Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Kanemɔ Biblia Iɛ yɛ Biɛ

ŊMALƐ KRƆŊKRƆŊ LƐ—JEŊ HEE SHISHITSƆƆMƆ

Mateo 17:1-27

YITSEI LƐ AMLI SAJI

  • Yesu tsakemɔ lɛ (1-13)

  • Hemɔkɛyeli ni tamɔ sinapi wu (14-21)

  • Agba Yesu gbele lɛ afɔ̃ shi ekoŋŋ (22, 23)

  • Akɛ kapɛlɛ ní aná yɛ loo daaŋ lɛ wo too (24-27)

17  Gbii ekpaa sɛɛ lɛ, Yesu ŋɔ Petro kɛ Yakobo kɛ enyɛmi Yohane efata ehe ni ekɛ amɛ tee gɔŋ ni kwɔ ko nɔ, ekɛ amɛ pɛ.  Ni etsake yɛ amɛhiɛ; ehiɛ kpɛ tamɔ hulu, ni etadei anɔhaanɔi lɛ yɛ tamɔ la.  Ni naa! amɛna Mose kɛ Elia ní amɛkɛ Yesu miigba sane.  Kɛkɛ ni Petro kɛɛ Yesu akɛ: “Nuŋtsɔ, ehi hã wɔ akɛ wɔyɛ biɛ. Kɛ́ oosumɔ lɛ, mashĩ bui etɛ yɛ biɛ, onɔ ekome, Mose nɔ ekome, kɛ Elia nɔ ekome.”  Be ni ekã he ewieɔ lɛ, naa! atatu halaŋŋ ko baha amɛnɔ, ni naa! gbee ko jɛ atatu lɛ mli kɛɛ: “Mɔ nɛ ji mi-Bi ni misumɔɔ lɛ lɛ, mɔ ni mikpɛlɛ enɔ lɛ. Nyɛboa lɛ toi.”  Be ni kaselɔi lɛ nu enɛ lɛ, amɛkɛ amɛhiɛ bumɔ shi ni amɛshe gbeyei naakpa.  Kɛkɛ ni Yesu tsi ebɛŋkɛ amɛ ni etara amɛhe ekɛɛ: “Nyɛtea shi. Nyɛkashea gbeyei.”  Be ni amɛhole amɛhiɛ nɔ lɛ, amɛnaaa mɔ ko akɛ ja Yesu kome pɛ.  Be ni amɛmiikpeleke gɔŋ lɛ, Yesu fã amɛ ekɛɛ: “Nyɛkagbaa mɔ ko mɔ ko ninaa lɛ kɛyashi abaatee gbɔmɔ Bi lɛ shi kɛjɛ gbohii ateŋ.” 10  Shi kaselɔi lɛ bi lɛ akɛ: “Belɛ, mɛni hewɔ woloŋmalɔi lɛ kɛɔ akɛ ja Elia eba dã lɛ?” 11  Ni ehere nɔ ekɛɛ akɛ: “Elia miiba lɛɛlɛŋ, ni ebaasaa nibii fɛɛ. 12  Shi miikɛɛ nyɛ akɛ, Elia eba momo, ni amɛyooo lɛ shi moŋ amɛfee lɛ nɔ fɛɛ nɔ ni amɛsumɔɔ. Nakai nɔŋŋ hu gbɔmɔ Bi lɛ baana nɔ yɛ amɛdɛŋ.” 13  Kɛkɛ ni kaselɔi lɛ kɔ sɛɛ akɛ Yohane Baptisilɔ lɛ he ekɛ amɛ wie lɛ. 14  Be ni amɛshɛ asafoku lɛ masɛi lɛ, nuu ko ba eŋɔɔ bakula shi yɛ ehiɛ, ni ekɛɛ: 15  “Nuŋtsɔ, naa mibinuu lɛ mɔbɔ, ejaakɛ eeye gbiligbili ni ehe miiye. Efɔɔ la mli gbeemɔ, ni efɔɔ nu hu mli gbeemɔ. 