Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 24:1-51

24  Agbɛnɛ be ni Yesu miije kpo kɛmiijɛ sɔlemɔwe lɛ, ekaselɔi lɛ ba eŋɔɔ ni amɛbatsɔɔ lɛ sɔlemɔwe lɛ tsũi lɛ.  Ehere amɛnɔ ekɛɛ: “Te nyɛmiina nibii nɛɛ fɛɛ? Lɛɛlɛŋ, miikɛɛ nyɛ akɛ, ashiŋ tɛ kome yɛ eko nɔ yɛ biɛ kɔkɔɔkɔ, ní atsiŋ atswaŋ shi.”  Be ni eta shi yɛ Oliv Gɔŋ lɛ nɔ lɛ, kaselɔi lɛ pɛ ba eŋɔɔ amɛbakɛɛ: “Kɛɛmɔ wɔ, mɛɛ be nibii nɛɛ baaba mli, ni mɛni baafee be ni oba lɛ* kɛ shihilɛ gbɛjianɔtoo lɛ* naagbee gbii lɛ he okadi lɛ?”  Yesu hã amɛ hetoo akɛ: “Nyɛkwɛa jogbaŋŋ koni mɔ ko akalaka nyɛ,  ejaakɛ mɛi babaoo baaba yɛ migbɛ́i mli abakɛɛ akɛ, ‘Miji Kristo lɛ,’ ni amɛbaalaka mɛi babaoo.  Nyɛbaanu tai kɛ tai amaniɛbɔi ahe. Nyɛkwɛa ni nyɛtsui akafãa, ejaakɛ esa akɛ nibii nɛɛ aba mli, shi naagbee lɛ shɛko.  “Ni jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli, ni hɔji kɛ shikpɔŋhosomɔi baaba yɛ heihei.  Enɛɛmɛi fɛɛ lɛ, kɔmɔmɔi lɛ abɔimɔ ni.  “Kɛkɛ lɛ mɛi baaŋɔ nyɛ amɛhã amanehulu ni amɛbaagbe nyɛ, ni jeŋmaji lɛ fɛɛ baanyɛ nyɛ yɛ migbɛ́i lɛ hewɔ. 10  Agbɛnɛ hu, mɛi pii anane baatɔ̃tɔ ni amɛbaajiejie amɛhe amɛhã ni amɛbaanyɛnyɛɛ amɛhe. 11  Amale gbalɔi pii baate shi ni amɛbaalaka mɛi pii; 12  ni akɛni mlatɔmɔ baaya nɔ afa hewɔ lɛ, mɛi pii asuɔmɔ he baajɔ. 13  Shi mɔ ni efi shi kɛyawula shi* lɛ, abaahere eyiwala. 14  Ni abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ* fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba. 15  “No hewɔ lɛ, kɛ́ nyɛhiŋmɛi gba nihiinii ni kɛ amaŋfɔfeemɔ baa lɛ nɔ, taakɛ atsɔ gbalɔ Daniel nɔ awie lɛ, akɛ edamɔ he krɔŋkrɔŋ ko lɛ (mɔ ni kaneɔ lɛ, ekɛ sanesɛɛkɔmɔ atsu nii), 16  no lɛ mɛi ni yɔɔ Yudea lɛ abɔi foijee kɛya gɔji lɛ anɔ. 17  Mɔ ni yɔɔ tsu yiteŋ lɛ akakpeleke shi eyakɔlɔ eshĩa mli nibii, 18  ni mɔ ni yɔɔ ŋmɔ mli lɛ, ekaku esɛɛ eyakɔ etade nɔhaanɔ. 