Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 7:1-29

YITSEI LƐ AMLI SAJI

  • GƆŊ NƆ SHIƐMƆ (1-27)

    • Nyɛkpaa kojomɔ (1-6)

    • Nyɛyaa nɔ nyɛbia, nyɛtaoa, nyɛshia (7-11)

    • Mla Kpakpa (12)

    • Agbó fintɔŋŋ (13, 14)

    • Amɛyibii akɛbaale amɛ (15-23)

    • Tsũ ni ama yɛ tɛsaa nɔ, tsũ ni ama yɛ shia nɔ (24-27)

  • Asafoku lɛ ahe jɔ̃ amɛhe yɛ Yesu nitsɔɔmɔ lɛ hewɔ (28, 29)

7  “Nyɛkpaa kojomɔ, koni akakojo nyɛ;  ejaakɛ nɔ kojomɔ ni nyɛkɛkojoɔ mɛi lɛ, akɛbaakojo nyɛ, ni susumɔnɔ ni nyɛkɛsusuɔ nyɛhãa mɛi lɛ, amɛkɛbaasusu amɛhã nyɛ.  Belɛ, mɛni hewɔ okwɛɔ jwɛi hwiaa ni yɔɔ onyɛmi hiŋmɛi mli lɛ, shi onaaa mplaŋ ni yɔɔ bo diɛŋtsɛ ohiŋmɛi mli lɛ?  Aloo te feɔ tɛŋŋ ni okɛɔ onyɛmi akɛ, ‘Hã majie jwɛi hwiaa lɛ yɛ ohiŋmɛi mli,’ be mli ni naa! mplaŋ yɛ bo diɛŋtsɛ ohiŋmɛi mli?  Osatofo! Jiemɔ mplaŋ lɛ yɛ bo diɛŋtsɛ ohiŋmɛi mli klɛŋklɛŋ, kɛkɛ lɛ, obaana faŋŋ bɔ ni ooofee ojie jwɛi hwiaa lɛ yɛ onyɛmi lɛ hiŋmɛi mli.  “Nyɛkɛ nii ni ji krɔŋkrɔŋ akahãa gbei, asaŋ nyɛkashɛrɛa nyɛdiagbai nyɛshwiea kpolotoi ahiɛ koni amɛkanaanaa nɔ yɛ amɛnajiashi ni amɛtsɔmɔ amɛhe amɛtserɛ nyɛmli.  “Nyɛyaa nɔ nyɛbia, ni abaahã nyɛ; nyɛyaa nɔ nyɛtaoa, ni nyɛbaana; nyɛyaa nɔ nyɛshia, ni abaagbele ahã nyɛ;  ejaakɛ mɔ fɛɛ mɔ ni biɔ lɛ nine shɛɔ nɔ, ni mɔ fɛɛ mɔ ni taoɔ lɛ naa, ni mɔ fɛɛ mɔ ni shiɔ lɛ, abaagbele ahã lɛ.  Anɔkwa, nyɛteŋ namɔ ni kɛ́ ebi bi lɛ aboloo lɛ, ebaahã lɛ tɛ? 10  Aloo kɛ́ ebi lɛ nu mli loo lɛ, ebaahã lɛ onufu? 11  No hewɔ lɛ, kɛji nyɛ, ni nyɛji mɛi fɔji po lɛ, nyɛle bɔ ni nyɛfeɔ nyɛŋɔɔ nikeenii kpakpai nyɛhãa nyɛbii lɛ, enyiɛ nɔŋŋ nyɛ-Tsɛ ni yɔɔ ŋwɛi lɛ eŋɔŋ nibii kpakpai ehãŋ mɛi ni biɔ lɛ lɛ! 12  “No hewɔ lɛ, nɔ fɛɛ nɔ ni nyɛtaoɔ akɛ mɛi afee ahã nyɛ lɛ, esa akɛ nyɛ hu nyɛfee nakai nɔŋŋ nyɛhã amɛ. Anɔkwa, enɛ ji nɔ ni Mla lɛ kɛ Gbalɔi lɛ* tsɔɔ. 13  “Nyɛtsɔa agbó fintɔŋŋ lɛ mli, ejaakɛ agbó ni lɛɛ kɛ gbɛ ni da lɛ ji nɔ ni kɛ mɔ yaa hiɛkpatamɔ mli