Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 2:1-23

YITSEI LƐ AMLI SAJI

  • Ŋulamiiaŋkwɛlɔi yasara Yesu (1-12)

  • Foijee kɛmiiya Ejipt (13-15)

  • Herode gbe gbekɛbii hii (16-18)

  • Sɛɛkuu kɛmiiba Nazaret (19-23)

2  Afɔ Yesu yɛ Betlehem ni yɔɔ Yudea lɛ, yɛ Maŋtsɛ Herode* gbii lɛ amli, ni no sɛɛ lɛ, naa! ŋulamiiaŋkwɛlɔi* jɛ Boka ba Yerusalem  bakɛɛ akɛ: “Nɛgbɛ Yudafoi lɛ amaŋtsɛ ni afɔ lɛ lɛ yɔɔ? Ejaakɛ wɔna eŋulami be ni wɔyɔɔ Boka lɛ, ni wɔba koni wɔbakoto lɛ.”  Be ni Maŋtsɛ Herode nu enɛ lɛ, lɛ kɛ Yerusalem fɛɛ yoyoro.  Ni ebua maŋ lɛ osɔfoi tsiifoi lɛ kɛ woloŋmalɔi lɛ fɛɛ naa, ni ebi amɛ koni amɛtsɔɔ lɛ he ni abaafɔ Kristo lɛ* yɛ.  Amɛkɛɛ lɛ akɛ: “Yɛ Betlehem ni yɔɔ Yudea lɛ, ejaakɛ bɔ ni atsɔ gbalɔ lɛ nɔ aŋma nɛ:  ‘Ni bo, Oo Betlehem ni yɔɔ Yuda shikpɔŋ lɛ nɔ, ojeee maŋ ni he ehiaaa fe fɛɛ yɛ Yuda amralofoi lɛ ateŋ, ejaakɛ omli amralo ko, mɔ ni baakwɛ mimaŋ Israel nɔ tamɔ tookwɛlɔ feɔ lɛ baajɛ aba.’”  Kɛkɛ ni Herode tsɛ ŋulamiiaŋkwɛlɔi lɛ yɛ teemɔŋ, ni ebi amɛ fitsofitso koni amɛtsɔɔ lɛ be ni ŋulami lɛ pue.  Be ni etsuɔ amɛ kɛyaa Betlehem lɛ, ekɛɛ akɛ: “Nyɛyaa ni nyɛyataoa gbekɛ bibioo lɛ fitsofitso, ni kɛ́ nyɛna lɛ lɛ, nyɛbakɛa mi koni mi hu maya ni mayakoto lɛ.”  Be ni amɛnu maŋtsɛ lɛ wiemɔ lɛ, amɛyi mli amɛtee, ni naa! ŋulami lɛ ni amɛna be ni amɛyɔɔ Boka lɛ nyiɛ amɛhiɛ aahu kɛyashi eyadamɔ he ni gbekɛ bibioo lɛ yɔɔ lɛ yiteŋ. 10  Be ni amɛna ŋulami lɛ, amɛná miishɛɛ naakpa. 11  Ni be ni amɛbote shĩa lɛ mli lɛ, amɛyana gbekɛ bibioo lɛ kɛ enyɛ Maria, ni amɛkula shi ni amɛkɛ woo hã gbekɛ lɛ. Agbɛnɛ hu, amɛjie amɛjwetrii lɛ akpo, ni amɛkekee lɛ nii—shika tsuru kɛ ohɛ́ ni jeɔ ŋma kɛ mire. 12  Shi akɛni Nyɔŋmɔ bɔ amɛ kɔkɔ yɛ lamɔ mli akɛ amɛkaku amɛsɛɛ kɛtee Herode ŋɔɔ hewɔ lɛ, amɛtsɔ gbɛ kroko nɔ kɛtee amɛmaŋ. 