Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 21:1-46

21  Be ni amɛbɛŋkɛɔ Yerusalem ni amɛshɛ Betfage yɛ Oliv Gɔŋ lɛ nɔ lɛ, kɛkɛ ni Yesu tsu kaselɔi enyɔ,  ni ekɛɛ amɛ akɛ: “Nyɛyaa akrowa ni nyɛnaa lɛ mli, ni amrɔ lɛ nyɛbaana teji yoo ni aŋmɔ lɛ shi kɛ ebi. Nyɛfɛnea amɛ ni nyɛkɛ amɛ abahãa mi.  Kɛ́ mɔ ko bi nyɛ sane ko lɛ, nyɛkɛa akɛ, ‘Amɛhe miihia Nuŋtsɔ lɛ.’ Ni amrɔ lɛ, ekɛ amɛ baahã nyɛ.”  Anɔkwa, enɛ tee nɔ koni nɔ ni atsɔ gbalɔ lɛ nɔ awie lɛ aba mli akɛ:  “Nyɛkɛa Zion biyoo lɛ akɛ: ‘Naa! Omaŋtsɛ lɛ miiba oŋɔɔ, ehe jɔ ni eta teji nɔ, hɛɛ, eta teji bi ni ji nitsumɔ kooloo bi nɔ.’”  No hewɔ lɛ, kaselɔi lɛ tee ni amɛyafee bɔ ni Yesu tsɔɔ amɛ akɛ amɛfee lɛ pɛpɛɛpɛ.  Amɛkɛ teji lɛ kɛ ebi lɛ ba, ni amɛŋɔ amɛtadei anɔhaanɔi lɛ amɛshwie amɛnɔ, ni eta nɔ.  Asafoku lɛ ateŋ mɛi pii ŋɔ amɛtadei anɔhaanɔi lɛ amɛha gbɛ lɛ nɔ, ni mɛi krokomɛi hu folɔ tsei aniji ni amɛkɛshwie gbɛ lɛ nɔ.  Kɛfata he lɛ, asafoku ni nyiɛ ehiɛ kɛ mɛi ni nyiɛ esɛɛ lɛ fɛɛ tee nɔ amɛbolɔ akɛ: “Ofainɛ, heremɔ David Bi lɛ yiwala!* Ajɔɔ mɔ ni baa yɛ Yehowa* gbɛ́i mli lɛ! Ofainɛ, heremɔ eyiwala, yɛ ŋwɛi flooflo!” 10  Ni be ni ebote Yerusalem lɛ, maŋ muu lɛ fɛɛ fee hoo amɛkɛɛ: “Namɔ nɛ?” 11  Asafoku lɛ tee nɔ amɛkɛɛ: “Mɔ nɛɛ ji Yesu, gbalɔ lɛ, ni jɛ Nazaret yɛ Galilea lɛ!” 12  Yesu bote sɔlemɔwe lɛ ni eyashwie mɛi ni hɔ̃ɔ nii kɛ mɛi ni heɔ nii yɛ sɔlemɔwe lɛ, ni etsirɛ shika tsakelɔi lɛ akpɔlɔi lɛ kɛ mɛi ni hɔ̃ɔ okpoi lɛ asɛii lɛ etswiatswiaa shi. 13  Ni ekɛɛ amɛ akɛ: “Aŋma akɛ, ‘Abaatsɛ mishĩa lɛ sɔlemɔ shĩa,’ shi nyɛ lɛ, nyɛkɛmiifee ojotswalɔi atɛkplo.” 14  Agbɛnɛ hu, shwilafoi kɛ akpakei ba eŋɔɔ yɛ sɔlemɔwe lɛ, ni etsa amɛ. 15  Be ni osɔfoi tsiifoi lɛ kɛ woloŋmalɔi lɛ na naakpɛɛ nii ni efee lɛ, kɛ gbekɛbii hii ni bolɔɔ yɛ sɔlemɔwe lɛ akɛ, “Ofainɛ, heremɔ David Bi lɛ yiwala!” lɛ, amɛmli wo la 16  ni amɛkɛɛ lɛ akɛ: “Oonu nɔ ni mɛnɛɛmɛi kɛɔ lɛ?” Yesu kɛɛ amɛ akɛ: “Hɛɛ. Ani nyɛkaneko dã akɛ, ‘Gbekɛbii kɛ abifabii anaa osaa yijiemɔ oto yɛ’?” 