lɛ, ni mɛi babaoo ji mɛi ni tsɔɔ agbó nɛɛ mli; 14  shi agbó fintɔŋŋ kɛ gbɛ leleoo lɛ ji nɔ ni kɛ mɔ yaa wala mli lɛ, ni mɛi fioo ji mɛi ni naa no. 15  “Nyɛkwɛa nyɛhe nɔ jogbaŋŋ yɛ amale gbalɔi lɛ ahe, amɛŋɔɔ gwantɛŋ hewolo amɛhaa amɛhe kɛbaa nyɛŋɔɔ, shi amɛmligbɛ lɛ amɛji klaji fulɔi. 16  Amɛyibii lɛ nyɛkɛbaayoo amɛ. Atseee wein yibii yɛ ŋmei tsei anɔ, aloo agbamii yɛ aŋlɛŋlɛi anɔ, ani afeɔ nakai? 17  Nakai nɔŋŋ tso kpakpa fɛɛ tso kpakpa woɔ yibii kpakpa, shi tso ni ekpɔtɔ fɛɛ tso ni ekpɔtɔ woɔ yibii gbonyo. 18  Tso kpakpa nyɛŋ awo yibii gbonyo, asaŋ tso ni ekpɔtɔ nyɛŋ awo yibii kpakpa. 19  Tso fɛɛ tso ni wooo yibii kpakpa lɛ, atoɔ lɛ afɔ̃ɔ shi, ni ashɛɔ afɔ̃ɔ la lɛ mli. 20  Belɛ, eji anɔkwale akɛ, nakai mɛi lɛ ayibii lɛ nyɛkɛbaayoo amɛ. 21  “Jeee mɔ fɛɛ mɔ ni kɛɔ mi akɛ, ‘Nuŋtsɔ, Nuŋtsɔ’ lɛ, baabote ŋwɛi Maŋtsɛyeli lɛ mli, shi moŋ mɔ ni feɔ mi-Tsɛ ni yɔɔ ŋwɛi lɛ suɔmɔnaa nii lɛ pɛ. 22  Mɛi babaoo baakɛɛ mi yɛ nakai gbi lɛ nɔ akɛ: ‘Nuŋtsɔ, Nuŋtsɔ, ani jeee bo ogbɛ́i lɛ mli wɔgba yɛ, ni ogbɛ́i lɛ mli wɔfãmɔ daimonioi yɛ, ni ogbɛ́i lɛ mli wɔtsu hewalɛ nitsumɔi babaoo yɛ?’ 23  Ni no lɛ makɛɛ amɛ akɛ: ‘Mileee nyɛ! Nyɛjea minɔ nyɛyaa, nyɛ mɛi ni nyɛtsuɔ mlatɔmɔ nitsumɔi!’ 24  “No hewɔ lɛ, mɔ fɛɛ mɔ ni nuɔ miwiemɔi nɛɛ ni ekɛtsuɔ nii lɛ, ebaatamɔ nuu hiɛshikalɔ ko ni ma etsũ yɛ tɛsaa nɔ. 25  Ni nugbɔ nɛ ni nu afuai ba ni kɔɔyɔi tswa ni eshimɔ nakai tsũ lɛ, shi ewuleee, ejaakɛ ato shishi yɛ tɛsaa nɔ. 26  Kɛfata he lɛ, mɔ fɛɛ mɔ ni nuɔ miwiemɔi nɛɛ ni ekɛtsuuu nii lɛ, ebaatamɔ nuu kwashia ko ni ma etsũ yɛ shia nɔ. 27  Ni nugbɔ nɛ ni nu afuai ba ni kɔɔyɔi tswa ni eshimɔ nakai tsũ lɛ, ni ewule, ni ewulemɔ lɛ da naakpa.” 28  Be ni Yesu gbe wiemɔi nɛɛ anaa lɛ, nɔ ni jɛ mli ba ji akɛ, asafoku lɛ ahe jɔ̃ amɛhe yɛ gbɛ ni etsɔ nɔ etsɔɔ nii lɛ hewɔ, 29  ejaakɛ etsɔɔ amɛ nii akɛ mɔ ni yɔɔ hegbɛ, shi jeee tamɔ amɛwoloŋmalɔi lɛ.

Shishigbɛ Niŋmaa

Kwɛmɔ Mat 5:17 sh. niŋ.