Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 20:1-34

20  “Ejaakɛ ŋwɛi Maŋtsɛyeli lɛ tamɔ shĩatsɛ ko ní je kpo leebi maŋkpa koni eyabɔ nitsulɔi apaa kɛya ewein ŋmɔ mli.  Be ni ekɛ nitsulɔi lɛ eye naa akɛ ebaahã amɛ denario kome* kɛhã gbi kome lɛ, ewo amɛ gbɛ kɛtee ewein ŋmɔ lɛ mli.  Be ni eje kpo aaafee ŋmɛlɛtswaa ni ji etɛ* lɛ hu nɔ lɛ, eyana mɛi krokomɛi damɔ jara lɛ nɔ ni amɛtsuuu nɔ ko;  ni ekɛɛ amɛ akɛ, ‘Nyɛ hu nyɛyaa wein ŋmɔ lɛ mli, ni nɔ ni sa lɛ mahã nyɛ.’  No hewɔ lɛ, amɛyiŋ amɛtee. Ni eje kpo ekoŋŋ aaafee ŋmɛlɛtswaa ni ji ekpaa* kɛ ŋmɛlɛtswaa ni ji nɛɛhu* lɛ nɔ, ni eyafee nakai nɔŋŋ.  Naagbee lɛ, aaafee ŋmɛlɛtswaa ni ji nyɔŋma kɛ ekome* lɛ nɔ lɛ, eje kpo ni eyana mɛi krokomɛi hu damɔ shi, ni ekɛɛ amɛ akɛ, ‘Mɛni hewɔ nyɛdamɔ biɛ gbi muu fɛɛ ni nyɛtsuuu nɔ ko lɛ?’  Amɛhere nɔ akɛ, ‘Ejaakɛ mɔ ko ebɔko wɔ apaa.’ Ekɛɛ amɛ akɛ, ‘Nyɛ hu nyɛyaa wein ŋmɔ lɛ mli.’  “Be ni shɛ gbɛkɛ lɛ, wein ŋmɔtsɛ lɛ kɛɛ enitsumɔ nɔkwɛlɔ lɛ akɛ, ‘Tsɛ nitsulɔi lɛ ni owo amɛ nyɔmɔ, jee shishi kɛjɛ sɛɛkpeebii lɛ anɔ kɛyashi klɛŋklɛŋ bii lɛ anɔ.’  Be ni mɛi ni abɔ amɛ apaa yɛ ŋmɛlɛtswaa ni ji nyɔŋma kɛ ekome lɛ nɔ lɛ ba lɛ, amɛteŋ mɔ fɛɛ mɔ ná denario kome. 10  No hewɔ lɛ, be ni klɛŋklɛŋ bii lɛ ba lɛ, amɛsusu akɛ amɛbaaná nɔ ni fa fe nakai, shi amɛ hu amɛná denario kome nyɔmɔwoo. 11  Be ni amɛnine shɛ nɔ lɛ, amɛbɔi tɔkemɔ kɛ shĩatsɛ lɛ woo 12  ni amɛkɛɛ, ‘Sɛɛkpeebii nɛɛ tsu nii ŋmɛlɛtswaa kome; kɛ̃lɛ okɛ amɛ eye tamɔ bɔ ni okɛ wɔ, ni wɔtsu nii dɛŋdɛŋ gbi muu fɛɛ ni hulu eshã wɔ lɛ, eye lɛ nɔŋŋ!’ 13  Shi ehere nɔ ekɛɛ amɛteŋ mɔ kome akɛ, ‘Naanyo, mifeko bo efɔŋ. Ani jeee denario kome okɛ mi ye naa? 14  Ŋɔɔ nɔ ni ji onɔ lɛ ni oya. Miisumɔ ni mahã sɛɛkpeebii nɛɛ bɔ ni mihã bo lɛ nɔŋŋ. 15  Ani mibɛ hegbɛ akɛ mikɛ mi diɛŋtsɛ minii feɔ nɔ ni misumɔɔ? Aloo ohiŋmɛi miiklɔ mɔ nɔ* yɛ ekpakpa* ni mifeɔ lɛ hewɔ?’ 16  Nakai nɔŋŋ sɛɛkpeebii lɛ baatsɔmɔ klɛŋklɛŋ bii, ni klɛŋklɛŋ bii lɛ baatsɔmɔ sɛɛkpeebii.” 