19  Kpoo hã yeihɔlɔi kɛ mɛi ni miihã fufɔ yɛ nakai gbii lɛ amli lɛ! 20  Nyɛyaa nɔ nyɛsɔlea koni nyɛfoijee lɛ akaba yɛ fɛ̃i be mli loo yɛ Hejɔɔmɔ Gbi lɛ nɔ; 21  ejaakɛ no mli lɛ amanehulu kpeteŋkpele ni anako enɔ dã kɛjɛ je lɛ shishijee aahu kɛbashi amrɔ nɛɛ, dabi, ni asaŋ eko baŋ dɔŋŋ lɛ baaba. 22  Anɔkwa, kɛ́ afooo nakai gbii lɛ anɔ kuku lɛ, ahereŋ heloo ko heloo ko yiwala; shi mɛi ni ahala lɛ ahewɔ lɛ, abaafo nakai gbii lɛ anɔ kuku. 23  “Ni kɛ́ mɔ ko kɛɛ nyɛ akɛ, ‘Naa! Kristo lɛ yɛ biɛ,’ loo, ‘Jɛmɛ!’ lɛ, nyɛkahea nyɛyea. 24  Ejaakɛ amale Kristoi kɛ amale gbalɔi baate shi ni amɛbaafee okadii kɛ naakpɛɛ nii wuji koni amɛkɛlaka mɛi, kɛ́ aaahi lɛ mɛi ni ahala lɛ tete. 25  Naa! Mitsɔ hiɛ mibɔ nyɛ kɔkɔ. 26  No hewɔ lɛ, kɛ́ mɛi kɛɛ nyɛ akɛ, ‘Naa! Eyɛ ŋa lɛ nɔ’* lɛ, nyɛkajea kpo; ‘Naa! Eyɛ piai lɛ amli’ lɛ, nyɛkahea nyɛyea. 27  Ejaakɛ bɔ ni sarawai gbalaa kɛjɛɔ boka ni amɛkpɛɔ kɛyaa anai lɛ, nakai nɔŋŋ be ni gbɔmɔ Bi lɛ eba* lɛ baatamɔ. 28  He fɛɛ he ni gbonyo* kã lɛ, jɛmɛ okropɔŋi baabua amɛhe naa yɛ. 29  “Nakai gbii lɛ amli amanehulu lɛ sɛɛ nɔŋŋ lɛ, hulu lɛ baawo duŋ, ni nyɔŋtsere lɛ kpɛŋ, ni ŋulamii lɛ baajɛ ŋwɛi abatswiatswiaa shi, ni abaahoso ŋwɛi hewalɛi lɛ. 30  Kɛkɛ lɛ, gbɔmɔ Bi lɛ okadi lɛ baapue yɛ ŋwɛi, ni shikpɔŋ lɛ nɔ wekui lɛ baagbala amɛhe mai kɛtsɔɔ akɛ amɛmiiye awerɛho, ni amɛbaana gbɔmɔ Bi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam kpele. 31  Ni ebaatsu ebɔfoi lɛ kɛ tɛtɛrɛmantɛrɛ gbɛɛmɔ ni naa wa, ni amɛbaabua ehalamɔbii lɛ anaa kɛaajɛ kɔɔyɔi ejwɛ lɛ anɔ, kɛjɛ ŋwɛi naagbeehe kome kɛyashi naagbeehe kroko. 32  “Agbɛnɛ, nyɛkasea agbami tso lɛ he nɔkwɛmɔnɔ* nɛɛ: Kɛ́ enine fɔ lɛ fee frɔ̃frɔ̃, ni efũ bai nɔŋŋ lɛ, nyɛle akɛ latsaa be eshɛ etã. 33  Nakai nɔŋŋ nyɛ hu, kɛ́ nyɛna nibii nɛɛ fɛɛ lɛ, nyɛnáa nyɛlea akɛ eshɛ shinai lɛ anaa etã. 34  Lɛɛlɛŋ, miikɛɛ nyɛ akɛ, nɛkɛ yinɔ nɛɛ hoŋ eyaŋ kɔkɔɔkɔ kɛyashi nibii nɛɛ fɛɛ baaba mli. 35  Ŋwɛi kɛ shikpɔŋ baaho aya, shi miwiemɔi lɛ hoŋ eyaŋ kɔkɔɔkɔ. 36  “Nakai gbi lɛ kɛ nakai ŋmɛlɛtswaa lɛ, mɔ ko mɔ ko leee, bɔfoi ni yɔɔ ŋwɛi lɛ tete loo Bi lɛ tete leee, ja Tsɛ lɛ kɛkɛ. 37  Ejaakɛ bɔ ni Noa gbii lɛ fee lɛ, nakai nɔŋŋ be ni gbɔmɔ Bi lɛ eba* lɛ hu baatamɔ. 