Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 25:1-46

EMLI SAJI

  • BE NI KRISTO EBA LƐ HE OKADI (1-46)

    • Oblayei froi nyɔŋma lɛ henɔkwɛmɔnɔ lɛ (1-13)

    • Talɛntai lɛ he nɔkwɛmɔnɔ lɛ (14-30)

    • Gwantɛŋi lɛ kɛ abotiai lɛ (31-46)

25  “Agbɛnɛ, ŋwɛi Maŋtsɛyeli lɛ tamɔ oblayei froi nyɔŋma ni hole amɛkanei ni amɛtee koni amɛkɛ ayemforo wu ayakpe.  Amɛteŋ mɛi enumɔ lɛ kwashiai ji amɛ, ni mɛi enumɔ lɛ hiɛshikalɔi ji amɛ.  Ejaakɛ kwashiai lɛ hole amɛkanei lɛ shi amɛŋɔɔɔ mu amɛfataaa he,  shi hiɛshikalɔi lɛ ŋɔ mu amɛwo amɛtɔi amli amɛfata amɛkanei lɛ ahe.  Be ni ayemforo wu lɛ sɛɛ miitsɛ lɛ, wɔ ye amɛ fɛɛ ni amɛwɔwɔi.  Nyɔɔŋteŋ tuuntu lɛ, anu bolɔmɔ ko akɛ: ‘Naa ayemforo wu lɛ ee ei! Nyɛjea kpo ni nyɛyakpea lɛ.’  Kɛkɛ ni nakai oblayei froi lɛ fɛɛ te shi ni amɛsaa amɛkanei lɛ.  Kwashiai lɛ kɛɛ hiɛshikalɔi lɛ akɛ, ‘Nyɛhãa wɔ nyɛmu lɛ eko, ejaakɛ wɔkanei lɛ miihe agboi.’  Hiɛshikalɔi lɛ hã amɛ hetoo akɛ: ‘Ekolɛ ebashɛŋ wɔ kɛ nyɛ fɛɛ. Moŋ lɛ nyɛyaa mɛi ni hɔ̃ɔ eko lɛ aŋɔɔ ni nyɛyahea eko nyɛhãa nyɛhe.’ 10  Shi be ni amɛyaa amɛyahé mu lɛ, ayemforo wu lɛ ba. Oblayei froi ni esaa amɛhe amɛto lɛ kɛ lɛ tee yookpeemɔ okpɔlɔŋmɛɛ lɛ shishi, ni aŋa shinaa lɛ. 11  No sɛɛ lɛ, oblayei froi krokomɛi lɛ hu ba amɛbakɛɛ akɛ: ‘Onukpa, Onukpa, gbelemɔ wɔ!’ 12  Ehã amɛ hetoo akɛ, ‘Lɛɛlɛŋ, miikɛɛ nyɛ akɛ, mileee nyɛ.’ 13  “No hewɔ lɛ, nyɛyaa nɔ nyɛbua, ejaakɛ nyɛleee gbi lɛ loo ŋmɛlɛtswaa lɛ. 14  “Asaŋ, ŋwɛi Maŋtsɛyeli lɛ tamɔ nuu ko ni be ni ebaafã gbɛ lɛ, etsɛ enyɔji lɛ ni etu nibii ni eyɔɔ lɛ ewo amɛdɛŋ. 15  Ehã mɔ kome talɛntai enumɔ,* mɔ kome hu enyɔ, ni mɔ kroko hu ekome, yɛ amɛteŋ mɔ fɛɛ mɔ nyɛmɔ naa, ni efã gbɛ. 16  Amrɔ lɛ, mɔ ni ná talɛntai enumɔ lɛ tee ni ekɛyaye guɔ ni ená enumɔ kɛfata he. 17  Nakai nɔŋŋ mɔ ni ná enyɔ lɛ hu yaná enyɔ kɛfata he. 18  Shi nyɔŋ ni ná ekome lɛ tee ni eyatsa shi ni eŋɔ enuŋtsɔ lɛ shika* lɛ eto. 19  “Be kplaŋŋ sɛɛ lɛ, nakai nyɔji lɛ anuŋtsɔ lɛ ba, ni ekɛ amɛ babu akɔntaa. 