Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 26:1-75

YITSEI LƐ AMLI SAJI

  • Osɔfoi tee Yesu yi nɔ apam akɛ amɛbaagbe lɛ (1-5)

  • Afɔse mu ni jeɔ ŋma ashwie Yesu nɔ (6-13)

  • Naagbee Hehoo lɛ kɛ ejiemɔ kɛhãmɔ lɛ (14-25)

  • Ato Nuŋtsɔ lɛ Gbɛkɛ Niyeli lɛ shishi (26-30)

  • Yesu gba efɔ̃ shi akɛ Petro baakwa lɛ (31-35)

  • Yesu sɔle yɛ Getsemane (36-46)

  • Amɔ Yesu (47-56)

  • Aye Yesu sane yɛ Sanhedrin lɛ hiɛ (57-68)

  • Petro kwa Yesu (69-75)

26  Agbɛnɛ, be ni Yesu ewie nibii nɛɛ fɛɛ egbe naa lɛ, ekɛɛ ekaselɔi lɛ akɛ:  “Nyɛle akɛ biɛ gbii enyɔ mli lɛ, abaaye Hehoo lɛ, ni abaaŋɔ gbɔmɔ Bi lɛ ahã koni agbe lɛ yɛ tso jaŋŋ nɔ.”  Kɛkɛ ni osɔfoi tsiifoi lɛ kɛ maŋ lɛŋ onukpai lɛ yabua amɛhe naa yɛ osɔfonukpa lɛ ni atsɛɔ lɛ Kaiafa lɛ kpo lɛ nɔ,  ni amɛtee apam akɛ amɛbaatsɔ ŋaa gbɛ nɔ amɛmɔ* Yesu, ní amɛgbe lɛ.  Shi amɛkɛɛ akɛ: “Jeee gbi jurɔ lɛ nɔ koni maŋbii lɛ akabawo maŋ lɛŋ hirihiri.”  Be ni Yesu yɔɔ Betania yɛ Simon, tsutsu kpitiyelɔ lɛ shĩa lɛ,  yoo ko ni hiɛ alabastro tɔ kɛ emli mu ni jeɔ ŋma ni jara wa ba eŋɔɔ, ni ebɔi fɔsemɔ kɛ Yesu yiteŋ shwiemɔ be ni Yesu ta niyenii lɛ ashi* lɛ.  Be ni kaselɔi lɛ na enɛ lɛ, amɛmli wo la ni amɛkɛɛ akɛ: “Te yaka nifitemɔ nɛɛ shishi lɛ?  Ejaakɛ kulɛ abaanyɛ ahɔ̃ɔ enɛ ni aná nii pii ni akɛhã ohiafoi.” 10  Akɛni Yesu le enɛ hewɔ lɛ, ekɛɛ amɛ akɛ: “Mɛni hewɔ nyɛgbaa yoo lɛ naa? Etsu nitsumɔ kpakpa ehã mi. 11  Ejaakɛ ohiafoi lɛ nyɛkɛ amɛ yɛ daa, shi mi lɛ jeee daa mikɛ nyɛ baahi shi. 12  Be ni yoo nɛɛ fɔse mu ni jeɔ ŋma nɛɛ eshwie migbɔmɔtso lɛ nɔ lɛ, efee koni ekɛsaa mi eto mifuu lɛ. 13  Lɛɛlɛŋ, miikɛɛ nyɛ akɛ, he fɛɛ he ni abaashiɛ sane kpakpa nɛɛ yɛ, yɛ jeŋ fɛɛ lɛ, abaagba nɔ ni yoo nɛɛ fee nɛɛ hu ni akɛkai lɛ.” 14  Kɛkɛ ni Mɛi Nyɔŋma kɛ Enyɔ lɛ ateŋ mɔ kome ni atsɛɔ lɛ Yuda Iskariot lɛ tee osɔfoi tsiifoi lɛ aŋɔɔ 15  ni eyakɛɛ: “Mɛni nyɛbaahã mi koni majie lɛ mahã nyɛ?” Amɛkɛ lɛ kpaŋ akɛ amɛbaahã lɛ jwiɛtɛi kukuji nyɔŋmai etɛ. 16  No hewɔ lɛ, kɛjɛ no be lɛ nɔ kɛyaa lɛ, etee nɔ etao hegbɛ ni sa ni ebaaŋɔ kɛjie lɛ ehã. 17  Aboloo ni Akɛ Ma ni Eshako Feɔ lɛ gbii juji lɛ amli klɛŋklɛŋ gbi lɛ nɔ lɛ, kaselɔi lɛ ba Yesu ŋɔɔ amɛbakɛɛ: “Nɛgbɛ osumɔɔ akɛ wɔyasaa wɔto bo koni oyaye Hehoo lɛ yɛ?” 18  Ekɛɛ akɛ: “Nyɛyaa maŋ lɛ mli nyɛyakɛa Ashimashi akɛ, ‘Tsɔɔlɔ lɛ kɛɛ: “Be ni ato ahã mi lɛ eshɛ etã; mi kɛ mikaselɔi lɛ baaye Hehoo lɛ yɛ owe lɛ.”’” 19  Ni kaselɔi lɛ yafee taakɛ Yesu tsɔɔ amɛ akɛ amɛfee lɛ, ni amɛsaa nibii amɛto kɛhã Hehoo lɛ. 20  Be ni shɛ gbɛkɛ lɛ, ekɛ kaselɔi nyɔŋma kɛ enyɔ lɛ yatara okpɔlɔ lɛ he. 21  Be ni amɛyeɔ nii lɛ, ekɛɛ akɛ: “Lɛɛlɛŋ, miikɛɛ nyɛ akɛ, nyɛteŋ mɔ kome baajie mi ehã.” 22  Akɛni enɛ hã amɛwerɛ ho amɛhe waa hewɔ lɛ, amɛbɔi lɛ bimɔ ekomekome akɛ: “Nuŋtsɔ, mi ni lo?” 23  Ehere nɔ ekɛɛ: “Mɔ ni nine kɛ mi tsɔɔ nii yɛ kã lɛ mli lɛ ji mɔ ni baajie mi ehã. 24  Anɔkwa, gbɔmɔ Bi lɛ miishi kɛmiiya taakɛ aŋma yɛ ehe lɛ moŋ, shi kpoo hã nakai mɔ ni abaatsɔ enɔ ajie gbɔmɔ Bi lɛ ahã lɛ! Afɔɔɔ nakai mɔ lɛ moŋ kulɛ, ehi hã lɛ.” 25  Yuda, mɔ ni miiba ebajie lɛ ehã lɛ here nɔ ekɛɛ: “Mi ni lo, Rabi?” Yesu kɛɛ lɛ akɛ: “Bo diɛŋtsɛ okɛɛ.” 26  Be ni amɛkã he amɛmiiye nii lɛ, Yesu kɔ aboloo,* ni esɔle,* ni ekumɔ mli, ni ekɛhã kaselɔi lɛ, ni ekɛɛ: “Nyɛhea, nyɛyea. Enɛ damɔ shi kɛhã* migbɔmɔtso.” 27  Ni ewó kpulu, ni eda shi, ni ekɛhã amɛ ni ekɛɛ: “Nyɛ fɛɛ nyɛnua kpulu lɛ naa, 28  ejaakɛ enɛ damɔ shi kɛhã milá ni ji ‘kpaŋmɔ lɛ lá’ ni abaafɔse ashwie shi ahã mɛi babaoo kɛhã eshaifaa lɛ. 29  Shi miikɛɛ nyɛ akɛ: Minuŋ wein ko dɔŋŋ kɛyashi gbi nɔ ni mi kɛ nyɛ baanu lɛ ehee yɛ mi-Tsɛ Maŋtsɛyeli lɛ mli.” 30  Naagbee lɛ, amɛlá yijiemɔ lalai, ni no sɛɛ lɛ, amɛje kpo kɛtee Oliv Gɔŋ lɛ nɔ. 31  Kɛkɛ ni Yesu kɛɛ amɛ akɛ: “Nyɔɔŋ nɛɛ mli lɛ, nɔ ni baaba minɔ lɛ baahã nyɛ fɛɛ nyɛnane atɔ̃tɔ, ejaakɛ aŋma akɛ: ‘Matswa tookwɛlɔ lɛ nɔ, ni tooku lɛ mli gwantɛŋi lɛ baagbɛ ashwã.’ 