Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 5:1-48

YITSEI LƐ AMLI SAJI

  • GƆŊ NƆ SHIƐMƆ (1-48)

    • Yesu bɔi nitsɔɔmɔ yɛ gɔŋ lɛ nɔ (1, 2)

    • Miishɛɛ nɛɛhu (3-12)

    • Ŋoo kɛ la (13-16)

    • Yesu baawo Mla lɛ obɔ (17-20)

    • Ŋaa ni awo yɛ mlifu (21-26), gbalafitemɔ (27-30), gbalatsemɔ (31, 32), kitãkamɔi (33-37), oweletɔɔ (38-42), kɛ suɔmɔ ni abaasumɔ henyɛlɔi he (43-48)

5  Be ni ena asafoku lɛ, ekwɔ kɛtee gɔŋ lɛ nɔ; ni be ni eho eta shi lɛ, ekaselɔi lɛ ba eŋɔɔ.  Kɛkɛ ni egbele enaa ni ebɔi amɛ nitsɔɔmɔ ekɛɛ:  “Mɛi ni le akɛ Nyɔŋmɔ he miihia amɛ lɛ* yɛ miishɛɛ, ejaakɛ amɛnɔ ji ŋwɛi Maŋtsɛyeli lɛ.  “Mɛi ni yeɔ awerɛho lɛ yɛ miishɛɛ, ejaakɛ abaashɛje amɛmii.  “Mɛi ni he jɔ lɛ* yɛ miishɛɛ, ejaakɛ amɛbaaná shikpɔŋ lɛ.*  “Mɛi ni jalɛ he hɔmɔ kɛ kumai yeɔ amɛ lɛ yɛ miishɛɛ, ejaakɛ amɛbaatɔrɔ.  “Mɛi ni naa mɔbɔ lɛ yɛ miishɛɛ, ejaakɛ abaana amɛ mɔbɔ.  “Mɛi ni tsuii amli tse lɛ yɛ miishɛɛ, ejaakɛ amɛbaana Nyɔŋmɔ.  “Mɛi ni kpãtãa* lɛ yɛ miishɛɛ, ejaakɛ abaatsɛ amɛ Nyɔŋmɔ bii. 10  “Mɛi ni awaa amɛ yi yɛ jalɛ hewɔ lɛ yɛ miishɛɛ, ejaakɛ amɛnɔ ji ŋwɛi Maŋtsɛyeli lɛ. 11  “Nyɛyɛ miishɛɛ, kɛ́ mɛi bɔ nyɛ ahora ni amɛwa nyɛ yi ni amɛmale amɛwie nyɛhe efɔŋ fɛɛ efɔŋ yɛ mihewɔ. 12  Nyɛmii ashɛa nyɛhe ní nyɛmli afilia nyɛ, akɛni nyɛjuromɔnɔ lɛ fa babaoo yɛ ŋwɛi lɛ hewɔ, ejaakɛ nakai nɔŋŋ amɛwa gbalɔi ni tsɔ nyɛhiɛ lɛ ayi. 13  “Shikpɔŋ lɛ nɔ ŋoo ji nyɛ, shi kɛ́ ŋoo lɛ mli hewalɛ lɛ tã lɛ, te eeefee tɛŋŋ ená eŋoo hewalɛ lɛ ekoŋŋ? Ehiii hãaa nɔ ko feemɔ dɔŋŋ akɛ ja atsi ashwie agbonaa koni gbɔmɛi anaanaa nɔ. 14  “Nyɛji je lɛŋ la lɛ. Maŋ ni ma gɔŋ nɔ lɛ, anyɛŋ akɛtee. 15  Mɛi esuuu kane kɛmaaa kɛntɛŋ* shishi, shi moŋ amɛkɛmaa kanetso nɔ, ni etsoɔ hãa mɛi ni yɔɔ shĩa lɛŋ fɛɛ. 16  Nakai nɔŋŋ nyɛhãa nyɛla lɛ atsoa yɛ gbɔmɛi ahiɛ, koni amɛna nyɛnitsumɔi kpakpai lɛ, ni amɛwo nyɛ-Tsɛ ni yɔɔ ŋwɛi lɛ hiɛ nyam. 17  “Nyɛkasusua akɛ miba Mla lɛ kɛ Gbalɔi lɛ* aguu. Mibaaa guu, shi moŋ miba koni mibawo amɛ obɔ. 18  Lɛɛlɛŋ, miikɛɛ nyɛ akɛ, kɛ́ ŋwɛi kɛ shikpɔŋ ho tee po lɛ, Mla