20  No hewɔ lɛ, mɔ ni ná talɛntai enumɔ lɛ ba ni ekɛ talɛntai enumɔ krokomɛi hu fata he kɛba, ni ekɛɛ, ‘Nuŋtsɔ, otu talɛntai enumɔ owo midɛŋ; naa, miná talɛntai enumɔ kɛfata he.’ 21  Enuŋtsɔ lɛ kɛɛ lɛ akɛ: ‘Aekoo, nyɔŋ kpakpa kɛ anɔkwafo! Oye anɔkwa yɛ nii fioo he. Maŋɔ bo mato nibii babaoo nɔ. Botemɔ onuŋtsɔ lɛ miishɛɛ lɛ mli.’ 22  No sɛɛ lɛ, mɔ ni ná talɛntai enyɔ lɛ ba ebakɛɛ, ‘Nuŋtsɔ, otu talɛntai enyɔ owo midɛŋ; naa, miná talɛntai enyɔ kɛfata he.’ 23  Enuŋtsɔ lɛ kɛɛ lɛ akɛ: ‘Aekoo, nyɔŋ kpakpa kɛ anɔkwafo! Oye anɔkwa yɛ nii fioo he. Maŋɔ bo mato nibii babaoo nɔ. Botemɔ onuŋtsɔ lɛ miishɛɛ lɛ mli.’ 24  “Naagbee lɛ, nyɔŋ ni ná talɛnta kome lɛ ba ebakɛɛ: ‘Nuŋtsɔ, mile bo akɛ osane wa, ni okpaa nii yɛ he ni oduko nɔ ko yɛ, ni obuaa nii anaa yɛ he ni oshako nɔ ko mli yɛ. 25  No hewɔ lɛ, mishe gbeyei ni mitee mikɛ otalɛnta lɛ yato shikpɔŋ. Naa, onii lɛ nɛ, hemɔ.’ 26  Enuŋtsɔ lɛ here nɔ ekɛɛ lɛ akɛ: ‘Nyɔŋ fɔŋ kɛ anihaolɔ, ole akɛ mikpaa nii yɛ he ni miduko nɔ ko yɛ, ni mibuaa nii anaa yɛ he ni mishako nɔ ko mli yɛ? 27  Belɛ, kulɛ esa akɛ oŋɔ mishika* lɛ owo shikatolɔi lɛ adɛŋ, ni kɛ́ miba lɛ minine ashɛ minii nɔ kɛ ehe kpa. 28  “‘No hewɔ lɛ, nyɛhea talɛnta lɛ yɛ edɛŋ ni nyɛkɛhãa mɔ ni yɔɔ talɛntai nyɔŋma lɛ. 29  Ejaakɛ mɔ fɛɛ mɔ ni yɔɔ nɔ ko lɛ, abaahã lɛ eko afata he, koni ená ni ateke nɔ. Shi mɔ ni bɛ nɔ ko lɛ, abaahe nɔ ni eyɔɔ lɛ tete yɛ edɛŋ. 30  Ni nyɛshɛa nyɔŋ ni he bɛ sɛɛnamɔ ko nɛɛ nyɛfɔ̃a agbonaa duŋ lɛ mli. Jɛmɛ ji he ni ebaafo ni ebaakpe enyanyɔjiashi yɛ.’ 31  “Kɛ́ gbɔmɔ Bi lɛ ba yɛ enunyam lɛ mli ni ŋwɛibɔfoi lɛ fɛɛ fata ehe lɛ, ebaata enunyam maŋtsɛ sɛi lɛ nɔ. 32  Abaabua jeŋmaji lɛ fɛɛ naa yɛ ehiɛ, ni ebaatsetsee mɛi kɛje mɛi krokomɛi ahe taakɛ tookwɛlɔ tseɔ gwantɛŋi kɛjeɔ abotiai ahe lɛ. 33  Ni ekɛ gwantɛŋi lɛ baadamɔ eninejurɔ nɔ, shi abotiai lɛ ekɛ amɛ baadamɔ ebɛku nɔ. 34  “Kɛkɛ lɛ, Maŋtsɛ lɛ baakɛɛ mɛi ni damɔ eninejurɔ nɔ lɛ akɛ: ‘Nyɛbaa, nyɛ mɛi ni mi-Tsɛ ejɔɔ nyɛ, nyɛŋɔa Maŋtsɛyeli ni asaa ato nyɛ kɛjɛ be ni ato je lɛ shishi lɛ.