Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ | ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 19:1-30

YITSEI LƐ AMLI SAJI

  • Gbalashihilɛ kɛ gbalatsemɔ (1-9)

  • Oshijayeli nɔkeenɔ (10-12)

  • Yesu jɔɔ gbekɛbii (13-15)

  • Oblanyo niiatsɛ ko sanebimɔ (16-24)

  • Afɔlei ni ashãa yɛ Maŋtsɛyeli lɛ hewɔ (25-30)

19  Be ni Yesu wie wiemɔi nɛɛ egbe naa lɛ, eshi Galilea, ni eba Yudea husui lɛ anaa yɛ Yordan sɛɛ.  Agbɛnɛ hu, asafoku babaoo nyiɛ esɛɛ, ni etsa amɛ yɛ jɛmɛ.  Ni Farisifoi ba eŋɔɔ kɛ yiŋtoo akɛ amɛbaka lɛ, ni amɛbi lɛ akɛ: “Ani mla ŋmɛɔ gbɛ ni nuu ashwie eŋa* yɛ sane fɛɛ sane hewɔ?”  Ehere nɔ ekɛɛ akɛ: “Ani nyɛkaneko akɛ mɔ ni bɔ amɛ yɛ shishijee lɛ, nuu kɛ yoo ebɔ amɛ  ni ekɛɛ akɛ: ‘Enɛ hewɔ lɛ, nuu baashi etsɛ kɛ enyɛ ni ebaakpɛtɛ eŋa he, ni amɛyi enyɔ lɛ fɛɛ amɛbaatsɔ heloo kome’?  Belɛ, amɛjeee mɛi enyɔ dɔŋŋ, shi moŋ heloo kome. No hewɔ lɛ, nɔ ni Nyɔŋmɔ eŋɔtsa lɛ,* gbɔmɔ ko akagbala mli.”  Amɛkɛɛ lɛ akɛ: “Belɛ, mɛni hewɔ mɔ ni Mose fã akɛ ahã yoo lɛ shwiemɔ wolo ni ashwie lɛ lɛ?”  Ekɛɛ amɛ akɛ: “Nyɛtsuiŋwalɛ lɛ hewɔ ni Mose hã nyɛ hegbɛ akɛ nyɛshwie nyɛŋamɛi lɛ, shi jeee nakai eji kɛjɛ shishijee.  Miikɛɛ nyɛ akɛ, mɔ fɛɛ mɔ ni shwieɔ eŋa, ni jeee bɔlɛnamɔ jeŋba sha* hewɔ jɛ, ní ekɛ mɔ kroko boteɔ gbalashihilɛ mli lɛ, efite gbãla.”* 10  Kaselɔi lɛ kɛɛ lɛ akɛ: “Kɛ́ nɛkɛ sane lɛ ji yɛ nuu kɛ eŋa teŋ lɛ, belɛ ehiii akɛ aboteɔ gbalashihilɛ mli mɔ.” 11  Ekɛɛ amɛ akɛ: “Jeee mɛi fɛɛ mɔɔ wiemɔ nɛɛ mli, ja mɛi ni yɔɔ nɔkeenɔ lɛ kɛkɛ. 12  Ejaakɛ osaii komɛi yɛ ni afɔ amɛ nakai, ni osaii komɛi yɛ ni gbɔmɛi sa amɛ, ni osaii komɛi hu yɛ ni amɛ diɛŋtsɛ amɛsa amɛhe yɛ ŋwɛi Maŋtsɛyeli lɛ hewɔ. Mɔ ni baanyɛ mli amɔ lɛ, hã emɔ mli.” 13  Kɛkɛ ni akɛ gbekɛbii bibii ba eŋɔɔ koni ekɛ eniji ashwie amɛnɔ ní esɔle ehã amɛ, shi kaselɔi lɛ kã amɛhiɛ. 