Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 28:1-20

YITSEI LƐ AMLI SAJI

  • Atee Yesu shi (1-10)

  • Ahã asraafoi lɛ nyɔɔŋnii koni amɛmale (11-15)

  • Akɛ nitsumɔ wo amɛdɛŋ akɛ amɛyafee kaselɔi (16-20)

28  Hejɔɔmɔ Gbi lɛ sɛɛ, yɛ otsi lɛ klɛŋklɛŋ gbi lɛ nɔ be ni je bɔi tsɛremɔ lɛ, Maria Magdalena kɛ Maria kroko lɛ ba gbonyo bu lɛ kwɛmɔ.  Ni naa! shikpɔŋhosomɔ kpele ko eba, ejaakɛ Yehowa* bɔfo* jɛ ŋwɛi ekpeleke shi ni ebakoklo tɛ lɛ kɛje bu lɛ naa, ni eta nɔ.  Ehe miikpɛlɛ tamɔ sarawa, ni etade lɛ miiyɛ tamɔ snoo.  Hɛɛ, ehe gbeyei sɔŋŋ ni mɔmɔ bulɔi lɛ hewɔ lɛ, amɛhe kpokpo ni amɛtsɔmɔ tamɔ gbohii.  Shi ŋwɛibɔfo lɛ kɛɛ yei lɛ akɛ: “Nyɛkashea gbeyei, ejaakɛ mile akɛ nyɛmiitao Yesu, mɔ ni agbe lɛ yɛ tso jaŋŋ nɔ lɛ.  Ebɛ biɛ, ejaakɛ atee lɛ shi, taakɛ ekɛɛ lɛ. Nyɛbaa, nyɛbakwɛa he ni no mli lɛ ekã lɛ.  Ni nyɛyaa oyayaayai nyɛyakɛa ekaselɔi lɛ akɛ atee lɛ shi kɛjɛ gbohii ateŋ, ejaakɛ naa! eetsɔ nyɛhiɛ kɛmiiya Galilea. Jɛmɛ nyɛbaana lɛ yɛ. Naa! Mikɛɛ nyɛ.”  No hewɔ lɛ, amɛshi gbonyo kaimɔ bu lɛ he oya nɔŋŋ, ni amɛkɛ gbeyeishemɔ kɛ miishɛɛ kpele jo foi koni amɛyabɔ ekaselɔi lɛ amaniɛ.  Ni naa! Yesu kɛ amɛ kpe ni ekɛɛ: “Hejɔlɛ ahã nyɛ!” Amɛtsi amɛbɛŋkɛ ni amɛmɔmɔ enanetokotai lɛ amli ni amɛkula shi amɛkɛ woo hã lɛ. 10  Kɛkɛ ni Yesu kɛɛ amɛ akɛ: “Nyɛkashea gbeyei! Nyɛyaa nyɛyabɔa minyɛmimɛi lɛ amaniɛ koni amɛya Galilea, ni jɛmɛ amɛbaana mi yɛ.” 11  Be ni amɛnyiɛ gbɛ amɛyaa lɛ, bulɔi lɛ ekomɛi tee maŋ lɛ mli amɛyabɔ osɔfoi tsiifoi lɛ nibii ni etee nɔ lɛ fɛɛ. 12  Ni be ni mɛi nɛɛ kɛ onukpai lɛ ebua amɛhe naa ni amɛtee ajina sɛɛ lɛ, amɛhã asraafoi lɛ jwiɛtɛi kukuji babaoo 13  ni amɛkɛɛ akɛ: “Nyɛkɛa akɛ, ‘Nyɔɔŋ be ni wɔmiiwɔ lɛ, ekaselɔi lɛ ba amɛbaju lɛ.’ 14  Ni kɛ́ amralo lɛ nu he lɛ, wɔbaagbala sane lɛ mli wɔtsɔɔ lɛ,* ni ehe ebahiaŋ ni nyɛhao nyɛhe.” 15  No hewɔ lɛ, amɛhe jwiɛtɛi kukuji lɛ, ni amɛfee taakɛ afã amɛ lɛ, ni sane nɛɛ gbɛ shwã yɛ Yudafoi lɛ ateŋ kɛbashi ŋmɛnɛ. 16  Shi kaselɔi nyɔŋma kɛ ekome lɛ tee Galilea, yɛ gɔŋ ni Yesu eto akɛ ekɛ amɛ baakpe yɛ lɛ nɔ. 17  Be ni amɛna lɛ lɛ, amɛkoto lɛ, shi mɛi komɛi ayiŋ fee amɛ kɔshikɔshi. 18  Yesu tsi ebɛŋkɛ ni ekɛɛ amɛ akɛ: “Aŋɔ hegbɛ fɛɛ ahã mi yɛ ŋwɛi kɛ shikpɔŋ lɛ nɔ. 19  No hewɔ lɛ, nyɛyaa nyɛyafea mɛi ni jɛ jeŋmaji lɛ fɛɛ mli lɛ kaselɔi, nyɛbaptisia amɛ yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli, 20  nyɛtsɔa amɛ ni amɛye nii fiaa ni mifã nyɛ lɛ nɔ. Ni naa! mikɛ nyɛ yɛ gbii lɛ fɛɛ kɛyashi shihilɛ gbɛjianɔtoo lɛ* naagbee.”*

Shishigbɛ Niŋmaa

Kwɛmɔ Wiemɔi Titrii Amligbalamɔ lɛ.
Aloo “ŋwɛibɔfo.”
Sht. ŋm., “wɔbaakɔne eyiŋ.”
Aloo “yinɔ lɛ.” Kwɛmɔ Wiemɔi Titrii Amligbalamɔ lɛ.
Aloo “kɛyashi shihilɛ gbɛjianɔtoo lɛ naagbee gbii lɛ.”