38  Ejaakɛ taakɛ eji yɛ gbii ni tsɔ Nu Afua lɛ hiɛ lɛ amli, ni mɛi miiyeyee nii, amɛmiinunuu nii, hii miibote gbalashihilɛ mli, ni akɛ yei hu miihã gbãla, kɛyashi gbi ni Noa bote adeka lɛ mli, 39  ni amɛkɛ amɛjwɛŋmɔ eyaaa nɔ kɛyashi Nu Afua lɛ ba ebabɛɛ amɛ fɛɛ kɛtee lɛ, nakai nɔŋŋ be ni gbɔmɔ Bi lɛ eba lɛ baatamɔ. 40  No mli lɛ, hii enyɔ baahi ŋmɔ mli; abaaŋɔ mɔ kome kɛya ni abaashi mɔ kroko lɛ. 41  Yei enyɔ baawiɛ yɛ wiɛtɛ nɔ; abaaŋɔ mɔ kome kɛya ni abaashi mɔ kroko lɛ. 42  No hewɔ lɛ, nyɛyaa nɔ nyɛbua, ejaakɛ nyɛleee gbi nɔ ni nyɛ-Nuŋtsɔ lɛ baaba. 43  “Shi nyɛnáa nyɛlea nɔ kome nɛɛ akɛ: Eji shĩatsɛ lɛ le nyɔɔŋ lɛ mli be* ni julɔ lɛ baaba kulɛ, ewɔŋ, ni eŋmɛŋ gbɛ ni agbu ewe lɛ awo mli. 44  Enɛ hewɔ lɛ, nyɛ hu nyɛsaa nyɛhe nyɛtoa, ejaakɛ nɔ ŋmɛlɛtswaa ni nyɛsusuuu akɛ no ni lɛ, gbɔmɔ Bi lɛ baaba. 45  “Namɔ tuuntu ji nyɔŋ anɔkwafo kɛ hiɛshikalɔ lɛ ni enuŋtsɔ lɛ eŋɔ lɛ eto ewebii anɔ koni ehã amɛ amɛniyenii yɛ be ni sa mli lɛ? 46  Nakai nyɔŋ lɛ yɛ miishɛɛ kɛ́ enuŋtsɔ lɛ ba ni ebanina lɛ akɛ eefee nakai! 47  Lɛɛlɛŋ, miikɛɛ nyɛ akɛ, ebaaŋɔ lɛ eto nibii fɛɛ ni eyɔɔ lɛ nɔ. 48  “Shi kɛ́ nakai nyɔŋ fɔŋ lɛ kɛɛ yɛ etsuiŋ akɛ, ‘Minuŋtsɔ lɛ miitsɛ,’ 49  ni ebɔi enanemɛi nyɔji lɛ yii, ni ekɛ mɛi ni ale amɛ jogbaŋŋ akɛ amɛji dãatɔlɔi lɛ bɔi niyeli kɛ ninumɔ lɛ, 50  nakai nyɔŋ lɛ nuŋtsɔ lɛ baaba yɛ gbi nɔ ni ekwɛɛɛ lɛ gbɛ, kɛ ŋmɛlɛtswaa nɔ ni eleee, 51  ni ebaagbala etoi waa, ni ebaahã lɛ egbɛhe yɛ osatofoi lɛ ateŋ. Jɛmɛ ji he ni ebaafo ni ebaakpe enyanyɔjiashi yɛ.

Shishigbɛ Niŋmaa

Kwɛmɔ Wiemɔi Titrii Amligbalamɔ lɛ.
Aloo “yinɔ lɛ.” Kwɛmɔ Wiemɔi Titrii Amligbalamɔ lɛ.
Aloo “mɔ ni fiɔ shi kɛyawulaa shi.”
Aloo “shikpɔŋ lɛ nɔ hei ni mɛi yɔɔ.”
Kwɛmɔ Mat 3:1 sh. niŋ.
Kwɛmɔ Wiemɔi Titrii Amligbalamɔ lɛ.
Hela wiemɔ ni akɛtsu nii lɛ kɔɔ gbɔmɔ loo kooloo ni egbo he.
Aloo “abɛbua.”
Kwɛmɔ Wiemɔi Titrii Amligbalamɔ lɛ.
Aloo “nyɔɔŋ buu be.”