Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 6:1-34

YITSEI LƐ AMLI SAJI

  • GƆŊ NƆ SHIƐMƆ (1-34)

    • Nyɛkɛ jalɛ lɛ akapupua nyɛhe (1-4)

    • Bɔ ni asɔleɔ (5-15)

      • Sɔlemɔ he nɔkwɛmɔnɔ (9-13)

    • Ŋmaahilɛ (16-18)

    • Jwetrii yɛ shikpɔŋ lɛ nɔ kɛ yɛ ŋwɛi (19-24)

    • Nyɛkpaa yeyeeyefeemɔ (25-34)

      • Nyɛyaa nɔ nyɛtaoɔ Maŋtsɛyeli lɛ klɛŋklɛŋ (33)

6  “Nyɛkwɛa jogbaŋŋ ni nyɛkafea nyɛjalɛ nii lɛ yɛ gbɔmɛi ahiɛ koni amɛna nyɛ; kɛjeee nakai lɛ, nyɛnáŋ juromɔnɔ ko kɛjɛŋ nyɛ-Tsɛ ni yɔɔ ŋwɛi lɛ dɛŋ.  No hewɔ lɛ, kɛ́ oyaafee ohiafoi ejurɔ lɛ,* kaakpã tɛtɛrɛmantɛrɛ kɛtsɔ hiɛ, taakɛ osatofoi lɛ feɔ yɛ kpeehei lɛ kɛ gbɛjegbɛi lɛ anɔ koni gbɔmɛi awo amɛhiɛ nyam lɛ. Lɛɛlɛŋ, miikɛɛ nyɛ akɛ, amɛná amɛjuromɔnɔ lɛ fɛɛ momo.  Shi bo lɛ, kɛ́ oofee ohiafoi ejurɔ lɛ, kaahã onine abɛku le nɔ ni oninejurɔ feɔ lɛ,  koni ejurɔ ni ofeɔ ohiafoi lɛ ahi teemɔŋ. Kɛkɛ lɛ, o-Tsɛ ni miikwɛ yɛ teemɔŋ lɛ baajɔɔ bo.  “Agbɛnɛ hu, kɛ́ nyɛmiisɔle lɛ, nyɛkafea nyɛnii tamɔ osatofoi lɛ, ejaakɛ amɛsumɔɔ ni amɛdamɔ kpeehei lɛ kɛ gbɛjegbɛi titrii lɛ akoji lɛ anɔ koni mɛi ana amɛ. Lɛɛlɛŋ, miikɛɛ nyɛ akɛ, amɛná amɛjuromɔnɔ lɛ fɛɛ momo.  Shi bo lɛ, kɛ́ obaasɔle lɛ, botemɔ otsũ mli he ni mɔ ko enaaa bo, ni be ni oŋa oshinaa lɛ, sɔlemɔ ohã o-Tsɛ ni yɔɔ teemɔŋ lɛ. Kɛkɛ lɛ o-Tsɛ ni miikwɛ yɛ teemɔŋ lɛ baajɔɔ bo.  Kɛ́ oosɔle lɛ, kaawie wiemɔ kome too lɛ nɔŋŋ shii abɔ, taakɛ jeŋmajiaŋbii lɛ feɔ lɛ, ejaakɛ amɛsusuɔ akɛ amɛwiemɔ babaoo lɛ baahã abo amɛ toi.  No hewɔ lɛ, nyɛkatamɔa amɛ, ejaakɛ nyɛ-Tsɛ lɛ le nibii ni he hiaa nyɛ dani nyɛbiɔ lɛ po.  “Belɛ esa akɛ nyɛsɔle yɛ nɛkɛ gbɛ nɔ: “‘Wɔ-Tsɛ ni yɔɔ ŋwɛi, ogbɛ́i lɛ he atse.* 10  O-Maŋtsɛyeli lɛ aba. Afee osuɔmɔnaa nii yɛ shikpɔŋ lɛ nɔ, taakɛ afeɔ yɛ ŋwɛi lɛ.