lɛ mli niŋmaa okadii lɛ ateŋ bibioo fe fɛɛ loo emli niŋmaa okadi ko he kuli kome hoŋ eyaŋ, kɛyashi nibii fɛɛ aaaba mli. 19  No hewɔ lɛ, mɔ fɛɛ mɔ ni kuɔ kitãi bibii nɛɛ ateŋ ekome mli ni etsɔɔ mɛi ni amɛ hu amɛfee nakai lɛ, abaatsɛ lɛ bibioo fe fɛɛ yɛ* ŋwɛi Maŋtsɛyeli lɛ mli. Shi mɔ fɛɛ mɔ ni kɛ kitãi nɛɛ tsuɔ nii, ni etsɔɔ mɛi lɛ, abaatsɛ lɛ agbo yɛ* ŋwɛi Maŋtsɛyeli lɛ mli. 20  Ni miikɛɛ nyɛ akɛ, kɛ́ nyɛjalɛ lɛ faaa kɛtekeee woloŋmalɔi lɛ kɛ Farisifoi lɛ anɔ lɛ, nyɛboteŋ ŋwɛi Maŋtsɛyeli lɛ mli kɔkɔɔkɔ. 21  “Nyɛnu akɛ akɛɛ blemabii lɛ akɛ: ‘Esaaa akɛ ogbeɔ gbɔmɔ, shi mɔ fɛɛ mɔ ni gbeɔ gbɔmɔ lɛ, akɛ lɛ baaye sane yɛ saneyelihe lɛ.’ 22  Shi mi lɛ, miikɛɛ nyɛ akɛ, mɔ fɛɛ mɔ ni kãa he ehiɛɔ enyɛmi he mlifu mli lɛ, akɛ lɛ baaye sane yɛ saneyelihe lɛ; ni mɔ fɛɛ mɔ ni wieɔ nyaŋemɔ wiemɔ eshiɔ enyɛmi lɛ, akɛ lɛ baaye sane yɛ Saneyelihe Wulu lɛ; ni mɔ fɛɛ mɔ ni kɛɔ akɛ, ‘Bo buulu ni he bɛ sɛɛnamɔ!’ lɛ, ewaaa akɛ eeebote Gehena* la ni tsoɔ lɛ mli. 23  “Belɛ, kɛ́ okɛ onɔkeenɔ miiba afɔleshaa latɛ lɛ he ni okai yɛ jɛmɛ akɛ onyɛmi yɛ sane ko eshi bo lɛ, 24  shi onɔkeenɔ lɛ yɛ jɛmɛ, yɛ afɔleshaa latɛ lɛ hiɛ, ni oya. Klɛŋklɛŋ lɛ, okɛ onyɛmi lɛ ayasaa, ni oku osɛɛ oba, ni okɛ onɔkeenɔ lɛ abahã. 25  “Okɛ mɔ ni esãma bo lɛ asaa mra be mli ni okɛ lɛ nyiɛ gbɛ kɛyaa lɛ, koni aleenɔ mɔ ni esãma bo lɛ akaŋɔ bo ehã kojolɔ lɛ, ni kojolɔ lɛ hu ŋɔ bo ehã saneyelihe sɔɔlɔ lɛ, ni aŋɔ bo awo tsuŋ. 26  Lɛɛlɛŋ, miikɛɛ bo akɛ, ojeŋ jɛmɛ kɔkɔɔkɔ kɛyashi ooowo onaagbee kapɛlɛ bibioo lɛ.* 27  “Nyɛnu akɛ akɛɛ akɛ: ‘Esaaa akɛ ofiteɔ gbãla.’* 28  Shi mi lɛ, miikɛɛ nyɛ akɛ, mɔ fɛɛ mɔ ni yaa nɔ ekwɛɔ yoo ni enáa ehe akɔnɔ lɛ, ekɛ lɛ efite gbãla* momo yɛ etsuiŋ. 29  Agbɛnɛ, kɛ́ oninejurɔ hiŋmɛi miitɔ̃tɔ onane lɛ, fãa oshɛ ofɔ̃. Ejaakɛ ehi hã bo akɛ ogbɔmɔtso lɛ henii kome baaŋmɛɛ bo, fe nɔ ni aaashɛ ogbɔmɔtso muu lɛ fɛɛ afɔ̃ Gehena.* 30  Agbɛnɛ hu, kɛ́ oninejurɔ miitɔ̃tɔ onane lɛ, foo oshɛ ofɔ̃. Ejaakɛ ehi hã bo akɛ ogbɔmɔtso lɛ henii kome baaŋmɛɛ bo, fe nɔ ni ogbɔmɔtso muu lɛ fɛɛ aaayagbe naa yɛ Gehena.