32  Shi kɛ́ atee mi shi lɛ, matsɔ nyɛhiɛ kɛya Galilea.” 33  Shi Petro hã hetoo ekɛɛ lɛ akɛ: “Kɛ́ nɔ ni baaba onɔ lɛ baahã mɛi krokomɛi lɛ fɛɛ nane atɔ̃tɔ po lɛ, mi lɛ, minane etɔ̃tɔŋ kɔkɔɔkɔ!” 34  Yesu kɛɛ lɛ akɛ, “Lɛɛlɛŋ, miikɛɛ bo akɛ, nyɔɔŋ nɛɛ mli lɛ, dani wuɔ baagbɛɛ lɛ, obaakwa mi shii etɛ.” 35  Petro kɛɛ lɛ akɛ: “Kɛ́ esa akɛ mikɛ bo agbo po lɛ, mikwaŋ bo kɔkɔɔkɔ.” Kaselɔi krokomɛi lɛ fɛɛ hu kɛɛ nakai nɔŋŋ. 36  Kɛkɛ ni Yesu kɛ amɛ ba he ni atsɛɔ jɛmɛ akɛ Getsemane lɛ, ni ekɛɛ kaselɔi lɛ akɛ: “Nyɛtaraa shi yɛ biɛ, miiya miyasɔle yɛ jɛmɛ.” 37  Ni eŋɔ Petro kɛ Zebedeo bihii enyɔ lɛ efata ehe, ni ewerɛ bɔi ehe hoo, ni ehe jara lɛ babaoo. 38  Kɛkɛ ni ekɛɛ amɛ akɛ: “Miwerɛ eho mihe* waa, kɛyashi gbele mli tete. Nyɛhia biɛ, ni nyɛkɛ mi ayaa nɔ abua.” 39  Ni etee hiɛ fioo, ni eŋɔ ehiɛ ebu shi, ni esɔle ekɛɛ: “Mi-Tsɛ, kɛ́ aaahi lɛ, hã kpulu nɛɛ aho mihe aya. Kɛ̃lɛ, jeee bɔ ni mi misumɔɔ, shi moŋ bɔ ni bo osumɔɔ.” 40  Eku esɛɛ eba kaselɔi lɛ aŋɔɔ ni ebana akɛ amɛmiiwɔ, ni ekɛɛ Petro akɛ: “Ani nyɛnyɛɛɛ nyɛkɛ mi aya nɔ abu ŋmɛlɛtswaa kome po? 41  Nyɛyaa nɔ nyɛbua ni nyɛsɔlea daa, koni nyɛkabote kaa* mli. Anɔkwa, mumɔ lɛ miisumɔ waa, shi heloo lɛ egbede.” 42  Shi kome ekoŋŋ lɛ, eyiŋ etee eyasɔle nɔ ni ji shii enyɔ nɔ ekɛɛ: “Mi-Tsɛ, kɛ́ enɛ nyɛŋ mihe aho aya akɛ ja minu lɛ, afee bɔ ni bo osumɔɔ.” 43  Ni eba ekoŋŋ ebana akɛ amɛmiiwɔ, ejaakɛ amɛhiŋmɛii etsii. 44  No hewɔ lɛ, eshi amɛ ni eyiŋ etee eyasɔle nɔ ni ji shii etɛ nɔ, ni esaa ewie nɔ kome lɛ nɔŋŋ. 45  Kɛkɛ ni eku esɛɛ eba kaselɔi lɛ aŋɔɔ ni ekɛɛ amɛ akɛ: “Ŋmɛlɛtswaa ni tamɔ nɛkɛ nɔ nyɛwɔɔ ni nyɛjɔɔ nyɛhe nɛɛ! Naa! Ŋmɛlɛtswaa ni abaajie gbɔmɔ Bi lɛ awo eshafeelɔi adɛŋ lɛ eshɛ etã. 46  Nyɛtea shi, nyɛhãa wɔyaa. Naa! Mɔ ni baajie mi ehã lɛ eshɛ shi etã.” 47  Be ni ekã he ewieɔ lɛ, naa! Yuda, Mɛi Nyɔŋma kɛ Enyɔ lɛ ateŋ mɔ kome lɛ, ba, ni asafoku babaoo ni jɛ osɔfoi tsiifoi lɛ kɛ maŋ lɛŋ onukpai lɛ aŋɔɔ lɛ fata ehe, ni amɛhiɛ klantei kɛ kpotii. 