* 11  Hã wɔ aboloo ni he hiaa wɔ kɛhã ŋmɛnɛ gbi nɛɛ; 12  ni okɛ wɔnyɔji lɛ ake wɔ, taakɛ wɔ hu wɔkɛkeɔ mɛi ni hiɛ wɔ nyɔji lɛ. 13  Ni okɛ wɔ akaya kaa* mli, shi jiemɔ wɔ* kɛjɛ mɔ fɔŋ lɛ dɛŋ.’ 14  “Ejaakɛ kɛ́ nyɛkɛ mɛi atɔmɔi fa amɛ lɛ, nyɛŋwɛi Tsɛ lɛ hu kɛbaafa nyɛ; 15  shi kɛ́ nyɛkɛ mɛi atɔmɔi efaaa amɛ lɛ, nyɛ-Tsɛ lɛ hu kɛ nyɛtɔmɔi efaŋ nyɛ. 16  “Kɛ́ nyɛmiihi ŋmaa lɛ, nyɛkpaa nyɛhiɛ mɔbɔmɔbɔfeemɔ tamɔ osatofoi lɛ feɔ lɛ, ejaakɛ amɛhãa amɛhiɛ feɔ taŋtaŋ* koni mɛi ana akɛ amɛmiihi ŋmaa. Lɛɛlɛŋ, miikɛɛ nyɛ akɛ, amɛná amɛjuromɔnɔ lɛ fɛɛ momo. 17  Shi bo lɛ, kɛ́ oohi ŋmaa lɛ, kpa oyiteŋ mu ni ofɔ ohiɛ, 18  koni mɛi akana akɛ oohi ŋmaa, akɛ ja o-Tsɛ ni yɔɔ teemɔŋ lɛ. Kɛkɛ lɛ, o-Tsɛ ni miikwɛ yɛ teemɔŋ lɛ baajɔɔ bo. 19  “Nyɛkpaa jwetrii ni nyɛbɔɔ nyɛhãa nyɛhe yɛ shikpɔŋ lɛ nɔ, he ni omlɛ̃gɛ̃ kɛ ŋkanale fiteɔ nii, ni julɔi hu gbuɔ kɛboteɔ mli kɛbajuɔ yɛ lɛ. 20  Moŋ lɛ, nyɛbɔa jwetrii nyɛhãa nyɛhe yɛ ŋwɛi, he ni omlɛ̃gɛ̃ loo ŋkanale fiteee nii, ni julɔi hu egbuuu kɛboteee mli kɛyajuuu yɛ lɛ. 21  Ejaakɛ he ni ojwetri yɔɔ lɛ, jɛmɛ otsui hu baahi. 22  “Gbɔmɔtso lɛ kane ji hiŋmɛi lɛ. Belɛ kɛ́ ohiŋmɛi kwɛɔ nɔ kome* lɛ, ogbɔmɔtso muu lɛ fɛɛ baakpɛ.* 23  Shi kɛ́ ohiŋmɛi klɔɔ mɔ nɔ* lɛ, ogbɔmɔtso muu lɛ fɛɛ baawo duŋ. Kɛ́ la ni yɔɔ omli lɛ ji duŋ lɛɛlɛŋ lɛ, kwɛ bɔ ni nakai duŋ lɛ yɔɔ kpii hã! 24  “Mɔ ko nyɛŋ atsɔ nyɔŋ ehã nuŋtsɔmɛi enyɔ; ejaakɛ no lɛ ebaanyɛ mɔ kome ni ebaasumɔ mɔ kroko lɛ, aloo ebaakpɛtɛ mɔ kome he ni ebaagbe mɔ kroko lɛ he guɔ. Nyɛnyɛŋ nyɛtsɔmɔ nyɔji nyɛhã Nyɔŋmɔ kɛ Ninámɔ fɛɛ. 25  “Enɛ hewɔ lɛ, miikɛɛ nyɛ akɛ: Nyɛkpaa yeyeeye ni nyɛfeɔ yɛ nyɛwala he* yɛ nɔ ni nyɛbaaye loo nɔ ni nyɛbaanu lɛ hewɔ, aloo yɛ nyɛgbɔmɔtsei lɛ ahe yɛ nɔ ni nyɛbaawo lɛ hewɔ. Ani wala* jara waaa fe niyenii, ni gbɔmɔtso lɛ hu jara waaa fe atade? 