* 31  “Kɛfata he lɛ, akɛɛ akɛ: ‘Mɔ fɛɛ mɔ ni shwieɔ eŋa* lɛ, ehã lɛ gbalatsemɔ wolo.’ 32  Shi mi lɛ, miikɛɛ nyɛ akɛ, mɔ fɛɛ mɔ ni baashwie eŋa ni jeee bɔlɛnamɔ jeŋba sha* hewɔ jɛ lɛ, no baanyɛ ahã yoo lɛ afite gbãla,* ni mɔ fɛɛ mɔ ni kɛ yoo ni ashwie lɛ boteɔ gbalashihilɛ mli lɛ, efite gbãla. 33  “Agbɛnɛ hu, nyɛnu akɛ akɛɛ blemabii lɛ akɛ: ‘Esaaa akɛ okãa kitã ni oyeee nɔ, shi esa akɛ oye shi srɔtoi ni owoɔ Yehowa* lɛ anɔ.’ 34  Shi mi lɛ, miikɛɛ nyɛ akɛ: Nyɛkakãa kitã kwraa, nyɛkɛ ŋwɛi akakã kitã ejaakɛ eji Nyɔŋmɔ maŋtsɛ sɛi; 35  asaŋ nyɛkɛ shikpɔŋ akakã kitã, ejaakɛ eji enajiashi maaŋoo; aloo nyɛkɛ Yerusalem akakã kitã ejaakɛ eji Maŋtsɛ kpele lɛ maŋ. 36  Nyɛkɛ nyɛyitso akakã kitã, ejaakɛ nyɛnyɛŋ nyɛhã yitsɔi kome atsɔ eyɛŋ loo ediŋ. 37  Nyɛhãa nyɛwiemɔ ‘Hɛɛ’ afea hɛɛ, ‘Dabi’ afea dabi, ejaakɛ nɔ fɛɛ nɔ ni tekeɔ enɛɛmɛi lɛ ejɛ mɔ fɔŋ lɛ mli. 38  “Nyɛnu akɛ akɛɛ akɛ: ‘Akɛ hiŋmɛi ato hiŋmɛi najiaŋ, ni akɛ nyanyɔŋ ato nyanyɔŋ najiaŋ.’ 39  Shi mi lɛ, miikɛɛ nyɛ akɛ: Nyɛkatea shi nyɛwoa efɔŋfeelɔ, shi mɔ fɛɛ mɔ ni baagba oninejurɔ toiŋ lɛ, tsɔ ekroko lɛ hu ohã lɛ. 40  Ni kɛ́ mɔ ko miitao ekɛ bo aya saneyelihe koni eshɔ̃ atade ni owo yɛ otade shishi lɛ, okɛ otade nɔhaanɔ lɛ hu afata he ohã lɛ; 41  ni kɛ́ mɔ ko ni yɔɔ hegbɛ nyɛ onɔ koni oya shitoo* kome lɛ, okɛ lɛ aya shitoi* enyɔ. 42  Mɔ ni biɔ bo nɔ ko lɛ, hã lɛ, ni mɔ ni taoɔ akɛ ofa lɛ nɔ ko* lɛ, kaatsɔ ohe ni oshi lɛ. 43  “Nyɛnu akɛ akɛɛ akɛ: ‘Esa akɛ osumɔ onaanyo* ni onyɛ ohenyɛlɔ.’ 44  Shi mi lɛ, miikɛɛ nyɛ akɛ: Nyɛyaa nɔ nyɛsumɔa nyɛhenyɛlɔi ni nyɛsɔlea nyɛhãa mɛi ni waa nyɛ yi lɛ, 45  koni nyɛtsɔmɔ nyɛ-Tsɛ ni yɔɔ ŋwɛi lɛ bii, ejaakɛ ehãa ehulu teɔ shi yɛ mɛi fɔji kɛ mɛi kpakpai fɛɛ nɔ, ni ehãa nugbɔ nɛɔ shwieɔ jalɔi kɛ mɛi ni ejaaa fɛɛ nɔ. 46  Ejaakɛ kɛ́ nyɛsumɔɔ mɛi ni sumɔɔ nyɛ lɛ, mɛɛ juromɔnɔ nyɛyɔɔ? Ani toohelɔi lɛ hu efeee nakai nɔŋŋ? 47  Ni kɛ́ nyɛŋaa nyɛnyɛmimɛi pɛ lɛ, mɛɛ nɔ srɔto nyɛfeɔ? Ani jeŋmajiaŋbii lɛ hu efeee nakai nɔŋŋ? 48  Belɛ taakɛ nyɛ-Tsɛ ni yɔɔ ŋwɛi lɛ eye emuu lɛ, nyɛ hu nyɛyea emuu.*