17  Be ni amɛkwɔɔ kɛyaa Yerusalem lɛ, Yesu ŋɔ kaselɔi nyɔŋma kɛ enyɔ lɛ kɛtee afã, ni ekɛɛ amɛ yɛ gbɛ lɛ nɔ akɛ: 18  “Naa! Wɔmiikwɔ kɛmiiya Yerusalem, ni abaaŋɔ gbɔmɔ Bi lɛ awo osɔfoi tsiifoi lɛ kɛ woloŋmalɔi lɛ adɛŋ. Amɛbaabu lɛ gbele fɔ 19  ni amɛbaaŋɔ lɛ amɛhã jeŋmajiaŋbii lɛ koni amɛye ehe fɛo ni amɛkɛ kpelebii ayi lɛ ni amɛgbe lɛ yɛ tso jaŋŋ nɔ; ni yɛ gbi ni ji gbi etɛ lɛ nɔ lɛ, abaatee lɛ shi.” 20  Kɛkɛ ni Zebedeo bihii lɛ anyɛ kɛ ebihii lɛ ba eŋɔɔ bakoto lɛ koni ebi lɛ nɔ ko. 21  Ekɛɛ yoo lɛ akɛ: “Mɛni otaoɔ?” Yoo lɛ here lɛ nɔ akɛ: “Kɛɛmɔ koni mibihii enyɔ lɛ ateŋ mɔ kome ata oninejurɔ nɔ, ni mɔ kome hu ata obɛku nɔ, yɛ o-Maŋtsɛyeli lɛ mli.” 22  Yesu hã hetoo akɛ: “Nyɛleee nɔ ni nyɛbiɔ lɛ. Ani nyɛbaanyɛ nyɛnu kpulu ni miiba mibanu lɛ?” Amɛkɛɛ lɛ akɛ: “Wɔbaanyɛ.” 23  Ekɛɛ amɛ akɛ: “Anɔkwa, nyɛbaanu kpulu lɛ moŋ, shi mininejurɔ kɛ mibɛku nɔ taramɔ lɛ, jeee minɔŋ ni mikɛbaahã, shi moŋ mɛi ni mi-Tsɛ esaa eto amɛ lɛ anɔ ni.” 24  Be ni mɛi nyɔŋma ni eshwɛ lɛ nu he lɛ, amɛmli wo la amɛwo nyɛmimɛi enyɔ lɛ. 25  Shi Yesu tsɛ amɛ kɛba eŋɔɔ ni ekɛɛ amɛ akɛ: “Nyɛle akɛ jeŋmaji lɛ anɔyelɔi lɛ yeɔ amɛnɔ akɛ nuŋtsɔmɛi, ni gbɔmɛi agboi lɛ hu yɛ amɛnɔ hewalɛ. 26  Esaaa akɛ afeɔ nakai yɛ nyɛteŋ; moŋ lɛ, mɔ fɛɛ mɔ ni miisumɔ akɛ etsɔ agbo yɛ nyɛteŋ lɛ, esa akɛ etsɔ nyɛsɔɔlɔ, 27  ni mɔ fɛɛ mɔ ni miisumɔ akɛ etsɔ klɛŋklɛŋ mɔ yɛ nyɛteŋ lɛ, esa akɛ etsɔ nyɛnyɔŋ. 28  Tamɔ bɔ ni gbɔmɔ Bi lɛ baaa koni asɔmɔ lɛ, shi eba sɔɔmɔ moŋ, koni ebaŋɔ ewala* ehã akɛ kpɔmɔnɔ kɛkpɔ̃ mɛi babaoo lɛ.” 29  Be ni amɛshiɔ Yeriko lɛ, asafoku babaoo ko nyiɛ esɛɛ. 30  Ni naa! hii shwilafoi enyɔ ni tara gbɛ lɛ he lɛ nu akɛ Yesu miiho, ni amɛbolɔ amɛkɛɛ: “Nuŋtsɔ, David Bi, naa wɔ mɔbɔ!” 31  Shi asafoku lɛ kã amɛhiɛ akɛ amɛfee diŋŋ; kɛ̃lɛ amɛbolɔ waa fe tsutsu lɛ amɛkɛɛ: “Nuŋtsɔ, David Bi, naa wɔ mɔbɔ!” 32  No hewɔ lɛ, Yesu wa damɔ shi, etsɛ amɛ, ni ekɛɛ: “Mɛni nyɛtaoɔ ni mafee mahã nyɛ?” 33  Amɛkɛɛ lɛ akɛ: “Nuŋtsɔ, hã wɔhiŋmɛii agbele.” 34  Akɛni Yesu musuŋ tsɔ lɛ hewɔ lɛ, etara amɛhiŋmɛii lɛ ahe, ni amrɔ lɛ, amɛna nii, ni amɛnyiɛ esɛɛ.

Shishigbɛ Niŋmaa

Romabii ajwiɛtɛi shika ni tsiimɔ ji g 3.85, ni eji gbi kome nyɔmɔwoo.
Ni tsɔɔ akɛ, aaafee leebi ŋmɛlɛ 9 mli.
Ni tsɔɔ akɛ, aaafee shwane ŋmɛlɛ 12.
Ni tsɔɔ akɛ, aaafee shwane ŋmɛji 3.
Ni tsɔɔ akɛ, aaafee gbɛkɛ ŋmɛji 5.
Sht. ŋm., “ehiii; ji efɔŋ.”
Aloo “ejurɔ.”
Aloo “esusuma.”