26  Nyɛkwɛa ŋwɛi loofɔji lɛ jogbaŋŋ; amɛduuu nii, asaŋ amɛkpaaa nii, asaŋ amɛbuaaa nii anaa amɛwooo nitoohei, kɛ̃lɛ, nyɛŋwɛi Tsɛ lɛ lɛɔ amɛ. Ani nyɛjara waaa kwraa fe amɛ? 27  Nyɛteŋ namɔ baanyɛ ekɛ yeyeeyefeemɔ atsa ewalasɛɛkɛlɛ nɔ ninetalɔ kome? 28  Kɛfata he lɛ, mɛni hewɔ nyɛfeɔ yeyeeye yɛ atade he? Nyɛkasea nii kɛjɛa koo mli fɔfɔii lɛ adɛŋ, bɔ ni amɛdaraa; amɛgbooo deŋme, asaŋ amɛtsɛ̃ɛɛ kpãa; 29  shi mi lɛ, miikɛɛ nyɛ akɛ, yɛ Solomon anunyam lɛ fɛɛ sɛɛ po lɛ, ewulaaa tamɔ enɛɛmɛi ateŋ ekome. 30  Agbɛnɛ, kɛji nɛkɛ Nyɔŋmɔ wulaa koo mli kwɛ̃ɛ nii ni ŋmɛnɛ lɛ amɛyɛ, ni wɔ́ lɛ aŋɔwo flɔnɔɔ mli lɛ, ani ewulaŋ nyɛ babaoo, nyɛ ni nyɛhemɔkɛyeli faaa? 31  No hewɔ lɛ, nyɛkafea yeyeeye kɔkɔɔkɔ ní nyɛkɛa akɛ, ‘Mɛni wɔɔye?’ aloo, ‘Mɛni wɔɔnu?’ aloo, ‘Mɛni wɔɔwo?’ 32  Ejaakɛ nibii nɛɛ fɛɛ sɛɛ jeŋmaji lɛ kɛ hiɛdɔɔ diɔ. Nyɛŋwɛi Tsɛ lɛ le akɛ nibii nɛɛ fɛɛ he miihia nyɛ. 33  “Belɛ, nyɛyaa nɔ nyɛtaoa Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ, ni abaaŋɔ nibii krokomɛi nɛɛ fɛɛ afata he ahã nyɛ. 34  No hewɔ lɛ, nyɛkafea yeyeeye yɛ wɔ́ he kɔkɔɔkɔ, ejaakɛ wɔ́ hu kɛ lɛ diɛŋtsɛ eyeyeeyefeemɔi baaba. Gbi fɛɛ gbi kɛ emli naagbai.*

Shishigbɛ Niŋmaa

Aloo “kɛ́ oyaake ohiafoi anii lɛ.” Kwɛmɔ Wiemɔi Titrii Amligbalamɔ lɛ.
Aloo “ahiɛ ogbɛ́i lɛ krɔŋkrɔŋ; atsuu ogbɛ́i lɛ he.”
Aloo “afee osuɔmɔnaa nii yɛ ŋwɛi kɛ shikpɔŋ lɛ nɔ fɛɛ.”
Ni ji, efɔŋ he kaa.
Aloo “kpɔ̃ wɔ.”
Aloo “amɛhiɛɔ amɛhe basabasa.”
Aloo “nɔ tse; bɛ haŋtsii.”
Aloo “baayi obɔ kɛ la.”
Sht. ŋm., “ehiii; ji efɔŋ.”
Aloo “nyɛsusumai ahe.”
Aloo “susuma lɛ.”
Aloo “gbi fɛɛ gbi nɔ naagbai fa hã lɛ.”