Shishigbɛ Niŋmaa

Aloo “mɛi ni baa mumɔ lɛ.”
Aloo “Humii lɛ.”
Sht. ŋm., “amɛbaaná shikpɔŋ lɛ akɛ gboshinii.”
Aloo “Mɛi ni sumɔɔ toiŋjɔlɛ.”
Aloo “nisusumɔ kɛntɛŋ.”
Wiemɔ ni ji “Mla lɛ kɛ Gbalɔi lɛ” damɔ shi kɛhã Hebri Ŋmalɛi lɛ fɛɛ.
Ni tsɔɔ akɛ, esaaa mɔ ni boteɔ.
Ni tsɔɔ akɛ, esa mɔ ni boteɔ.
He ko ni ashãa jwɛii yɛ, yɛ Yerusalem sɛɛ. Kwɛmɔ Wiemɔi Titrii Amligbalamɔ lɛ.
Sht. ŋm., “naagbee kwadra lɛ.”
“Gbalafitemɔ.” No ji kɛ́ mɔ ko ni ebote gbalashihilɛ mli kɛ ehe wo bɔlɛnamɔ jeŋba sha mli.
Kwɛmɔ kk. 27 sh. niŋ.
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Hela wiemɔ ni akɛtsu nii lɛ tsɔɔ gbalatsemɔ yɛ mla naa.
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Kwɛmɔ kk. 27 sh. niŋ.
Kwɛmɔ Wiemɔi Titrii Amligbalamɔ lɛ.
Aloo “maili.”
Aloo “mailii.”
Ni tsɔɔ akɛ, ofa lɛ nɔ ko ni oheee he kpa.
Hela wiemɔ ni atsɔɔ shishi akɛ “naanyo” lɛ kɔɔɔ mɛi ni mɔ ko kɛbɔɔ lɛ pɛ ahe, shi ebaanyɛ ekɔ adesai fɛɛ he.
Aloo “nyɛhia kɛwulaa shi.”