* 35  Ejaakɛ hɔmɔ ye mi ni nyɛhã mi nɔ ko miye; kumai ye mi ni nyɛhã mi nɔ ko minu. Gbɔ ji mi ni nyɛhere mi hiɛmɛɛ;* 36  minyiɛ yayai* ni nyɛwo mi atade. Mihe ye ni nyɛkwɛ mi. Awo mi tsuŋ ni nyɛbasara mi.’ 37  Kɛkɛ lɛ, jalɔi lɛ baahere lɛ nɔ kɛ wiemɔi nɛɛ akɛ: ‘Nuŋtsɔ, mɛɛ be wɔna bo akɛ hɔmɔ miiye bo ni wɔhã bo nɔ ko oye aloo kumai miiye bo ni wɔhã bo nɔ ko onu? 38  Mɛɛ be wɔna bo akɛ gbɔ ji bo, ni wɔhere bo hiɛmɛɛ,* aloo onyiɛ yayai ni wɔwo bo atade? 39  Mɛɛ be wɔna bo akɛ ohe miiye aloo awo bo tsuŋ ni wɔbasara bo?’ 40  Ni Maŋtsɛ lɛ baahere nɔ ekɛɛ amɛ akɛ, ‘Lɛɛlɛŋ, miikɛɛ nyɛ akɛ, gbii abɔ ni nyɛfee nyɛhã minyɛmimɛi nɛɛ ateŋ mɛi bibii fe fɛɛ lɛ ateŋ mɔ kome lɛ, mi nɔŋŋ nyɛfee nyɛhã lɛ.’ 41  “Kɛkɛ lɛ, ebaakɛɛ mɛi ni yɔɔ ebɛku nɔ lɛ akɛ: ‘Nyɛjea minɔ nyɛyaa, nyɛ mɛi ni alomɔ nyɛ, nyɛyaa naanɔ la* ni asaa ato Abonsam kɛ ebɔfoi lɛ mli. 42  Ejaakɛ hɔmɔ ye mi ni nyɛhãaa mi nɔ ko maye; ni kumai ye mi ni nyɛhãaa mi nɔ ko manu. 43  Gbɔ ji mi ni nyɛhereee mi hiɛmɛɛ;* minyiɛ yayai ni nyɛwooo mi atade; mihe ye ni awo mi tsuŋ, shi nyɛkwɛɛɛ mi.’ 44  Kɛkɛ lɛ, amɛ hu amɛbaahã hetoo kɛ wiemɔi nɛɛ akɛ: ‘Nuŋtsɔ, mɛɛ be wɔna bo akɛ hɔmɔ miiye bo aloo kumai miiye bo aloo gbɔ ji bo aloo onyiɛ yayai aloo ohe miiye aloo awo bo tsuŋ ni wɔbasɔmɔɔɔ bo?’ 45  Kɛkɛ lɛ, ebaahã amɛ hetoo akɛ: ‘Lɛɛlɛŋ, miikɛɛ nyɛ akɛ, gbii abɔ ni nyɛfeee nyɛhãaa minyɛmimɛi nɛɛ ateŋ mɛi bibii fe fɛɛ lɛ ateŋ mɔ kome lɛ, mi nɔŋŋ nyɛfeee nyɛhãaa lɛ.’ 46  Mɛnɛɛmɛi lɛ, amɛbaaya naanɔ hiɛkpatamɔ mli,* shi jalɔi lɛ amɛbaaya naanɔ wala mli.”

Shishigbɛ Niŋmaa

Hela talɛnta kome feɔ kg 20.4.
Sht. ŋm., “jwiɛtɛi.”
Sht. ŋm., “mijwiɛtɛi.”
Sht. ŋm., “be ni ashɛ (dumɔwu) afɔ̃ shi,” ni tsɔɔ akɛ, be ni Adam kɛ Hawa bɔi amɛbii lɛ ahɔŋɔɔ.
Aloo “nyɛhã mibato nyɛŋɔɔ.”
Hela wiemɔ ni akɛtsu nii yɛ biɛ lɛ baanyɛ atsɔɔ akɛ ewo nɔ ko hatahata ko; ewo nɔ ko ni awoɔ yɛ atade shishi pɛ; etsɔɔɔ doo akɛ ehiɛ ehe yayai.
Aloo “wɔhã obato wɔŋɔɔ.”
Enɛ tsɔɔ naanɔ hiɛkpatamɔ.
Aloo “nyɛhãaa mabato nyɛŋɔɔ.”
Ni tsɔɔ akɛ, amɛbaaje wala mli. Sht. ŋm., “abaafolɔ amɛ ashwie.”