48  Agbɛnɛ, mɔ ni baajie lɛ ehã lɛ eto amɛ okadi ko akɛ: “Mɔ naa ni mashɔ lɛ, lɛ ni; nyɛmɔa lɛ.” 49  Ni etee Yesu ŋɔɔ tɛ̃ɛ, ni ekɛɛ: “Miiŋa bo, Rabi!” ni ekɛ suɔmɔ shɔ enaa. 50  Shi Yesu kɛɛ lɛ akɛ: “Naanyo, mɛni oba feemɔ yɛ biɛ?” Kɛkɛ ni amɛtsi amɛbɛŋkɛ ni amɛmɔ Yesu. 51  Shi naa! mɛi ni kɛ Yesu yɔɔ lɛ ateŋ mɔ kome kpã enine mli ni egbala eklante ni ekɛbã osɔfonukpa lɛ nyɔŋ lɛ, ni efo etoi. 52  Kɛkɛ ni Yesu kɛɛ lɛ akɛ: “Ŋɔɔ oklante lɛ owo etoohe, ejaakɛ mɛi fɛɛ ni gbalaa klante lɛ, klante naa amɛhiɛ baakpãtã yɛ. 53  Aloo osusuɔ akɛ minyɛŋ makpa mi-Tsɛ fai ni ehã mi ŋwɛibɔfoi ni fa fe lejioi nyɔŋma kɛ enyɔ* bianɛ nɔŋŋ? 54  Kulɛ te aaafee tɛŋŋ ni nɔ ni Ŋmalɛi lɛ kɛɔ akɛ ja eba mli nɛkɛ lɛ aaaba mli lɛ?” 55  Nakai ŋmɛlɛtswaa lɛ nɔ lɛ, Yesu kɛɛ asafoku lɛ akɛ: “Mi mɔmɔ nyɛba kɛ klantei kɛ kpotii tamɔ amɔɔ ojoyelɔ ko nɛɛ? Daa gbi lɛ, mitaa sɔlemɔwe lɛ mitsɔɔ nii, ni kɛ̃lɛ nyɛmɔɔɔ mi. 56  Shi enɛɛmɛi fɛɛ ba koni nibii ni gbalɔi lɛ ŋmala lɛ* aba mli.” Kɛkɛ ni kaselɔi lɛ fɛɛ shi lɛ, ni amɛjo foi. 57  Mɛi ni mɔ Yesu lɛ kpala lɛ kɛtee osɔfonukpa Kaiafa ŋɔɔ, he ni woloŋmalɔi lɛ kɛ onukpai lɛ ebua amɛhe naa yɛ lɛ. 58  Shi Petro tee nɔ enyiɛ esɛɛ yɛ shɔŋŋ aahu kɛyashi osɔfonukpa lɛ kpo lɛ nɔ, ni be ni ebote jɛmɛ lɛ, ekɛ shĩa lɛŋ sɔɔlɔi lɛ yata shi koni ekwɛ bɔ ni nibii anaa baayakpa ahã. 59  Nakai be lɛ mli lɛ, osɔfoi tsiifoi lɛ kɛ Sanhedrin* muu lɛ fɛɛ miitao amale odase ko amɛshi Yesu koni amɛgbe lɛ. 60  Shi amɛnáaa eko, eyɛ mli akɛ amale odasefoi pii ba. Sɛɛ mli lɛ, mɛi enyɔ ba 61  ni amɛbakɛɛ akɛ: “Nuu nɛɛ kɛɛ akɛ, ‘Manyɛ makumɔ Nyɔŋmɔ sɔlemɔwe lɛ ni mikɛ gbii etɛ ama.’” 62  Kɛkɛ ni osɔfonukpa lɛ te shi ni ekɛɛ lɛ akɛ: “Ani obɛ naajiemɔ ko? Mɛni oyɔɔ kɛɛmɔ yɛ odase ni hii nɛɛ yeɔ shiɔ bo lɛ he?” 63  Shi Yesu etswaaa esɛŋ. No hewɔ lɛ, osɔfonukpa lɛ kɛɛ lɛ akɛ: “Miifã bo ni okã kitã