17  Ni eshi amɛ yɛ jɛmɛ ni eje maŋ lɛŋ etee Betania ni eyawɔ jɛmɛ. 18  Leebi maŋkpa be ni eku esɛɛ eyaa maŋ lɛ mli lɛ, enu hɔmɔ he. 19  Ni ehiŋmɛi gba agbami tso ko nɔ yɛ gbɛ lɛ he ni etsi ebɛŋkɛ he, shi enaaa nɔ ko yɛ nɔ akɛ ja bai kɛkɛ, ni ekɛɛ tso lɛ akɛ: “Owoŋ yibii ko dɔŋŋ.” Ni agbami tso lɛ ŋala amrɔ nɔŋŋ. 20  Be ni kaselɔi lɛ na enɛ lɛ, amɛnaa kpɛ amɛhe, ni amɛkɛɛ: “Te fee tɛŋŋ ni agbami tso lɛ ŋala amrɔ nɔŋŋ lɛ?” 21  Yesu hã amɛ hetoo akɛ: “Lɛɛlɛŋ, miikɛɛ nyɛ akɛ: Kɛ́ nyɛyɛ hemɔkɛyeli ni nyɛyiŋ efeee nyɛ kɔshikɔshi lɛ, jeee nɔ ni mifee agbami tso nɛɛ kɛkɛ nyɛbaafee, shi moŋ, kɛ́ nyɛkɛɛ gɔŋ nɛɛ tete akɛ, ‘Fãa oyagbee ŋshɔ lɛŋ’ lɛ, ebaaba mli. 22  Ni nɔ fɛɛ nɔ ni nyɛbaasɔle nyɛbi lɛ, kɛ́ nyɛyɛ hemɔkɛyeli lɛ, nyɛnine baashɛ nɔ.” 23  Be ni ebote sɔlemɔwe lɛ, osɔfoi tsiifoi lɛ kɛ maŋ lɛŋ onukpai lɛ ba eŋɔɔ be ni etsɔɔ nii lɛ, ni amɛbakɛɛ: “Mɛɛ hegbɛ okɛfeɔ nibii nɛɛ? Ni namɔ hã bo nɛkɛ hegbɛ nɛɛ?” 24  Yesu here nɔ ekɛɛ amɛ akɛ: “Mi hu mabi nyɛ sane kome. Kɛ́ nyɛhã mi hetoo lɛ, mi hu makɛɛ nyɛ nɔ hegbɛ ni mikɛfeɔ nibii nɛɛ: 25  Nɛgbɛ hegbɛ ni Yohane kɛbaptisi lɛ jɛ? Ŋwɛi ejɛ aloo gbɔmɛi adɛŋ ejɛ?” Shi amɛbɔi niiahesusumɔ yɛ amɛteŋ amɛkɛɛ: “Kɛ́ wɔkɛɛ, ‘Ejɛ ŋwɛi’ lɛ, ebaakɛɛ wɔ akɛ, ‘Belɛ, mɛni hewɔ mɔ ni nyɛheee lɛ nyɛyeee lɛ?’ 26  Shi kɛ́ wɔkɛɛ, ‘Ejɛ gbɔmɛi adɛŋ’ lɛ, wɔmiishe nɔ ni asafoku lɛ baafee lɛ gbeyei, ejaakɛ amɛ fɛɛ amɛbuɔ Yohane akɛ gbalɔ.” 27  No hewɔ lɛ, amɛhã Yesu hetoo amɛkɛɛ: “Wɔleee.” Lɛ hu ekɛɛ amɛ akɛ: “Belɛ, mi hu mikɛɛɛ nyɛ nɔ hegbɛ ni mikɛfeɔ nibii nɛɛ. 28  “Te nyɛsusuɔ tɛŋŋ? Nuu ko yɛ bii enyɔ. Etee klɛŋklɛŋ mɔ lɛ ŋɔɔ, ni ekɛɛ akɛ, ‘Bi, ŋmɛnɛ lɛ, yaatsu nii yɛ wein ŋmɔ lɛ mli.’ 29  Mɔ nɛɛ hã hetoo ekɛɛ akɛ, ‘Miyaaa,’ shi sɛɛ mli lɛ, eshwa ehe ni etee. 30  Etee mɔ ni ji enyɔ lɛ ŋɔɔ, ni ekɛɛ lɛ nakai nɔŋŋ. Mɔ nɛɛ hã hetoo akɛ, ‘Ataa, maya,’ shi eyaaa. 31  Mɛi enyɔ nɛɛ ateŋ namɔ fee etsɛ lɛ suɔmɔnaa nii?” Amɛkɛɛ akɛ: “Klɛŋklɛŋ mɔ lɛ.” Yesu kɛɛ amɛ akɛ: “Lɛɛlɛŋ, miikɛɛ nyɛ akɛ, toohelɔi lɛ kɛ ashawoi lɛ miitsɔ nyɛhiɛ kɛmiiya Nyɔŋmɔ Maŋtsɛyeli lɛ mli. 32  Ejaakɛ Yohane ba nyɛŋɔɔ yɛ jalɛ gbɛ nɔ, shi nyɛheee lɛ nyɛyeee. Shi toohelɔi lɛ kɛ ashawoi lɛ he lɛ amɛye, ni nyɛ lɛ, be ni nyɛna enɛ po lɛ, nyɛshwaaa nyɛhe koni nyɛhe lɛ nyɛye. 