14  Shi Yesu kɛɛ akɛ: “Nyɛŋmɛa gbekɛbii bibii lɛ ahe, ni nyɛkatsĩa amɛ gbɛ akɛ amɛkaba miŋɔɔ, ejaakɛ mɛi ni tamɔ nɛkɛ lɛ anɔ ji ŋwɛi Maŋtsɛyeli lɛ.” 15  Ni ekɛ eniji shwie amɛnɔ, ni eshi jɛmɛ. 16  Agbɛnɛ naa! mɔ ko ba eŋɔɔ ebakɛɛ akɛ: “Tsɔɔlɔ, mɛɛ nɔ kpakpa esa akɛ mafee koni maná naanɔ wala?” 17  Ekɛɛ lɛ akɛ: “Mɛni hewɔ obiɔ mi nɔ kpakpa he sane? Mɔ kome yɔɔ ni ji mɔ kpakpa. Shi kɛ́ ootao obote wala mli lɛ, ye kitãi lɛ anɔ daa.” 18  Ekɛɛ lɛ akɛ: “Te amɛmli nɔ ni ji lɛ?” Yesu kɛɛ: “Esaaa akɛ ogbeɔ gbɔmɔ, esaaa akɛ ofiteɔ gbãla,* esaaa akɛ ojuɔ, esaaa akɛ oyeɔ amale odase, 19  wo otsɛ kɛ onyɛ, ni esa akɛ osumɔ onaanyo gbɔmɔ tamɔ bo diɛŋtsɛ ohe.” 20  Oblanyo lɛ kɛɛ lɛ akɛ: “Miyeɔ enɛɛmɛi fɛɛ nɔ; mɛni shwɛɔ mi lolo?” 21  Yesu kɛɛ lɛ akɛ: “Kɛ́ ootao oye emuu* lɛ, yaahɔ̃ɔ onibii ni okɛhã ohiafoi, ni obaaná jwetri yɛ ŋwɛi; ni oba obatsɔ misɛɛnyiɛlɔ.” 22  Be ni oblanyo lɛ nu wiemɔ nɛɛ, ewerɛ ho ehe ni eyiŋ etee, ejaakɛ eyɛ nii pii. 23  Kɛkɛ ni Yesu kɛɛ ekaselɔi lɛ akɛ: “Lɛɛlɛŋ, miikɛɛ nyɛ akɛ, ebaawa kɛhã niiatsɛ akɛ eeebote ŋwɛi Maŋtsɛyeli lɛ mli. 24  Shi kome ekoŋŋ lɛ, miikɛɛ nyɛ akɛ, ewaaa hãaa yoma akɛ eeetsɔ abui hiŋmɛi mli fe nɔ ni niiatsɛ aaabote Nyɔŋmɔ Maŋtsɛyeli lɛ mli.” 25  Be ni kaselɔi lɛ nu enɛ lɛ, amɛhe jɔ̃ amɛhe naakpa amɛkɛɛ: “Namɔ kwraa yiwala abaanyɛ ahere mɔ?” 26  Yesu kwɛ amɛ gãa ni ekɛɛ amɛ akɛ: “Gbɔmɛi agbɛfaŋ lɛ anyɛŋ enɛ afee, shi Nyɔŋmɔ nyɛɔ nii fɛɛ efeɔ.” 27  Kɛkɛ ni Petro here nɔ ekɛɛ: “Naa! Wɔshi nibii fɛɛ ni wɔbanyiɛ osɛɛ; belɛ mɛni wɔbaaná?” 28  Yesu kɛɛ amɛ akɛ: “Lɛɛlɛŋ, miikɛɛ nyɛ akɛ, be ni abaafee nibii ehee lɛ, be mli ni gbɔmɔ Bi lɛ ta enunyam maŋtsɛ sɛi lɛ nɔ lɛ, nyɛ mɛi ni nyɛnyiɛ misɛɛ nɛɛ, nyɛ hu nyɛbaatara maŋtsɛ sɛii nyɔŋma kɛ enyɔ nɔ, ni nyɛkojo Israel wekui nyɔŋma kɛ enyɔ lɛ. 29  Ni mɔ fɛɛ mɔ ni eshi shĩai loo nyɛmimɛi hii loo nyɛmimɛi yei loo tsɛ loo nyɛ loo bii loo ŋmɔji yɛ migbɛ́i lɛ hewɔ lɛ, abaato lɛ najiaŋ toi oha, ni ebaaná naanɔ wala. 30  “Shi klɛŋklɛŋ bii babaoo baatsɔmɔ sɛɛkpeebii, ni sɛɛkpeebii baatsɔmɔ klɛŋklɛŋ bii.

Shishigbɛ Niŋmaa

Hela wiemɔ ni akɛtsu nii lɛ tsɔɔ gbalatsemɔ yɛ mla naa.
Sht. ŋm., “efi ekpɛtɛ kɔɔŋtso kome lɛ.”
Hela mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Kwɛmɔ Mat 5:27 sh. niŋ.
Kwɛmɔ Mat 5:27 sh. niŋ.
Aloo “ohi kɛwula shi.”