naa nɔ lɛ fɛɛ, 17  bɔ ni afee ni nɔ ni atsɔ gbalɔ Yesaia nɔ awie lɛ aba mli akɛ: “Lɛ diɛŋtsɛ ewó wɔhelai lɛ, ni etere wɔhejaramɔi lɛ.” 18  Be ni Yesu na asafoku ni ebɔle lɛ lɛ, efã akɛ afo ŋshɔ lɛ kɛya esɛɛgbɛ. 19  Ni woloŋmalɔ ko ba ebakɛɛ lɛ akɛ: “Tsɔɔlɔ, he fɛɛ he ni oyaa lɛ, manyiɛ osɛɛ.” 20  Shi Yesu kɛɛ lɛ akɛ: “Osɔi yɛ bui, ni ŋwɛi loofɔji hu yɛ tsũi, shi gbɔmɔ Bi lɛ bɛ he ko ni ekɛ eyitso ŋmɛɔ.” 21  Kɛkɛ ni kaselɔi lɛ ateŋ mɔ kroko kɛɛ lɛ akɛ: “Nuŋtsɔ, ŋmɛɛ mi gbɛ ni maya mayafu mitsɛ dã.” 22  Yesu kɛɛ lɛ akɛ: “Yaa nɔ onyiɛ misɛɛ, ni ohã gbohii lɛ afu amɛgbohii.” 23  Ni be ni ebote lɛlɛ ko mli lɛ, ekaselɔi lɛ nyiɛ esɛɛ. 24  Agbɛnɛ naa! ŋshɔ lɛ fee hamahama aahu akɛ ŋshɔkei lɛ miikumɔ miiwo lɛlɛ lɛ mli; shi lɛ lɛ, ewɔ. 25  Ni amɛba amɛbatsĩɛ lɛ amɛkɛɛ: “Nuŋtsɔ, heremɔ wɔyiwala, wɔhiɛ miihe akpãtã!” 26  Shi ekɛɛ amɛ akɛ: “Mɛni hewɔ nyɛsheɔ gbeyei* nɛkɛ, nyɛ ni nyɛhemɔkɛyeli faaa?” Kɛkɛ ni ete shi, ni ekã kɔɔyɔi lɛ kɛ ŋshɔ lɛ hiɛ, ni amɛŋmɛ dɛmm. 27  No hewɔ lɛ, mɛi lɛ anaa kpɛ amɛhe ni amɛkɛɛ: “Mɛɛ gbɔmɔ nɛ? Kɔɔyɔi kɛ ŋshɔ tete boɔ lɛ toi.” 28  Be ni eshɛ ŋshɔ lɛ sɛɛgbɛ, yɛ Gadarabii lɛ akpokpaa lɛ nɔ lɛ, hii enyɔ ni yɔɔ daimonioi jɛ gbohii abui* lɛ ateŋ amɛkɛ lɛ bakpe. Amɛhiɛ yɛ laŋlaŋ aahu akɛ mɔ ko mɔ ko nyɛɛɛ aná ekãa ni etsɔ nakai gbɛ lɛ nɔ. 29  Ni naa! amɛbolɔ waa amɛkɛɛ: “Mɛni wɔkɛ bo yɔɔ feemɔ, Nyɔŋmɔ Bi? Ani oba biɛ koni obapiŋ wɔ dani be ni ato lɛ ashɛ?” 30  No mli lɛ, kpolotoi akuu kpele ko miiye nii yɛ shɔŋŋ. 31  No hewɔ lɛ, daimonioi lɛ bɔi lɛ faikpamɔ amɛkɛɛ: “Kɛ́ ofã wɔ lɛ, hã wɔyabote kpolotoi akuu lɛ mli.” 32  Ni ekɛɛ amɛ akɛ: “Nyɛyaa!” Kɛkɛ ni amɛje kpo ni amɛyabote kpolotoi lɛ amli, ni naa! kpolotoi akuu muu lɛ fɛɛ wó foi gidigidi kɛjɛ gɔŋkpɔ lɛ nɔ kɛyabote ŋshɔ lɛ mli ni amɛgboi yɛ nu lɛ mli. 33  Shi kpolotoi akwɛlɔi lɛ jo foi, ni amɛtee maŋ lɛŋ ni amɛyagba nɔ fɛɛ nɔ, ni hii ni yɔɔ daimonioi lɛ asane lɛ hu fata he. 34  Ni naa! maŋ muu lɛ fɛɛ je kpo koni amɛkɛ Yesu ayakpe, ni be ni amɛna lɛ lɛ, amɛkpa lɛ fai akɛ eje amɛkpokpai lɛ anɔ eya.

Shishigbɛ Niŋmaa

Mɔ ni kwɛɔ asraafoi 100 nɔ.
Aloo “mɛni hewɔ nyɛtsui efã.”
Aloo “gbohii akaimɔ bui.”