Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 4:1-25

4  Agbɛnɛ, mumɔ lɛ ŋɔ Yesu kɛtee ŋa lɛ nɔ.* Ni jɛmɛ Abonsam ka lɛ yɛ  be ni ehi ŋmaa shwaneshwane kɛ nyɔɔŋnyɔɔŋ gbii nyɔŋmai ejwɛ ní hɔmɔ miiye lɛ lɛ.  Ni Kalɔ lɛ ba eŋɔɔ ebakɛɛ lɛ akɛ: “Kɛ́ Nyɔŋmɔ bi ji bo lɛ, kɛɛmɔ tɛi nɛɛ koni amɛtsɔmɔ aboloi.”*  Shi ehã hetoo akɛ: “Aŋma akɛ: ‘Jeee aboloo pɛ naa esa akɛ gbɔmɔ ahi wala mli yɛ, shi moŋ wiemɔ fɛɛ wiemɔ ni jɛɔ Yehowa* daaŋ lɛ.’”  Agbɛnɛ, Abonsam ŋɔ lɛ kɛtee maŋ krɔŋkrɔŋ lɛ mli, ni ekɛ lɛ yadamɔ sɔlemɔwe lɛ yiteŋ afabaŋ* lɛ nɔ,  ni ekɛɛ lɛ akɛ: “Kɛ́ Nyɔŋmɔ bi ji bo lɛ, tuu kɛya shikpɔŋ, ejaakɛ aŋma akɛ: ‘Ebaafã ebɔfoi lɛ yɛ ohewɔ,’ ni ‘Amɛbaahiɛ bo yɛ amɛdɛŋ koni okaŋɔ onane oshi tɛ ko.’”  Yesu kɛɛ lɛ akɛ: “Aŋma hu akɛ: ‘Esaaa akɛ okaa Yehowa* o-Nyɔŋmɔ lɛ.’”  Abonsam ŋɔ lɛ ekoŋŋ kɛtee gɔŋ ko ni kwɔ somromoo nɔ, ni ekɛ jeŋ maŋtsɛyelii lɛ fɛɛ kɛ amɛnunyam lɛ tsɔɔ lɛ.  Ni ekɛɛ lɛ akɛ: “Maŋɔ enɛɛmɛi fɛɛ mahã bo kɛ́ okula shi ojá mi shi kome pɛ.” 10  Ni Yesu kɛɛ lɛ akɛ: “Jee mihiɛ, Satan! Ejaakɛ aŋma akɛ: ‘Yehowa* o-Nyɔŋmɔ lɛ esa akɛ ojá, ni lɛ pɛ esa akɛ okɛ sɔɔmɔ krɔŋŋ ahã.’” 11  Kɛkɛ ni Abonsam shi lɛ, ni naa! ŋwɛibɔfoi ba ni amɛbabɔi lɛ sɔɔmɔ. 12  Agbɛnɛ, be ni enu akɛ amɔ Yohane lɛ, eshi jɛmɛ ni etee Galilea. 13  Agbɛnɛ hu, be ni eshi Nazaret lɛ, eba ebahi Kapernaum ni kã ŋshɔ lɛ naa lɛ, yɛ Zebulon kɛ Naftali kpokpai lɛ anɔ, 14  koni nɔ ni atsɔ gbalɔ Yesaia nɔ awie lɛ aba mli akɛ: 15  “Oo Zebulon shikpɔŋ kɛ Naftali shikpɔŋ ni kã ŋshɔnaa gbɛ lɛ, yɛ Yordan sɛɛ lɛ, jeŋmaji lɛ a-Galilea lɛ! 16  Mɛi ni tara duŋ mli lɛ ena la kpeteŋkpele, ni mɛi ni tara he ko ni gbele hɔɔŋ eha amɛnɔ lɛ, la ete shi ehã amɛ.” 17  Kɛjɛ nakai be lɛ mli kɛyaa lɛ, Yesu bɔi shiɛmɔ ni ekɛɛ: “Nyɛtsakea nyɛtsui, ejaakɛ ŋwɛi Maŋtsɛyeli lɛ ebɛŋkɛ nyɛ.” 18  Be ni enyiɛ Galilea Ŋshɔ* lɛ naa lɛ, ena nyɛmimɛi hii enyɔ, Simon, ni atsɛɔ lɛ Petro lɛ, kɛ enyɛmi Andrea, ni amɛmiifɔ̃ yaa amɛmiiwo ŋshɔ lɛ mli, ejaakɛ wolɛi ji amɛ. 19  Ni ekɛɛ amɛ akɛ: “Nyɛbanyiɛa misɛɛ, ni mafee nyɛ wolɛi ni baahɛ gbɔmɛi.” 20  Amrɔ lɛ, amɛshi amɛyai lɛ, ni amɛnyiɛ esɛɛ. 21  Be ni eje jɛmɛ eyaa lɛ, ena nyɛmimɛi hii krokomɛi enyɔ, Yakobo kɛ Yohane. Amɛkɛ amɛtsɛ Zebedeo yɛ lɛlɛ mli amɛmiikpɛ amɛyai, ni etsɛ amɛ. 22  Amrɔ lɛ, amɛshi lɛlɛ lɛ kɛ amɛtsɛ, ni amɛnyiɛ esɛɛ. 23  Ni ekpa Galilea niiaŋ fɛɛ etsɔɔ nii yɛ amɛkpeehei* lɛ, ni eshiɛ Maŋtsɛyeli lɛ he sane kpakpa lɛ, ni etsa mɛi lɛ ahelai srɔtoi fɛɛ kɛ amɛgbɔmɔtsoŋ gbɔjɔmɔi srɔtoi fɛɛ. 24  Ni ehe sane gbɛ shwã Siria fɛɛ, ni amɛkɛ mɛi fɛɛ ni helai kɛ piŋmɔi srɔtoi ehã amɛmiina nɔ, mɛi ni yɔɔ daimonioi kɛ mɛi ni miiye gbiligbili, kɛ mɛi ni ekumɔ ba eŋɔɔ, ni etsa amɛ. 25  No hewɔ lɛ, asafoku babaoo jɛ Galilea kɛ Dekapoli* kɛ Yerusalem kɛ Yudea kɛ Yordan sɛɛ banyiɛ esɛɛ.

Shishigbɛ Niŋmaa

Kwɛmɔ Mat 3:1 sh. niŋ.
Yɛ Ŋmalɛi lɛ amli lɛ, aboloo ji mamu ni akɛ nu ekpɔtɔ ní ashã, ni bei pii lɛ, akɛdamɔɔ shi kɛhãa niyenii.
Kwɛmɔ Wiemɔi Titrii Amligbalamɔ lɛ.
Aloo “yiteŋ he ni kwɔ fe fɛɛ.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Yɛ anɔkwale mli lɛ, eji kpaakpo; Biblia lɛ tsɛɔ lɛ hu akɛ Genesaret Kpaakpo, Galilea Ŋshɔ, kɛ Tiberia Ŋshɔ.
Hela mli lɛ, “sinagogei.” Hei ni Yudafoi lɛ buaa amɛhe naa yɛ ní amɛsɔleɔ ní amɛkaneɔ ŋmalɛi.
Aloo “Maji Nyɔŋma Kpokpaa lɛ nɔ.”