33  “Nyɛboa nɔkwɛmɔnɔ* kroko toi: Nuu ko, shikpɔŋtsɛ ko, hi shi ni efee wein ŋmɔ ni efo afabaŋ ewo he kɛkpe, ni etsa weinŋaa bu yɛ mli, ni ema mɔɔ; kɛkɛ ni ekɛhã okwaafoi apaayeli, ni efã gbɛ. 34  Be ni shɛ yibiikpamɔ be lɛ, etsu enyɔji kɛtee okwaafoi lɛ aŋɔɔ koni amɛyaŋɔ eyibii lɛ amɛbahã lɛ. 35  Shi okwaafoi lɛ mɔmɔ enyɔji lɛ, ni amɛyi mɔ kome, amɛgbe mɔ kome, ni amɛtswia mɔ kome hu tɛi. 36  Esaa etsu nyɔji krokomɛi ni fa fe klɛŋklɛŋ bii lɛ, shi amɛfee mɛnɛɛmɛi hu nakai nɔŋŋ. 37  Naagbee lɛ, etsu ebinuu kɛtee amɛŋɔɔ ekɛɛ, ‘Amɛbaabu mibinuu lɛ.’ 38  Be ni okwaafoi lɛ na ebinuu lɛ, amɛkɛɛkɛɛ amɛhe akɛ, ‘Niyelɔ lɛ nɛ. Nyɛbaa, nyɛhãa wɔgbea lɛ koni wɔŋɔ egboshinii lɛ!’ 39  No hewɔ lɛ, amɛmɔ lɛ, ni amɛtsirɛ eyisɛɛ kɛje wein ŋmɔ lɛ mli, ni amɛgbe lɛ. 40  No hewɔ lɛ, kɛ́ wein ŋmɔtsɛ lɛ ba lɛ, mɛni ebaafee nakai okwaafoi lɛ?” 41  Amɛkɛɛ lɛ akɛ: “Akɛni amɛji gbɔmɛi fɔji hewɔ lɛ, ebaakpãtã amɛhiɛ butuu, ni ekɛ wein ŋmɔ lɛ baahã okwaafoi krokomɛi apaayeli, mɛi ni kɛ́ yibiiwoo be lɛ shɛ lɛ amɛkɛ yibii lɛ baahã lɛ.” 42  Yesu kɛɛ amɛ akɛ: “Ani nyɛkaneko yɛ Ŋmalɛi lɛ amli dã akɛ, ‘Tɛ lɛ ni tsũtswalɔi lɛ kpoo lɛ, no nɔŋŋ ebatsɔ koŋtɛ titri* lɛ. Yehowa* dɛŋ enɛ jɛ kɛba, ni eyɛ naakpɛɛ yɛ wɔhiŋmɛiiaŋ’? 43  Enɛ hewɔ mikɛɔ nyɛ akɛ, abaashɔ̃ Nyɔŋmɔ Maŋtsɛyeli lɛ yɛ nyɛdɛŋ ni akɛbaahã jeŋmaŋ ko ni woɔ eyibii lɛ. 44  Kɛfata he lɛ, mɔ fɛɛ mɔ ni gbeɔ tɛ nɛɛ nɔ lɛ, emli baatserɛ. Shi mɔ fɛɛ mɔ ni tɛ lɛ gbeɔ enɔ lɛ, ebaagbɛlɛ lɛ mɔnyɔmɔnyɔ.” 45  Be ni osɔfoi tsiifoi lɛ kɛ Farisifoi lɛ nu enɔkwɛmɔnii* lɛ, amɛkɔ sɛɛ akɛ amɛhe ewieɔ lɛ. 46  Eyɛ mli akɛ amɛmiitao amɛmɔ lɛ moŋ, shi amɛshe asafoku lɛ gbeyei ejaakɛ asafoku lɛ buɔ lɛ akɛ gbalɔ.

Shishigbɛ Niŋmaa

Hela mli lɛ, “Hosanna,” ni eshishi ji “ofainɛ, heremɔ yiwala.”
Kwɛmɔ Wiemɔi Titrii Amligbalamɔ lɛ.
Aloo “abɛbua.”
Sht. ŋm., “koŋ lɛ yitso.”
Kwɛmɔ Wiemɔi Titrii Amligbalamɔ lɛ.
Aloo “ebɛbuai.”