13  Be ni amɛshi amɛtee sɛɛ lɛ, naa! Yehowa* bɔfo* jie ehe kpo etsɔɔ Yosef yɛ lamɔ mli ni ekɛɛ: “Tee shi, ŋɔɔ gbekɛ bibioo lɛ kɛ enyɛ ni ojo foi kɛya Ejipt, ni ohi jɛmɛ kɛyashi makɛɛ bo nɔ ko, ejaakɛ Herode miiba ebatao gbekɛ bibioo lɛ ni egbe lɛ.” 14  No hewɔ lɛ, Yosef te shi nyɔɔŋ ni eŋɔ gbekɛ bibioo lɛ kɛ gbekɛ lɛ nyɛ, ni etee Ejipt. 15  Ehi jɛmɛ kɛyashi Herode gbo. Enɛ hã nɔ ni Yehowa* tsɔ egbalɔ lɛ nɔ ewie lɛ ba mli akɛ: “Ejipt mitsɛ mibi lɛ kɛjɛ.” 16  Agbɛnɛ, be ni Herode na akɛ ŋulamiiaŋkwɛlɔi lɛ elaka lɛ lɛ, emli wo la waa, ni etsu kɛtee ni ehã agbe gbekɛbii hii fɛɛ ni yɔɔ Betlehem kɛ ehewɔ kpokpai lɛ fɛɛ nɔ ní amɛye afii enyɔ kɛ mɛi ni yeko nakai lɛ, yɛ be ni ebi ŋulamiiaŋkwɛlɔi lɛ fitsofitso ni amɛtsɔɔ lɛ lɛ naa. 17  Kɛkɛ ni nɔ ni atsɔ gbalɔ Yeremia nɔ awie lɛ ba mli akɛ: 18  “Anu gbee ko yɛ Rama, yaafo kɛ yarawoo babaoo. Rahel miifo ebii lɛ, ni ekpɛlɛɛɛ miishɛjemɔ ejaakɛ amɛbɛ dɔŋŋ.” 19  Be ni Herode gbo lɛ, naa! Yehowa* bɔfo* jie ehe kpo etsɔɔ Yosef yɛ lamɔ mli yɛ Ejipt 20  ni ekɛɛ: “Tee shi, ŋɔɔ gbekɛ bibioo lɛ kɛ enyɛ ni oya Israel shikpɔŋ lɛ nɔ, ejaakɛ mɛi ni taoɔ gbekɛ bibioo lɛ wala* lɛ egboi.” 21  No hewɔ lɛ, ete shi ni eŋɔ gbekɛ bibioo lɛ kɛ gbekɛ lɛ nyɛ, ni etee Israel shikpɔŋ lɛ nɔ. 22  Shi be ni enu akɛ Arkelao miiye Yudea nɔ yɛ etsɛ Herode sɛɛ lɛ, eshe gbeyei akɛ eeeya jɛmɛ. Kɛfata he lɛ, akɛni Nyɔŋmɔ bɔ lɛ kɔkɔ yɛ lamɔ mli hewɔ lɛ, edɔ eyi kɛtee Galilea niiaŋ. 23  Ni ebahi maŋ ko ni atsɛɔ lɛ Nazaret lɛ mli koni nɔ ni atsɔ gbalɔi lɛ anɔ awie lɛ aba mli akɛ: “Abaatsɛ lɛ Nazarenyo.”*

Shishigbɛ Niŋmaa

Kwɛmɔ Wiemɔi Titrii Amligbalamɔ lɛ.
Hela mli lɛ, “magoi.”
Aloo “Mesia lɛ; Mɔ ni Afɔ Lɛ Mu lɛ.”
Kwɛmɔ Wiemɔi Titrii Amligbalamɔ lɛ.
Aloo “ŋwɛibɔfo.”
Kwɛmɔ Wiemɔi Titrii Amligbalamɔ lɛ.
Kwɛmɔ Wiemɔi Titrii Amligbalamɔ lɛ.
Aloo “ŋwɛibɔfo.”
Aloo “susuma.”
Eeenyɛ efee akɛ aná kɛjɛ Hebri wiemɔ ni shishi ji “kwɛ̃” loo “tsɛ̃” lɛ mli.