16  Mikɛ lɛ bahã okaselɔi lɛ, shi amɛnyɛɛɛ lɛ amɛtsa.” 17  Ni Yesu here nɔ akɛ: “Oo yinɔbii ni bɛ hemɔkɛyeli ni bɛ amɛŋɛlɛ nɔ, be enyiɛ kwraa mikɛ nyɛ baahi shi kɛyashi? Be enyiɛ kwraa maná nyɛhe tsui kɛyashi? Nyɛkɛ lɛ abaa miŋɔɔ yɛ biɛ.” 18  Kɛkɛ ni Yesu kã daimonio lɛ hiɛ, ni eje emli, ni gbekɛ nuu lɛ he wa lɛ yɛ nakai ŋmɛlɛtswaa lɛ nɔ nɔŋŋ. 19  Kɛkɛ ni kaselɔi lɛ ba Yesu ŋɔɔ yɛ teemɔŋ ni amɛkɛɛ akɛ: “Mɛni hewɔ wɔnyɛɛɛ daimonio lɛ wɔfã lɛ?” 20  Ekɛɛ amɛ akɛ: “Nyɛhemɔkɛyeli ni faaa lɛ hewɔŋ. Ejaakɛ lɛɛlɛŋ, miikɛɛ nyɛ akɛ, kɛ́ nyɛyɛ hemɔkɛyeli ni dalɛ tamɔ sinapi wu lɛ, nyɛbaakɛɛ gɔŋ nɛɛ akɛ, ‘Fãa kɛjɛ biɛ kɛya jɛmɛ,’ ni ebaafã, ni nɔ ko nɔ ko bɛ ni nyɛnyɛŋ nyɛfee.” 21  —— 22  Be mli ni amɛbua amɛhe naa yɛ Galilea lɛ ni Yesu kɛɛ amɛ akɛ: “Abaajie gbɔmɔ Bi lɛ awo gbɔmɛi adɛŋ, 23  ni amɛbaagbe lɛ, ni yɛ gbi ni ji gbi etɛ lɛ nɔ lɛ, abaatee lɛ shi.” Ni amɛwerɛ ho amɛhe waa. 24  Be ni amɛshɛ Kapernaum lɛ, hii ni heɔ drakmai enyɔ* too lɛ ba Petro ŋɔɔ amɛbabi lɛ akɛ: “Ani nyɛtsɔɔlɔ lɛ wooo drakmai enyɔ too lɛ?” 25  Ekɛɛ akɛ: “Ewoɔ.” Shi be ni ebote shĩa lɛ, Yesu klɛŋklɛŋ kɛ lɛ wie ekɛɛ: “Te osusuɔ tɛŋŋ, Simon? Namɛi adɛŋ shikpɔŋ lɛ nɔ maŋtsɛmɛi lɛ heɔ too loo yi too kɛjɛɔ? Yɛ amɛ diɛŋtsɛ amɛbii lɛ adɛŋ loo mɛikpɔji adɛŋ?” 26  Be ni ekɛɛ akɛ: “Yɛ mɛikpɔji lɛ adɛŋ” lɛ, Yesu kɛɛ lɛ akɛ: “Belɛ, yɛ anɔkwale mli lɛ, esaaa akɛ bii lɛ woɔ too. 27  Shi bɔ ni afee ni wɔkatɔ̃tɔ amɛnane lɛ, yaa ŋshɔ lɛ naa oyafɔ̃ kpoŋ, ni loo klɛŋklɛŋ ni baabakɔ kpoŋ lɛ, shá lɛ, ni kɛ́ ogbɛ edaaŋ lɛ, obaana jwiɛtɛi shika.* Ŋɔɔ ni okɛhã amɛ kɛhã mi kɛ bo fɛɛ.”

Shishigbɛ Niŋmaa

Sht. ŋm., “drakma nta.”
Sht. ŋm., “stata kapɛlɛ,” asusuɔ akɛ enaa shiɔ drakmai ejwɛ.