yɛ Nyɔŋmɔ hiɛkãalɔ lɛ hiɛ akɛ obaawie anɔkwale, ni okɛɛ wɔ kɛji bo ji Kristo lɛ, Nyɔŋmɔ Bi lɛ!” 64  Yesu kɛɛ lɛ akɛ: “Bo diɛŋtsɛ okɛɛ. Shi miikɛɛ nyɛ akɛ: Kɛjɛ be nɛɛ nɔ kɛyaa lɛ, nyɛbaana gbɔmɔ Bi lɛ ta hewalɛ ninejurɔ nɔ, ni eeba yɛ ŋwɛi atatui lɛ anɔ.” 65  Kɛkɛ ni osɔfonukpa lɛ gbala etadei anɔhaanɔi lɛ ni ekɛɛ: “Ebɔ musu! Mɛɛ odasefoi krokomɛi wɔtaoɔ dɔŋŋ? Nyɛkwɛa! Amrɔ nɛɛ, nyɛnu musubɔɔ lɛ. 66  Te nyɛsusuɔ tɛŋŋ?” Amɛhã hetoo akɛ: “Esa gbele.” 67  Kɛkɛ ni amɛfɛ̃ lajɔ̃ amɛshwie ehiɛ ni amɛmamɔ lɛ atswɛrɛi. Mɛi krokomɛi hu gbala ehiɛ mai 68  amɛkɛɛ: “Kristo, gbaa otsɔɔ wɔ. Namɔ gba bo ma lɛ?” 69  Agbɛnɛ, Petro ta sɛɛ flɛŋŋ yɛ kpo lɛ nɔ, ni gbekɛ yoo ko ni ji tsulɔ lɛ ba eŋɔɔ ebakɛɛ: “Bo hu ofata Yesu, Galileanyo lɛ, he!” 70  Shi etso yɛ amɛ fɛɛ amɛhiɛ ekɛɛ: “Mileee nɔ ni owieɔ lɛ he nɔ ko.” 71  Be ni etee shĩa lɛ agbó lɛ he agba lɛ mli lɛ, gbekɛ yoo kroko na lɛ ni ekɛɛ mɛi ni yɔɔ jɛmɛ lɛ akɛ: “Nuu nɛɛ kɛ Yesu, Nazarenyo lɛ yɔɔ.” 72  Etso ekoŋŋ kɛ kitãkamɔ ekɛɛ: “Mileee nuu lɛ!” 73  Be fioo sɛɛ lɛ, mɛi ni damɔ jɛmɛ lɛ ba amɛbakɛɛ Petro akɛ: “Ekã shi faŋŋ akɛ, bo hu amɛteŋ mɔ kome ji bo, ejaakɛ, anɔkwa, owiemɔ tete miikpa bo shi.” 74  Kɛkɛ ni ebɔi loomɔ kɛ kitãkamɔ ekɛɛ: “Mileee nuu lɛ!” Ni amrɔ lɛ wuɔ gbɛɛ. 75  Ni Petro kai wiemɔ ni Yesu wie lɛ akɛ: “Dani wuɔ baagbɛɛ lɛ, obaakwa mi shii etɛ.” Ni eje kpo eyafo kɛ dɔlɛ babaoo.

Shishigbɛ Niŋmaa

Aloo “amɛkɛ hiɛtɛ̃ɛ baatsu nii kɛmɔ.”
Aloo “ta okpɔlɔ lɛ he.”
Yɛ Ŋmalɛi lɛ amli lɛ, aboloo ji mamu ni akɛ nu ekpɔtɔ ní ashã, ni bei pii lɛ, akɛdamɔɔ shi kɛhãa niyenii.
Sht. ŋm., “ejɔɔ.”
Sht. ŋm., “enɛ ji.” Hela mli lɛ, e·stin, ni eshishi ji “damɔ shi kɛhã, feɔ he okadi.”
Aloo “Misusuma werɛ eho ehe.”
Ni ji, efɔŋ he kaa.
Yɛ Roma tabilɔi ateŋ lɛ, asraafoi aaafee 4,000 kɛmiimɔ 6,000 ni feɔ lejio kome. Yɛ biɛ lɛ, ekɔɔ yibɔ ní da waa he.
Aloo “gbalɔi lɛ aŋmalɛi lɛ.”
Sanhedrin lɛ ji Yudafoi asaneyelihe wulu lɛ.